نداء لاولياء امور القومية

[lionking]

السلام عليكم

يا جماعة

يا اولياء الامور

النهاردة تم تحويل مدرستنا

6 اكتوبر القومية لغات
الى

6 اكتوبر التجريبية ( المستقبل )

ارجوكم

احنا النهاردة رحنا المدرسة ووقفنا طول النهار ووقفنا ولادنا فى سبيل اننا نوصل لحل وكتبنا عريضة
فيها كل المطالب

وطلبنا قناة الحياة
وسجلت وصوروا الولاد والحلقة فعلا اتذاعت النهاردة



بكرة ان شاء الله

فى تجمع تانى الساعة 10

عشان المديرة الجديدة ( نجوى ابو النجا )

ياريت الكل يتواجد بكرة هنعمل توكيل للمحامى وهو طالب على الاقل 200 توقيع

كمان فى بكرة صحفيين من الوفد وبعض الجرايد المعارضة

ياريت

كلنا نتجمع

بكره عشان خاطر اولادنااااااااااااااااااااا

[محمود التهامي]

هبلغ عنك يا ليون
بقا بتعملي مظاهرة وتجمهر
انتي عارفه دي عقوبتها ايه
ماااااااااشي
ههههههههههههههههههههههههههههههه

[lionking]

سيبنى فى حالى يا محمود احسنلك

احسن انا خلاااااااااااااااااااااااااااااااااااااااااااااااا اااااااااااااااااااص
عايزة اصوت
وحياة ربنا موقف زى الزفت

والولاد حالتهم زى الزفتين وحسبى الله ونعم الوكيل

بس المهم الاعضاء اللى معانا فى القومية يشوفوا الموضوووووووووووووووع

[mamet lina]

قلبي معاكوا وربنا يدبر لنا الحال

دي أول مشاركة لي، وللعلم أنا اشتركت في المنتدى ده علشان خاطر مدرسة 6اكتوبر القومية دي

أنا مقيمة حاليا في القاهرة.. والمفروض ان سكني هيتنقل العام المقبل إن شاء الله للشيخ زايد.. ودورت على مدارس هناك في زايد وفي أكتوبر من على النت وروحت شفت مدرسة 6اكتوبر ومدرسة اوراسكوم على الطبيعة وكنت قررت اني أنقل بنتي في مدرسة 6اكتوبر على اعتبار انها أفضل مدرسة شوفتها وقرأت عنها على منتداكم وعلى مواقع تانية على النت .. هي تابعة للقوميات وأنا طول عمري بحترم المدارس القومية.. وكمان جديدة وكبيرة المدرسة ومصروفاتها معقولة مقارنة بمدارس أخرى كتيرة والباص بتاعها بيروح زايد ...

والنهاردة من شوية عرفت موضوع تحويلها لتجريبي هي و3 مدارس قومية أخرى في اسكندرية ..

وبصراحة حاسة باكتئاب شديد وضيقة ومش عارفة أعمل ايه بعد ما كنت رسيت على المدرسة دي للعام المقبل ان شاء الله

وحالكم أصعب من حالي ربنا معاكوا .. واللى مقطع قلبي طالبات مدرسة كلية النصر بنات القومية بالاسكدنرية على المظاهرات اللى عاملينها احتجاجا على اللى بيحصل.. ومنهم طبعا طالبات في آخر مرحلة من التعليم .. يعني يا عيني دول يتنقلوا فين وازاي ويجيبوا الاستقرار والراحة النفسية منين؟!!!

طيب كان حتى قرار التحويل ده يتنفذ من العام الدراسي المقبل مثلا بحيث يبقى فيه فرصة لترتيب الافكار والاختيار بما يتناسب مع ظروف كل واحد

والله مش عارفة أقول ايه غير حسبنا الله ونعم الوكيل

[nogafoda]

السلام عليكم ورحمه الله وبركاته
والله انا تعبت من الي بيحصل ده
انا مالحقتش افرح بالمدرسه الجديده
اصحي من النوم علي خبر مزعج زي ده
انا مش فاهمه حاجه خالص ياريت لو حد فاهم يفهمني ايه الي هيحصل بالضبط
حسبي الله ونعم الوكيل

[محمود التهامي]

على حسب تصريحات الوزير
الدراسة ستستمر كما هي
ولا يوجد أي تغيير أو تعديل على نظام الدراسة ولا المدرسين
والتغيير والتحويل هو في الهيكل الإداري فقط
فمن يدرس لغات سيستمر في دراسته
ومن يدرس أميريكان سيستمر في دراسته
ومن يدرس بريطاني (IG) سيستمر في دراسته


وذلك بعد أن قضت المحكمة بحل الجمعية ومجلس إدارتها
لمخالفاتهم المالية والإدارية الجسيمة

مع العلم أن التحويل هو لمدارس الجمعيات المخالفة فقط وليس للكل
وما تم تحويله فقط هو اربع مدارس تقريبا من اصل اكتر من اربعين مدرسة

ملحوظة كمان
المخالفات المالية الشديدة دفعت الوزارة للجوء للقضاء لحل الجمعية واستلام ادارة المدارس حفاظا على المال العام
حيث أن المدارس ومنشئاتها هي ملك للوزارة وليست ملكية خاصة على عكس ما يتخيل البعض
ودور الجمعيه هو فقط ادارة المدرسة وهو ما ثبت فشلهم فيه

[lionking]

ملحوظة كمان
المخالفات المالية الشديدة دفعت الوزارة للجوء للقضاء لحل الجمعية واستلام ادارة المدارس حفاظا على المال العام
حيث أن المدارس ومنشئاتها هي ملك للوزارة وليست ملكية خاصة على عكس ما يتخيل البعض
ودور الجمعيه هو فقط ادارة المدرسة وهو ما ثبت فشلهم فيه


اسمحلى يا محمود اعلق ع الكلام ده
بس شوف الفيديو ده كان اول يوم فى المشكلة

وطبعا الجوده مش اد كده بس ده تصوير طالبة من المدرسة

QOYzIKY3JF4

بالنسبة بئه لكلام الوزير السيد الدكتور\ زكى بدر
لو افترضنا ان هناك مخالفات مالية هل يكون جزاء هذه المخالفات هو تحويل مسار المدرسة ام تحويل المخطىء الى التحقيق

تانى حاجة

لم يثبت ان فى مدرسة 6 اكتوبر القومية اى مخالفات مالية

يا جماعة المدارس القومية ليست ملك للحكومة هى جمعية تعاونية ولا يحق لوزير التعليم تحويلها الى حكومية تجريبية متميزة كما يدعى

واذا كان محتاج مدارس ياريت يتجه للمدارس الحكومية اللى محتاجة تطوير فعلا وكمان المدارس التجريبية اللى فى غاية السووووووووووووء

لو جبنا طالب فى الصف الرابع من التجريبية اللغات فى مقابل طالب من مدرسة 6 اكتوبر القومية وقدمنا لكل منهم قصة باللغة الانجليزية لما استطاع طالب التجريبية اللغات قراءة سطر وليس صفحة من القصة

ناهيك طبعا عن اسلوب المدرسين المنحدر الذى تتسم به مدارس الحكومة والتجريبية


اليس من الاولى بالوزير ان يطور المدارس المحتاجة فعلا الى هذا التطوير

هل من الطبيعى ان اتجه الى صرح له اسم وتاريخ وسمعة طيبة واقضى عليه واحوله شىء رث متهالك مريـــــــــــض

احنا فى مدرسة 6 اكتوبر القومية مصاريفنا 3800 وللعلم نحن لسنا من الاغنياء ولا الاقطاعيين كما يدعى السيد الوزير ويعلم الله اننا نعانى الامرين لكى نتمكن من دفع هذه المصاريف ولكن بهدف تحقيق مستقبل افضل لاولادنا وتعليمهم احسن تعليم


وبعدين هل فى مدرسة تجريبية فى البلد تشتمل على نظام الــ آى جى
او الاميركان دبلوما


طبعا مفيييييييييييييييييييييييييييييييييييييش

اذا كلام السيد الوزير لا علاقة له بالحقيقة

احنا اللى فى الحدث

احنا اللى بنعانى

احنا اللى مش عارفين هنحول ازاى


وبعدين انا مثلا لا اقبل ولا اتحمل ان يكون سى فى اولادى يشتمل على تجريبى

لابد من احترام حرية الاختيار لدينا

نحن اولياء امور 6 اكتوبر القومية اناس عقلاء

راشدين

متحملين مسئولية قراراتنا بتعليم ابنائنا بمصاريف فى القومية وليس من حق ايا من كان ان يجبرنى على تعليم ابنائى فى التجريبى المتميز كما يدعى السيد الوزير

[lionking]

ملحوظة

اذا تمكنت من الحصول على اى فيديوهات سارفقها فى الموضوع


ونحن الان فى انتظار رد من مرتضى منصور بخصوص القضية المرفوعة من اولياء الامور

[nogafoda]

السلام عليكم
انا عرفت ان المحكمه الاداريه حسمت القضيه بالنسه لتجريبيات الاسكندريه
ياتري في اي جديد عن اكتوبر التجريبيه
يا رب يفك هذا الكرب

[nogafoda]

علي فكره النهارده اتصلت بينا مس مني مديره الكي جي
وقالت انهم محتاجين 500 جنيه من كل ولي امر علشان موضوع القضيه
وقالت انهم اتفقو مع الاستاذ مرتضي منصور علي اتعاب 90000جنيه
وهما بيحولو يجمعوا المبلغ من اولياء الامور
وانا سالتها هو الحكم الصادر لمدارس اسكندريه ميكفيش لحسم القضيه
قالت ان كل مدرسه لازم ترفع القضيه بصفه مستقله

[محمود التهامي]

500 من كل ولي أمر عشان يجمعو 90 ألف
هي المدرسة فيها 180 ولي أمر بس ؟؟

واذا كان الموضوع مهم للمدرسين ومجلس الإدارة
ما يرفعوش هم القضية ليه ؟؟؟؟؟

خدوا بالكم يا جماعه عشان الكلام اللي قاله الوزير
عن مجالس ادارة المدارس دي ميطمنش ابدا

[nogafoda]

والله يا استاذ محمود احنا مفيش حاجه قدمنا غير ان احنا نعمل كده
ده مستقبل اولادنا
يعني مينفعش نضحي بيه
وربنا يستر ويجي بفايده
يعني قولي في ادينا ايه نعمله

[محمود التهامي]

والله يا فندم انا مش عارف ايه المشكلة
حضرتك بنفسك ناشره موضوع او خبر الصبح
تاميم المدارس القوميه (http://www.vb.6ocity.net/showthread.php?t=38627)

وبيأكد ان التغيير في ادارة المدارس بس ولا مساس بالنظاام التعليمي
تبقا فين المشكلة وفين الضرر