كل ماتتزنئ إسئل

[محمود عبد الله]

السلام عليكم و رحمة الله

انا محمود عبد الله يوسف
المفروض انى مهندس سيارات بس فاضلى كام مادة لغات و ثقافية و اتخرج

يشرفنى و يسعدنى الإجابة على اسئلة جميع الاعضاء فى مجال السيارات سواء كانت اسئلة فنية او تجارية

كما يمكنكم التواصل معى على احدى الهواتف التالية
0105146921
0162327485
او الايميل [email protected] ([email protected])

انا مبزهئش من الاسئلة خالص
ولاكن رجاء طرح كل سؤال فى موضوع جديد

جزيل شكرى لجميع اعضاء المنتدى

[fagrmasr01]

يارب ربنا يوفقك يا حودة
آمين

وكل سنة وانت طيب

[محمود عبد الله]

شكرا لمرورك يا باشا
و انا تحت امرك برضه
فى الخدمة
ها؟

[nasr]

أشكر ادارة المنتدي علي أختيارك
وأنت قدها يا بشمهندس .
وعايز أعرف رأيك في السيارات الأتيه :
1 - تويوتا أفانزا
2 - كيا كارينز
3 - اسبرانزا تييجو
الأفضل من حيث : السعر - الصيانة وقطع الغيار

[محمود عبد الله]

انا سعيد جدا بمشاركتك معانا يا عمى
احب اوضح لحضرتك انك مختار 3 عربيات فيهم عيب مشترك
الا و هو ارتفاع حاجة اسمها مركز الثقل و ده ممكن يسبب انقلاب السيارة عن السرعات العالية 140 كم/س و انت طالع
اقلهم تئثرا بهذا العيب هى الكارينز طبعا و اللئسف اعلاهم تئثرا بهذا العيب هيا الافانزا
اما عن قطع الغيار
ترتيب الاسعار كالاتى تنازلى
1- التيوتا
2-الكيا
3- التيجو
بس لازم تاخد بالك من حاجة
فترات الصيانه بعيدة عند قطع الغيار العالية و قريبة عند قطع الغيار المنخفضة السعر
يعنى مثلا سير الكاتينة بيقضى
1- التيوتا 80000كم
2- الكارينز 40000 او 60000 كم مش فاكر اوى
3- التيجو 30000 كم
تخيل انك تغير كاتينة كل 30000 ينفع كدة ؟

دا كله كلام فنى
نصيحتى الاخيرة عن الفعلية و الله للسيارات الثلاثة
خد الكارينز

[nasr]

شكرا" يا حوده
باين عليك في العربيات عفريت
اختيار الكارينز موفق جدا"
أرجوك متزهقش مني حاكم أنا بحب
العربيات وبحب اللي بيفهموا في العربيات .

[محمود عبد الله]

لا
مش هزهئ انا حياتى كلها عربيات

[خلود]

مبروك على القسم يامحمود

ولو انا ماليش علاقه بصراحه بالعربيات بس مبسوطه بوجودك ويانا ووجود القسم ده كمان

وربنا يوفقك يارب

[محمود عبد الله]

الله يبارك فيكى يا خلود

[mohamedbook]

اولا احب ارحب بيك في القسم الجديد
ممكن بعض الاسئلة
1- ايه تقييمك للسيارة نيسان صني من حيث
المميزات والعيوب والفئه السعرية مقارنة بمثيلتها اليابانية
(الاتزان - السحب- استهلاك البنزين- العزل -القوة والمتانة- قطع الغيار- التوكيل - الشكل الجدبد بتاع 2010- )
مع المقارنه بينها وبين التويوتا كرولا من حيث المميزات والعيوب بخلاف الكماليات
2- عايز اعرف مشكلة الفتيس الجديد في التويوتا التابترونك وليه خد سمعة سيئة في مصر مع ان التويوتا شركة عريقة

[محمود عبد الله]

الله يرحب بيك فى جنته يا رب
انا سعيد بمشاركتك دى و ارجو المزيد
احب اوضحلك ان ردى كدله سارى على الشكل الجديد و القديم

اولا : عن تجربة
الصنى مظهرش فيها عيوب قاتلة
مع العلم ان ثبات السوبر صالون يفوق ال اي اكس بكتير لأنها مزودة بعفشة اسبور
تعليقى الشخصى عليها ان الكنبة الخلفية غير مريحة

ثانيا: المواصفات الفنية

اقصى قدرة 105 حصان عند 6000 لفة فى الدقيقة
اقصى عزم 147 ك وات عند 3600 لفة فى الدقيقة
اما عن التسارع فى سيارة عادية جدا
نسبة تخفيض الترس الاولانى 3.333
لاكن الرابع و الخامس ليهم اداء جبار
نسبة الترس الخامس 0.7 كدة ممكن تئفل الامبير و انت مستريح
تانك البنزين صغير شوية 55 لتر
الاستهلاك 300 كم فى الصفيحة عند سرعة 90 كم /س

توكيل النيسان من التوكيلات اللى مش زحمة وده بيخليهم يعرفو يخدمو العميل و يحسسوه بنفسه
فترات الصيانة
فى عم 2003 كانو بيغسلو العربية كمان مش عارف لسة بيعملو كدة ولا لا ؟
10000 زيت و فلتر و تربيط عفشة و مراجعة السوائل
15000 تربيط عفشة و مراجعة السوائلو الكشفعلى تيل الفرامل
20000 غيير بوجيهات +فلتر هواء +فلتر بنزين +زيتو فلتر + السابق
80000 السيور + السابق
و الاسعار غالية بس مش اغلى من الامانى طبعا

ثالثا : المقارنة بين الكرولا و الصنى
بخلاف الكاماليات الفظيعة اللى نازلة فى الكرولا
انا هتكلم عى المحرك
محرك الكرولا يعمل بنظام VVT-I
ده نظام لتوقيت و مقدار فتح الصمامات بيوفر فى استهلاك البنزين بشكل غير طبيعى
و كمان بيخلى السيارة تستفيد من اقصى قدرة للمحرك
و يوفر 20% من حجم المحرك
و يقلل اهتزازات و صوت المحرك
اما محرك الصنى غلبان يعينى محرك عادى جدا كل اللى فيه انه 16 صمام

رابعا : حكاية الكرولا ال 4 Matic
بص الفتيس ده فتيس مانوال مش اتوماتك
ولاكنه بالبلدى كدة بيدوس دبرياج لوحده و ياخد النقلة لوحده لو انت جايبه على ال E
اما لو انت هتسوء مانوال ف هتشتغل بال + و -
مميزات الفتيس ده بينقل لوحده زى الاتو ماتك و عمره طويل لانه اصلا مانول و بيسحب جامد زى المانول
عيوبه ... انا سمعت من تجار كتير ان الناس بتشتكى منه عشان بيهرب غيارات و صوت المحرك بيعلا
بس ده كلام تجار
المستخدمين بئا كلامهم تانى خالص بيقولو ان العربية 100/100
و ده رئيى برضه عن تجربة
التجار هما اللي كانو خايفين من ان العربيه متتبعش فكانو بيخافو يجيبوها و لما الناس تسئل عليها يئولو البؤين الحمضانين دول
و للئسف ده السبب فى ضعف مبيعات العربية الجميلة دى و اتخاذ الشركة قرار بعدم نزولها 2010
هينزلو اوتوماتك صريح و مانول صريح

كدة خلص الكلام
ارجو انى اكون افادتك
مرة تانية سعيد بمشاركتك و خلينا نشوفك كتيير

[mohamedbook]

اشكرك شكر جزيل علي ما قدمتة من رد وافي وشافي
وان شاء الله يكون فيه تواصل بينا علي طول خاصة اني من محبي السيارات بس للاسف بمشي علي سرعات عاليه

[محمود عبد الله]

طاب متنساش ان الEx مش تمام على السرعات العالية

[اميرة حبى انا]

ماشاء الله
ايه الشغل الجامد ده
ربنا يوفقك
شكلك عايز التمييز الفترة الجاية
بس لى رجاء
كل حد عنده سؤال
ارجو كتابته فى موضوع مستقل

[محمود عبد الله]

والله يا اميرة انا كنت عايز كدة برضو و طلبته من الاعضاء فى اول الموضوع خالص
بس كدة احسن عشان اللى يدخل يقرا معلومات كتير
و انا مش ضرورى التميز بالنسبالى المهم انى انفع الناس
فكرة تثبيت الموضوع احسن بكتييير من كل موضوع لوحده
الف شكر على مرورك ومشاعرك النبيلة

[mohamedbook]

طاب متنساش ان الex مش تمام على السرعات العالية



انا كنت ماشي بيها علي سرعة 170 كان ثبتها كويس بس في حاله عدم وجود هواء قوي
لكن مجربتش السوبر صلون
النيسان مشكلتها في البنزين بتسحب بنزين بشكل غير عادي بخلاف التويوتا بتشم البنزين
صوت المتور بتاعها عالي عند السرعات العاليه وديه حاجة مش كويسه بالمرة بس شكلها حلو بس فونسها الخلفيه مش اوي
انا شفت منها الكوري الي في الخليج كانت روعة شكلها زي الاوكتافيا
ان شاء الله ناوي اجيب تويوتا كرولا بس للاسف مش عاجبني الشكل الجديد بتعاها خالص بالمرة مع ان امكانيتها جبارة بس شكلها من وجهة نظري مش حلو خالص
يعني افضل الشكل القديم 2007 عن الجديد
عندك خلفيه عن تغيير الشكل دة في الفيترة المقبله ولا ممكن تاخد الشكل دة لمدة 7 سنين زي الشكل الي فات مع تغيرات بسيطة في الفوانيس والشبكة والاكصدام

[محمود عبد الله]

اولا عشان تجرب اى عربية فى ثباتها احسن مكان هؤلك عليه
عارف و انت جاى من ميدان الرماية وواخد طريق مصر اسكندرية الصحراوى
قبل متعدى من تحت المحور يعنى لما يظهر المحور على مدد البصر ابتدى امسك الدركسون بئدك الاثنين
و شوفها هتعوم ولا لا ؟
اصل الحتة دى فيها رياح جانبية مستمرة
و عشان تعرف الفرق بين ال اي اكس و السوبر صالون جرب الاثنين فى الملف اللى امام حديقة الازهر و انت على سرعة 80


اما عن الشكل الجديد للصنى (اللى برة مصر) ده غير اللى جوا مصر تماما
محرك حديث vvt و حكاية تانية خالص لو عايز الكتالوج بتاه ادينى الميل بتاعك

اما عن استهلاك الصنى ف اى عربية فوق 90كم/س بتهيس فى الاستهلاك و انت بتؤول انك بتجرى بسرعة

مظنش ان شكل الكرولا هيتغير قبل ال7 سنين لاكن انا معنديش خبر يقين
و اخيرا احب اؤلك خبر مش ظريف اليارس مش هتنزل 2010 خلاص بحححححححححح

[mohamedbook]

انا عارف موضوع اليارس من زمان
ياريت تبعتلي علي الايميل دة [email protected]
بس انا مأدرش امشي في المنطقة ديه علي السرعة 170 ابدا عشان متكدسة بالسيارات
ممكن علي الطرق السريعة طريق الكريمات اسكندريه الصحراوي العالمين فقط
اما في العادي 120
وشكرا لاهتمامك

[محمود عبد الله]

تم ارسال الملف
check your mail

[mohamedbook]

لم يصل اي فيل اتاش مع الميل

[محمود عبد الله]

تم ارسال الملف مرة اخرى

[engehf10]

اخي العزيز مهندس / محمود
لقد قرات كل ما في الباب وبالفعل كانت معلومات مفيدة جدا
لكن ارجو منك المساعدة بالمعلومات اللازمة لمن لا يعرف شيئا عن فنيات السيارات ويريد شراء سيارة كيف يمكن المفاضلة بين شراء سيارة مستعملة او جديدة لمن يركب سيارة لاول مرة. وشكرا
ايهاب

[محمود عبد الله]

اولا احب ارحب بيك و اؤلك الف مبروك مقدما

الامكانيات المادية يا عزيزى بتلعب دور كبير فى اختيار سيارة مستعملة او جديدة
لو الامكانيات تمام
يبئا زيرو طبعا
اما لو مش تمام بس ضامن انك تئدر تدفع قسط
يبئا زيرو طبعا

طيب : نتكلم شوية عن الزيرو

1-اختيارك للسيارة الزيرو فى المقام الاول هيكون على اساس الحجم
يعنى تشوف حجم اسرتك اد ايه و الناس اللى هتركب معاك عموما

2- النقطة التانية هتكون السي سي هتكون ال ( سي سي )
من بين كل الاحجام اللى تنفعك تشوف اقل سي سي فيهم
عشان توفر فى اسهلاك البنزين

3- كدة هتكون حدد اختياراتك فى عدد صغير من العربيات
تسئل بئا على كل عربية من اللى عليهم العين
يعنى مشاكلها
ثباتها
فراملها
طبعا انا تحت امرك فى اى سؤال
وبس اوعى تاخد المعلومة من المعارض و التوكيلات
خدها احسن من الناس اللى راكبة العربية فى الشارع
و متخافش المصريين جدعان اوى محدش هيحرجك
بس اوعى توئف واحدة و تسئلها

4- لو لسة الاختيار موقعش على واحدة بس
يبئا تختار الاحسن شكلا بالنسبالك

5- بعد متستقر عليها و عايز توفر اكتر شوف بئا الاوبشنزززز
ممكن تتنازل عن الزجاج الكهربائى مثلا او اي كمالية اخرى

6- نقى اللون و اتكل على الله
و ابعد عن الاحمر الصريح و الاصفر الصريح
عشان بيجربو وم الشمس

نصيحة ابعد عن الصينى لانك اول مرة تركب عربية

لو انت بئا مش قد الكاش ولا القسط يبئا المستعمل

طيب : نتكلم شوية عن المستعمل

هتمشى نفس الخطوات السابقة لغاية الخطوة 5

6- هتكون الاستعانة بأهل الخبرة يعنى تاخد واحد متخصص معاك يعاينها
ولكن لازم تعرف ان مفيش عربية مستعملة مش هتعمل معاك مشاكل
كل المستعمل لازم تظهر فيه مشاكل بعد متركبها شوية

7- برضو اتكل على الله و الف مبروك

لو عايز تسئل على حاجة تانية بالتفصيل انا تحت امرك
ورقمى اهه
0163272485

[mohamedbook]

بص ياسيدي
انا بفكر احول السيارة النيسان لغاز ايه رايك في الفكرة ديه عشان مشويري كتير جدا ومحتاج اوفر في البنزين
ممكن اعرف العيوب والمميزات للغاز غير توفير الفلوس
وتكلفة تحويل السيارة الي غاز
لك جزيل الشكر يابشمهندس محمود
السيارة نسيان صني ex صالون مانوال 2008

[محمود عبد الله]

اسلام عليكو و رحمة الله

دون شك الغاز هيوفر فى تكاليف البنزين
لاكنه بيقصر عمر المحرك لان نسبة الكربون فيه قليلة و نسبة الكبريت عالية
ضيف على كدة ان قدرة المحرك هتقل اثناء العمل بالغاز يعنى السحب هيضعف لانه ابطئ فى الاشتعال من البنزين
ده طبعا هيقلل السرعة القسوى اللى ممكن توصلها
بالنسبة للسيارات الجديدة لا يجب استخدام الغاز إلا بعد اول 5000 كم
و هيخاد مساحة من الشنطة
و لو انت مصمم تركبه يبئا عليك انك تسخن عربيتك الاول بالبنزبن قبل متقلب للغاز
و ممتستخدموش غير فى المشاوير الطويلة اللى هتعد معاك كاشات كتيير
و بالنسبة للامان
اطمئن الامبوبة بتاعة الغاز بتتحمل ضغوط عالية جدا حتى تحت ضرب الرصاص
و اخيرا افضل شركة تتعامل معاها هيا كار جاز
التكاليف للعربيات الانجيكشن 5500 ج و عندهم نظام تقسيط كدا معقد لسة مفهمتوش
ارجو انى اكون جاوبتك على اكمل و جه
و فى انتظار مشاركتك الاخرى

[mohamedbook]

كنت عايز تفاصيل اكتر
من ناحية تقلييل عمر المحرك بوجة مقارنة
يعني الموتور البنزين مثلا عمره الافراضي كذا
والاخر بيقل عنة بكذا
ثم عمليه السحب ديه تأثرها جامد ولا ممكن محسش بيه
وعملية التحويل لغاز بتاخد وقت ولا في نفس اليوم
وانت من وجه نظرك ياباشمهندس الموضوع دة كويس ولا لا

[محمود عبد الله]

بالنسبة لعربيات اليابانى
مع السائق المحافظ عمر المحرك هيكون حوالى 200 الف كم
و بعد كدة يبتدى يشتكى من الدخنة السوداء
مع الغاز يوصل المحرك ل 170 الف كيلو و يتعب

فى الاول مش هتحس بفرق كبيير فى السحب
عشان تلاحظه امشى فى طريق على سرعة 100كم/س و بص على عداد ال rpm هيكون في حدود 2.8
بعد تركيب الغاز كرر نفس العملية
لو انت مشغل الغاز هتلاقى العداد 3.3
لو انت مشغل البنزين هتلاقى العداد 3.1

اللى بيحصل ان انت لما تركب بس نظام الغاز وزن العربية بيزيد 100 كجم وزن الامبوبة
ف المحرك بينحر فى نفسه ياعينى عشان يجرها بالغاز اللى فيها
ولو انت ماشى كمان بإستخدام الغاز القدرة اللى بيديها للمحرك اقل من البنزين ف المحرك هينحر فى نفسه اكتر واكتر

وكل ميزيد العمر التئثير بيزيد و السحب يقل اكتر و اكتر
زى الفرق بين تئثير التدخين على شاب و تثثيره على راجل عجوز

التحويل بيتم فى يوم عمل كامل يوم واحد من اوله

رئييى الشخصى فى الغاز
خسارة ال5500 جنيه انت ممكن تمشى بيهم 37 الف كيلو ببنزين 92
و بعدين لمما تيجى تبيع العربية مش هتلاقى زبون و حتى لو فكيت الغاز منها هتبئا حالتها مش تمام هتخسر نفس المبلغ فى البيع
انا عن نفسى مركبوش

[engehf10]

اخي العزيز م / محمود
شكرا جزيلا علي تلك المعلومات القيمة , ان شاء اللة سوف ازور معرض فورميلا الاهرام بارض المعرض خلال الفترة من 20 - 24 يناير الحالي لمزيد من المعرفة والاختيار بين الانواع المعروضة وانظمة التقسيط المتاحة للشراء , شكرا علي اهتمامك
ايهاب

[محمود عبد الله]

عفوا استاذ إيهاب
تحت امرك فى اي وقت

[عابرسبيل]

بالتوفيق - ومبروك مقدما

[nogafoda]

السلام عليكم ورحمه الله وبركاته
لو سمحت يا استاذ محمود انا كنت عايزه اسال عن العربيات السزوكي المرخصه اجره
دي شروطها ايه؟
وبيتم الحصول عليها ازاي؟
وسعرها كام؟
يعني باختصار كل التفاصيل الخاصه بشراء العربيه وترخيصها
ولك جزيل الشكر

[محمود عبد الله]

السلام عليكم

اولا مفيش شروط معينة لترخيص السوزوكى ولكن فى بعض الاحوال ممكن مرور يمنع ترخيص الاجره بوجه عام لمدة معينة هوا اللى بيحددها فانت تسألى فى الايام اللى هتشترى فيها الترخيص مفتوح ولا مقفول
العربية بحوالى 55 الف جنيه
و بيتم الحصول عليها من اى معرض كاش او تقسيط بنكى

طبعا الكاش معروف
اما بالنسبه للتقسيط البنكى فلو هتدفعى نص ثمن السياره فـ الضمانات بتكون صوره بطاقتك و وصل نور بس

اما لو هتدفعى اقل من نص ثمنها فلازم يكون عندك اثبات لدخلك غالبا بيكون مفردات مرتب

بنك ناصر بئا بيعمل تقصيط بفوائد قليله بس بضمان سجل تجارى

اما عن الترخيص فالمعرض بيديكى حاجة اسمها جواب مرور
بتروحى المرور الصبح بدرى بتاع الاجره حسب المنطقة اللى انت ساكنة فيها
و تدفعى التأمين الاجبارى الضراءب و بتخشى الفحص و بتشترى الطفايه
ترتيب الخطوات دى بيتغير من مرور لمرور
بس الثابت انك بتستلمى الرخصة اخر خطوة
طبعا بيكون فى حظر بيع على العربيات القسط + مبلغ تأمين حوادث بيدفع لشركة التأمين اللى البنك بيخيرك بينهم

ارجو انى اكون وفيت الاجابة

و شكرا لتواصلك

[nogafoda]

متشكره جدا يا استاذ محمود علي الاهتمام وسرعه الرد
جزاك الله خيرا

[محمود عبد الله]

عفوا بس بلاش استاذ دى

[ALIABOALI]

ربنا يوفقك ان شاء الله بس خلى بالك بردة من اللغه العربيه وعايز اعرف رايك فى العربية أسبرانزا A113-A620
الشيفروله N200-Lanos
,شكرا مقدما وربنا يوفقك

[محمود عبد الله]

من سؤالك كدة انت مش عايز تقارن بينهم لانهم فئات مختلفة

نبدأ بالانوس
128 العصر يعنى عربية كل سهلة و معروف اعطالها و تقريبا معظم الميكانيكيين حافظينها
+ ان قطع غيارها المضروبة وتوفره بشدة (و على فكره المضروب له ناسه اللى مش بتجيب الاصلى)


اما ال113 دى عربية كيووووت خالص
انا مجربها اعطالها قليلة بالغم من ان الاسبيرانزا بوجه عام ممكن يبقا فى الانتاج 10% من الانتاج مشموم يعنى عربيات كدة راكبها عفريت بتظهر فيها اعطال كتير لكن ده لا يتخطى النسبة المذكوره يعنى انت 90% فى الامان

ال 620 احسن كتير عشان محركها يبانى سياره فارهة و لها عشاقها

اما ال N200 فأنا مجربتهاش بس خايف من متورها الصينى و كمان انا مستغليها على الامكانيات اللى فيها لاكن انا متوقعلها مبيعات عاليا فى الفتره القادمة

ارجو لو كان فى حاجة ناقصة فى اجاباتى عاود السؤال انا مش همل
و شكرا لمشاركتك

[احمد الباشمهندس]

المهندس محمود انا قرأت الموضوع كله و هو جميل و شكرا لك انا عايز اشترى سيارة ادفع 50% و اقسط الباقى اسلامى بس محتار اختار ايه و حدود المقدم المتاح من 25 الف الى 50 الف انت رأيك اختار ايه بعد جميع المقارنات الممكنة مع العلم ان الافضل لى هو تقليل المبلغ قدر الامكان و افضل مكان اشترى منه و جزاك الله كل خير

[خلود]

استاذ احمد هنحاول نوصل سؤالك لاستاذ محمود لانه بقاله فتره مش بيدخل

وعذرا للتاخير فى الرد

[احمد الباشمهندس]

استاذ احمد هنحاول نوصل سؤالك لاستاذ محمود لانه بقاله فتره مش بيدخل



وعذرا للتاخير فى الرد

شكرا يا خلود على الاهتمام و بارك الله فيكى

[محمود عبد الله]

بسم الله الرحمن الرحيم
نبدأ من الاخر إلى الاول
افضل موزع تتعامل معاه هوا سمير ريان

اما عن تقلييل المبلغ فممكن تشترى ارخص عربية يعنى ماروتى مثلا
بالنسبة لاقل مقدم ممكن تدفعو اللى هوا 25000 ده هيكون 50% من تمن الاسبيرانزا الـ 113 او الشفروليه سبارك

اما عن اعلى مقدم ممكن تدفعو هوا 50000 ممكن تجيب سيراتو او صنى سوبر صالون اوتوماتك

انا بئا بؤلك اقسم البلد نصين و ادفع 42000 فى نيسان صنى اى اكس عادة
و تمنياتى لك بإقتناء سيارة جديدة جميلة

[احمد الباشمهندس]

السلام عليكم و رحمة الله و بركاته
شكرا يا باشمهندس على الاجابة و بارك الله فيك
و لى استفسار هو الافضل النيسان و لا الاسبيرنزا و لا الشفيرولية و لا الكيا و لا الهيونداى و فى حدود نفس الامكانيات المذكورة سابقا

[محمود عبد الله]

النيسان طبعا

[زهرة الياسمين]

ياريت اخى محمود لو تعرف فيه جمارك للسيارات فى مدينة 6 أكتوبر ولالأ

وهل عندك فكرة عن قيمة الجمرك لسيارة تيريوس 1500سىي سى موديل 2009 وانا

المالك الاول لها فى سنة الموديل وعاوزة انزلها من الكويت

واشكرك جدا

[محمود عبد الله]

و الله انا مسالة الجمارك دى مليش فيها اوى بس نسأل
عموما هوا فيه جمارك فى اكتوبر و اكيد فيها سيارات

[محمد ابو المجد]

السلام عليكم ورحمة الله
اولا تحياتى
ثانيا انا عندى سيارة مازدا 323 مو 82 بحالة جيدة عاوز اثمنها
ثالثا انا داخل على تجديد ونقل ملكية مرور اكتوبر اعمل ايه
واخيرا شكرا

[محمود عبد الله]

السلام عليكم و رحمة الله و بركاته اسف لو كنت اتأخرت عليك فى الرد اصل انا فى الجيش و انت اعرف الاجزات بقا و كدة
بالنسبة للمازدا بتعمل حد ادنى عشرين و حد اقصى ستة و عشرين
ام بالنسبة لنقل الملكية فانت بروح فى الشهر العقارى الاول تسجل العربية بأسمك و بتدفع رسوم تسجيل بتسأل عنها هناك حسب نوع و موديل عربيتك
الخطوة التانية و دى يفضل تعملها لما الرخصة تنتهى
اللى هيا نقل الملكية فى المرور بعنى انت بتروح و معاك كل الاوراق اللى تخص العربية بما فيها التسجيل و تنقل ملكيتك و انت بتجدد الترخيص