-- لمـاذا جمعه الحسم .. حوار مصري خالص

[RSS]

بسم الله الذي امدنا بالقوه كي نستمر ..

بسم الله الذي منحنا القدره ان نستحضر المعجزه .. وان نكتشف انفسنا مره اخري ..

بسم الله الرحمن الرحيم ..

-----

اولا اعرفكم بنفسي يا جماعه ..

انا حد مصري جدا جدا ودلوقتي اكتر من اي وقت

انا مسلم ومسيحي .. اهلاوي وزملكاوي .. غني جدا .. وفقير اوووووي .. بسمع تامر .. وعمرو ومنير وام كلثوم وعبد الوهاب وفيروز ومحمود الليثي ورمضان البرنس والشيخ ياسين التهامى وشعبان عبد الرحيم ..

قاريء للمصري اليوم والوفد والاهرام والدستور ..

انا ملتزم جدا .. وساعات مبكونش كويس .. مليان اخطاء .. رغم اني في معظم الاوقات ملاك ..

بصلي الجمعه وبحضر قداس الاحد وبتابع الجزيره وقنوات النظام ..

انا واحد من الشعب دا .. والله العظيم مش غريب عنه .. ولا ليا اجندات خارجيه ولا داخليه
ولا عارف ايران ولا امريكا ولا روسيا ولا بتنجان
يا اخوانا انا زي زيكم .. يمكن اكتر ويمكن اقل ..

بالله عليكم اسمعولي كويس .. اللي في ايدو حاجه ياريت يسيبها واللي مشغل اغاني يطفيها واللي بيكلم في الموبايل مجتش علي 10 دقايق الله يرضي عليك ..

بدايةً اغلبنا مش مثقف سياسيا .. ولا يعرف التيارات الي ماشيه في البلد ولا له علاقه باي شيء يخص الدستور ..

ودا مش بلومكم عليه ولا بلوم نفسي .. عشان ياجماعه محدش علمنا اننا ندور علي حقوقنا
ولا نعرف سياسه بلدنا .. الي هي امنا .. وبيتنا .. وقبرنا .. وارضنا .. وعرضنا ..
من زمان واحنا بنسمع علي ان الي بيمشي في مظاهره بيتحبس ..
الي يشتم الريس .. بيروح ورا الشمس ..
ابوك يقولك متربيش دقنك يابني حرام عليك .. يعتقلوك
وامك تقولك .. لو شفت مظاهره تمشي جمب الحيطه ..
تصدقوا اني كنت بخاف اصلا اقول " لا " حتي بيني وبين نفسي .. لاحسن المخبرين مترشقين في كل حته
في دولابك في كراستك في مدرستك في جامعتك .. وساعات في الحمام ..
كنت مستني اكبر .. واسيب مصر .. بناسها .. وشوارعها .. وزحمتها .. وكدبها ...
كنت بقول البلد مش هتتغير ..
مفيش فايده ..
خليني في حالي ..
لما واحد صاحبي يكلم معايا مثلا علي قانون ولا تغيير وزاره .. اقوله ياعم وطي ام صوتك دا
الحيطان لها ودان
كنت بشوف امين الشرطه .. اتررررعب ..
اشوف الظابط .. ممكن يجيلي تبول لا ارادى
اقرا يافطه " مباحث امن الدوله " وانا مروح ... احس ان قلبي هيوقف واخاف ابص في عيون العساكر الحرس ع البوابه ...
يا جماعه انا كنت ميت .. كنت صفر ع الشمال ..
كنا بنسمع ناس للاسف بتسب الدين بتاع ربنا في الشارع وهي مش خايفه .. " والعياذ بالله "
بس عمرنا سمعنا عن حد سب امن الدوله في الشارع ؟؟
عمرنا شفنا واحد شتم الريس في نص الميدان ؟؟
بنخاف مالنظام اكتر من ربنا ...
تخيلوا المصيبه ؟؟
ثواني .. انا سامع ناس بتهمس وبتقول ... الواد دا شكله اخوان مسلمين .. وهيورطنا
والله ابدا .. انا لا اخوان ولا مصر والسودان ولا يحزنون
انا بس عايز اوضح .. ان النظام دا سرق مننا حاجات كتير اوي يا اخوانا
النظام دا مسح شخصياتنا
موتنا بالحيا ..
استعبدنا لدرجه اننا مبقناش متخيلين نفسنا غير عبيد عندو ..
قالنا النظام في مصري جمهوري .. لكن عامل الدوله معامله الحكم الملكي ..
حسني مبارك يا اخواناااا سررررق 24 سنه من عمري .. وانا خايف
انا عمري فيه كام 24 سنه ؟؟؟
شبابي ضاع وانا عمري ما اشتركت في حزب سياسي عشان خايف ..
عمري ما اتعاملت كويس في قسم ولا في مركز شرطه عشان مليش تمن ...
عمري ما رفعت عيني في حد لاني مصري .. والمصري دا ارخص من التراب ..
حسني مبارك خلي العشره مننا بشللللن ..
وكنا خايفين وساكتين ..

..

انتوا عارفين .. اكتر مره كنت غبي فيها كانت امتي ؟؟
يوم ما طلع الريس .. " السابق " محمد حسني مبارك
وقال خطاب في التلفزيون ..
قال انا مش ههرب بره البلد .. وهتدفن في بلدي .. وهحافظ عليها
قال هعمل اصلاح دستوري .. وهحاسب المفسدين ..
قال انا كنت وسأظل احمي مصر
قال انه حارب في اكتوبر عشان مصر وهيموت فيها ومش هيطلع ..

وقتها ... صدقته .. صعب عليا اوى .. وصدقت التلفزيون المصري الكداب ...
قلت .. حرام عليهم .. مايسيبوا الراجل يكمل الفتره بتاعته
ليه عاوزين يودوا البلد في داهيه
قلت انا هنزل بكره الميدان واكلم الناس واقولهم .. حسني مبارك مش وحش .. حسني مبارك راجل خدم مصر اصبروا عليه لو سمحتوا ..
تتخيلوا ايه اللي يحصل ؟؟

تاني يوم بالظبط .... بعد ما نسبه كبيره من الشباب انسحبت من ميدان التحرير .. وصدقت وعد مبارك
وقالت حرام بقي .. خليه يقعد ..
ناس كتير رجعت بيوتها ..
ناس كتير آمنت له تاني .. رغم انه طول عمره بيكدب ..

تحصل المفاجأه ..
خيول .. وجمال .. وبلطجيه .. وسنج ومطاوي .. فجاه تخترق ميدان التحرير ..
ضرب واهانه وقتل .. اه والله العظيم قتل ..
شباب زي الورد عمرهم 20 سنه بيموتوا .. عشان خاطر واحد حرامي وعجوز وكداب سنه 85 سنه قرر انه ينهي حياتهم غدر ..
عربيات امن مركزي جت اخر الميدان ..
الناس كلها قالت اخيرا الشرطه جت تقبض ع البلطجيه
نبص نلاقي العربيات بتتفتح وبدل ما ينزل منها عساكر ..
ينزل منها بلطجيه تاني من ناحيه ميدان عبد المنعم رياض
مؤامره ..
مذبحه يا اخوانا ..
والله العظيم مذبحه ..
ناس واقفه مش معاها غير الطوب تدافع عن نفسها
قصاد ناس بتحميها الخيول والجمال والسنج والمطاوي والعصيان الكهربا والجنازير
شباب بتوقع والحصنه تجري تدهسها وبلطجيه بيضربوا في الاجسام وبنات بتصوط وستات بتجري
ايه القررررررف دا ..
ايه الكدب بتاعك دا ...
انت ايه ..
مش بني ادم ؟؟
مفيكش خوف من ربنا ؟؟

ساعتها كرهت نفسسسسسى اوى
كرهت غبائي الي خلاني اصدق شخص زي دا
كرهت قلت ثقافتي .. الي خلتني مقراش التاريخ الوسخ بتاعه طول 33 سنه
كرهت اني اتعاطفت مع القاتل .. وانا شايف الشباب الرجاله الي قالت لا ووقفت زي الجبال
بتدوسها الخيول وجزم البطلجيه ..
والساعه 4 الفجر نلاقي القناصه بتوع الشرطه الخاينه بتضرب بالرصاص الحي .. واتنين متظاهرين وقعوا فوق الكوبري بطلقات في راسهم
لا وايه .. البلطجيه سحلوووووهم وهما ميتين !!!!!!!!!!!!!!!!
لا اله الا الله ..
ايه اللي بيحصل ..
في شرع مين يقتلوا الشباب الشريف ويمثلوا بجثته ؟؟؟
لقيت نفسي قاعد ببكي .. بس مش دموع حزن
دموع قهر وغضب ..
دموع اني متغاظ من نفسي اني صدقت الريس وكلامه
قلت انا غبي ..
اقل واحد في ميدان التحرير جزمته برقبتي ورقبت عشره زيي
انا مستاهلش اكون تراب يدوس عليه
شفت الجثث قدامي والجروح ..
شفت صوابع بنت مقطوعه عشان مسكت قنبله دخان من ناحيه غلط كانت عايزه ترميها بعيد عن الناس فقطعت صباع السبابه والابهام سوا .. اه والله العظيم بنت .. تخيلوا ..
واتضح الموقف تاني يوم ...
عشرات القتلي الشهدااااااااااااااا .. ومئات المصابين منهم اصابات خطره
شباب زي الفل .. ورد كان مفتح في جنينه كبيره اسمها مصرررر
واكتشفت المصيبه
اكتشفت ان خطاااب الرئيس .. الي سرق بيه تعاطف الشعب ..
واللي كدب فيه ..
واللي قال فيه انه بيحمي البلد
واللى واللى واللى ...
كان جزء من خطه الهجوم .. عشان الميدان يقل العدد فيه .. والباقيين يبقوا سهل اوي يتقتلوا ..
والاوسخ ايه بقي ؟؟
ان التلفزيون المصري تاني يوم بيغطي علي اللي حصل
زي ما يكون اللي ماتوا دول مثلا ..
شويه كلاب مالهمش لزمه
التلفزيون المصري شغال يقول دول خونه .. دول اجندات اجنبيه .. دول اخوان مسلمين .. دول بياكلو من كنتاكي .. دول اسرائيلين .. دول ولاد ستين كلب ..
وشويه فنانين اقذر من ميت الصرف الصحي زي سماح انور وطلعت زكريا وعادل امام طالعين بيقولو لازم يتحرقوا .. وطلعت زكريا بيقول علي البنات هناك مش نضيفه .. وبيتهم المتظاهرات الشرفاااا في اعراضهم ..؟؟؟
تخيلوا كميه السفاله اللي حاصله ؟؟
ابراهيم حسن وحسام حسن الي ثبت انهم هما الي دفعوا الفلوس للبلطجيه طالعين تاني يوم في التلفزيون يقولوا بنؤيد الاستقرار ..
استقرار ايه ؟؟
هي السرقه استقرار ؟؟؟
هي الرشوه استقرار ؟..
هو الفساد والدعاره الاعلاميه والقتل وسرقه حق الكلام والاعتقال المفتوح دا استقرار ؟؟
هو ان المصري يبقي رخيص في بلده وبره بلده دا استقرار ؟؟؟
هو ان المصري الي طول عمره شامخ ... يفطر من الزباله ؟؟؟
هو دا الاستقرار ..
ياخي ملعون ابو دا استقرار لو كان دا الي تقصدوه ..
دا الموت اهون ..
سالت نفسي ازاي احنا ساكتين 30 سنه ؟؟؟
ازززززززاي ؟
ازاي واحد زي دا مسيطر علينا وسارق فلوسنا .. ومجوعنا .. ومأجر البلد للغريب زي ما تكون فتاه ليل .. واحنا ساكتين
ازاي خير البلد ميبقاش لينا .. واحنا ساكتين ..
ازاي الاسرائيلي بيستمتع بالغاز المصري بسعر رخيص والمصريين ربعهم بس الي بيستعمله وبسعر اغلي ؟؟
في شرع مين ..؟؟
وكرهت حسني مبارك ..
كرهته اوي اوي .. .
كرهته لدرجه اني مفتكرش هقدر احب اي حد تاني طول عمري بعد الكره دا ..
بقيت اشوف وشه افتكر الكدب .. والتدليس .. والخيانه ..
بقيت بشوف دم الشهدا الي ماتوا .. الشباب المخلصه ..
بقيت يا جماعه بحس بالئرف منه زي ما يكون مش بني ادم .. وهو فعلا كدا ..


انا اكتر شيء هزززززني في حياتي
ام الشهيد اسلام
لما قالت انها متعرفش ابنها مات ازاي ..
وقع علي جمبه اليمين ولا الشمال
خبطته في الارض كانت حنينه ولا اتعذب فيها ..
صرخ ولا مات وهو ساكت
...
اسلام دا مات بطلق رصاصي " ميري " .. حي مش مطاطي ..

اسلام دا 17 سنه .. وحيد امه وابوه ..

اسلام دا مش ايراني .. ولا اخوان .. ولا روسي .. ولا امريكي .. ومش موساد
اسلام دا من مصر ..
ولا له سجل اجرام .. ولا شيوعي

اسلام دا مات عشان حسني مبارك قرر انه يحكم مصر حتي لو كلها جثث ..
مات عشان خاطر مبارك عايز يهرب بالـ 70 مليار دولار اللي سرقهم بأمان بره البلد من غير مالانتربول يجيبه ..

اسلام مات عشان مبارك قرر كدا ..


عرفتوا دلوقتي ليه جمعه الحسم ؟؟؟

عرفتوا ليه دلوقتي مينفعش نستني عليه يوم واحد مش بس 7 شهور ؟؟
عشان دم اللي ماتوا مش هيستني والله العظيم ..
عشان ام اسلام دي مش هتعيش الـ 7 شهور لو ابنها مرتاحش في قبره ..
عشان مصر موجوعه اوي يا اخوانا ..
والجرح كبير ومعادش ينفع مسكنااااااات ...

واللي بيقول حافظوا علي كرامه الرئيس دا .. اساله سؤال ..
واحد داااااااس علي كرامه 83 مليون مصري .. طوال 30 سنه
جي تقول كرامته ؟؟
بالله عليكم انا مش لاقي كلام اقوله تاني اكتر من ان الراجل دا لازم يتشنق في قلب ميدان الشهدا

انه لازم يسلموه لاهالي الشهداا يقطعوا فيه بالحته ..

مفيش كلام يتقال غير ان الجمعه اللي جايه دي مش هتعدي بالساهل ..
وانها هتبين معادن الناس وان الشعب المصري مفيش احسن من المعدن بتاعه

خليك معانا يااااااااااااااااااااارب

ياااااااااااارب

اسف للاطاله