-- نـــــار مبارك ولا جنة أمريكا اللي جى خدوا بالكم منه

[RSS]

لو سمحتو يا جماعة قبل ما تقروا اى كلمة عاوزة اى حد يفكر يرد عليا يرد عليا بعد تفكير بعقل واعي واكيد كلكم كدا

اكيد كلنا كنا قاعدين قدام التليفزيون علي رؤوسنا الطير ومركزيييييييييييين مع كل كلمة بيقولها الريس

انا واحدة مصرية شافت اللي شفتوه كلكم وعارفة ان اى واحدة هتقول انا متغربة ومش حاسة بللي ف مصر وعايش فيها لكن احب اقولكم انى زيي زيكم بالظبط لان سبب غربتى هو اللي بيحصل ف مصر من بطالة وضيق معيشة ومرض ووووووووووو وكل اللي في بيوت المصريين والحمدلله علي كل حال انا بقول كدا عشان تعرفوا انى دوقت اللي دقتوه كلكم

الموضوع فعلا يا جماعة محتاج اعادة نظر من كل الشعب

بجد لما سمعت خطاب الريس ع أد ما كنت زعلانة منه وعتبانة عليه انه ساب وادي فرصة للانتهازيين والمنتفعين اللي اول ما حصلت ازمة بانوا فعلا ع حقيقتهم وان كل اللي يهمهم نفسهم وبس وللاسف ميستحقوش يتسموا مصريين ولا يتحسبوا ع بلدي اللي طلع منها نماذج اذهلت اللي عاشوا ايام 73 وناضلوا فيها واذهلت العالم كله

كلنا شايفين دلوئتى كل واحد عامللي فيها عمر المختار وفارد صدره اوى وبيقول لو انطلب منى اى حاجة انا مش هقصر لو الشعب اختارنى ونيجى بعد كدا ندور عليهم منلاقيهمش

فعلا يا جماعة مبارك مهما كان سيء وانا مبنكرش انه قصر كتيييييييييييييير ف حقنا رغم مواقفه المشرفة الكتيرة لكن لو فعلا ساب دلوئتى هتحصل حرب مش متخيلينها احنا دلوئتى

مش متخيلين لو حصل فينا زي ما حصل ف العراق يا خبرررررررررررررر بجد تبقي كارثة


احنا مش هنخسر حاجة لو استنينا شهر شهرين بكتيره لو محصلش تغيير ف البلد لحد ما تحصل انتخابات ونقدر نقف ع ارض صلبة ساعتها نقولله مع السلامة ونرجع نتظاهر ونعمل اكتر مللي عملناه وساعتها محدش هيكون ليه حكم علينا

يا جماعة احنا زى ما احنا ورينا العالم كللللللللللللله اننا شعب محترم وراقي بمختلف فئاته وطبقاته وحافظ ع خير بلده وعاش نظام وحب وتماسك اليومين دول معشهاش قبل كدا من سنين طويلة

قربنا من بعض قبطي مع مسلم

نظام وكلنا خايفين علي بعضنا كلنا بقينا جيش وشرطة تحمى بعضنا من النهب والسرقة

لناس بيحافظوا ع نضافة شوارعهم لناس بتوزع اكل وشرب علي بعضهم وقلوبهم ع بعض بعد ما كنا بنسمع كل واحد بيقول يللا نفسي

للي واقفين قدام البنوك والمتحف وخايفين ع بلدهم

لناس كلهم اخوات ايد واحدة

عاوزين زى ما بهرنا العالم كله برقينا واحترامنا لنفسنا وارضنا وبلدنا عاوزين كمان منشمتش حد فينا

مش عاوزين مبارك ينطرد من البلد

يا جماعة في مثل عندنا زمان قالوه جدودنا ( انا واخويا علي ابن عمى وانا وابن عمى عالغريب )

اخويا ظلمنى مظلموش

عاوزين نبين للعالم كله اننا لو راح الحب لريسنا لكن مراحش احترامنا ليه

عاوزين نبين سماحة ديننا ورقي اخلاق العرب وسماحة اخلاقهم وكرم أصلهم

يا جماعة لو حصلت فتنة بين الشعب لان منهم مؤيد لمبارك ومنهم معارض واللي موافق ع الربادعى رافض عمرو موسي واللي رافض البرادعى موافق ع عمرو موسي وكل واحد بئا ماشي ف وادى ساعتها مش هيكون فيه ثورة لطلب الحقوق لا هيكون فيه استغاثات ومذابح مش عارفين هتودينا لفين وساعتها اول حد هتكون امريكا تعمللنا فيها الصدر الحنين وتقول انا اللي هحميكم من نفسكم وتدخل وقابلونى لو خرجت

صدقونى نار مبارك ولا جنة امريكا ومش عاوزين يحصل فينا زي ما حصل ف العراق واتقسمت شيعة وسنة وطوائف بلاش دا يحصللنا

عمرنا ما كنا نعرف نفرق بين مسلم وقبطي ولا بنسأل حد انت مسلم وللا قبطى لأننا كلنا واحد مع اختلاف الديانة لكن ف الاخر احنا مصريين


بجد يا جماعة بتمنى صوتى يوصل لكل مصري ويارب يارب يارب يهيء لمصر امر رشد يعز فيه اهل طاعته ويذل فيه اهل معصيته ويؤمر فيه بالمعروف وينهى فيه عن المنكر

يارب من اراد مصر بخير فأعنه عليه ووفقه اليه ومن أراد بلدي مصر بسوء فأشغله بنفسه واجعل كيده في نحره واجعل تدبيره تدميره واجعل الدائرة عليه