مسابقة جديدة

[اميرة حبى انا]

السلام عليكم ورحمة الله وبركاته
جبتلكم النهاردة مسابقة جديدة
المسابقة عبارة عن
لجميع الاعضاء
1- اجمل قصة حب نهايتها سعيدة
2- اجمل قصة حب نهايتها مش سعيدة
3- اكتر قصة مؤثرة (تقطع القلب يعنى وطبعا ملهاش علاقة بالحب)
4- اكتر قصة تعبر عن السعادة والتفاؤل والامل
شروط المسابقة
1- مافيش مانع لو الموضوع منقول
2- عدم كتابة قصة مكررة تكون هنا او استرك بها احد بتاريخ يسبق المشترك صاحب القصة المكررة والا تحذف القصةومن غير زعل طبعا
3- هما اربع قصص بس للموضوع الواحد يعنى محدش يشترك بقصتين يقطعو القلب مثلا
4- شرط الاشتراك الاربع قصص مع بعض

للمبدعين
1- قصة من ابداعهم الخاص
2- شعر فى حب مصر (رغم اللى احنا فيه بس هى ملهاش ذنب)
3- شعر يعبر عن الحب والرومانسية والسعادة بالحب
4- شعر فى حب منتدانا الجميل ده
شروط المسابقة
1- طبعا مافيش منقول لانها للمبدعين
2- واكيد مش هيكون فى تكرار ولا هتغششو بعض
3- شرط الاشتراك الاربعة مع بعض
تبدأ المسابقة من اليوم ولمدة 10 يوم
من 7/1
الى 17/1
والجايزة عبارة عن وسام للمسابقة الاولى
http://www.gulfup.com/gfiles/12629028611.png
ووسام للمبدعين
http://www.gulfup.com/gfiles/12629034021.gif
كيفية وضع مواضيع المسابقة
كل مشترك يعمل موضوع باسمه
بمعنى ان عنوان الموضوع يكون اسمه الموجود فى المنتدى مثل(اميرة حبى انا)
1-توضع موضوعات المسابقة المطلوبة فى نفس الموضوع تحت بعضها
مع كتابة موضوع القصة مثلا
يعنى تحديد ما اذا كانت قصة الحب الحزينة او السعيدة
2-ارجو عدم رد اى عضو من الاعضاء على موضوعات اى مشترك(اللى مشترك بيها فى المسابقة بس)
اللى عنده اى استفسار يتفضل يسأل

اتمنى التفاعل من الجميع لتنشيط المنتدى

مع تمنياتى للجميع بالفوز والتميز

[محمود التهامي]

ايه الظلم دا 10 ايام بس
كدا عم جمال كسب

[محمود التهامي]

انا رديت هنا وعم جمال هناك
اتصرفي بقا يا مكررة هههههههههههههههه

[خلود]

ياطنط ممكن سؤال صغير

يعنى 4 قصص حته واحده كده مع بعض واشمعنى نهايتها سعيده وواحده نهايتها مش سعيده يعنى مينفعش نخلط الاتنين على بعض وتبقى قصه مئثره فزيعه كده جدا

ايه الاستبداد ده والظلم اللى احنا فيه

يارب اكسب يارب

[اميرة حبى انا]

الجهاز كان زعلان شوية وعمل الموضوع مرتين ازاى معرفش
معلش بقى بما ان الاكتر ردو هنا
فياريت استاذ جمال ينقل رده هنا

[اميرة حبى انا]

انا قريت اقتراح استاذ جمال
بصو
معلش عشان تبقى سهلة شوية بس
زى ماقلت كل واحد هيعمل موضوع باسمه وهو موضوع واحد بس والقصص تحت بعضها
يعنى يحط اول قصة مثلا ويحط التانية وكأنه كاتب رد

ونسيت اقولكم ان مسابقة الاعضاء مكان وضع القصص هو قسم القصة
ومسابقة المبدعين
فى قسم الابداعات

[fagrmasr01]

اهلا اهلا بمسابقاتك وافكارك الجميلة يا اميرتنا
باذن الله نشترك كلنا
واتمنى لكل المشتركين الفوز باحلى الأوسمة

[محمود عبد الله]

ممكن نشترك بقصص انجليزى؟؟؟

[محمود التهامي]

ممكن يا حودة
واهو بالمرة تضمن تكسب
هتقوللي ازاي اكسب لمجرد انها انجليزي
هقولك بقا يا سيدي
طبعا لما تجيب قصة انجليزي محدش هيفهم نصها
وبدل ما يقول وحشة هيضطر يقول حلوة احسن تكون حلوة وهو ميعرفش ويقولو عليه مبيعرفش انجليزي
بالظبط كدا زي افلام يوسف جاهين اللي محدش بيفهمها فكانو بيدوها جوايز احسن تتطلع مفهومة والعيب فيهم

[fagrmasr01]

ههههههههههههههههههههه
تعليق المدير بتاعنا صح الصح يا حودا

بس بجد بجد يا مدير....
اسلوبك جميل جدا جدا

[محمود التهامي]

بعض ما عندكم يا عم جمال

[اميرة حبى انا]

ياسلام
وده ليه يعنى
خلصت القصص العربى خلاص
عربى بس يا محمووووووووووود
واوعدك المرة الجاية اعملك مسابقة قصص بالانجليزى
وتبقى انت المشترك والفائز الوحيد
ههههههههههههه

[محمود عبد الله]

خلاص انا هحاول اضغط على نفسى و اجيب قصة
بس يوم الاحد انشاء الله عشان انا عندى امتحانات
ادعولى

[وردة الايمان]

مسابقاتك جميله جدا يا اميره ..

احييكى واحيى الأداره على الأفكار الجميله ..

واتمنى للجميع التوفيق ...

[fagrmasr01]

It's realy a good idea to improve our English skills, I appreciate, and applaud this wonderful idea and I hope to take place as soon as possible
Thanx Mahmoud for this great idea

[fagrmasr01]

معلللللش انا بس قلت امرن ايدى واجرب اكتب تانى كلمتين انجليش لانى خلاص نسيت الانجليزى

تحية منى لأخويا محمود على الفكرة الجميلة واتمنى سرعة تنفيذها

[اميرة حبى انا]

كويس ياوردة ان المسابقة عجبتك
ومنتظرين ابداعاتك واشتراكك فيها
استاذ جمال
هو اصلا مش بيسمع الكلام
وانا مش هسمعه كلامه
ماشى
وشكل محمود ده هينضرب قريب بصاروخ

[fagrmasr01]

لا لا لا لا ... محمود دا زى العسل ... أكيد انتى قصدك يا أميرة نبعت له صواريخ حب وفل ... صح واللا لم صح
انما مومكن سؤال يا ميس اميرة ؟ لو سمحتى ....
هى مسابقات الانجليزى امتى ؟

[habiby]

انا باحب جدا مسابقات المنتدى هنا علشان عارف العدل والنزاهة وقبل كددا كسبت وكنت وقتها عضو جديد جدا
باذن الله احجزوا لى وسام .. اقصد احجزوا لى مكان

[اميرة حبى انا]

استاذ جمال
مسابقة الانجليزى
وقتها لا يعلمه الا الله لما اشوف بس استعداد الاعضاء لها اد ايه
habiby
شكرا على رأيك في المنتدى
وسعداء جدا برجوعك
ونكون اسعد بمشاركتك المسابقة

[DMR]

فعلا المسابقة جميلة جدا يا اميرة تسلم ايدك
و كان نفسي اشارك فيها بس مش عندي وقت علشان ادور على قصص حلوة
و بجد باتمنى للجميع الفوز و التوفيق
ادعولي بالتوفيق انتو كمان
و كان عندي تعليق تاني
بجد محمود ردودك حلوة اوي في كل المواضيع و فعلا انت دمك خفيف جدا و ربنا يوفقك دايما و ادعيلي انت كمان بالتوفيق
:50 (31)::50 (31)::50 (31)::50 (31)::50 (31):

[اميرة حبى انا]

دى دى
حبيبتى كلنا بنتمنالك تفوزى فى مسابقة اكبر عشان نحتفل بيكى كلنا
وكفاية يا حبيبتى انك فكرانا وكل مده تدخلى تسلمى وتشاركينا
احنا فى انتظار اكبر مجموع لاحلى بنوتة فى الدنيا

[ام انس]

السلام عليكم ورحمة الله وبركاته

موضوع جميل ... وفى ذلك فليتنافس المتنافسون

لكن راى المتواضع يقول ... صعب جدا تحقيق هذه الشروط

اربع قصص فى عشر ايام... صعب

عموما ربنا يوفقكم

شدو حيلكم

[مصطفى مامون]

اميره/مش فاهم حاجه هى مسابقه ولا4 مسابقات
وهكتب القصه والقصائد فين فهمييييييييينىىىىىىىىى

[اميرة حبى انا]

افهمك يافندم
هتكتب الاربعة
قصة واربع قصايد
فى موضوع يكون عنوانه اسمك
تحط فيه الاربعة مع بعض
تحت بعض
يعنى كأنك بترد على نفسك
وازاى لحد دلوقتى مش اشتركت ده اللى فاضل اربع ايام تقريبا

[اميرة حبى انا]

والله يا ام انس هو فعلا المدة قليلة
بس انا حبيت يكون فى تنافس فى المسابقة
واما نشوف
اهو لحد دلوقتى محدش اشترك

[fagrmasr01]

اتشرف بان اضع الرابط هنا يا أميرتنا لمشاركتى الرمزية

http://www.vb.6ocity.net/showthread.php?p=50452#post50452

[اميرة حبى انا]

مشاركة الاستاذ مصطفى مأمون
http://www.vb.6ocity.net/showthread.php?p=50483#post50483

[اميرة حبى انا]

ياجماعة اخر يوم للاشتراك فى المسابقة النهاردة
يعنى هقفلها باليل ان شاء الله
ولا ارى غير رابطين بس
فين باقى الروابط
فين الاشتراك فى المسابقات

[وردة الايمان]

* الرابـط *

http://www.vb.6ocity.net/showthread.php?t=8771

[اميرة حبى انا]

شكرا لكل من ساهم
وكل من لم يساهم
تغلق لانتهاء المدة
وان شاء الله تعلن النتيجة فى اقرب وقت