haytham69

السلام عليكم،
مدونة يعني تقدر تقول اللي في نفسك..فأعتبروا كلامي هذا فضفضة...

أفتكر و انا صغير ايام رمضان و الزينة في الشوارع و سباق الجميع في تزيين الشوارع و البيوت و المناطق السكنية. و بالرغم من أني كنت أسكن في منطقة المهندسين يعني مكانتش شعبية اوي الا اني كنت أسمع المسحراتي في الشارع يدق طبلته و يقول رسالته و كنا نفطر على الخشاف و نصلي المغرب بعدين نفطر من مالذ و طاب من عمايل أمي الله يرحمها.
وأمي كانت طاهية ممتازة. الحلويات اللي كانت تعملها بقى من كنافة و قطايف و قمر الدين.........لو الزمن يرجع...
وكنا نلعب بالليل بحاجة اسمها شمس و قمر..حد يعرفها؟ هي زيي الصواريخ بس مش بنفس الخطورة..و افتكر كان فيه حاجة لو مسحنا عليها بحجر كانت تنفجر...مش فاكر اسمها..العتب على السن بقى. J

و فاكر كمان يوم صلاة العيد و قبلها الدبح مع اني لو شفت الدبح مستحيل اكل من اللي اندبح ان شاء الله تكون فرخة..
فرحة الناس و فرحتنا كأطفال بالعيد و ملابس العيد و العيدية و فانوس رمضان....كل ده راح و أختفى بحكم الغربة و البعد عن الأهل و الأصدقاء و ايضا البحث عن الاستقرار المادي و الوظيفي.
أصبح الناس جامدين في مشاعرهم. لابد أن الرجل يبان شرس في هذا الزمن و دائما يكون في موضع الهجوم.
فين براءة زمان؟ فين مشاعر زمان؟ كل الناس نسيت انهم كانوا أطفال في يوم من الأيام...
أصبحنا كلنا نعيش بأكثر من وجه حتى نستطيع ان نتكيف مع حياتنا.
الله يرحمك يأيام زمان.....