ـالاخوه اللى جابولنا شلل .. رجاء ارحمونا من غباءكم السياسى .. ...

[RSS]

:sadd:

سامحونى على الاسلوب المتعصب فى الكلام .. لكن الايام دى بمر بحاله من حالات الشلل النفسى من اللى بنشوفه ..

:sad:

البهوات ولاد البهوات بتوع انا أسف يا ريس .. ولابد من احترامه .. وبلاش نظلمه .. وراجل قد ابونا .. ومعرفش ايه ..

اللى مش حاسين بالدنيا واللى بيجرى .. واللى عمرهم مادخلوا أمن الدوله .. ولا ظابط لسعهم قفا :blink: ولا ليهم أخ مات فى معتقل .. ولا أخت الظابط وقفها فى الشارع عشان يشوف بطاقته بكل سماجه وقلة أدب .. ولا ليه أخ جاله سرطان بسبب النظام الزباله اللى كان حاكمنا ..

أحب اقولهم خنقتونا ..

بدل ما تقعدوا تدافعوا عن أنسان " الله يحرقه مطرح ماهو مرمى مسجون "
نهب البلد 30 سنه وتقرفونا وتقولوا انجازات وبتاع .. صاحب أول ألشه جويه .. اللى طلعت فشنك من أصله .. فوقوا بقى وبطلوا ألش ونخع قرفتونا :ag: ..

ملكش أخ ولا قريب ولا صاحب راح شهيد مع اللى راحوا ؟! محستش بحرقة قلب الامهات على شباب زى الورد ماتوا " عقبالكوا كدا عن قريب عشان نخلص " بس متموتوش شهداء ولا تدخلوا الجنه ..

وتكونوا مع من أحببتم يوم الحشر .. ومصيركم جهنم معاهم بأذن الله .. عشان يبقى يومها تخلى اللى بتدافع عنه دا .. ينفعك أوى قدام ربك اللى هيحاسبك على كل كلمه طلعت منك ..

أنا لا هتكلم بالفصحى ولا بالسياسه واقولك احصائيات وأرقام ..

لكن هقولك لو تسمح .. خلى عندك شوية دم :bye:

حس لو مره فى حياتك .. وأنزل منطقه عشوائيه .. بص على حال اهلها عايشين ازاى وعاملين ايه ..
وبما أنك من ولاد البهوات .. خد طياره واطلع امريكا .. وشوف حال العشوائيات هناك ..
هتلاقى حالهم أحسن شويه من الطبقه الوسطى فى بلدك مش الفقيره كمان ..
انزل الشوارع وبص فى وشوش الناس .. ولو مبكتيش على حالهم يبقى معندكش دم ..
أنزل ساعة الفطار .. وشوف كام انسان فى شارعك بس مش فى مصر كلها .. مش لاقى فطاره ..
أنضم لحملة بنك الطعام او لجمعية رساله .. وانت تعرف ان نص بلدك بالظبط .. مش لاقيين ياكلوا ..
وماما سوزان وبابا حسنى اللى بتدافع عنهم " الله يخربيتهم اكتر ماهو مخروب " كانوا بياكلوا فلوس الشعب وخير بلدك ..

تلاتين سنه واحنا مذلولين ومتهانين وطالع عين ابونا .. لو قولت لأ تبقى خارج ع النظام .. لو نطقت كلمة حق تبقى ملعون وأمن الدوله يطاردك ..
لو ربيت دقنك تبقى أخوان .. ولو مربتهاش تبقى شاب تالف وتستحق ضرب الشوز " لا مؤاخده "
لو صليت الفجر حاضر فى الجامع يوقفك ظابط ثقيل ويقولك " انت اخوان يالا "
وكأنك كفرت لما صليت ..


بلد كان اللى يركع فيها كافر واللى ينطق فيها فاجر واللى عاوز يتعلم ويبدع مخبول ..

واللى ينحل ويتعرى ويبوظ دماغ الشعب مبدع ..


بلد كان حالها مقلوب .. وان اوانها عشان تتعدل وتمشى صح ..

مش عايزينها .. سيبونا نعمرها وغوروا .. خلينا نمشى فى طريقنا صح من غير ما تكعبلونا كل شويه زى الزلط اللى مرمى فى سكتنا ..

خربتوها 30 سنه بغباءكم وأنانيتكم ..

سيبونا نعمرها ونبنيها .. واللى مش عايزه يعمرها ميستحقش حتى ينام على ترابها ولا يندفن فيها ..

شغالين اهانات فى الثوره والثوار .. عشان كنتوا مستفدين من المخلوع وحزبه ومجلسه وعصابة الحراميه اللى كانت حواليه ..
اشتغلتوا بالوساطه وخدتوا خير البلد .. وولادها ومبدعيها وعلماءها اترموا بره عشان امثالكوا ياكلوها ..
اتمتعتوا 30 سنه انتوا واهاليكوا .. سيبونا بقى .. مش عايزين نتمتع .. وعارفين مش هيجلنا فايده منها دلوقتى .. وهناخد سنين نبنيها ونعليها ونرجع مكانتها ..

عايزه ابنى لما يجى يتولد فى بيئه نضيفه ياكل أكل مش مسرطن ويتعلم صح مش يدخل ويطلع زينا مش فاهم حاجه ..
عايزه أقوله حب بلدك عشان دى بلدك .. مش عيزاها يسيبها ويتغرب ويلف على بلاد تانيه عشان يجيب فلوسه ..
مش عايزاه يوصل 30 ولا 40 سنه ومش عارف يتجوز عشان مفيش امكانيات ولا فلوس ..
مش عايزه ابنى لما يقول كلمة حق يتسجن .. مش عايزه ابنى يتعامل على ان الجماد عنده انسانيه عنده ..

افهموا بقى .. سيبوها تعمر ..







منقول