المساعد الشخصي الرقمي

مشاهدة النسخة كاملة : اخر بهدلة(تحب تجرب)



خلود
25-12-2009, 11:12 PM
اذيكوا ياجماعة
ياريت تقرأوا الموضوع كلة وللاخر وقولولى رأيكوا فى الموضوع وبجد
ياااااااااااااااااااااه على اتوبيسات اليومين دول
ياسلام وانت قاعد طول النهار تلبس وتزوق وتتبرفن ولما تنزل تمشى تخاف التراب يجى عالشوز بتاعك وطبعا انت عامل دة كله لية اكيد اما رايح مشوار مهم او كالعادة رايح الكلية
وندخل عالمصيبة الكبيرة ورايح تركب الاتوبيس يالا مع بعض نشوف العجايب
اول ماتوصل الموقف تلاقى السواقين والتابعين بيقولوا راحة المنصورة يا ابله وياه بئه لما تكون مستنى حد هتلاقى الصداع مسكك من كتر هتروحى المنصورة يا ابلة وفى الحالة دى تتعقد من ام اللى يروح المنصورة المهم ركبت الاتوبيس اول ماتركب تلاقى فى الاول كدة كل واحد قاعد على الكرسى اللىجنب الشباك وسايب الكرسى اللى جنبة فاضي طبعا انتوا مش عارفين ايه السبب كملوا معايا للاخر وانتوا هتعرفوا
فانت طبعا هتضطر تعد جنب اى واحد وبدأت المصيبة أولا انك قعدت جنب واحد ماتعرفش اخلاقة والكارثة الاكبر انك قعدت عالطرف
وبعدين الاتوبيس حمل ركابة ومشى اول حاجة هتقابلاها لو انت مسافر بالنهار الشمس اللي هتولع فيك هتقولى مافى ستاير فى الاتوبيس هقولك بتتغسل وابقى قابلنى لو اتركبت تانى
تانى حاجة ياه لما حد يركب من عالطريق ويجى يركن عالكرسى بتاعك وانت كل شوية تقولو لو سمحت مش عارف اقعد مايعبركش ويفضل طول الوقت ساند عليك
ولا واحدة كبيرة فى السن تيجى تقولك مش قادرة اقف تقوم انت بكل شهامة وتقاعدة وتدعى عليها بعد ماتقعدها ويعينى من كتر الدعا عليها تموت قبل ماتروح
وياااة لوواحدة تخينة وجات سندت عليك وقالت ماعلش يابنتى احنا ستات زى بعض يبقى نفسك تولع فيها وفى اللى ركبها
والله بئة لما واحدة تركب وشايله ابنها وتلاقى اللى قام محطوط على رجلك وانت قاعد وبردة ماتقدرش تتكلم وبعد ماتديلها ابنها تلاقى رجليك مبلولة طبعا انتوا عارفين من ايه
ولا لما يكون مع حد شيل كتير وتلاقى رجلك وانت قاعد اصبحت مكتب للموظفين وطول السكة ياعينى وانت بتتألم وماحدش حاسس بيك
وبعدين تنزل ياعينى من الاتوبيس تلاقى نفسك متبهدل اخر بهدلة مع انك كنت قاعد أمال لو كنت واقف كان حصلك اية متهيألى كنت رميت نفسك من الشباك..........ههههههههههه
ملحوظة هامة: دى كلها حاجات بسيطة من اللى بيحصل
أكيد انتوا جربتوا مواقف كتير اللى عايز يفضفض او عندوا حلول يدخل ويقول
بس ياريت تحطوا نفسكوا فى الموقف بجد
واللى عايز يجرب يقولى وانا اعملوا دعوة فورية

وكل سنة وانتوا طيبين مع اتوبيس جديد

محمود التهامي
25-12-2009, 11:17 PM
تستاهلي

عشان تحرمي تروحي المنصورة

هههههههههههههههههههههههههههههههههه

ودعوة ايه دي

دعوة للمنصورة

لالالالالالالا

لو فيه اسكندرية احجزيلي معاكي

خلود
25-12-2009, 11:44 PM
اسكندريه برد دلوقتى

ما تيجى نخليها اسوان

ايه رأيك

احجز ولا بلاش

اميرة حبى انا
26-12-2009, 12:46 AM
لو ثمحتو ممكن اجيب معايا كيلو حرنكش وتاخدونى معاكو
لاقصر واوسان

خلود
26-12-2009, 12:10 PM
لا يااميره مش عايزين عزول

ولا هى غلاسه وخلاص

يلا ياماما شوفى الاتوبيس اللى بعدينا

بااااااااااااااى

gmal0123
29-12-2009, 09:53 PM
الاتوبيسات دي كانت موجودة من 40 سنه يعني قبل ما تتولدي . أنا جربتها . طبعا دلوقت مفيش الكلام ده إلا في الأحلام . مش عشان التقدم والتطور الي احنا فيه ولكن لأسباب أخرى . المشكله أنه موجود أصعب مما تتكلمي عنه بكتير والكل عارف المعاناه وخصوصا أيام ( الخميس والسبت والأحد . ) وطبعا في المناسبات