يوميـــــــــــــــــــــــات خلـــــــــــــــــود

[خلود]

http://almasah76.jeeran.com/%D8%A7%D9%84%D8%A8%D8%B3%D9%85%D9%84%D8%A9.gif


فى البدايه احييكم اصحابى وصحباتى


واعتقد هتكون فكره حلوه حكايه اليوميات دى



احب احكى عن بعض من مقتطفات يومى النهارده اللى كان مشحون بالفعل


اليوم ابتدى من 5 صباحا مع شروق الشمس بصلاه الفجر اللى بحمد الله على ادائى لها ومش هكدب عليكم مش فى كل الاوقات بس ربنا يقدرنا ونواظب


ولادى اتفقوا معاى من بالليل على نوعيه سندويتشات المدرسه وقالوا اعملى لنا شيبسى وكاتشب

زهقنا ياماما كل يوم بيض وجبن وخيار


وطبعا الشيبسى عايزه يتقشر ويتعمل بالماكينه وتحمير بقى ودوشه
وطلبوا منى عصير جوافه فريش يعنى اعمله الصبح طبعا علشان الفيتامين


المهم خلصت كل الطلبات ولبسو وراحوا مدارسهم بسلامه الله


وطبعا انا كمان نزلت على شغلى بصفتى امرأه عامله


ونزلت قبل 8 وركبت التاكسى بعدد شغلانه لان شغلى فى مكان صعب جدا ش القصر العينى


واروح بقى الاقى امن مركزى وعساكر وشكلها تشريفه فرحت طبعا وقلت ده علشان انا جايه كل المهرجانات دى


وطبعا لقيت مش ده السبب لكن السبب حاجه تانيه مش لازم بقى علشان سريه الموضوع



المهم عدى يوم الشغل عادى ما بين حكايات الزملاء وحواديتهم وميمنعش شويه لعب على الكمبيوتر الخاص بالشغل


ورجعت بقى عملت غداء وحاولت طبعا ارتاح شويه مش نافع فيه مدرس بيجى لنا البيت وواجبات هتتعمل


بس طبعا البنات فرحانين علشان النهارده الخميس تليفزيون وكمبيوتر ونت بقى وليله


وصابح اجازه بقى



بس كفايه كده لو افتكرت حاجه تانى هجى واقولكم


سلاااااااااااااااااام

[خلود]

http://almasah76.jeeran.com/%D8%A7%D9%84%D8%A8%D8%B3%D9%85%D9%84%D8%A9.gif

النهارده بقى يوم مش عادى
لانه يوم العيله

نتجمع فيه انا واخواتى عند ماما ربنا يخليها لنا يارب ويخلى كل الامهات

علشان كده مش هقعد كتير هنا

مش معقول هسيب يوم زى ده واستنى هنا

ده يوم واحد فى الاسبوع

اكيد بتمنى يكون كل يوم لكن بقى المدارس والشغل بيخلوها صعبه شويه

واجى لكم بالليل بقى اكمل معاكم يومياتى لانى كده هتأخر ولازم اقوم علشان هروح اعمل معاهم محشى

ما تتفضلوا ويانا

يلا اشوفكم على خير
سلام

[خلود]

طبعا انا يشرفنى وجود استاذنا محمد واختى الفاضله ام اياد واى احد من الاعضاء الافاضل فى يومياتى والمشاركه فيها سواء بالرد او المؤازره ولكن اعتقد انى الفقره القادمه وردت فى قوانين اليوميات واتمنى الا يغضب احد من وضعها لكم هنا وذلك حتى يعلمها الجميع

تفاديا لعدم حذف مشاركه اى عضو اتشرف بوجوده فى يومياتى ولكن هذا نص قانون هذا القسم

غير مسموح لاى عضو او اى مشرف او اى فرد التدخل بأى شكل او كتابة رد او تعليق فى صفحة يوميات اى فرد فينا
كل فرد له صفحة يومياته الخاصة وله كامل الحرية فيما يكتبه فما سيكتب هو المسموح لنا بأن نقرأه ونعرفه عن حياته

وفى النهايه اعتز بوجودكم جميعا معى فى اليوميات بقرائتها والاطلاع عليها

واشكركم جميعا

[خلود]

هو فى ايه بقى

محدش هيكتب يوميات غيرى ولا ايه :storm_9401257127043

يلا يااصحابى وصحباتى فى انتظاركم بيومياتكم

[خلود]

صباح الخير على كل حبايبى وصحباتى واصحابى

شفتو بقى حتى يوم السبت اللى هو اجازه انا صاحيه من ايمتى

من 7 الا ربع يعنى مافيش فايده مش فارق مدارس اجازه خلاص هى كده صحيان بدرى بقى وخلاص

وهما كمان اولادى صاحيين وبيلعبوا وفى منتهى النشاط لكن يوم المدارس كسل الدنيا ويااااااه ياماما ايمتى الخميس يجى

يلا نقوم نحضر فطارنا ونشوف اخبار المذاكره والدروس

سمعت امبارح من اختى وهى مدرس اول ان كله هينجح والمواد الدراسيه هيلغوا فيها كتير علشان يخلصوا

لان موضوع انفلونزا الخنازير عامل رعب لكله خاصه ان الحالات بتزيد وبتموت

ربنا يحفظنا ويحفظ اولادنا جميعا يارب

واسيبكم بقى واروح احضر الفطار ونتقابل بعد شويه فى احداث جديده

[خلود]

ازيكم يااصحابى

معلشى غبت عليكم شويه بيومياتى بس كنت تعبانه جدا جدا

من امبارح ومقولش لكم بقى على الالام الاسنان وتعبهم معايا

امبارح بقى بسبب وجع ضرس لى ويارب ميكونش ضرس العقل منمتش طول الليل وبالتالى كان صعب اروح شغلى

نزلتهم مدارسهم ونمت تانى من شده الالم

المهم كان لابد من استشاره الدكتور وطبعا افاد حضرته من ضروره حشو عصب وشغلانه بقى تزهق

لكن الحمد لله على كل شئ

معلشى مش هعرف اطول اكتر من كده

مش ينفع دلوقتى بقى فيه عندنا مذاكره ودروس وشغلانه

[خلود]

على فكره بقى احنا عايزين من المشرف العام استثناء شرط عدم رد الاعضاء فى اليوميات ده

انا عن نفسى برحب بوجود الاعضاء فى يومياتى ومشاركتهم بالرد فيها والتواصل والتفاعل معى حتى لا يصيبنى الملل

ثم فين باقى يويمات الاعضاء بقى

معندهمش يوميات ولا ايه

[fagrmasr01]

خلود
.. اتابع يومياتك بكل اهتمام ..
واعتقد اننى لست وحدى المتابع ليومياتك
لان يوميات نجمة المنتدى تستحق المتابعة والاهتمام
والفكرة فعلا جميلة لانها بتدينا فرصة زى موضوع المدونات
... لكن ...
فعلا مشاركة ورد الاعضاء سيمنع من اصابة الكاتب بالملل
وبدون مشاركة وردود الناس .. فلن يعلم الكاتب مدى التجاوب مع ما يكتبه
كما ان المشاركة مع الكاتب جميلة لانها تفتح الباب لنصيحة او تعليق
.. وهذا قد يؤدى بالتبعية الى تطوير اسلوب الكاتب نفسه ..
انتظر معك الموافقة على تعديل هذا الشرط

[خلود]

صباح الخير

اسعدنى ويسعدنى طبعا وجودك واخوانى واخواتى فى يومياتى جمال افندى

وان شاء الله يحصل تعديل فى الشرط ده لانه فعلا هيعمل تجاوب وتفاعل اكثر مع كاتب اليوميات

[خلود]

النهارده بقى مش هكدب عليكم يعنى عندى ملل من كل حاجه بعملها وده طبعا حال معظم الستات بيزهقوا من الروتين اليومى من شغل البيت والمذاكره وبيجى وقت المخ بيعمل قافله ويبقى مش عايز يعمل حاجه خالص من اللى اتعود عليها

لكن مينفعش طبعا مش نعمل

بس اهو فضفضه وخلاص بقى ياساتر هو يعنى هيبقى من كله

الغريب كمان بقى ان جرايد النهارده مافيش ولا خبر عن انفلونزا الخنازير باين عليها خلاص مشيت من بلدنا او كانت كدبه ابريل ههههههههه

بنتى طالبه منى اعمل لها كشرى وانا يعنى على رأى المرحومه حماتى مش بيحبنى بس مينفعش طبعا بنتى تطلب منى حاجه ومعملهاش

ميصحش طبعا

يلا اما اروح اشوف اخبار القسم العام ايه واظبطه شويه واروح بقى اعمل للهانم الكشرى واجى لكم تانى فى باقى اليوميات

هتوحشونى كلكم وبحبكم كلكم

[خلود]

ازيكم

انا جيت اخد فسحه كده من كل حاجه

يعنى تقدروا تقولوا ريست

طبعا لسه فيه مذاكره ودروس بس خمسه سياحه كده مش وحشين يعنى

وميضرش برضو كان فيه خمسه فسحه مع صديقتى اميره تناقشنا فيها واحوال الدنيا واحوال العيال

بصراحه موضوع المدرسين ده مضايقنا جدا وخلصنا اكتر من 20 كارت شحن فى الاتصالات علشان مواعيدهم اللى ملغبطه جدا دى

وطبعا بسبب ظروف انفلونزا الخنازير بقى فيه ذعر وناس كتير منعت ولادها من المدارس واصبحت فرصه للمدرسين

والله حرام عليهم بجد
ده طبعا غير انهم مش هيخدوا زى من شهرين كده لا طبعا كل حاجه غليت

المهم يلا ربنا يعين بقى هنعمل ايه

[خلود]

ازيكم اصحابى واخواتى

النهارده كان يوم شاق جدا وعدى الحمد لله

ابتدى بدرى اوى مع الشروق تقريبا وقرب ينتهى بالنسبه لى

طبعا العادى بتاع كل يوم مدارس ورحت الشغل بعد غياب اسبوع تقريبا بسبب وجع ضرسى اللى جننى

اكيد كلنا حسينا بالام الضروس دى وتعبها وربنا الشافى بقى

بعد ما رحت شغلى وطبعا اتفرجت على محلات اللى جمب الشغل لزوم العيد والذى منه قبل ما اطلع علشان هكسل انزل تانى

المهم معجبنيش حاجه طلعت وفطرت الحمد لله
واذ فجأه كده وانا قاعده قوم ااااااااااااااااايه بقى

دق التليفون المحمول الموباين يعنى على رأى عامه الشعب هههههههه

والاقى مدرسه بنتى خلود طبعا كلكم عارفين ان خلود ده اسم بنتى الاقى المدرسه تقولى انتى ماما خلود

مش قادره اقو لكم بقى على الذعر والرعب اللى حصل اول ما سمعت منها الكلمه دى قلت لها بسرعه فظيعه ايوه خير البنت فيها حاجه

قالت لا بس موبايلها اتسرق او وقع منها مش عارفين المهم يعنى هى بتقولك كده

اللى فهمته بقى ان البنت سواء وقع منها او اتسرق هى خافت تقولها لى مباشره راحت للمدرسه وطلبت منها تخبرنى هى

رغم انى مش ام قاسيه يعنى والله بس ضياع موبايل برضو مش مسأله بسيطه وتعدى كده وخلاص

المهم قلت لها البنت كويسه يعنى ولا فيها حاجه قالت لا تمام قلت خلاص يلا فى داهيه مقطوع منه النصيب هعمل ايه يعنى فداها

بس اقولكم سر انتم بقى مش بعرف اخبى عليكم حاجه

ده كان موبايل استبن احتياطى يعنى اما موبايلها الاساسى انا واخده منها لان له امكانيات كتيره جدا كاميرا بقى وبلوتوث ومكالمات فيديو وشغلانه

واللى عملت حسابه ادينى لقيته لما حجزته عنها واديتها موبايل عادى خالص مافيهوش اى امكانيات

المهم البنت رجعت البيت ولما باباها وصل من شغله طلبت منه تروح معاه المدرسه يدورو عليه والحمد لله رجعت بيه

لانها عاملاه صامت خوفا من مدرسينها محدش سمعه لما رنت عليه كتير جدا وبالتالى محدش شافه والا مكنش رجع تانى ابدا

طولت عليكم
المهم الحمد لله عدت على خير

واهم خلاص خلصوا مذاكره ودخلوا يناموا

وانا كمان هبص بصه كده معاكم على مواضيع المنتدى واسيبكم بقى واروح انام

واحمد الله على نعمه التى لا تعد ولا تحصى

واشوفكم بكره على خير

هتوحشونى كلكم

[ah-mo]

والله الفكره حلوه وجميله جداااا يا خلود واتمني اني اتواصل معاكو واقدر اني اكتب يومياتي ربنا يقدرني من اليوم لما ارجع من الشغل ان شاء الله
اه نسيت والنبي يا خلود عاوز كماله بنص جنيه ممكن وزودي الدقه والحمص ..

[خلود]

ماشى احمد مستنينك فى اليوميات لما ترجع من الشغل

وبالنسبه للكشرى موعدكش بقى

هو خلاص بقى المره الجايه ان شاء الله

بس ابقى اقف فى الطابور علشان فيه ناس حجزت قبلك معلشى مش علشان مشرف يعنى

احنا هنا معندناش كوسه ولا خيار ولا اى انواع خضار

كلنا واحد مش كده ولا ااااااااااااااايه

شكرا احمد على وجودك فى اليوميات واسعدنى ردك

[خلود]

صباح الخير على كل اهل المنتدى واصحابى

النهارده بقى حصل تمرد ومحدش راح اى مكان غير طبعا زوجى العزيز راح شغله

اما انا والبنات بصراحه قلنا ناخد اجازه بمزاجنا كده ومحدش راح مدارس ولا شغل

قلنا نخليها اجازه طويله شويه خميس وجمعه وسبت

بس برضو والله نازله مدرسه بنتى علشان المدرسين ملغبطين مواعيد الدروس خالص وواجعين قلبى معاهم

هروح بقى اجيبهم كلهم واوقفهم كده واقولهم نسقوا مع بعض بقى وابقو ادونى خبر لانى كل واحد فيهم عايز ميعاد التانى

وانا احوليت معاهم وجالى شلل رباعى ورعاش ونصفى وكل الانواع بتاعه الشلل ههههههههههه :storm_9401257127043:storm_9401257127043

يلا اسيبكم بقى علشان اروح لانهم خلاص طالعين من المدرسه بعد نص ساعه على ما اروح

واما اجى ابقى اكمل لكم باقى اليوميات

هتوحشونى :50 (31):

[خلود]

ازيكم اصحابى

وحشتونى جدا

طبعا انا جيت لكم بعد ميعادى ب 24 ساعه اخر حاجه كنت وياكم فيها انى رايحه مدرسه بنتى اشوف موضوع المدرسين دول

والحمد لله رحت واتفقت وميضرش انى بصراحه احتديت على مدرس فيهم لكن عدت الحمد لله

ورجعنا انا والبنات بقى مش قادره اوصف لكم على اللى جرالى

سخونه ورعشه وبرد وكل حته فى تعبانه جدا

المهم طبعا لازمت السرير طوال اليوم بعد ما اخدت الدواء لانه كان موجود اساسا بحاول اعمل حسابى وادويه البرد تكون موجوده عندى باستمرار

طبعا ولادى استنجدوا بطنط اميره لانها جارتى وطلعت تشوفنى وميمنعش طبعا انها تغلس على وتقولى احط كمامه لتكون انفلونزا خنازير ههههههههه

المهم على بالليل كان الالم بطل يخف تدريجيا ولكن بقى صداع رهيب ونشر فى كل اجزاء الجسم وتعب بالمعده

يعنى برد متمكن فى العضم والمعده

المهم من نتيجه البرد ملازمتى للبيت النهارده وتغيير عاده مهمه جدا الا وهى مرواحى عند الحاجه والدتى وزعلها جدا على وتقولى طيب تعالى نص ساعه وامشى اطنم عليكى بس

لكن طبعا مينفعش خالص لابد من الراحه التامه علشان يعدى دور البرد ده ونخلص بقى منه

لكن على الصعيد الاخر ولادى طبعا متضايقين ونفسهم يروحوا عند تيته بتاعتهم لانه اليوم الوحيد اللى بيطلعوا فيه من الالتزام الاسبوعى بالمدارس والمدرسين

اعتقد كده هيعملوا حركه نداله معاى ويعملوا مؤامره ضدى ويسوقوا الدلال على ابوهم ويقنعوه يوديهم هما عند تيته

مش مشكله يروحوا على الاقل يتهوا شويه

وانا اريح لى شويه كده على ما يوصلوا بالسلامه

موضوع ماتش بكره ده قالب الدنيا كلها ربنا يستر ويكون الفوز من نصيبنا يارب لان شكلنا هيبقى وحش اوى لو لا قدر الله ومحصلش

فرحت جدا لما شفت يوميات احمد مختار وياريت باقى الاعضاء ياركوا ويانا

حتى لو مش هيلاقوا حاجه يقولوها اكيد فيه حاجات تتقال

المهم انا شكلى طولت عليكم

هرجع لكم بالليل ان شاء الله وادعوا لى اكون اتحسنت شويه عن كده لانى فعلا لسه تعبانه جدا والحمد لله على كل شئ

[ah-mo]

يا ست الكل الف مليون سلامه يا ريت تكشفي ومتخديش ادويه من غير كشف وشكرااا جدا علي مجاملاتك الحلوه الرقيقه والف سلامه مره تاني ومنتظرينك

[خلود]

ميرسى لك اوى يااحمد على شعورك النبيل

واهو الحمد لله دلوقتى بقيت احسن

اللهم لك الحمد والشكر

[خلود]

السبت 14/11

النهارده يوم اجازه من الشغل والمدارس بس طبعا الانسه بنتى راحت دلوقتى درس قلت فرصه ادخل ابص كده بصايه واشوف اصحابى اخبارهم ايه

وحشتونى كلكم

انا النهارده الحمد لله احسن كتير عن امبارح بس هو واضح ان الدور ده فعلا عايز راحه تامه وعدم الخروج خالص

واهو بسببه انحرمت من انى اشوف والدتى واخواتى واتجمع وياهم

يلا الحمد لله على كل شئ

المهم دخلت النهارده لقيت صديقنا محمود عبد الله منور فى المنتدى ومحمود ده كان من اوائل الناس اللى اشتركوا فى المنتدى

وبجد كانت احلى ايام كنا عاملين زى الديوك انا وهو واميره ومحمود التهامى ونور والاحباب والباشا

كانت مواضيعنا كلها مناقشات وهزار وضحك واللى مش مصدقنى يرجع للمواضيع القديمه ويشوفها

وطبعا المنتدى منور طبعا بأعضائه اللى منورينه حاليا لكن ميمنعش برضو الواحد يحن لذكريات كانت جميله جدا

بس محمود طمنى انه هيتواجد بينا تانى لانه كان مشغول فى دراسته ولما بيعرف يدخل بيدخل ونتمنى له ولكل الطلبه يارب التوفيق

اعتقد لازم اقوم دلوقتى لانه وقت صعب جدا حاجات كتير لازم تتعمل علشان تخلص قبل الماتش المرتقب بين مصر والجزائر

يارب المكسب لمصر يارب

ونتقابل بعد الماتش ان شاء الله

واقولكم السلام عليكم

[fagrmasr01]

الف سلامة ليكى يا نجمة المنتدى
شفاكى الله وعافاكى

اشربى ليمون وينسون وسوائل كثير
ربنا عز وجل يشفيكى ويعافيكى باذن الله

ومعاكى نتمنى النصر لمصر
باذن الله

[اميرة حبى انا]

بجد انا كمان مبسوطة جدا بعودة محمود عبدالله
وفعلا يا خلود
كانت احلى ايام
ان شاء الله ترجع تانى
ولو مرجعتش
....................
مش هرجع انا كمان

[خلود]

[QUOTE=fagrmasr01;42786]
الف سلامة ليكى يا نجمة المنتدى
شفاكى الله وعافاكى
الله يسلمك جمال واشكرك على الدعوه

اشربى ليمون وينسون وسوائل كثير

تم يافندم لما رجعنا من كتر الينسيون والليمون
ربنا عز وجل يشفيكى ويعافيكى باذن الله

اللهم امين ولك مثل ما دعوت

ومعاكى نتمنى النصر لمصر
باذن الله

الحمد لله النصر مؤجل ولكن هناك نصر تم اليوم وعقبال يوم الاربع

اشكرك على التعليق جمال وعلى وجودك فى يومياتى ويسعدنى وجودك فيها

[خلود]

[quote=اميرة حبى انا;42818]
بجد انا كمان مبسوطة جدا بعودة محمود عبدالله
وفعلا يا خلود
كانت احلى ايام
ان شاء الله ترجع تانى
ولو مرجعتش
الست بتقول عايزنا نرجع زى زمان قول للزمان ارجع يازمان

مظنش الحاجات الحلوه بترجع تانى لكن احنا برضو نحاول نخلى اللى جاى احلى ان شاء الله
بوجودنا كلنا سوا ومحدش يبعد عن التانى
....................
مش هرجع انا كمان

بطلى بقى الكلام ده ومتقوليهوش تانى

[خلود]

السلام عليكم اصحابى وصحباتى

ازيكم وحشتونى جدا

انا سيبتكم قبل الغداء وطبعا كنت مستعجله علشان النهارده يوم مش عادى

كان فيه ماتش ومش اى ماتش ده متش مصر والجزائر

المهم خلصنا موال الغداء معلشى اصل الغداء عندنا له موال زى كل البيوت كده شغلانه بقى وكلى يابنتى ووتفضل متنحه قدام التليفزيون كده

المهم خلصنا واستعدينا للماتش وعملت طقم شاى معتبر كده ولسه هنقول ياهادى والقى جارتى نازله ال ايه تطمن على لما سمعت انى كنت تعبانه

طيب وهو ده وقته المهم يعنى قلت لها كده عادى بقى هى عارفه انى بهزر معاها

قعدنا نتفرج على الماتش وياساتر كانت حرق اعصاب فعلا

ومع فرحه الجون الاول استبشرنا خير وقلنا يامسهل الاجوان جايه كتير

ولكن بقى محصلش تانى اى حاجه غير دفاع مستفز مع تضييع للوقت متعمد من لاعبى الجزائر

المهم قبل نهايه الشوط التانى وفى الوقت الضايع عماله اقول يارب يارب لغايه ما تعبت
وفعلا اللى يقول يارب عمره ما يخيب رجاه ابدا ربنا اكرمنا بالشوط التانى ومش قادره اقولكم بقى انا جرى لى ايه

قعدت اتنطط واتشال واتهبد فى الارض لغايه ما اغمن على اغمن على ههههههههههههههه

بجد والله من الفرحه بعد ما كان خلاص فيه يأس من اننا نعدى الماتش ده ولقيت بقى ناس بتفوق فى وناس بتزغرط وحاجات كده

حتى اختى اميره طلعت مكنتش مصدقه انى كان ممكن يحصل لى كده من ماتش

الحمد لله يارب عقبال الماتش الجاى ان شاء الله ونعديه على خير

عاجبانى جدا يوميات احمد مختار حسيت فيها مصداقيه جميله جدا وبقصه كفاح شاب من البدايه لغايه ما قدر يعمل له اسم وكيان فى مجال شغله

اسال الله له التوفيق وان يكون النجاح حليفه فى كل خطواته

اسيبكم بقى علشان عندى شغل الصبح بدرى واقابلكم بعد رجوعى بمشيئه الله اذا كان فى العمر بقيه

استودكم الله

[ah-mo]

يا ست الكل هو انتا اللي كنت عامله زلزال بقوه 7 راختر دنا سمعته في حلوان وفي الاخر يطلع طنطيت الست ام خلود
ياااااااااااااااااا
عوز بقي ان شاء الله براكين يوم الاربعاء والله احنا بقالنا كتير مفرحناش ربنا يستر ويتم فرحنا يوم الاربعاء
مبروك علينا الفوز
مبروك علينا عوده الغائبين عن عيوننا
ام اعجابك بيومياتي فانت السبب فيه لانك انت واميره وورده الايمان اول وشكلها كدا اخر المشجعين
شكرا اميره
شكرا ام خلود
شكره ورده
وبنتظارك باكر ان شاء الله يا ام خلود

[خلود]

الاحد الساعه 15ر11 بالليل طبعا

طبعا مكنش فيه اى فرصه اقعد احكى لكم حصل ايه النهارده

لانى رحت شغلى ورجعت طبعا على الغداء مباشره واهو اليوم عدى بسرعه كده معرفش ازاى
المهم عايزه احكى لكم عن موضوع الساعه عندنا فى الشغل

طبعا انتم عارفين انى موظفه فى وزاره التموين
المهم بقى اننا منصب المدير العام بتاعنا اصبح فارغ بترقى المدير السابق الى درجه وكيل وزاره عقبالى يارب كده

وطبعا ناس كتير رشحت نفسها للمنصب ده واتعمل امتحانات وشغلانه
ومن الناس اللى رشحوا نفسهم زميله هى طبعا اخدت درجه اولى من فتره وحصلت على درجه كبير ودى اعلى درجه فى الترتيب الوظيفى زى ما بيقولوا كده
المهم الحاجه دى بقى ياحضرات كانت مديره اداره بس مش مديرتى والحمد لله
ولما طلبوا تعيين مدير عام اتقدمت الاخت لشغل الدرجه
واسمحوا لى اعرفكم عليها هى ست بتاعه شغل بصراحه يعنى دماغها ميه ميه فى الشغل وتشغل 100 وست وراجل تحت ايديها شخصيتها قويه جدا
لكن مافيش عندها رحمه خالص بظروف موظف ولا تعبان ومالهاش الا حضور وانصراف وبس

المهم الاخت اتقدمت للوظيفه ودخلت الامتحانات واجتازتها بنجاح منقطع النظير وحطينا احنا بقى ياحضرات ايدينا على قلوبنا من المستقبل اللى بينتظرنا على ايد الست المدير العام
كله متخوف منها من صغير لكبير وعاملين حساب جامد جدا لليوم اللى هتمسك فيه
اللى يغيظ قى ان من قبل ما يطلع لها قرار تعيين عملت علينا مدير عام وهات ياتفتيش وهات يادفاتر على مكتبها
حتى زملائها الناس اللى على نفس درجتها وواخدين درجه كبير مرحمتهمش وامرت سيادتها بحضورهم امامها شخصيا الساعه 8 ونص والساعه 2 ونص يعنى حضور وانصراف

وقعدنا ندعى ونقول يارب انت حنين يارب متحكمش فينا حاكم ظالم

بصراحه ومن خلال وجودى كام سنه فى العمل الحكومى بحس ان رئاسه الرجل لمنصب قيادى افضل من الست مش عشان هو راجل والعنصريه دى
لكن لان الست ما بتصدق تتمريس وتبقى غلسه جدا على الست قبل الراجل
المهم اللى سمعناه النهارده ان احتمال بنسبه 75 & انها مش تمسك مدير عام لان فيه شكاوى كتير وصلت للوزير ضدها وان الجهاز التنميه الاداريه بيعيد النظر فى توليها المنصب من عدمه

ياالله ياسلام ده يبقى احلى خبر فعلا

المهم وكانت طبعا اخار الماتش مكتسحه كل الاخبار وفرحه كل الناس مش تتوصف ابدا

ورجعت طبعا عملت غداء ومش هقول لكم بقى علشان بتقعدوا تقولوا عايزين وشغلانه هههههه

قعدت شويه على المنتدى لقيت لعبه القطر ولعت على الاخر بين اخوانا الرجاله وسيدات المنتدى الجميلات وطبعا بخرتهم من العين والحسد

وطبعا كانت لنا جلسه مباحثات قصيره بينى وبين اختى وثاحبتى اميره لبحث رأب الصدع فى منتدانا هههههههه

وعدت على كمان جاره لى مش عارفه حاسه انى قاعده فى دوار العمده هههههههه جارتى مدرسه وقالت لى اخبار مش كويسه عن المدارس بلاش بقى اضايقكم بيها

طبعا اسلوبى فى الكتابه ركيك جدا يلا اتحملونى بقى وخلاص امركم لله

عجبتنى فى يوميات احمد النهارده قصه حب جاسر اوى بس يخساره مش كل قصص الحب بتنتهى نهايه حلوه زى الافلام كده

ياريت باقى الاعضاء يشاركوا فى انهم يحطوا يومياتهم كده

اشوفكم بكره بقى ان شاء الله

[ah-mo]

ازيك يا ست ام خلود ايه اليوميات الجامده دي
والله برفو ؟؟؟؟؟؟؟؟
احب اعرفكك ان الراجل في المناصب القياديه بيكون ممتاز في كل شيئ وبيكون راحه للكل لكن للاسف الست لما بيتكون في المنصب دا بتكون متعبه جداا هي ممكن تريح زملائها الرجال لكن تتعب زميلتها عارفه ليه عشان ست زيها فبالتالي عارف كل ظروف الستات من معانتهم في الموصلات والاولاد والبيت ولكنها لا ترحم لكنها تسامح الرجال ال ايه عشان جوزها راجل ؟؟
علي فكره انا اعتقد ان الست دي هي اللي هتمسكك مدير عندكم هاهاهاهااهاهاهاهااههاهااهاهاهاها دي هتظبتكم
اما اليوميات بتعتي فانتظري اليوم المفاجاه
يومياتك حلوه اوي وجميله
يلا صباح الفل عشان هخرج سلام

[fagrmasr01]

بجد اسلوبك كويس اوى يا خلود فى الكتابة
وكل الى كتبوا يومياتهم بجد طريقة حلوة وجميلة وباذن الله هاحاول التقليد
وخصوصا أميرة .. الاستاذ مختار .. وكتكوووووتة الكتكوتة
وانتى طبعن كمان يا ست خلود

على فكرة.. انا كانت عندى رئيسة فى الشغل زمان.. لكن كانت قمورة وطيبة وحلوة وزى العسل.. وكنت باعاكسها كمان واهزر معاها وكانت ظريفة اوى

وبالمناسبة برضو .. ف يوم هى شافت صورتها على مكتبى . وافتكرت انى شايلها للذكرى وانى حاططها قدامى مخصوص... فررررحت اوووى واتبسطت اوى اوى اوى .. ومن ساعتها بقت تعاملنى معاملة ظريفة اوى
مع انى كنت حاطط صورتها عشان كانت واقعة من ملفها وكنت ناوى ادبس الصورة عشان متقعش تانى
هههههههه
دى مجرد ملاحظة يعنى ع الماشى.. بمناسبة الست الريسة
ربنا يسعد قلوبكم وتفرحينا باخبار سارة كتير
:36_3_12[1]:

[خلود]

[QUOTE=احمد مختار;43107]ازيك يا ست ام خلود ايه اليوميات الجامده دي
والله برفو ؟؟؟؟؟؟؟؟

علي فكره انا اعتقد ان الست دي هي اللي هتمسكك مدير عندكم هاهاهاهااهاهاهاهااههاهااهاهاهاها دي هتظبتكم

على فكره احمد انا بكرهك بقى :50 (8):

انا من الاول مكنتش مستريحه لك اتارينى احساسى مش بيخيب ابدا :storm_9401257127043:storm_9401257127043

يارب مش تشمت فى احمد مختار يارب ومش تمسك الست دى ولا اى منصب فى الدنيا يارب
اما اليوميات بتعتي فانتظري اليوم المفاجاه

ماشى يااستاذ احمد فى انتظارك لما نشوف اخرتها معاك
يومياتك حلوه اوي وجميله

بعد ايه بقى زعلانه منك بقى
يلا صباح الفل عشان هخرج سلام

الف سلامه وربنا يوفقك يارب وترجع لنا بسرعه بسرعه :36_3_12[1]:

[خلود]

[QUOTE=fagrmasr01;43159]


وبالمناسبة برضو .. ف يوم هى شافت صورتها على مكتبى . وافتكرت انى شايلها للذكرى وانى حاططها قدامى مخصوص... فررررحت اوووى واتبسطت اوى اوى اوى .. ومن ساعتها بقت تعاملنى معاملة ظريفة اوى
مع انى كنت حاطط صورتها عشان كانت واقعة من ملفها وكنت ناوى ادبس الصورة عشان متقعش تانى
هههههههه
دى مجرد ملاحظة يعنى ع الماشى.. بمناسبة الست الريسة
ربنا يسعد قلوبكم وتفرحينا باخبار سارة كتير

ههههههههههههههههههههههههههههههههههههههه

يعنى كانت مفكراك معجب بيها

ههههههههههههههه
:36_3_12[1]:


شكرا ياجمال على ردك الجميل ويلا فى انتظار يومياتك

[ah-mo]

الست الريسه ام خلود
شفتي راي الاستاذ جمال ؟؟؟
عشان تعرفي المديرات بتعامل الرجال ازاي
معلش بقي ارضي بنصيبك وخلاص هي ديتها ايه تروحي 8 الصبح وترجعي 4 ومفيش جهود ولا حوافز
ومهما الست تشتغل برضه هتكون بنظر مديرتها مش بتشتغل
معلش ورنا يصبركم علي ما بلاكم
ياااااااااااااااااااااااا لو انا معاكي في الشغل كنت مشيتلك المديره علي العجين متلغبتوش
كل سنه ونتي طيبه يا ست الكل

[خلود]

ماشى يااحمد

اعمل انتداب عندنا قد سنتين تلاته كده

لما نشوف هتعمل ايه مع مديرتنا

على فكره ان شاء الله مش هتبقى مديرتى بقى

[خلود]

التلات مساء

ازيكم اخباركم ايه

مش عارفه انا بصراحه مش بحب ادخل اليوميات وانا مضايقه بس بجد حاجات كتير بتخلينى مش حاسه بانبساط كده

مجال الشغل بقى مش حلو خالص غير المناصب والخناق عليها تلاقى ناس نفوسها مش كويسه واللى تبقى قاعده معاكى وبعد ما تلفى بس كده تتكلم عليكى واللى مجرد ما تحسى برضا مديرك عليك تقول اشمعنى وحاجات كتير بصراحه تخنق

فعلا حسيت بعد مده العمل دى ان الشغل فى القطاع الخاص احسن مش علشان الراتب ولا الحاجات التانيه علشان بيخلى الموظفين معندهومش وقت لكل ده طول النهار شغل وبس لغايه ما يجى ميعاد الانصراف

لكن مجال العمل الحكومى مش عايزه اقول معظم الوقت مش بنعمل حاجه طبعا الكلام ده مش فى كل الاماكن فيه اماكن عندنا فى الوزاره مش بيقوموا من على مكاتبهم وطول النهار بيشتغلوا بصراحه يعنى طلعان عينهم فى الشغل

المهم بقالى فتره كده بفكر فى حكايه نص الوقت دى اللى عاملها احمد مختار ولكن لسه بدرسها كويس وربنا يسهل

كمان موضوع المدارس ده والقلق اللى شايفينه بقالى اسبوع مش وديتهم مدارس والحمد لله مظهرتش عندهم حالات ولكن الخوف والقلق ناس تقول فيه وناس بتكدب

ريحت نفسى وقعدتهم بس طبعا المذاكره اتأثرت كتير جدا ومش هكدب عليكم انا مش قد كده فى كل المواد صحيح بدى دروس لكن فيه مواد مش وديتهم فيها دروس وادينى بحاول وياهم

لكن طبعا طالما مافيش مدارس يعنى فيه دلع وصحيان متأخر ونوم كمان متأخر وشغلانه

النهارده نزلت السوق ورجعت من السوق نزلت تانى وصلت الهانم للدرس بتاعها ورجعت عملت غداء وبجد شغل البيت مرهق جدا وسعاده البيه نايم طبعا

مش هو الراجل يبقى خلاص بقى سى السيد

ما علينا

قريت جزء من يوميات احمد النهارده وكتبت تعليق لصديقه شريف وياريت يستجيب ويسيبنا نتابع وياه اليوميات

لو افتكرت حاجه تانى بقى هبقى ادخل واقولكم عليها

بس بصراحه مظنش

اساسا انا زهقانه جدا من كل حاجه

بفكر ادور على اى جزء من فيلم او مسرحيه تضحكنى شويه واقوم انام

اقولكم سلام والى لقاء قريب ان شاء الله

[ah-mo]

ايه يا نجمه الكلام دا؟؟؟؟؟
ايه كميه الياس اللي في كلامكك دا ؟؟؟؟؟؟
اولا انا عاوزكك متياسيش من شغلك وتحبيه حاولي تصحبيه اعتبريه حد صحبك وانت راحه الشغل حتي تشعري بالارتياح تجاهه وكمان ملكيش دعوه باصحابك خليكي في شغلكك عشان لو بصينا لاصحبنا يبقي مش هنخلص
ربنا معاكيي اما انك توجهيي نداء لشادي فدا بجد نبل منك والله العظيم اشكركك عليه بجد
ويؤسفني ان ابلغكك اني قررت الاحتجاب عن الكتابه
يعني شويه ظروف كدا بس مش بسبب شادي لا
ولو حضرتك حبيتي تعرفي بقيه الحكايه ممكن ارسلهاك خاص او رساله
علي فكره انا نزلت اخر جزء ابقي شوفيه
صباح الفل
وابقي اسمحلي ان اعلق علي يزمياتكك

[fagrmasr01]

فين يوميات ما بعد المباراة يا خلود

[خلود]

شكرا على نصائحك الغاليه احمد وهحاول انفذها بحذافيرها حاضر

بالنسبه لشريف بصراحه انا رافضه اسم شادى لانى عرفته بشريف انا قلت يمكن بعد النداء يعرف ان فيه ناس مهتمه باليويمات ويخليك تكملها

بس اهو اللى حصل بقى

بالنسبه لوجودك فى اليويمات ده شئ يسعدنى اكيد احمد وميرسى لك جدا

وميعادنا فى السهره ان شاء الله فى جزء جديد

[خلود]

حاضر ياجمال بس بعد المباره محدش كان له نفس اصلا يعمل حاجه

[ah-mo]

الله غالب .....

[خلود]

السلام عليكم ورحمه الله

ازيكم اصحابى وحبايبى

وحشتونى جدا جدا ومعلشى اتأخرت عليكم بس بصراحه مكنش لى نفس لاى حاجه
ولا شغل ولا يوميات ولا اى شئ

ساعات الواحد كده بيحس بزهق من كل حاجه كان بيعملها
المهم طبعا من امبارح والدنيا كلها مالهش سيره غير الماتش واللى جرى فيه

ومش هتكلم انا كمان عنه لاننا حصل لنا تشبع بس عايزه اقول انى لسه شايفه محمد فؤاد وهيثم شاكر وماجد المصرى كلهم اجمعوا على ان محصلش لنا اى حمايه ولا امن من السودان بالعكس هما شعروا انهم فى الجزائر
خلاص بقى مش هتكلم عن الماتش
النهارده نزلت انا وبناتى ومعانا اختى وثاحبتى اميره اشترينا ملابس العيد للاولاد كلهم والحمد لله اشترينا بس بصراحه كل حاجه غاليه جدا وطبعا لان انا عندى بنات عايزين بقى غيلا الملابس اكسسوارات من توك وخواتم وحاجات البنات اللى تعل

وبصراحه كل ما افتكر العيد زمان ومتطلباتى وبناتى حاليا احس انى كنت بسيطه جدا وعبيطه اكتر

مكنتش بطلب زى بناتى كده من ماما ولا اخواتى مكنش ده من ضمن اهتمامتنا كنا بنهتم بالخروج مع اصحابنا والعيله والفسح طبعا ولادى كمان بيربطوا من دلوقتى على كل الحاجات دى

طبعا زهقونى من الاختيار ده حلو وده وحش ولسه زوقهم مش قد كده واجى اختار انا يقولوا لا ياماما غيريه ولكن الكبيره خلاص بتختار لنفسها ومش ممكن تتنازل عن اللى اختارته لحد ما نحاول نوصل سوا لحل وسط بس بصراحه هى زوقها حلو ولها نظره فى الحاجات اللى بتشتريها وطبعا اميره زوقها جميل جدا فى لبس البنات خاصه علشان كده لازم تنزل وياى لانى بعتمد كتير جدا على رأيها واحيانا كتير ابعت البنات معاها لو انا مش فاضيه تشترى هى معاهم لبسهم
جميل ان الانسان يكون له صاحب واخ يعتمد عليه ويحس معاه بالراحه والامان وعلاقتى بأميره جميله جدا بتمنى ربنا يديمها كده على طول لانى بعتز جدا بالعلاقه دى

هى فعلا نعم الصديقه والاخت واقدر اقول الاخ والله فى بعض الازمات واعتذر عن تشبيها بالرجل ولكن هذه هى الحقيقه فهى من الشخصيات اللى ممكن تعتمد عليهم فعلا خاصه فى الازمات
هقولكم حاجه عن بدايه علاقتى بأميره طبعا الكل يعرف اننا جيران فى نفس العماره وفى بدايه السكن لا كنت بستريح لها ولا هى كمان خالص
هى كانت مفكرانى مغروره ومش بعبر حد ولا انا طالعه ولا انا نازله ولكن انا كنت برمى السلام وخلاص مش مطلوب منى اكتر من كده وانا كمان كنت شايفاها برضو مغروره

للعلم هى مكانتش برضو من هواه الاختلاط بس ميمنعش كلمتين كده بين الجيران فى اى موقف يعنى
انا حتى الكلمتين دول مكنتش بقولهم
تقدروا تقولوا كنت فى حالى خالص وده نظرا لظروف وجود حماتى معاى فى نفس السكن فكنت بريح دماغى وابعد عن كل شئ

لغايه ما حصل عندى انا ظرف معين وعكه صحيه وهى جت وزارتنى وبصراحه وقفت جمبى فيه زى الاخت ويمكن اكتر بصراحه

ودى شهاده حق انا كنت بلاقيها اكتر ماا الاقى اهلى جمبى ومن هنا توطدت علاقتى بيها جدا لدرجه ان طبعا بعض جيرنا هنا متغاظين مننا وبيحقدوا علينا


حتى العيلتين خلاص عرفوا ارتباطنا ببعض قد ايه ولما اكون عند ماما ويجى لى تليفون تبقى اميره وهى كمان العكس بالظبط
اكيد حصل بينا مناقشات ومناوشات يمكن لقرب السن بين الاولاد والبنات كانت بتخلينا مش عايزه اقول نزعل لاننا مش بنوصله للزعل لكن خلاف فى وجهات النظر نسكت كده يوم مش اكتر ونتفاهم تانى وترجع الامور تانى زى الاول ويمكن اكتر

بتمنى ربنا يديم علينا اخوتنا لبعض وميدخلش بينا اى حد يفسد العلاقه الجميله دى ودايما بقولها ربنا ما يجعل لنا جار وله عينين

طبعا ولادى بما ان النهارده الخميس سهروا قصاد الكمبيوتر شويه ومش عايزين يقوموا بيتفرجوا على فيلم وانا سيبتهم شويه لغايه ما ناموا قدامه

بكره ان شاء الله يوم العيله عند ماما وطبعا وحشونى جدا ومن المرات القليله اللى بيعدى اسبوعين مروحش فيهم عند امى لكن بقى ظروف مرضى الاسبوع اللى فات بعدتنى عنها شويه ومعرفتش خالص اروح لها فى وسط الاسبوع الشغل بقى والمدارس والمدرسين
بيبقى يوم ظريف جدا وجميل جدا من بدايته لغايه ما نرجع بيتنا لمه العيله والاخوات وتحسى انك رجعتى تانى عيله مع احلى ذكريات طفوله وجيران واصدقاء

يلا اروح بقى اشوف اخبار القسم العام ايه واظبطه كده لو فيه مواضيع مكرره ولا عايزه تتظبط

ان شاء الله اشوفكم بكره على خير بعد الساعه 11 بقى

وتصبحوا على خير

[lionking]

على فكرة يا خلود انا اول مرة ادخل اليوميات دى

بس بجد يوميات حلوة ولذيذة

يلا كملى يا ست النجمة

احنا مستنيييييين

[ah-mo]

صباح اللوز والفسدق عليهم قشدة البندق يا اجمل ما خلق ربي ان شافكك حجر ينطق ( تحيه جزائريه ) علي الماشي
احلي حاجه في الدنيا ان يكون لك صديق وفي واحلي شيئ لما يكون الصديق دا جاركك واحلي حاجه لما الصديق دا يكون معرفته جت في وقت ضيق ...
ودا اللي حصل معاكي ومع اميره عشان كدا اقدر اقولك ان الصداقه دي انها زي القلب والعقل في جسم الانسان كلا يكمل الاخر ولا يمكن الاستغناء
عن الاخر.
ربنا يديم محبتك لاميرة ومحبه اميره ليكي ..
ربنا يجمعكمم علي الخير وفي الخير والفرح يا رب
تحياتي,,,,

[خلود]

السلام عليكم يااجمل اعضاء

وحشتونى اوى فى اليوميات

بجد ببقى نفسى اقعد وتكلم كتير وياكم

بس معرفش الدنيا بقت زحمه اوى كده ليه

والوقت بقى ضيق اوى كده ليه

المهم النهارده الجمعه وعندى الزياره الاسبوعيه اللى اتنقلت عندى هنا بحكم وجود ماما عندى

وطبعا انا حاليا فى انتظارهم ومفروض اقوم اجهز باقى الغداء بس مش قادره مدخلش المنتدى وابص بصه كده فى السريع

وبعدين بقى ما اليوم طويل هو مش طويل اوى يعنى بس مش مشكله لما يتغدوا متأخر شويه فى سبيل منتداى الحبيب اللى بتمنى اقعد عله اكتر وقت ممكن بس الظرو مش مساعدانى خالص

المهم اما الحق بقى اخد لى جوله كده فى السريع جوه المنتدى

اشوفكم على خير قريب ان شاء الله

[ahmed love]

يوميات جميلة يا خلود

[خلود]

ازيكم ياجماعه

وحشتونى اوى

معلشى النهارده يوم مش مظبط بالنسبه لى خالص ويمكن لانه بيوافق الذكرى السنويه لوفاه والدى رحمه الله عليه اللى كنت بحبه جدا وبحترمه جدا ولكن ده حكم الحياه ناس تفارق ناس وناس تبعد عن ناس ودى سنه الحياه

بكره كمان اجازه بقى تحرير سيناء والحمد لله هنصحى من النوم متأخر شويه يعنى نقوم براحتنا كده

ومش قادره اقولكم بقى العيال فرحانين بالاجازه دى قد ايه لانهم 3 ايام اجازه وراء بعض وهما نفسهم فى الاجازه دى من بدرى طبعا

اصلا اصلا هما خلاص زهقوا من المدارس ومش طايقينها وبيروحوا بالعافيه يلا اهى هانت وقربنا نستريح من المدارس والمدرسين والمذاكره والوش ووجع الدماغ

امبارح بقى كان يوم جميل جدا لان العيله كلها كانت عندى واليوم عدى على خير الحمد لله

واشوفكم بكره ان شاء الله فى يوميات جديده ان شاء الله

[خلود]

وحشتونى ووحشتنى يومياتى وهرجع لها تانى ان شاء الله

[خلود]

وحشتونى تانى وتانى يااجمل اصحاب
معرفش اشمعنى النهارده بالذات حبيت اجى واكتب هنا واسترجع شويه من اللى قريته
غبت كتير اوى عن يومياتى وحصلت حاجات كتير فيها الحلو وفيها اللى يزعل ويضايق واتغيرت مفاهمي كتير اوى جوايا
عن الصداقه والاخوه والمبادئ وحاجات كتير سمعت عنها وكنت مفكراها موجوده ولكن للاسف كله كلام وضحك على الدقون

انضمت لنا فى المنتدى ناس كتير وبعد عننا ناس كتير وفى بعدهم عنا بنحزن جدا بس جايز يرجعوا تانى ولو انى متاكده ان معظمهم بيدخلوا لنا زوار وبيشوفوا ايه اخر اخبار المنتدى وده لانهم بيحبوه جداوفيه منهم انضم لنا بيدور على حاجه معينه مش لاقاها ساب المنتدى ومشى
وبتمنى اللى انضم لنا ميبعدش لانه فعلا هيلاقى هنا ناس كويسين واصحاب محترمين جدا

اما عنى انا مش مظبطه خالص وبمر بشويه ظروف مش تمام خالص وصعبه جدا ولكن هذا ابتلاء وقدر واتمنى ربنا يدينى القدره على تحمله وتجاوز المرحله الصعبه دى

بتمنى ان رمضان يجى علينا السنه والناس اسعد واهدى واروق رغم الظروف الصعبه اللى بتمر بيها مصر ومخليانا كلنا مشدودين ما بين مؤيد ومعارض

يمكن لان حالتى النفسيه مش مظبطه مش هتكون يومياتى دمها خفيف زى عوايدى ولكن فيه مراره جواى وزعل جامد اوى

معلشى سامحونى وبتمنى المره اللى جايه اجى لكم وانا افضل عن المره دى ان شاء الله

[خلود]

رجعت لكم من تانى بيومياتى ولكنها مش يوميات قد ماهى تسجيل للحظات بعيش فيها

بس يمكن لحظاتى اليومين
دول كئيبه شويه وربنا يفكها من عنده بقى
امبارح ظهرت نتايج الثانويه العامه وكانت محبطه لناس كتير ومش عارفه ازاى بيقولوا النتيجه كويسه وفيه مجاميع مش حلوه خالص
بس يعوضوا ان شاء الله السنه اللى جايه
هلت علينا روايح رمضان وايامه الجميله ويارب يعيده علينا كلنا بكل الخير يارب

وبعده بقى على طول مدارس تانى ودوشه ووجع دماغ

فاصل وارجع لكم تانى

[قموره]

يومياتك حلوه ياخلود و اتمنى زوال كل اسباب الضيق لكى وللجميع

[خلود]

انا اميره على نفسى وملكه على عرش ذاتى

داخلى طموح من ذهب ودموع من سراب

انا امرأة لاتنحني لتأخذ ماسقط من عينيها ابدا

انا امرأة لاتشكو فالشكوة انحناء... وكيف أشكو ونبض عروقي كبرياء

أن كل شخص له طبائعه الخاصة ..وأنا طبعي هو عزة نفسي وكبرياؤها

وكرامتى فوق كل اعتبار

أن دمعتي مصدر رقتي ..لا مصدر لذلي و مهانتي

من يخرج من حياتي بأرادته لا يعود لها إلا بأرادتي

خواطر اعجبتنى

[فريد]

و عودة الى اليوميات
يلا بلاش كسل كل واحد يرجع
يومياته
تانى
حلوة الخاطرة
ياخلود

[خلود]

شكرا يافريد على متابعتك الجيده

بس متتعودوش على كده

الخاطره كانت تعبير عما يجول بالخاطر وينبض به القلب

[خلود]

السلام عليكم

وحشتونى جدا يااجمل اصحاب

النهارده رجوعى لليوميات صعب جدا جدا

لان خلاص مبقاش فى حد اسمه جمال يتابع ويجى ويعلق

بجد المنتدى دمه تقيل اوى من غيره

ينقصه كتير جدا

بوفاته فقدت الاخ الغالى والصديق اللى ياما اختلفنا بس كنا بنرجع نتكلم تانى ونتناقش تانى ونهزر من جديد ولا كأن فى حاجه

وحشنى ياجمال جدا ويارب يجعل مثواك الجنه يارب

الكلام كتير اوى يارب صبر اسرتك وصبر اخواتك هنا فى بعدك عننا