ـعمي .. ممكن أعض ايد بنتك ! ...

[RSS]

<div>

http://www.vb.6ocity.net/images/imgcache/2011/10/592.jpg

عمي .. ممكن أعض ايد بنتك !
____________

يقول الأستاذ روبرت فروست – وانا قلت استاذ لأني بصراحه
معرفش هو أساسا دكتور ولا مهندس ولا خريج معهد سنتين ولا
ايه بالظبط :

"تنفق الأم عشرين عاما لتجعل من ابنها رجلاً ، ثم تأتي امرأة
أخرى وتجعل منه أحمقا في عشرين دقيقة "

والأخ فروست عنده حق .. مكدبش الصراحة .. ده فيه ما تجعله
أحمق و همه لسه بيلبسوا الدبل .. ويمكن قبل كده كمان ..
بيبقى فعلاً احمق .. او ابتدى يحمق شويه عن الأول ولونه يروح
.. ولما قلت المقوله دي لزوجتي العزيزة اعترضت ..
قالت لي طب هاتلي كده ساعة رولكس بفصوص كريستال ومعاها
ستوب ووتش وهنشوف هتبقى احمق بعد عشرين دقيقة فعلا
ولا لأ !! .. فروست ده كداب ومعقد نفسياً ..

ده كان رأيها ..

و لو كنت مع الأخ فروست لاقترحت عليه اضافة بطعم المايونيز لحكمته الذهبية ..
فاذا كانت المرأة هتحول الرجل لأحمق في عشرين دقيقة ..
فأبو المرأة وأمها – الحموين - ممكن يجننوه ويقطعوا خلفه في لمح البصر ..
واللي خلاني ااقول كده انه اتصل بيا احد الاصدقاء وهو منهار تماماً بعد ما اترفض
في الجوازة الاخرانية .. قبل كده كان بيترفض عشان مناخيره شكلها مش عاطفي
وانه بيجيب شعره على جنب .. لكن المرة دي الرفض كان خارج عن ارادته ..
كان سببه الشبكة .. الاب طالب 50 ألف جنيه .. و بيقول ان بنته
مدلعه واصلي وبالورق بتاعها ..
الولد قاله كتير .. ابوها قاله خلاص يا ابني ولا تزعل نفسك ..
خد اختها الصغيرة .. بـ 25 الف بس .. بس من غير ورقها ..

صاحبي حس بقلق وانه داخل بيت غلط وان ده مش اب بيجوز بناته .. لأ ..
ده واحد بيفاصل على كبوت عربية ..
قام الصديق واخد الازازتين زبادو الخوخ اللي كان جايبهم معاه
هدية ومشي بعد ما شتمهم شتايم ابيحه جداً يعف مقالي العظيم عن ذكرها ..

ومش دي اول جوازة لصديق تتفشكل بسبب الشبكة ..
جوازات تانيه كتير اتفشكلت بسبب موضوع الشبكة وموضوع
الشباب اللي بتجيب شعرها على جنب ..

وانا مش عارف ليه الدنيا كلكعت في الجواز كده ؟!..
زمان كانت الشبكة هي هدية العريس للعروسة وكانت بسيطة لأن
معناها أكبر و هو : " بحبك يا قلبي " ..
انما دلوقتي الشبكة بقت كبيرة قوي وغالية فبقى معناها " آه يا قلبي" ..
و حديثاً جداً بقى العريس بيقدم الشبكة لعروسته وعينيه بتقول :
" بحبك يا قلبي ..بس لما اتزنق في يوم و اعوز قلبي ده يا ريت
تديهوني بدل ما اعلم عليكي وعلى ابوكي .. قشطة ؟"..

واللي بيحصل فعلاً - ان الزوج بعد يوم واحد من الجواز - بيتزنق في الفلوس ..
زمان كانت الزوجة عظيمة ومتعاونة .. كانت من غير ولا كلمه تقوم فاتحه
الدولاب جايبه الدهب وقالعه الغوايش والكردان والحلقان والحركات وحاطاهم
في حِجر الزوج وهي في تمام الرضا والسعادة .. انما دلوقتي موضوع تضحية الزوجة
بشبكتها انعدم تماماً .. فيه اسباب بتقول لأن الدولاب اللي الزوجة بتجيب منه الشبكه
معادش موجود أساساً .. وفيه ناس بتقول ان الحِجر – بتاع الزوج – اللي بتترمي فيه
الشبكه هو اللي مش موجود .. الزوج بتاع الايام دي معندوش حجر ..
لانك بتلاقي بطنه لازقه في فخده عدل لانه صحته باظت ومبقاش
يلعب رياضة من كتر الاكتئاب .. و لو اتوجد الدولاب والحجر فالزوج في هذا الزمن
ميقدرش يقرب من شبكة مراته اللي بتبقى حاطاها في اكياس بلاستيك بدل الدولاب –
مش صدفة طبعاً لكن عشان تفكره باللي ممكن يتعمل فيه لو قرب منها .
عشان كده الزوج دلوقتي بقى ياخدها من قاصرها ويقوم بايع كليته
..او حته من كبده وشوية قوانص ..
واحتمال يبيع اعضائه التناسليه لان ملهمش لزمه بعد ما قطع الخلف من يوم ما اتجوز..

فانا رأيي الشخصي ان احنا نستغل الثورة اللي فيها البلد ونساعد الشباب تتجوز بتغيير
مفهوم الشبكة ده .. مهو يا نوفر الشبكة .. يا نلغي الجواز ..
يا نعمل لنفسنا سندوتشات حلاوة بالقشطة .. ولو الناس معترضة عالإلغاء ممكن
نستبدل الشبكة بحاجه تانيه مفيدة .. فيها ايه لما العريس يخش على اهل العروسة
بلاب توب معاه شنطة هدية .. او فلاش ميموري 2 جيجا ..
او طقم حلل من قناة الناس .. او حتى جركن مانجه مشبر من فرغلي ؟!! ..
او يجيبلها سيلف ديفنس أو الكتريك شوك عشان القلق اللي البلد فيه ..
ولو البت بيئه وبتشم حاجات مش كويسه ممكن يجيبلها مطواه قرن
غزال او سيفين وكزلك ..

والله يا جماعه اقتراح عظيم جداً .. بس احنا نفكر فيه ..
الغوا الشبكة خالص .. ويمكن قدام نلغي دبلتين الخطوبة اللي
ملهمش اي تلاتين لزمه دول ..
و نستبدلهم بحظاظات جلد على شكل قلب من البوتيكات اللي بتبقى واقفه فيها عيال
بتسقط بنطلوناتها وبتحط جل في شعرها اللي اكيد مبتجيبوش على جنب ..

شكراً مستر فروست ...



بقلم : خالد بيومى فهمى
من الادب الساخر













منقول