سؤال انتم مسئولين عن اجابته

[اميرة حبى انا]

السلام عليكم ورحمة الله وبركاته
معلش خلاص راسى هتنفجر من التفكير
وبما ان كل اللى فى المنتدى هنا علمنى اعرف وافهم اللى بيحصل
اه علمتونى
لانى كنت بعيدة كل البعد عن السياسة وعلى فكرة مكونتش اعرف اسامى الوزراء الا وزير التعليم عشان هو اللى يهمنى
واه قولت حسنى مبارك يمشى بس من غير مانطول لسانا
وعلمتونى وعرفتونى عمل ايه
انتو مسئولين تردوا على اسئلتى عشان مش عارفة اسأل مين ومين عنده اجابة عليها
البداية احب اعرفكم انى كنت عارفة زى ناس كتير اللى هيحصل يوم 25 يناير كنت عارفة قريت الكلام وشوفت الناس بتقول لبعضها ايه على النت
وقلت لجوزى وجيرانى بالحرف
مكتوب ان حاجة كبيرة هتحصل بس هتحصل ولا لأ الله اعلم
وجه يوم 25 وصحيت الصبح فتحت التليفزيون وكان المنظر روعة مصدقتش نفسى
نفذوا كلامهم وخرجوا
وجه الليل وابتدا الامن المركزى يرش عليهم المياه وسمعتهم وقريت كلامهم بالليل انهم هيرجعوا بكرة تانى
ومنمتش طول الليل
ياترى هينفذوا كلامهم؟؟؟؟؟؟؟؟؟؟
الله نفذوا كلامهم وبقيت فى قمة السعادة اللى كان بيتكتب فى المنتدى عن اللى بيحصل فى مصر اهو فى ناس نزلت تطالب بتغييره
وجه خطاب الرئيس وزعلت واقولكم الحق بكيت صعب عليا وفرحت انه شال الحكومة اصلى كنت مش عايزة احمد زكى بدر
بس بعد دقايق من الفرحة وجوا نفسى سألت سؤال طب هو ده التغيير المطلوب
رديت على نفسى وقلت لا الناس مش هترضى هما عايزين اكتر من كده لان المطالب كانت واضحة وهو مقالش غير استقالة الحكومة
لحد ما جه يوم الضرب والقتل مصدقتش اللى كنت بشوفه والله ويومها الصبح نزل ابنى وجوزى هنا عندنا فى الجيزة وداقوا مرار القنابل المسيلة للدموع بس الحمدلله رجعولى بالسلامة واحمد ربنا
ده نفس اليوم
جمعة الغضب
بقيت اتنطط هتجنن طيب ليه
بقيت اعلى صوتى واقول بيضربوهم وهما بيصلوا
يالهوى الحقوا العربية راجعة لورا داست الراجل
الناس بيهتفوا
يا ابو بدلة ودبورة وكاب احنا اخواتك مش ارهاب
طب ليه
قالوا هو ده النظام
بقى هو ده النظام:1:
وجه الخطاب التانى
وقال هيحقق مطالب اكتر شوية
قلت طب خلاص هيغير الدستور وعين نائب وعين رئيس وزرا اقسم بالله ناس من الجيش قالولى انهم كان نفسهم انه هو اللى يبقى رئيس جمهورية لانه كويس جدا
مانا لازم اسأل لانى عمرى ما سمعت عنه خالص ولا حتى اسمه
وشوفته بيتكلم وحسيت انه محترم وناس كتير قالتلى
المهم زعلت من الاصرار على التنحى لان اللى فهمته ان البلد هتبقى فى حالة فوضى فالافضل انه يمشى فى ميعاده وتتعمل انتخابات ونختار
واصروا واتنحى
نسيت اقولكم انى لما سمعت ان جهاز الشرطة بالكامل انسحب بقيت والله العظيم هتجنن ازاى وليه وهما ممكن يعملوا كده
طيب هو اتنحى وده كان المطلب الاساسى اللى قالوا بالحرف مش هنمشى الا لما يمشى
ومشى
اللى زعل ناس كتير انهم او بعضهم فضلوا قاعدين فى الميدان وكلنا شوفنا المظاهرة بتاعة الشعب يريد اخلاء الميدان وخلود راحت ساعتها وقالتلى الناس مش عايزة تمشى وتشيل الخيم بتاعتها والشباب عاملين مظاهرة عشان عايزينهم يمشوا
تفتكروا الناس دى من الثورة
اذا كان الثورة حققت اهم هدف ليها واكبر هدف واللى الناس الكبار زى عمرو اديب بعد خطاب التنحى كان هيحصله حاجة وقعد يزعق ويقول انا بحلم
دلوقتى الجيش اللى بيحكم
وبيعدل
وهيعمل الانتخابات
وناس شغالة فى بنك واحد بيقول اشمعنا انا مرتبى 5000 وزميلى 7000
السؤال يا سادة
هل معنى الحرية والديموقراطية
ان عمرو اديب وهو بيحكى عن اللى حصله يسب الدين وولادى بيتفرجوا وابنى بحركة لا شعورية يرجع لورا بعيد عن الشاشة ويقولى اللى هو بيقوله ده(محدش يقولى معلش اصله كان مظلوم عمرو اديب وبكلامه هو فى برنامج بدون رقابة مليونير)
هل معنى الحرية والديموقراطية
ان كل شوية حد يكتب كلام بان حسنى مبارك هو اللى بيحكم وان مافيش حاجة حصلت ولا هتحصل (الكلام ده لما بنقرأه والله بنتعب وبحس ان كل اللى حصل على الفاضى يعنى 18 يوم ثورة وناس ماتت واطحنت والاخر تقولوا هو برضو اللى لسه بيحكم)
هل معنى الحرية والديموقراطية
ان ابراهيم عيسى يطلع يقول احمد شفيق صورة ومالوش لزمة وكان موجود لما حصل اللى حصل من قتل فى التحرير(طب اللى شاطر اوى ويعرف يجيب اللى كان السبب فى كده يتفضل يجيبهم ولا هو لازم الراجل يعمل اللى كنتوا بتكتبوا هنا على المنتدى انه بيحصل وهو انه يلبسها لاى حد عشان يرضى الناس ويسكتهم)
هل معنى الحرية والديموقراطية
ان محمود سعد يسيب برنامج مصر النهاردة عشان الشركة المنتجة نزلت اجره من 9 مليون جنيه فى السنة الى مليون ونصف فى السنة وعشان يطلع بطل يقول انه ساب البرنامج عشان كانوا عايزين يفرضوا عليه انه يعمل لقاء مع احمد شفيق(وكأن مليون ونص فى السنة ميأكلوش حضرته عيش حاف وللعلم وللى شاف الحلقة مع عمرو خالد قال لعمرو خالد بالحرف يمكن اللى زينا مرتاح وعنده فلوس ومش ابتدينا بالثورة بس فرحانين بيها على فكرة انا شوفت الحلقة مش سمعت عنها)
هل الحرية والديموقراطية
اننا كل ما يجيبوا حد هيقولوا وحش وحش ونغير تغيير التغيير ومش هيبقى ورانا حاجة الا المظاهرات عشان فلان مش عاجبنا(مش لما يبقى فيه ريس الاول نبقى نغير الوزراء:36_1_9[1]:)
فى واحد كاتب تعليق على النت بيقول والله لو جابولهم نبى مش هيعجبهم
تفتكروا اللى حصل وبيحصل فى تونس ومصر وليبيا والجزائر والعراق واليمن والبحرين والاردن والمغرب
ميخليناش نفكر ولو لحظة انه ممكن يكون تخطيط صهيونى زى ما بيقولوا ولا دى مجرد صدفة بحتة

تفتكروا فى ظل اللى احنا فيه وان فى ناس دلوقتى بتتصرف من غير عقل زى اللى فضلوا فى التحرير يوم الجمعة لبعد الساعة واحدة صباحا ومحترموش حظر التجول ورموا الجيش بالطوب(ولا الجيش كمان كداب ونظام لازم يتشال ده سؤال وعايز رد برضو)
تفتكروا بقى هيصبر كتير ولا زى ماتوقع مدرس التاريخ ان بعد اسبوعين بالظبط الجيش هيعلن الاحكام العرفية والبلد هيقف حالها
تفتكروا تعليم ولادى وولادكوا مصيره ايه
تفتكروا هينفع زيادة دخل وهو مافيش شغل اصلا
تفتكروا ان دلوقتى كل واحد يشوف ظابط او حتى عسكرى من حقه انه يهزأه ويضربوه ويتريئوا عليه مش عشان حادثة المعادى لأ عشان هو ده اللى بيحصل وهيحصل
تفتكروا حوادث القتل والاغتصاب والسرقة والخناقات والبلطجة اللى بالهبل دى هتخلص امتى
ياسادة الحاجات اللى انا كتباها دى نقطة فى بحر اللى بنشوفه ونقراه
مانا اتعلمت منكم انى اقرا كل حاجة ولما اشوف نشرة الاخبار بتبتدى مقلبش التليفزيون زى زمان
اوعى حد يقولى انى غلطانة
وانى ضد الثورة
وانى بركب الموجة
واننا منتدى بيؤيد النظام اصل الكلمة دى اتقالت
ولما اتقالت حسيت باحساس مالوش لزوم اوصفه عشان محدش يزعل بس
اكتر واحد كان بيعارض النظام هنا كان محمود التهامى وكنت بدخل امسح ردوده والله من خوفى عليه لما سمعت انه بيراقبوا النت واللى عليه(معلش كنت بمارس سلطتى كمديرة زى ماقالوا برضو بس المرة دى على صاحب المنتدى نفسه جبروت بقى)
محمود ده بقى اتقال عليه انه مؤيد للنظام وبيشتم فى شباب الثورة ازاى وهو كان بيكتب كلام زى الزفت وبالاسامى على النظام القديم
وهيشتم شباب الثورة ليه وهو كان نفسه ينزل لولا مرضه اللى مش هقول هو ايه واللى يمنعه انه ينزل ويشارك فى اى حاجة فيها انفعال(معلش يا محمود ماهو لازم نقول بقى عشان محدش يفتكر انه احسن من حد)
كل اللى مكنش عاجبه الناس اللى فضلت فى التحرير بعد التنحى
اللى هيقول كده اكيد حد مش عايش فى مصر
ومش بيحب مصر
ومالوش ولاد فى مصر
ومش هيحافظ عليها
ولا على ثورتها
ولا على دم شهداءها
انا منتظرة الاجابة
يمكن الاقى عندكوا اجابة تقول ان كل ده غلط
http://www.vb.6ocity.net/imgcache/17275.imgcache.jpg


سألوا الشهيد نفسك في ايه
وايه توصينا احنا بيه
قال خلوا بالكم من البلد دي
واوعوا تنسوا انا مت ليه

http://www.vb.6ocity.net/imgcache/17276.imgcache.jpg
سؤال اخير يا سادة
ابنى بيقولى هو ليه بيحصل كده لانه سمع عن واحدة ست اتسرقت واتقتلت جنبنا
وقرأفى اليوم السابع ان اتنين فصلوا راس واحد عن جسمه
فين الاتنين دول يا سادة
حد يروح يجيبهم:1:
وقالى كمان هو المدارس هتكمل ازاى وهنمتحن ازاى
حد عنده اجابة

مش
منقول

[محمود التهامي]

بصي بقا يا مرمر
انا عن نفسي بطلت اتكلم لان الصوت العالي مبقاش مدي لحد فرصة يتكلم او يتسمع
بالظبط زي اللي كنا بنشتكي منه
وماتستنيش حد من الجماعه اياهم يرد عليكي رد يشفي او يريح صدرك
اصلهم مابيعرفوش يتكلمو بيعرفو يتظاهرو بس ولا تفاوض قبل التنحي
الشعب اللي كان بيقول اخترناه اخترناه زي ما قال اخترناه طلع هو هو وقال يسقط النظام
واهو سقط النظام وعمت الفوضى
كل امنياتي بس انه يكون فيه دور تاني (ملحق) للنظام يمكن ينجح ويرجعلنا زي ماكان
وفعلا لو جابولهم نبي محدش هيعجبه ومحدش هيرضى بيه
والدليل التعليقات على الوزراء الجددد
يعني مثلا كانوا بيطالبو بوزارة ائتلافيه فجابولهم مثلا وزير التضامن من حزب التجمع فقالو لأ وحش دا يساري
هههههههههههههههه طيب ماهو التجمع كله يساري
طيب وزير الثقافة صاحب ساقيه الصاوي اللي كانت قبل الثورة منبر من منابر نشر الوعي الثقافي في مصر
بقا وحش لانه رجل اعمال ورجال الأعمال وحشين مينفعوش وزرا لكن فرض عليهم يدفعو ويتبرعو لكل حاجه وأي حاجه
ووزير البترول رغم الطلبات بان الوزارة تكون تكنوقراط بمعنى ان وزير الصحة يكون طبيب والتعليم يكون مدرس مثلا وهكذا
فجابولهم وزير البترول مهندس بترول وعضو في مجلس ادارة شركة بترولية
بقا وحش ومش عايزينه عشان الشركة اللي بيشتغل فيها هي اللي بتصدر الغاز لاسرائيل
ولجنة التعديل يغلب عليها الاخوان وعليه فأعتقد انها مش مقبوله عشان لها اتجاهات واجندات دينية ههههههههههه

وعليه فالوزراء لازم يكونو ائتلافيين بشرط يكونو من حزب جديد لانج ملوش اهتمامات ولا ملامح
عشان لو على اساس ديني فاحنا دولة علمانية مش عايزين دينيين
ولو اشتراكي او يساري فاحنا دولة رأسمالية
ولو رأسمالي فاحنا دولة ديموقراطية ونرفض زواج المال والسلطة
وبعد كل ده لازم كمان الوزارة تكون تكنو قراط
يعني تكنوقراط ملوش اي اهتمامات او نشاطات او اتجاهات
م الآخر يعني عايزين خريج جديد قاعد ع القهوة يبقا وزير
بشرط ميكنش مدخن للسجاير او الشيشة ويجيد لعب الطاولة
عشان مش هنديله اي اختصاصات وهيسيب اختصاصاته للنائب والبرلمان
وعجبي
وتوتة توتة فرغت الحدوتة بس يسقط النظام
ولما تخلص الشعارات دي كلها ومايلاقوش حاجه جديدة
هيبقا شعارنا
الشعب يريد دخول الحمام
وابقو صحوني لما الشعب لما ينام



وحسبي الله ونعم الوكيل

[الرومنسى]

أخيرا يا أميرة
لقيت حد يقول الكلام اللى جوايا بيصرخ بيخرج حيره جوايا هيجننى
بجد أنا وصلت أمبارح للقمة فى الزهق والملل والتعب وعدم القدرة على الواصلة وصلت لمرحلة وفوق الخيال وعمال اسأل نفسى انا صح واللى غلط الناس اللى قدامى على شاشات التليفزيون مش قليلة يبقى أنا جاهل مش فاهم حاجة حتى لما حاولت أراجع فى كتاب الاستاذ مصطفى محمود العقاد لترجمة برتوكولات صهيون وحاولت أنزل موضيعة على المنتدى هنا كانت فيه فكرة فى دماغى لكن لقتنى والله امبارح بس انى زى اللى بينفخ فى قربة مقطوعة مش فيه ايه هل اليهود صح واللى اللى فى التحرير صح واللى اللى ى التليفزيون صح حتى اللى حصل صح ولا غلط ولو صح يبقى من البدايه للنهاية واللى لمرحلة معينة
طب اللى جاى للبلد دى ايه والفوضى اللى بتحصل مصيرها ايه وغيرو وغيرو.............
حجات كتير يا أميرة لقينى بتكلم فى وادى والناس فى وادى تانى وكل واحد ليه فكروا وهدفة طب هدف الثورة ايه لما المطلب الرئيسى تنحى حسنى ودا اتنفذ ايه تانى ليه سقف المطالب بيزيد ليه الفوضى بتزيد ليه العرب قامت قيامتهم مش هما العرب اللى كنا بنحسدهم على الفلوس اللى عندهم واحنا بنشتغل عندهم هما بيقلدوا
ليه القيامة قامت فى الوطن العربى كله مرة واحدة التغيير ليه مفيش رابط للجميع ولنفترض ان النظام فى الوطن العربى كله فاسد ممكن فى لحظة من اللحظات يبقى فيه اتحاد مع وجود اختلاف فى العادات والتقاليد ممكن فى لحظة نبقى جبهه ضد اسرائيل انا شايف أن فى مصر 85 مليون نسمة ب 170 مليون رأى ممكن يبقى اتحاد بين الدول العربيه والحكام والشعوب ممكن نتفق على رأى واحد الاول كنا بنضحك على الحكام العرب ونقول
إتفقو على الا يتفقو
دلوقتى احنا الشعوب اللى بيعملو كدا طب ليه والهدف ايه
هل نحن لا نعلم الديمقراطية ونجهلها ام اننا شعوب العالم الثالث كما ذكروا أم هى مخططات صهيون ونطبقها كما ذكرت ولو قرأمنكم أحد برتوكول صهيون رقم واحد على صفحات هذا المنتدى لتأكد أن ما يحدث فى مصر هو مخطط مسبق لا مفر منه وإن لم نعى ما نصنع لتكون النهايه قريبة جدا لنا وإعلموا ان هؤلاء الجرزان لا يخططو ليوم قادم انما لدهور قادمة خطط لمائة عام أما نحن فننظر تحت أقدامنا حتى تعفر وجوهنا بالتراب
شكرا أميرة انا عندى كلام كتير مش قادر أطلعة فى رد بس لانى هنفجر وعامل زى قنبلة موقوتة لو انفجرت ممكن تدمر نفسها قبل الاخرين

[nogafoda]

والله يا اميره كل الي انتي قولتيه نسبه كبيره مننا عايزه تقوله
وخصوصا اننا اكتشفنا ان احنا كنا مخدوعين في ناس كتيييييييير
زي ابراهيم عيسي ده الي انا والله كان بيصعب عليا لما اعرف انه هيتسجن
واقول طيب يا عيني ولاده ياكلو منين
وعمر الليثي وهو بيقطع قلوبنا علي الناس الي بيجبهم في البرنامج يطلب ليهم المساعدات
ويا حرام هو ميقدرش يساعدهم
ولاطبعا محمود باشا سعد ولا غيرهم
بصراحه انا قرفانه قوي من الناس دي
وبغض النظر احنا مع ولا ضد مين فيهم طلع جزء من مرتبه لعمال اليوميه الي كانو مش لقيين ياكلو ولادهم في الايام18
الي فاتت مين فيهم اهتم بمصالح الغلابه
طيب وفين الشخص الي كلهم يجمعو عليه انه يصلح ليدير شئون البلاد
حد يفتكر انه موجود ولا هما قررو يجبوه تفصيل
بيفكروني بالمنصور وهو بيقول"ابويا ابويا انا عايز الحصان"
وطبعا فكره الديمقراطيه بقت مرفوضه تماما بق في حاجه اسمها القائمه السوداء كل الي مكنش في التحرير يتحط اسمه فيها
وطبعا لما يجي الريس الي يعجبهم مش هيخلوه يدي اي امتيازللناس دي علشان دول اعداء الثوره
واخير لكي الله يا مصر

[اميرة حبى انا]

جميل طلعتوا اللى جواكوا كويس
لسه منتظرة باقى الناس اللى عندنا
يامحمود
انا مش مستنية رأى حد من الناس اياها عشان اللى انا كتباه حاصل وبيحصل وهيحصل ويزهق جدا
والدليل ان فى المؤتمر الراجل بتاع الجيش وهو بيتكلم بيقول مش هيرضيكم ان الجحيش كمان يتحدف بالطوب يعنى الجيش كان شكله زهقان يا عينى(متهيألى الجيش غلطان وايه يعنى لما يتحدف بالطوب هو على راسه ريشة فى ديموقراطية فى البلد)
يا رومنسى اللى جواك وجوايا وجوانا جوا ناس كتيييييييييييييير بس بعيد عنك محدش مديهم فرصة يعبروا عشان كده مخنوقين
مخنوقين من الديموقراطية والرفاهية والعيشة الرغدة اللى مكوناش نحلم بيها دى(هيقولك كل حاجة كويسة عايزة شوية صبر متهيألى الصبر يكون على التغيير مش على كل واحد يمشى بمزاجه ويقول اصل فى تغيير فى البلد)
يا نوجا الاسامى اللى قلتيها دى ناس بتقبض ملايين وكانت قاعدة بالبيجامة تتفرج على الثورة فى التلفزيون ومع ذلك مش عاجبها اللى وافق يمسكها وهى ملهاش اول من آخر وكتير رفضها
ولكى ولنا الله يا مصر
من هنا وبأعلى صوتى واللى مش عاجبه هو حر
احنا بتوع الثورة الحقيقة
احنا اللى مش عايزين دم الشهداء يروح هدر
احنا اللى عايزين مطالب الثورة الجميلة تتحقق
مش احنا ابدا اللى عمل نفسه ثورجى وبيطول لسانه وبيشتم بعد ماكان مطاطى
مش احنا الناس اللى طالعة تسب الدين ولا تشتم وتعيب فى حد
مش هى دى الثورة ومش هى دى الحرية ابدا
الثورة ادب واحترام ورقى
مش قلة ادب وطول لسان وشتيمة ونفاق وكل واحد يمشى بمزاجه
لسه منتظرة باقى الاراء

[nogafoda]

والله يا اميره انا تعبت من الاستهتار بالناس انا كنت خارجه امبارح مع جوزي وولادي علشان افسحهم
قبل المدارس لاني مكنتش اعرف ان الدراسه اتاجلت تاني
وشفت ازاي عساكر المرور واقفين في الاشارات ومحدش عامل لهم اي اعتبار
الناس ماشيه عكس وبتكسر في الاشارات
هي دي بقي الديمقراطيه والتغير
حسبي الله ونعم الوكيل

[nogafoda]

وعلي فكره انا مبقولش ان الدنيا كانت ورديه وبقت كحلي
بالعكس الدنيا كانت كحلي بس دلوقت بقت سوده

[الرومنسى]

عندما دخلت المنتدى
وجدت أسما لامع فى سماء المنتدى
وجدت تاجا مرصعا بالجواهير يزين رؤوس الجميع
أميرة حبى انا
أميرة المنتدى
لكن عندما تخرج عن شعورها بهذه الدرجة أذا فهناك شئ خطأ إما فيها وإما فينا
شعورك بأننا تجاوزنا كل حد شئ جميل بأن أفاقنا قد تخيلت أحلاما ورديه واننا فى سبيلنا لتحقيقها ونعلم أن بالوضع الراهن هى مجرد خزعبلات نراهن عليها شئ واضح
ولكن لا بالثورة فى وجوه بعضنا البعض لا للسب والشتم بيننا لاننا او بعضنا الان مغيب عن الواقع وهناك كثيرا من الناس رغبه فى الصبر حتى النهاية لكى يدركوا الصواب من الخطأ نعم نرد على بعضنا وفى كل موضوع أطرحة على صفحات المنتدى أو فى اى منتدى أخر أتركة ناقصا حتى يحاورنى فيه من هو يعارضنى قبل اى ممن يوافقوننى عليه إما أن يقنعنى أو أقنعة هذه هى الديمقراطيه السليمة التى ننشدها
شكرا أميرة المنتدى على سعة صدرك

[خلود]

موضوعك حلو يااميره وطلع اللى جواكى وجوا ناس كتير اوى

بس وبعدين وايه الاخر والصوت العالى مش هيوصل لاى حاجه

الحكومه ولا الوزارء عارفين يشوفوا شغلهم والجيش خلاص ساب شغلته الاساسيه وهى الدفاع عن الوطن وعمال يحل بين المواطنين والموظفين

الخميس اللى فات حصلت خناقه بين موظفه ومواطن جاى الوزاره عندنا بقى ظابط فى الجيش واقف يحجز بينهم

طيب وبعدين وايه النهايه لازم الشرطه تنزل تانى وتمارس مهامها

مظاهرات وكل اللى بقى عايز حقه طالع بمظاهره
النهارده قابلت مدرسه ومعاها مجموعه جايين من الشرقيه واقفه قدام باب وزاره التربيه والتعليم جمب شغاى هيعملوا مظاهره لانهم مدرسين بعقود وعايزين تثبيت
والاسكان عاملين مظاهره والتموين اللى هو احنا عاملين مظاهره

وشكلى انا هعمل لكم مظاهره هنا فى المنتدى

اقولك ايه بس يااميره

بصى اكمل لك بكره لانى عندى برد جامد جدا

بس عايزه اقولك نفسى اغمض عينى وافتحها الاقى فى استقرار وخايفه اكون بحلم

[مصطفى مامون]

ايه كل دا النقاش داير وانا مش هنا استنوا شويه
تعالوا نتفق او نختلف عشان نصل فى النهايه لحوار ديمقراطى
--نتفق كلنا ان قبل 25يناير كان هناك فساد وراس نظام فاسد وعائله مالكه فاسده وحاشيه اشد واحقر؟؟؟؟؟؟؟؟؟؟؟؟؟؟؟
--نتفق كلنا ان ضرورة الثوره كانت واجبة النفاذ والا كنا سنظل فى الفساد اللى ذكرناه وترامينا فيه قيمة 30سنه او ما قبل ذلك
--نتفق كلنا ان من قام بالثوره ليسوا الشباب وحدهم ولكن كان معهم مفكرين ومثقفين وعلماء وفنانيين وادباء وجياع وفقراء
--نتفق كلنا ان الثوره حققت ما كانت وما كنا نتمنى تحقيقه بل وصلت الى ابعد من كده بكتير وفاقت ما كنا نتمناه
--نتفق كلنا ان الثوره كشفت رموزا بل اساطين الفساد فى مصر وعرت وجوه الاستبداد ولسه هيبان مع الايام اكتر واكتر
****************************
نختلف فى ان اى ثوره فى العالم عشان تنجح لازم يكون ليها قائد وبرنامج ودى مشكلة الثوره دى ان ملهاش ولا قائد ولا برنامج
--اى ثوره فى العالم عشان يتحقق لها النجاح لازم تقضى على نظام سابق وتضع النظم اللى تتراءى لبرنامجها او لقائدها فطالما ملهاش قائد او برنامج فمحدش قدر يتبناها ويقوا هى بتاعتى بالعكس اللى تبناها مجموعه من حرس النظام السابق فاصبحت ثوره بلا هويه ونريد ان نبحث بها وعنها عن عنوان واتمنى ان نجده ويتحقق ولكن بشروط
*****علشان نقول ان اجنحة نظام سابق لسه موجوده دون القضاء عليها ومعروفه بالاسم امثال سرور والشريف وجمال يبقى الثوره لسه
********علشان نقول ان حكومة شفيق رغم كونه رجل معتدل ومحترم ولكنه جاء فى وقت مش بتاعه يكون موجود وهو معين من قبل نظام اتفقنا كلنا على فساده وفشله ويكون موجود امر مش مقنع
****** علشان نقول ان ثوره قامت لعزل نظام فاسد ولسه رأس النظام موجود على الارض اللى قامت عليها الثوره دون محاكمه او طرد او حذر شىء مش مقنع اذا كنا اتفقنا على فساده وفساد نظامه
***علشان نقول ان الاشخاص والخياله اللى هجموا على ميدان التحرير خدوا احكام عسكريه شىء جميل لكن اللى مش منطقى اننا منعرفش مين اللى قالهم روحوا الميدان ومعتقدش انهم راحوا بمزاجهم وازاى تحكم على اداه من غير ما نعرف مين استعملها
******علشان نقول ان الانفلات الامنى حصل وان المتسبب فيه يحاكم الان مش بالتهمه دى لكن بتهمه تانيه خالص وهى اراضى دوله مش تحريض على اثاره امن الدوله زى ما بنقول اهى حاجه ونلهى الشعب بيها
*******والله ماطرحته اسئله لا اجد لها اجابه
لكن فى النهايه نتفق فى ان الاعلام اعطى شبابا مش هم لوحدهم قاموا بالثوره حجم اكبر من سقفهم السياسى
اتفق على اننا ليس امامنا الا الانتظار ثقه فى القوات المسلحه
اتفق على ان الثوره كشفت وجوه فساد تملقت على حساب الثوره زى سعد ومصطفى بكرى وهيظهر غيرهم
لكن انا بقول ان دى ظاهره صحيه وهى عملية كشف الاوراق واختلاطها واستبعاد السىء منها
لكن المطلوب اننا نرجع الشعب للشرطه
المشكله فينا وفى القائمين دلوقتى على البلد هى حاجتين مهمين
احنا خايفين ومعندناش ثقه فى حد ولسه بنحبو على طريق الديمقراطيه زى عيل اول مااتولد بتقوله اجرى مش امشى وهم مشكلتهم ان الشفافيه ناقصه فى علانية الاحكام والمحاكمات
لكم منى الف سلام اخواتى والنقاش دائر والمحبه دائمه
وسيبونى انام شويه وارجعلكم

[اميرة حبى انا]

اشكر الجميع على المناقشة المحترمة المهذبة
مصطفى
عايزة اقولك محدش فينا مختلف معاك خالص فى اللى انت بتقوله
لكن
مش يمكن احنا اللى مش مديين حد فرصة يعرفنا حاجة او يحاكم المفسدين صح
مش يمكن المطالب الفئوية زى اللى عايزين يتعينوا واللى عايزين زيادة مرتب ممكن نقول حقهم بس فى نوع من الاستعجال خصوصا ان البلد محتاجة تتنظم الاول ولما يجوا اللى يحققوا المطالب دى تبقى تتحقق
مش يمكن يا مصطفى احمد شفيق هو الراجل الصح فى الوقت والمكان الغلط
ايوة المكان الغلط
لاننا ومعلش استحملونى شوية منستاهلش الراجل مكفرش عشان مبارك اللى معينه
مانفكر شوية واللى نلاقيه كويس حتى لو من النظام اللى فات نبقى معاه ونساعده يصلح البلد
الباز قال انه يعرفه شخصيا وقال بالحرف شفيق مسرقش ومش هيسرق
والجمل قال احمد شفيق احسن رئيس وزراء شافته مصر
المشكلة مش مشكلة شفيق او غيره
المشكلة لما مخنا يتربس على حاجة سهلة وجميلة ومحلولة
ونسيب حاجات كتير عايزة حل وترتيب ونظام
التفكير والنظام يا سادة
هما فيييييييييييين
لما نروح للمشير نقوله شيل شفيه ويسالنا ليه ماهو شغال زى الفل
هنقوله ايه
نقوله لا معلش اهو كده بقى شيله وخلاص ملناش دعوة
ده كلام برضو

[اميرة حبى انا]

النيابة تستجوب العادلي في أحداث موقعة الجمل والفراغ الأمني بعد الثورة


(http://profile.live.com/badge?url=http%3a%2f%2fwww.masrawy.com%2fNews%2fEg ypt%2fPolitics%2f2011%2ffebruary%2f27%2fadly_rev.a spx&title=%d8%a7%d9%84%d9%86%d9%8a%d8%a7%d8%a8%d8%a9+% d8%aa%d8%b3%d8%aa%d8%ac%d9%88%d8%a8+%d8%a7%d9%84%d 8%b9%d8%a7%d8%af%d9%84%d9%8a+%d9%81%d9%8a+%d8%a3%d 8%ad%d8%af%d8%a7%d8%ab+%d9%85%d9%88%d9%82%d8%b9%d8 %a9+%d8%a7%d9%84%d8%ac%d9%85%d9%84+%d9%88%d8%a7%d9 %84%d9%81%d8%b1%d8%a7%d8%ba+%d8%a7%d9%84%d8%a3%d9% 85%d9%86%d9%8a+%d8%a8%d8%b9%d8%af+%d8%a7%d9%84%d8% ab%d9%88%d8%b1%d8%a9&de************************ion=%D8%B5%D8%B1%D8%AD%2 0%D8%A7%D9%84%D9%85%D8%AA%D8%AD%D8%AF%D8%AB%20%D8% A7%D9%84%D8%B1%D8%B3%D9%85%D9%8A%20%D9%84%D9%84%D9 %86%D9%8A%D8%A7%D8%A8%D8%A9%20%D8%A7%D9%84%D8%B9%D 8%A7%D9%85%D8%A9%20%D8%A8%D8%A3%D9%86%20%D8%AC%D9% 85%D9%8A%D8%B9%20%D8%A7%D9%84%D9%86%D9%8A%D8%A7%D8 %A8%D8%A7%D8%AA%20%D8%A7%D9%84%D9%85%D8%AE%D8%AA%D 8%B5%D8%A9%20%D8%AA%D9%88%D8%A7%D8%B5%D9%84%20%D8% B3%D8%A4%D8%A7%D9%84%20%D8%A7%D9%84%D9%85%D8%B5%D8 %A7%D8%A8%D9%8A%D9%86%20%D9%88%D8%A3%D9%87%D8%A7%D 9%84%D9%8A%20%D8%A7%D9%84%D9%85%D8%AA%D9%88%D9%81% D9%8A%D9%86%20%D9%88%D8%A7%D9%84%D8%B4%D9%87%D9%88 %D8%AF%20%D9%88%D8%AC%D9%85%D8%B9%20%D9%83%D8%A7%D 9%81%D8%A9%20%D8%A7%D9%84%D8%A3%D8%AF%D9%84%D8%A9% 20%D9%81%D9%8A%20%D9%88%D9%82%D8%A7%D8%A6%D8%B9%20 %D8%A7%D9%84%D8%AA%D8%B9%D8%AF%D9%8A%20%D9%88%D8%A 7%D9%84%D9%82%D8%AA%D9%84%20%D8%A7%D9%84%D8%B9%D9% 85%D8%AF%20%D8%A7%D9%84%D8%AA%D9%8A%20%D9%88%D9%82 %D8%B9%D8%AA%20%D8%B9%D9%82%D8%A8%20%D9%8A%D9%88%D 9%85%2025%20%D9%8A%D9%86%D8%A7%D9%8A%D8%B1.%20&screenshot=http://www.vb.6ocity.net/imgcache/17311.imgcache.jpg)
http://www.vb.6ocity.net/imgcache/17311.imgcache.jpg

حبيب العادلي



2/27/2011 9:43:00 PM

صرح المتحدث الرسمي للنيابة العامة بأن جميع النيابات المختصة تواصل سؤال المصابين وأهالي المتوفين والشهود وجمع كافة الأدلة في وقائع التعدي والقتل العمد التي وقعت عقب يوم 25 يناير.
وأضاف المتحدث انه في ذات الوقت بدأ فريق التحقيق الذى أمر النائب العام بتشكيله برئاسة النائب العام المساعد في سؤال بعض المختصين في وزارة الداخلية في سبيل الكشف عن أسماء المتورطين في ارتكاب تلك الجرائم، واستعجال نتائج أعمال لجنة تقصى الحقائق ،وفى هذا السياق تم استدعاء وزير الداخلية السابق حبيب العادلي لاستجوابه في ذات الشأن.
وأكد المتحدث الرسمي حرص النيابة العامة على حقوق ضحايا تلك الثورة والقصاص من الجناة وأن النيابة العامة ، ستواصل تحقيقاتها والكشف عن أسماء مرتكبي تلك الجرائم أيا كانت شخصياتهم أو وظائفهم فور الانتهاء منها.

[اميرة حبى انا]

علشان نقول ان الانفلات الامنى حصل وان المتسبب فيه يحاكم الان مش بالتهمه دى لكن بتهمه تانيه خالص وهى اراضى دوله مش تحريض على اثاره امن الدوله زى ما بنقول اهى حاجه ونلهى الشعب بيها
والنبى نقرأ ونتابع الاول قبل مانتكلم
ماشىىىىىىىىىىىى

[اميرة حبى انا]

النيابة تواجه "العادلى" بتقارير الطب الشرعى فى أحداث 25 يناير

الأحد، 27 فبراير 2011 - 22:51
http://www.vb.6ocity.net/imgcache/17312.imgcache.jpg اللواء حبيب العادلى وزير الداخلية السابق



(http://www.google.com/ig/adde?moduleurl=http://activedd.googlecode.com/svn/trunk/iGoogle/Gadgets/Youm7/Youm7.xml)
بدأت نيابة أمن الدولة العليا برئاسة المستشار هشام بدوى المحامى العام الأول، التحقيق مع اللواء حبيب العادلى وزير الداخلية السابق، فى التهم المنسوبة إليه، وتتعلق بقتل عدد من المتظاهرين بالرصاص الحى، وانسحاب جميع أجهزة الشرطة ليلة 28 يناير مما تسبب فى حالة فوضى تامة فى البلاد، بالإضافة إلى التورط فى تهريب عدد كبير من المسجونين والمسجلين خطر والبلطجة واستخدامهم لإرهاب المتظاهرين والمواطنين.

وواجهت النيابة العادلى، بتقارير الطب الشرعى التى كشفت استخدام قنابل مسيلة للدموع منتهية الصلاحية، واستخدام رصاص حى محرم دولياً.

وكان النائب العام المستشار عبد المجيد محمود أصدر قرارا بتشكيل فريق من المحققين برئاسة النائب العام المساعد المستشار عدنان فنجرى، وعضوية عدد كبير من المحامين العامين الأول، والمحامين العامين ورؤساء النيابة، وتكليفهم بمتابعة التحقيقات الجارية فى النيابات على مستوى الجمهورية فى كافة الوقائع التى حدثت خلال المظاهرات وأسفرت عن حالات قتل وإصابات وأعمال التخريب والإتلاف العمدى وإشعال الحرائق، وما ارتبط بها من وقائع أخرى.

وأكد المصدر القضائى أنه جارى التنسيق مع مصلحة الطب الشرعى ووزارة الصحة لتقديم أوراق العلاج والتقارير الطبية الخاصة بالمصابين والمتوفين فى تلك الأحداث، وكذلك التنسيق مع لجنة تقصى الحقائق بشأن تقاريرها عن الأحداث التى واكبت انتفاضة الشباب منذ يوم 25 يناير 2011 والانفلات الأمن لسرعة استكمال التحقيقات، وتحديد المسئولية الجنائية، وأضاف المصدر أن النيابة العامة تعمل بكافة طاقتها للانتهاء من تلك التحقيقات وإعلان نتائجها للرأى العام.

[اميرة حبى انا]

نسيت اقول حاجة
عايزين يشيلوا احمد شفيق وحكومته عشان من النظام السابق
طيب ماهما برضو عايزين عمرو موسى يرشح نفسه لرياسة الجمهورية
وهو برضوووو من النظاااااام الثابق
ده من ايه ده

[مصطفى مامون]

الكلام اللى بتقوليه يااميره انا نفسى مش معترض عليه الا فى بعض الاجزاء فعلا احمد شفيق مع الافتراض انه راجل محترم وجدا جدا وفعلا هو الراجل المناسب انما لو استرجعنا كلامنا هنلاقى انى قلت ان المشكله فى انعدام الثقه بين شعب ونظام فالشعب مش هيرضى بأى حاجه يجبها النظام السابق
-----------------
بخصوص يااميره موضوع حبيب العادلى انا والله بقرأ قبل ما اكتب وما تعودتش الا على كده انى اقرأ قبل ما اكتب ولو راجعتى تاريخ ردى هتلاقيه قبل تاريخ تحويل حبيب العادلى للنائب العام والاستماع الى اقواله فى قضية الانفلات الامنى
وكان الاستدعاء الاول مش لنفس السبب ولكن لسبب اخر اللى انا قصدته
المهم ماعلينا النقاش له فايده وميكونش بينا غير الاستفاده
سواء اتفقنا او اختلفنا كلنا

[اميرة حبى انا]

احنا مش هنختلف
احنا عايزين نوصل لحل عقلانى
هو ده قصدى بكلامى
العقل بيقول الكويس نبقى عليه
حتى لو من النظام السابق
ماهو يا مصطفى للاسف
طلع مافيش حد كويس
يبقى لما نلاقى واحد من مليون
نمسك فيه
مش نقوله ارحل
ممكن اللى معاه يمشوا
ماشى
بس هو ليه
ده انا اول مرة احس ان حد صادق وبيطلع يقول الحقيقة يا ناس

[nouran_111]

. كل الللى انتى قولتيه يا اميرة كلاما من زمان محيرنى من زمان قوى مش من 5 يناير فقط
كلام كتير وجعنى وخلانى بتمنى انى اصحى الصبح في وسط الصحرا وعندى فقدان ذاكرة
يمكن ارتاح
انا مش هقولك برتوكول صهيون ولا هقول اجندات خارجية ولا هقول هقول اى كلام من كل اللى اتقال لكن هقول حاجة واحدة بس

ان اللـــــــــــــــــه لا يغــــــــــــــــــير ما بقـــــــــوم حتى يغيـــــــــــــــــــــــروا ما بأنفسهم

[الرومنسى]

يا أميرة احنا اتعودنا نسمع وبس عمرنا ما حسبناها بالعقل
ودى مشكلتنا حتى لما بندخل نقاش
حاجة من اتنين
إما بنزعل
أو نقفلة ومنكملوش

[اميرة حبى انا]

ونقفله ليه
كل واحد يقول رأيه براحته
مع احترام كامل للرأى الاخر
وبدون تهكم او سخرية
فيها حاجة دى