ـهل خلق الفيس بوك ليفقع مرارتنا .. ام خلقت مرارتنا لفقع مرارة الفيس بوك ^_^ ...

[RSS]

<div>
تعتبر الاستايتس من أهم مميزات الفيس بوك .. ولأن الواحد بقاله حوالي 3 سنين و أكتر ع الفيس فـ بيقرأ مجموعة ستايتس كتيرة جداً من ناس كتيرة جداً ..
وبحكم خبرتي الضئيلة قدرت أقسم الستايتس اللي بيكتبها البعض إلى عدة أنواع :

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘

• ستايتس من نوع : "هسيبكم على ناركم " .. :D

ودي ستايتس تحس إن صاحبها عايز ياكل قلم على قفاه عشان يتعدل فعلاً !
الاستايتس دي ميزتها إنها لغز .. متفهمش صاحبها عايز يقول إيه ولا قصده إيه !!
يعني مثلاً .. كام واحد فينا لقى ستايتس لواحد من الفريندز كاتب:

"بجد حاجه تنرفز.. بس أنا أخدت قراري :@ " ..

طيب ايه اللي نرفزك وايه القرار ؟؟ ماتعرفش ..
وتلاقي على الستايتس اللي زي دي سبعين كومنت من الفريندز .. تلاتين كومنت منهم علامات استفهام.. وتلاتين علامات تعجب.. والباقي بيحاول بقدر الإمكان يستفز الشخص يمكن يقول حاجة !
وممكن تلاقي في الوسط كومنت من فريند لطيف وظريف شكله عارف الموضوع بيقول..
" مش مشكلة .. شوف غيرها يا فوزي ولما تلاقيها كلمني وانا هضبط الباقي !" ..
طب يشوف إيه ويضبط ايه ؟؟
ما تفهموووونا ياجدعان .. :D
ولكن فـ الآخر تلاقي صاحب الستايتس كاتب بعد 100 كومنت اتبعتوله "بردو ماقدرش أقول حاجة غير حسبي الله ونعم الوكيل " .. وتتكرر حدوته الكومنتات تاني .. انت بتقول حسبي الله على ايه ؟؟
فيه ايه؟؟
و فـ الآخر خاااالص بتلاقي إن صاحبنا كاتب " يا جماعة ماتخدوش فـ بالكم .. ده موضوع شخصي :D " .. طب مادام هو شخصي ..
فالقناع الفيس بوك لييييييييييييييييه :@:@ !!
حاجه مستفزة ..

تحليل شخصية صاحب هذا النوع من الاستايتس :
" حمار " ♦

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘

• ستايتس من نوع " أنا فـ الحمام دلوقتي " :D ..

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘


زي ما فيه ناس كانت بتعتقد إن الأرض مركز الكون .. فيه برضه صنف من الفريندز بيعتقد إن هوة نفسه مركز الفيس بوك ومنه بيتفرع كل الفريندز حول العالم !! :D
ستايتس (انا ف الحمام دلوقتي) صاحبها بيتوهّم وبيتخيل إن الناس بتصحى الصبح .. بتغسل وشها .. تضرب النسكافيه ..
ثم تبدأ رحلتها في الدخول على بروفايله الشخصي ..
هو بيتهيأله كدة ! وبيتخيل إن الناس دي بتشوفه .. يا ترى عامل إيه ؟؟ وأحواله إيه ؟؟ وكاتب إيه ؟؟ و أكل إيه ؟؟ وشرب إيه ؟؟ وعمل آد لمين ؟؟ وعمل كومنت فين ؟؟!
ولذلك بتلاقي صاحبنا ده بيتحف الناس بكل ما هو جديد في حياته .. هتلاقي دايما الستايتس بتاعته بتتجدد سبعتاشر مرة في اليوم وهتلاقيها زي :

- " النهاردة كان يوم جميل .. انا اتبسطت قوي مع أصحابي .. احب اشكر سُها وتُها وبُها ع الوقت اللطيف ده " :D

- " بجد زهقان آخر ترامنتاشر حاجة " :D

- " أبويا طلق أمي وقتل حمايا " :D:D

- " أنا شيلت مادة .. حسبي الله ونعم الوكيل " :D

- " تواليت الحمام لسة ماتصلحش .. بس أكيد فيه حل للزنقة دي " :D

- " أنا نازل بكرة الكلية .. وهقابل شاهيناز والدكتورة حلاوتهم هناك " :D

ازاي تميز صاحب هذا النوع من الاستايتس :

صاحب الاستايتس دي هتلاقيه :

1- لاجيء ع الفيس بوك .. صبح وليل وظهر وعصر ومبيقومش خالص .. كل ما تدخل تلاقيه ع الشات غالباً .. وف الوقت اللي أنت مش قادر فيه تلاحق على تلاتة أو أربعة ف الشات هتلاقيه هو بيكلم سبعين واحد أون لاين في نفس اللحظة وبنفس الكفاءة !!

2- عنده 200 ألبوم مليانين صور .. صور في كل حتة وبيغطوا أنشطته اليومية ..
ألبوم صور مع العائلة .. وألبوم مع الفريندز .. وألبوم مع الفريند الغاليين قوي .. وألبوم الرحلات .. وألبوم الرحلات الكوول .. وألبوم الخروجات المية مية .. وألبوم أحلى صحاب .. وألبوم رحلة شرم الشيخ .. وألبوم رحلة العين السخنة .. وألبوم صور فرح الأقارب .. وألبوم صور صابع رجله الصغير لما اتعور .. وألبوم صور البدلة الجديدة او التسريحة الجديدة .. ده غير 5672890812765 صورة بروفايل بكتشر كلها شبه بعضها وبنفس الوضعية بيبدلها سبع مرات في البروفايل كل يوم وغالباً مقفولين وماحدش يقدر يوصل للصورة غيره ..
وهتلاقي صور البروفايل بتاعته غالباً هي شرح للستايتس ..
يعني هتلاقي صورة ف الجامعة .. صورة تانية وهوة بياكل ف الجامعة .. .. صورة وهوة جوة البيت ..صورة وهوة بيفكر .. صور وهوة أحول .. صورة وهوة مكشر .. صورة وهوة بيضحك قوي وفاتح بقه .. صورة وهوة بيذاكر .. صورة وهوة نايم ف البيت .. صورة وهوة بيتليّف ف البانيو .. صورة وهوة لافف البشكير ..صورة وهوة قاعد ع التواليت .. وهكذا ..


3 - هتلاقي دايماً عنده ألبوم اسمه :

just me

4 - هتلاقيه دايماً يتحفنا هوة بيحب ايه وبيكره ايه وبياكل ايه وبيخرج امتى وبييجي البيت امتى وهكذا .. :D

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘


• ستايتس ( الكآبة ) ..

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘

كل واحد فينا هيلاقي تلاتة او أربعة من الفريندز عنده قمة ف الاكتئاب الأزلي .. مابيكتبوش حاجة غير القرف والنكد والاحباط ..

هتلاقي دايماً الستايتس بتاعتهم زي :

" زهقت من كل حاجة .. الحياة بقت مقرفة .. أنا همشي ومش هتشوفوني تاني :( "

" أنا محبط .. زعلان .. متدايق "

" مافيش حاجة نافعة .. هولع ف روحي "

" خلاص خسرت كل حاجة ولسة هخسر "

صاحب هذا النوع من الاستايتس بيتعامل مع الفيس بوك على أنه مكان بيخرج فيه اللي جواه .. يدخل الحمام يرجّع النكد اللي جواه ويطلع يمارس حياته الطبيعية !!
ومش فاهمة ليه !!

♦ازاي تميز صاحب هذا النوع من الاستايتس ؟؟

- على طول هتلاقيه حاطط صورة بروفايل دموية أو كئيبة جداً ..
زي صورة اتنين وقت الغروب بيحضنوا بعض الحضن الأخير والدم مطرطش من جنابهم ومغرق الدنيا وهمه مكملين حضن عادي (ازاي ؟!؟ مش قادرة أعرف) ..
ممكن تلاقيه حاطط صورة شاب أمور /بنت أمورة ... ماعندهمش أي مشاكل ف الحياة غير ان فيه خنجر راااااشق في قلبهم وفيه دم نازل ع الأرض على شكل قلب كبير (بردو مش فاهمة ازااااي :D ) .. ممكن تلاقيه حاطط صورة واحد وواحدة لابسين أشيك حاجة ف الدنيا وحاضنين بعض و جنبهم عصير فرجلو و أكل ديلفري ومستنيين قطر من بعييييد جاي يموتهم سوا .. :D:D:D

- غالباً بيقفل الأكاونت بتاعه لمدة طويييييلة أو يغيب لمدة طوييييييييييييلة ويرجع يحدف كلمتين يكرهوك ف عيشتك ويسوّدوا الدنيا ف عنيك ويمشي ! :D

- دايماً هتلاقيه عدواني وبيحب يتفلسف كتير .. :D

- مابيحبش نفسه ولا بيحب حد ومابيحبش الخير لنفسه ولا لغيره ! :D

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘



• ستايتس " إذا أحببت شيئاً بشدة فاتركه .. فإن عاد إليك فهو بالتأكيد سيكون بنطلونك "..
◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘

أقصد "إذا أحببت شيئاً بشدة فاتركه .. فإن عاد إليك فهو ملكك للأبد "..

فيه إشاعه بتقول إنك لو ماكتبتش الستايتس دي مرة أو مرتين ف حياتك ع الفيس بوك ممكن تفقد الأكاونت بتاعك للأبد وعمره ما هيرجعلك تاني !!!!!!!!!!!!

بس فعلاً مش عارفة ايه سر حب الناس الشديد ليها ؟؟! كتير قوي بيكتبوها ..
هتلاقي تسعين في المية من الفريندز عندك اجى عليهم وقت كانوا كاتبين الاستايتس دي .. و مش عارفة ليه دي بالذاااات دوناً عن حكم و أمثال الدنيا كلها !!
وايه اللي الناس عمالة تفقده ومابيرجعش ولو رجع هتملكه للأبد ؟؟!
إيه سر حب الناس الغريب للاستايتس دي ؟؟!

بتتكتب كتييييير .. وليها سبعتاشر جروب .. و700 بيج .. و100 أكاونت .. طب ليه ؟!!

تحليل شخصية صاحب هذا النوع من الاستايتس :

والله فعلاً مش عارفة .. :D
أكيد أنا كائن فضائي عشان بقول إنها جملة مستفزة .. :D

◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘



• آخر نوع بقى .. ستايتس من نوع " هعقدك فـ عيشتك ياحيوااااان " .. :D
◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘◘

هتلاقي عندك غالباً فريند محترف انه يكتب ستايتس بالانجليزي .. ومكلكعة جداً ماتفهمش منها حرف !
يا إما كاتب الاستايتس خليط من الفرانكو والكلمات الانجليزي ف النص !!
المشكلة إن بيبقى فيها كلام مجعلص .. :D
والمشكلة الأكبر انك بتقدر تترجم كل كلمة لوحدها لكن لما تربط الكلام مع بعضه تلاقيه مش راكب !!
بس اللي يطمنك إن فيه ناس قليلة عاملين عليها لايك .. عارف لو كتير عاملين لايك ؟ يبقى انت لازم تراجع نفسك .. خد كورس كونفيرزايشن في الجامعة الامريكية .. :D
أو خد تويفل عشان تمتحن وتفهم الاستايتس اللي زي دي !
فيه حل تالت .. اعمل لايك وانت ساكت ولا من شاف ولا من دري .. وعنك ما فهمت .. :D
أو اعمل لصاحبك بلوك عشان مايفكركش بخيبتك القوية..
وكله في سبيل إنك تتخلص من الألم النفسي اللي بتعانيه لما تلاقي هذا النوع المكلكع من الاستايتس .. :D

- كيف تميز صاحب هذا النوع من الاستاتس ؟؟

هتلاقيه غالباً مدارس لغات .. وانت يا حبة عيني .. تعليم مجاني :D:D:D
◘◘○◘◘•◘◘♦◘◘♣◘◘♠◘◘○◘◘☻◘◘☺◘◘

اما بقى اللى يكفر سيئات اللى خلفوك بجد :D .. انك تلاقى واد مفعوص فى تانيه اعدادى وبت افعص منه فى اولى اعدادى .. وعاملينلك ريليشن شب :D .. فى الحاله دى يبقى اسمها ريليشن شيت :D .. ريليشين شد :D نفسين واسكت ^_^ ..
واللى يفرس أكتر .. انك تبقى طول بعرض عضلات ومجانص وحيطه ما شاء الله مخلص جامعه .. والمفاعيص دول ريليشن وانت سينجل ودفعتك كلها واقفه نيكست ^_^

منتهى المسخره .. انك تحط صورتك الشخصيه وتقول انا اهوه .. وتلاقى مزه غبيه داخل تقولك .. انت دا :Jumpy:

ومنتهى التخلف انك تقول اها :D .. ومنتهى العبط انك تحط صوره مش صورتك اصلا .. ومزه متخلفه تانيه تدخل تقولك امور اوى .. مع العلم انها صورة شاروخان :D :D :D

ولنا الله ^_^






منقول