المساعد الشخصي الرقمي

مشاهدة النسخة كاملة : انسحبو ... هشام الجخ


محمود التهامي
21-12-2010, 12:13 PM
قصيدة إنسحبو
http://www.vb.6ocity.net/imgcache/12971.imgcache.jpg
للشاعر: هشام الجخ

اهداء الي الجنود المصريين التي صدرت لهم الاوامر بالانسحاب
ولم يطيعو الاوامر العشوائية بالانسحاب ..!
انسحبوا


كان اللاسلكى بعيد والعسكرى ماسمعش

انسحبواااااا

شوف العجب ياولاد .. العسكرى مرجعش

إنسحبوااااا

أطرش دا ولا صنم

إرجع ياجندى بياده

دخل العدو العريش
ارجع خلاص بزياده

العسكرى سامع لكنه واد مجدع

شال اربجيهه وضحك .. إشمعنا أنا اللى أرجع

وقف الزمن مزهول ساعتين بيشاهد

الجندى قام كبر
المدفع .. اتشاهد

الدبابات ظهرت
إرجع ياجندى نظام

دا كان كلام القادة

ودا برضو وقت كلام

وقف الولد ددبان
ياساده ياسامعين

صادهم كما الدبان
محروس ياواد من العين

الدبابات صفين
إتفجأو وافترقو

على كتفه كان مدفع
وعلى الجبين عرقه

غطى العفار النار ولاحد عاد شايف

والدبابات بتهل
وده برضو مش خايف

الضحكة على وشه ماتقولش بيصيف

لسه الزمن واقف مبسوط ومتكيف

الدبابات كترت والكترة غلابة

والقلب لو مؤمن ولا الف دبابة

هتقولوا مات الولد

انا اقولكم عايش

مالجنة مافيهاش موت
ولاتندخل ببلاش
فريد
21-12-2010, 12:20 PM
جميلة قوى
تسلم ايدك يامحمود
هم دول الرجالة
و للاسف خلصوا فى الحرب
nouran_111
21-12-2010, 12:38 PM
مالجنة مافيهاش موت
ولاتندخل ببلاش
الله استاذ محمود ولا اروع من ذلك
ahmedabdelziem
22-12-2010, 12:16 AM
تسلم ايدك استاذ محمود
بس هذه الكلمات منقوله من قبل
بواسطتى يوم 1/12/2010
باسم شجاعه جندى(انسحبوا)
وهذا فقط للتوضيح
محمود التهامي
22-12-2010, 01:09 AM
عذرا استاذ احمد
ماهو لو حضرتك بتدينا فرصة نتابع مواضيعك كنت اكيد هشوفها

عموما ولا يهمك
أصل انا مش في المسابقة
ومش هينفع اتوقف لاني للأسف من الادارة
ههههههههههههههه
ahmedabdelziem
22-12-2010, 01:13 AM
هههههههههه
لا والله مش قصدى وقف ولا كلام من ده
وعارف ان حضرتك مش فى المسابقه
بس انا فى اخر ردى كتبت وهذا للتوضيح
عشان ميكونش عندنا مواضيع مكرره
وده كان قصدى لمصلحه المنتدى
فريد
22-12-2010, 05:22 PM
يامحمود مخصوم منك 100 مشاركة
و مفيش نقاش
لازم تاخد بالك
مش هانعرف نشغلكم و لا ايه
ياادارة
محمود التهامي
22-12-2010, 05:39 PM
يامحمود مخصوم منك 100 مشاركة
و مفيش نقاش
لازم تاخد بالك
مش هانعرف نشغلكم و لا ايه
ياادارة



ههههههههههههههههههه
تمام يا باشا
علم وينفذ
بس هيتخصمو من ايه الـ 100 دول
مانا مش في المسابقة

وللا هتعملولي رصيد بالسالب زي ضرية المبيعات
- دي مزحة للمحاسبين فقط -
هههههههههههههههههه
ahmedabdelziem
22-12-2010, 08:11 PM
وللا هتعملولي رصيد بالسالب زي ضرية المبيعات
- دي مزحة للمحاسبين فقط -
هههههههههههههههههه

ياستاذ محمود انا كنت شوفت ان حضرتك
واخد لقب ديكتاتور المنتدى
فى حد يوقف قدام الديكتاتور
عشان يطلع ضدنا حكم بالاعدام

ههههههههههههه