يعنى ايــــه وطـــــن ؟؟؟؟ [الأرشيف]

lionking

24-05-2009, 08:24 PM

سؤال سألته لنفسي كثيراً ولم أستطيع أن أجد له جواباً…
كنت أشعر أين وطني ولكني لا أدرك لماذا هذا بالتحديد…
هل الوطن هو حيث نولد؟؟! :36_3_5[1]:
هل الوطن هو من حيث نبتت جذورنا؟؟!:36_3_5[1]:
هل الوطن هو حيث يوجد أصدقاؤنا وأحباؤنا؟؟!:36_1_62[1]:
هل الوطن هو حيث نجحنا وتفوقنا؟؟!:50 (10):
هل الوطن هو حيث وجدنا راحتنا؟؟!:50 (15):
هل الوطن هو حيث شعرنا بالأمان؟؟!:50 (5):
هل…هل…هل...هل ...
وطني لم يكن أبداً مكاناً من كل هؤلاء…
وطني كان شيئاً أخر ما أدركته آلا مؤخراً…
وطني كان حيث سكنت أحلامي…
حيث رأيت الظلمة فتمنيت أن يبددها النور…
حيث احترق قلبي أمام الظلم والفساد، حتى وأن لم يمسني منه شيء…:50 (5):
حيث حلمت لكل مجروحاً بالشفاء…
حيث أبتهج قلبي لنجاح لم أصنعه…
حيث تخيلت وبنيت بيوتاً ومدناً لم تراها أرض الواقع أبداً…:50 (10):
وطني ليس له حدود مرسومة…
وطني ليس ورقة قد أحملها أو لا أحملها…
وطني هو حيث سكنت أحلامي…
يعنى ايه كلمة وطن
؟؟؟؟؟؟؟؟؟؟؟؟؟؟؟؟

بجد يعنى ايه مصر !!!!!!!
ويعنى ايه لما الواحد يقوللى تعالى نحب مصر
ما أنا بحبها يا ناس:36_3_5[1]:
طب نفكر مع بعض
يعنى ايه أنا بحب مصر
وهى مين مصر دى اللى أنا بحبها
أكيد مصر دى مش أشخاص
وإلا لو هى الحكاية كدة
كانت مصر اختفت من زمان بموت الاشخاص دول
ومصر برده أكيد مش جماد
أقصد يعنى جبال وأهرامات وعجائب الدنيا وحاجات من دى
وبرده أكيد مصر مش هى المنتخب الوطنى
ومحدش يقوللى مصر .......
علشان هى لو كدة يبقى
...............
محمد فؤاد قال
يعنى ايه كلمة وطن
يعنى أرض
حدود
مكان
ولا حالة من الشجن
أنا عايزة أعرف
لما حد ييجى يقوللى مصر هى ايه
أقوله ايه؟؟

وعلى فكرة انا بحب مصر بس مش عارفة هيا ايه

fagrmasr01

25-05-2009, 07:45 AM

أحييكى على صراحتك وعلى موضوعك المتميز بل والمتفرد فى قوته وبيانه
برغم انه للوهلة الأولى قد يصدمنا
فلم نتعود ان نتسائل هذه الأسئلة بهذا الوضوح وبتلك الصراحة

بل لا أبالغ ان قلت ان أغلبنا قد حفظ حب الوطن بالتلقين .. وهو ليس عيبا بلام عليه

وارجو ان اوضح
انا هنا لا الوم من يحب وطنه بالتلقين
فالتلقين ليس عيباً
ولكن من خلال الفهم والقناعات والاقتناع
سيكون حبها عشقاً .. والحياة فيها برغم مافيها
حبٌ وعشقٌ ووجدٌ .. بل .. وهيام من أعلى حالات الهيام

انما هو باب رائع للنقاش فى منتدانا فتحتيه يا ليون بجراءة وشجاعة أحييكى عليها
وأتمنى ان يستمر النقاش فيه من الجميع .. بالعقل والتروى
وأتمنى الا تأخذنا فيه روح التعصب
فأنا عاشق لمصر وأهيم وجدا بها
وأعرف وأعيش كل معانى العشق لتراب ارضها
واعرف وأعيش أعلى معانى الهيام لنقاط ماء نيلها
وأعرف وأعيش أرقى معانى الفداء فقد شرفنى الله عز وجل
اننى فى 1973 اشتركت وحاربت من اجلها فى حرب اكتوبر

الموضوع قوى جدا يا ليون .. ويحتاج الى مجلدات نفتحها للنقاش
بشرط ان نفتح عقولنا وقلوبنا لهذا النقاش
فحبها ليس فقط مجرد كلمات
وكى لا أطيل فاننى باذن الله لى عودة
ان امد الله فى عمرى
الله لأدلى بدلوى فى هذا النبع المهم جدا .. بل
وأقولها صريحة .. والعالى الأهمية
الذى فتحتيه لنا يا مبدعة ومتألقة فى آن واحد ياليون

الرجاء كل الرجاء الا يكون حوارنا مدخل للتعصب او لإتهام
فكلنا فيها .. تُحيينا ونُحييها

lionking

25-05-2009, 10:54 AM

اهلا بيك يا استاذنا فى النقاش

وزى ما انت قلت النقاش مش محتاج عصبية او تعصب

كلنا بنحب مصر

واللى مش هيشارك هيبقى هو اللى مش بيحب مصر
:36_3_2[1]: :36_3_2[1]: :36_3_2[1]:

بس عايزين نعرف يعنى مصر عندنا

يمكن انت بتحبها عشان حاربت عشانها

طب الجيل الجديد اللى محاربش واللى

اتولد فى السلام

هل ياترى بيحبها !!؟؟؟

طب بيحبها ليه ؟؟

:36_3_13[1]: :36_3_13[1]: :36_3_13[1]:

لا خلاف بيننا على حب مصر

لكن لو حبيبتك بتعمل حاجة غلط او شكلها وحش او مش زى ما عودتك

انت هتعمل ايه

:1 (12):
:1 (12):

ياريت الكل يشاركنا النقاش ده

وده مش معناه تقليل او تشكيك فى حبنا لمصر

احنا عايزين نتعرف عليها كويس

عشان نحبها اكتر واكتر

واعتقد ان فى نخبة كبيرة هنا من مواليد الستينات والسبعينات

وكمان الجيل الجديد

عايزين الناس الكبار ومن ضمنهم انا طبعا

نشترك ونعرف الجيل الجديد يعنى ايه مصر

وازاى نحب مصر

وازاى نحمى ونحافظ على مصر

ياريت الكل يشارك

مع الالتزام باحترام وانتقاء الالفاظ
والتعبيرات

fagrmasr01

26-05-2009, 05:15 PM

كنت اتوقع المشاركات تكون كثيرة فى هذا الموضوع
ولكن يظهر ان كثرة المواضيع تغطى احياناً على بعض الموضوعات المهمة
على كل الاحوال
اسمحى لى بمداخلة سوف اقوم بها على مراحل
حيث ان الحوار والنقاش هنا عن محبوبتى انا شخصيا
مصر اللى هى معشوقة قلبى وعقلى وروحى ..
وصدقينى يا ليون ان دا شعورى وبدون ادنى تزويق فى الكلام

الوطن في اللغة هو محل الإنسان المطلق بمعنى:
استوطن القوم ارضاً وتوطنوها يعنى اتخذوها سكنا

وفى السياسة : مكانك الذى تنتسب اليه
ومحفوظة حقوقك فيه ومعروف حقوقه عليك
وتأمن فيه على نفسك وأهلك ومالك

ومن الاقوال المشهورة انه لا وطن الا مع الحرية ولا وطن مع الاستبداد

الاوطان نعيش فيها وتعيش فينا .. ونفديها بالأموال والأرواح
وتقدم على الاهل والخلان، ويبلغ حبها في النفوس الزكية مقام الوجد والهيمان.

وطبعا الانتساب للوطن فى الظروف الطبيعية يعتبر شرف للوطن وللمواطن فى نفس الوقت ومش بس شرف للمواطن

انما فى الظروف غير الطبيعية اللى بتمر بيها اوطان غايبة عن الوعى .. بيكون مطلوب من المواطن انه يحب الوطن ويعمل كل اللى عليه ويؤدى كل واجباته ويمكن اكتر ... وفى نفس الوقت بيكون الوطن ناسى خالص ان للمواطنين عنده حقوق

مثلا لو واحد من اى جنسية اتعرض لخطر فى بلد غريبة .. بتهب لنجدته سفارات وجيوش واساطيل

ولكن فى الاوطان المغيبة ..
يموت عشرات الالاف .. والوطن ولا هو حاسس بيهم ..
سواء فى داخل الوطن او فى الغربة .. ليس فى سبيل الشهادة طبعا..
ولا تتحرك سفارات ولا يرمش للحكومات المغيبة جفن

ويجب ان ننتبه هنا الى اننى
لا أتعمد الاسقاطات انما تأتى عفوية

ففى اكتوبر 1973 كان عمرى عشرون عاماً
واتشرف بأننى اشتركت فى الحرب
ومات من اهلى وأصدقائى الكثيرين
ولم نكن نحزن ولا نبتئس عليهم بمعنى الحزن الحقيقى .. فقد كنا نزفهم للوطن شهداء
مسيحيين ومسلمين من غير فرق ..
كلنا امنا اسمها مصر

قبل ان اختم اول مداخلة ..
أعذرينى للإطالة فلقد فتحى حديثاً ذا شجون

المواطن من أول حقوقه وواجباته
ان يساعد ان يجعل وطنه محبوبا
وذلك بكشف واصلاح عيوب الوطن
.. ما استطاع اليه سبيلا

وقبل ان يهاجمنى احد
اذكركم بقول حبيبنا وسيدنا رسول الله
صلى الله عليه وسلم
من رأى منكم منكراً .. فليغيره بيده
فإن لم يستطع فبلسانه فإن لم يستطع فقلبه
وذلك أضعف الإيمان

الساكت عن الحق شيطان أخرس

ولا يكون تغيير واصلاح عيوب الوطن بالقوة ..
انما يبدأ بكشف المشاكل ومحاولة اصلاحها

وأنا أرى أن هم المشاكل والعيوب
.. هى عيوب نفسى انا كمواطن
وللحديث بقية ان كان فى العمر بقية

ليون .. أنتظر ردك ..
كما ومشاركات اخوانى وأخواتى فى هذا الحديث
الذى أراه مهماً ولا خوف من المشاركة فيه
طالما نتحدث بالعقل والمنطق

فريد

27-05-2009, 10:00 AM

lionking

27-05-2009, 10:03 AM

استاذ جمال

انا احييك على مشاركتى النقاش اللى اعتقد انه مهم ومثمر بجد وكلنا هنستفيد منه

ربنا يرحم جميع موتانا اللى ماتوا فى سبيل الدفاع عن وطنا الغالى الحبيب (مصـــر)

استوقفتنى الجملة الجميلة دى من ضمن جمل اجمل ساسردها تباعا

وأنا أرى أن هم المشاكل والعيوب
.. هى عيوب نفسى انا كمواطن

انا من وجهة نظرى ان الوطن هو المواطن
احنا اللى بندى سمات وصفات وطباع للوطن
لاننا بشر اما الوطن فهو جماد ارض جبال ماء ......الخ

اذا المشكلة الحقيقية تكمن فينا كبشر
سلوكنا عاداتنا طريقة تفكيرنا واسلوبنا فى التعبير عما يجول فى خاطرنا...
طبعا الوطن محل ميلاد الانسان
وبنحبه زى ما انت قلت بالتلقين

لكن لو اتكلمنا عن جزء ان الوطن محل ميلاد الانسان

إيه رأيك فى من ولد ونشأ خارج مصر
هل هيحبها زى اللى اتولد ونشأ وترعرع فيها

؟؟ ؟؟؟؟ ؟؟؟؟
إجابتى أو رأيى
هو هيحبها بس مش بنفس قدر حبه لمكان ميلاده
بالعكس هيكون عايش فيها وبيحن لمكان ميلاده :50 (11):
وذكرياته

الوطن بناسه اللى عايشين فيه
لو سلوكيات الناس اتغيرت للأسوأ يبقى الوطن اصبح كله سيىء

وبكده نبقى رجعنا لنقطة البداية تانى
ان بلدنا هتبقى احلى وأحلى لو الناس رجعت حلوة ونفسياتها بقت احسن

بس سؤال بئه لابد منه :50 (35):

ازاى نخلى الناس ترجع زى زمان
ازاى منخليش الناس تحقد على بعض؟؟
ازاى منخليش الناس تكره بعض وتتلكك لبعض؟؟
:1 (18): :1 (18): :1 (18):

ياريت باقى الاعضاء يفكروا ويشتركوا معانا فى النقاش

lionking

27-05-2009, 12:22 PM

السلام عليكم
الوطن هو : الامان و الانتماء
فان وجدت الاثنان فى اى مكان فهذا هو الوطن
فحيث وجدت الامان انتميت لهذا المكان واصبح هو الوطن
و الدليل كل المهاجرين الى امريكا و غيرها تجدهم فى كلاماتهم عن بلادهم الاصلية
انك تشعر بغربة فى لغتهم عنها و تجدهم يتحدثون عن امريكا مثلا يعنى بكل فخر و اعزاز
و ان سالت احد منا سيلعن امريكا و من حولها .
النهاية من وجهة نظرى متى وجدت الامان وجدت الانتماء اصبح هذا هو الوطن
اما انا بحبك يامصر مهما جرى فيكى

شكرا استاذة ليون على الموضوع الرائع

شكرا استاذ فريد على مشاركتك النقاش

وعلى فكرة انا اؤيد رايك جدااا

اهم حاجة للانسان الامان ثم الامان ثم الامان

طب سؤال

العراقين مع احترامى وحبى ليهم ومش بس العراقيين كل الدول الاسلامية العربية المحتلة

لما ناسها بتهرب منها

هل ده معناه انهم مش بيحبوا البلد

طبعا بيحبوها بس زى ما انت قلت بيدوروا ع الامان
والراحة

بس للاسف مش هيكون تابع للامان الانتماء
ولا بيكون عندهم انتماء للوطن التانى
:50 (8): :50 (8):
راقب اى مهاجر هتلاقيه مرتاح اه ومبسوط جايز لكن لو جاتله الفرصة للعودة لحضن الوطن ( بس فرصة كويسة وتستحق التضحية ) اكيد مؤكد هيرجع

يعنى انا بحس الامان مش مرتبط بالانتماء

تحياتى لك على المشاركة ومستنية تكمل معانا الحوار

فريد

27-05-2009, 12:33 PM

انا فاهم قصدك لكن انا قصدى فى الانتماء المرتبط بالامان الطويل المدى
يعنى مش شهر و لا سنه لكن سنين كتيرة
بالتالى كل المشاعر تجاه الوطن الاصلى بتتغيير
يمكن كلامك صح معرفش انا بحس كده فى كل الا اتغربوا مدد طويلة
و الله اعلى و اعلم

lionking

27-05-2009, 12:42 PM

شوف يا سيدى الفاضل

انا من الناس اللى نشأوا وترعرعوا خارج مصر

وأدينى هنا بقالى سنين

:1 (5): :1 (5):

هتضحك لما تعرف انى ولائى وانتمائى لمكان ميلادى

مع العلم انى بحب بلدى مصر جداا

بس مش قادرة انسى مكان ميلادى
حياتى كلها وذكرياتى هناك
:50 (2): :50 (2):

مش عارفة ده بئه اسمه ايه

اسامة22

27-05-2009, 12:48 PM

ســـــــــــــــــــــــــؤال مهم

يعني يااستاز/فريد

لو انت شغال في امريكا مثلا تابع لعمل
جاءلك بعثة في اسرائيل وهناك لاقيت
معاملة حلوة وشيك وانبهرت بيهم
ولقيت معاملة ليك راقية وامان جامد
هتقول دا وطني
مش حسيت بالامان والطمأنينة
مثلا يعني
ممكن اجابة
وربنا يجعلة عامر
عمااااااااااااااااااااااااار يامصر
باهلك حتي لو كان ناسك مش كويسين بالرغم انهم احلي واجمل واحن ناس في العالم
بس هقولكم حاجة يمكن تكونو نسيييييين
الخير في امتي الي يوم الدين
ادخلو مصر فان لكم ماسالتم
ادخلو مصر امنين
وفي النهاية مصر بلد الطيبين
حتي لو كنت مولود في جزر القمر
يكفي انة الشعب الي عايش في ظل الخنقة ولسة الضحكة علي وجهة
يكفي انة وطن عاش حروب لو دخلها اي شعب كان ...كان اية اقولكم اية بس
ولكن سوف ياتي يوم تصبح ارض مصر طاهرة نقية
ويوجد في مزبلة التاريخ كثير وكثير
وسوف ياتي يوم تنكشف فية الظلمة
بحبك يابلدي......ياللي لون ابتسامتك في سمارك
رغم انف الحاقدين والمنتفعين
ادخلوها بسلام آمنين
مصر بلد الطيبين
وربنا يصلح احوالنا يارب
وفي كلام كتييييييير اوي
هااااااااااااااااااا
بس خلاص
علي راي شعبولا

lionking

27-05-2009, 01:04 PM

اسامة 22

المغترب

اولا وقبل اى خناقات

وحشتنا

شوف بئه

كلمتين ابرك من عشرة

انت بتقول الناس الطيبين والضحكة الجميلة والوشوش الحلوة والكلام الجامد اوى ده
اسمحلى
انت بتتكلم كده عشان انت مش هنا
مش وسط المعمعة اللى الشعب ده فيها
انت عايز تقنعنى ان الناس اللى مش قادرة تجيب عيش حاف عشان تاكله
مبسوطين

ولا الناس اللى بيضربوا نفسهم بالــــــــ
وقت دفع مصاريف المدارس
مش عارفة
الضحكة دى اللى على وشوش المصريين

ضحكة استسلام :36_1_7[1]:

يأس :50 (8):

وزى ما بنقول

ما باليد حيلة :50 (8):

والكلام ده مش فى مصر بس
روح شوف الاردن
وسوريا ولبنان وغيرها كتير من الدول العربية
نفس الاحساس والانطباع
بل ونفس ردة الفعل

الموضوع هنا مش موضوع شعارات رنانة

كل واحد فينا بيحب بلده

مهما كانت !!!!!عارف ليه؟؟؟؟
عشان ملوش غيرها
ومهما لف وسافر واتغرب
مسيره يرجع هنا تانى

شاورلى على واحد فيكى يا مصر

مش بيتمنى يطلع منها

حتى لو هيروح فى داهية

والادلة ع الكلام ده كتير وكتير اوى

لا اعتقد ان الشباب اللى بيموت فى البحر ده مبسوط وبيضحك ومتهنى يعنى
طب انت مثلا
مغترب

ومش بنحسدك ولا حاجة

ايه اللى خلاك تخرج ؟؟؟

هو نفس السبب اللى من ايام ما انت خرجت منها موجود لغاية دلوقتى

اعدوا بالعافية

اميرة حبى انا

27-05-2009, 01:18 PM

شاورلى على واحد فيكى يا مصر

مش بيتمنى يطلع منها

حتى لو هيروح فى داهية
انا مش عايزة اطلع منها
ومش هطلع منها
الشعب الى حاسس علطول بيأس وجوع وظلم وقهر زى مابتقولوا كده
هو احسن من كل الشعوب اللى فى كل البلاد التانية
ومش عشان راضى وصابر يبقى وحش
مصر يعنى وطن وحضن وامان وسلام
مصر ذكرت فى القران من ضمن بلاد عددها قليل جدا ذكرت فى القران الكريم
اسمحيلى انتى بتقولى مش حاسة غير بالمكان اللى اتولدتى واتربيتى فيه
طيب معلش من غير زعل
بتسألى عن مصر ليه
احنا اتولدنا هنا وعشنا هنا
عشان كده كل واحد كتب عنها وهو حاسس بيها
يعنى مش شعارات
ده رد على كلامك مش كلام من عندى
يعنى كل واحد بيحس وبينتمى لمكان ولادته ونشأته

lionking

27-05-2009, 01:28 PM

طبعا كل واحد بيكتب عن احساسه

ومش معنى انى اتولدت وعشت برة انى مش بحب مصر

مصر بلدى

وبحبها بكل عيوبها

وتانى انا مش بتكلم عشان شعارات وحاجات من دى

وبلاش انا يا ستى

الناس اللى بتهرب من الارياف والصعيد وبيهربوا فى المراكب اهم دول اتولدوا هنا واتربوا فى خيرها وحضنها وكل الكلام الجميل ده

لكن مصر دلوقتى قاسية على ولادها جداااا

ردى حضرتك على سؤالى وشوفى الاحصائيات وانتى تعرفى اد ايه هجرة شرعية وغييييييييير شرعية

وكمان فى احصائية عن اكثر شعوب العالم تفاؤلا

اول الشعوب نيوزيلاندة وفى ذيل القائمة الطويلة العريضة وصل الشعب المصرى

الكلام ده اللى بنقوله هنا (اللى هو احسن واطيب واحن شعب كل ده على عينى وراسى )

بس هل انتى شايفة ان الشعب المصرى اخلاقة وعاداته زى ما هيا

هل لو قدر لك وركبتى اتوبيس هتلاقى الاحترام زى زمان كونك امراة

:1 (11): :1 (11):

اشــــــــــــــــــــــــــــــك

فريد

27-05-2009, 01:33 PM

السلام عليكم
استاذ اسامة انت فهمتنى غلط اولا انا لا اتكلم عن مصر بالتحديد ده موضوع عام
انا بكلمك عن ناس فعلا انا قبلتهم و كلمتهم و ناس شفتهم فى التلفزيون ووسائل الاعلام
و على العموم انا بحب مصر اكتر من اى حد
و صدقنى كل حد هايقول انا بحب مصر اكتر من اى حد
و كل واحد هايقوا انا بحب بلدى اكتر من اى حد ده موضوع لا خلاف عليه
و بقول يمكن بنقول كده عشان
لاننا عايشين فيها و معشناش الوضع التانى انا بقول وجهة نظر
و قلت يمكن اكون غلط

اميرة حبى انا

27-05-2009, 01:35 PM

بصى ياست الكل
كل الدنيا فى كل زمان ومكان
فيها حلو وفيها وحش
يعنى
دلوقتى لو ركبتى اتوبيس ممكن جدا حد يقوم لواحدة ويكون الحد ده سنه صغير بس ذوق
وممكن لأ انا معاكى
زى ماتمشى فى الشارع كده
وتلاقى ان اللى بيعاكسك راجل كبير
والشباب اغلبهم دلوقتى حسب اللى بشوفه بقى مش بيعمل كده
ووالله ده بيحصل وبشوفه
عايزة اقولك
ان الحلو موجود
والوحش موجود
واسمحيلى
انا بعترض على الجملة دى
لكن مصر دلوقتى قاسية على ولادها جداااا
وكمان لما حد يقول الدنيا بقت وحشة
ربنا مخلقش حاجة وحشة ابدا
بس لو الناس اللى اتغيرت
يبقى مش ذنب مصر ولا الدنيا
وربنا يهدى الحال
اخر كلامى ان
الوحش مش معمم
يعنى مش كله وحش ومش كله حلو
وده الحال من بداية الدنيا ولاخرها
والا مكنش هيبقى فى جنة ونار

lionking

27-05-2009, 01:44 PM

وده اللى انا قلته من اول الكلام

ان الناس هيا اللى وحشة مش مصر

عشان اى مكان فى الدنيا بيتعرف بناسه مش بجبالة وشوارعه

ومش معنى ان الواحد يقول الحاجة الوحشة فى اللى بيحبه انه خلاص مبقاش بيحبه

هو انتى لما تنقدى ابنك او بنتك يبقى انتى كده خلاص مش بتحبيهم
ولا انتى عايزاهم يكونوا احسن ناس

والراجل اللى متجوز ست مجنناه ومطلعة عينه لما ينتقدها ده معناه انه خلاص مش طايقها

بالعكس

معناه انه لسة بيحبها ومتمسك بيها

مش معنى كلامنا هنا اننا بنعمل انقلاب او بنعمل تجمع للى مش بيحب مصر

بالعكس فى اول الموضوع هتلاقينى قلت اننا عايزين نعلم الجيل الجديد ازاى يحب مصر
ازاى يعشق مصر

معلش مع احترامى للجميع والاراء المضادة

انزلى الجامعة كده

وهاتى 20 ولد وبنت

واساليهم مين بيحب مصر

وشوفى الاجابات ووقتها هتعرفى الوضع كويس

وبرده فى الاخر والله بحبها ونفسى تكون احسن واجمل بلد زى ما اخونا المغترب بيقول

اعدوا بالعافية

اميرة حبى انا

27-05-2009, 01:52 PM

مش معنى كلامنا هنا اننا بنعمل انقلاب او بنعمل تجمع للى مش بيحب مصر
اقرى كلامى تانى حضرتك
مش هتلاقى ولا حرف يحمل معنى الجملة دى

fagrmasr01

27-05-2009, 02:24 PM

بكل حبى للوطن .. باحييكم
وابعت كلامى باحترام ليكم

الموضوع هنا متميز وحيوى وبه قدر طيب من المناقشة وفتح باب الحوار
لا يوجد ادنى داعى للعصبية

المفترض اننا نناقش قضية رأى
وليس من المفترض ان تكون كل عقولنا لها نفس الرأى تجاه جميع القضايا الحوارية

أحييى كل كلمة اتكتبت .. بدون تعصب
انا مصرى حتى النخاع .. ولا أنتظر شهادة بوطنيتى من أحد .. ولا أدافع عن حبى لمصر
وفى نفس الوقت أعترف
ان فينا عيوب يجب ان نكاشف أنفسنا بها ..
حتى نتفاداها

فى اليابان بعد الحرب العالمية الثانية التى عانت منها اليابان الأمرين وتم تدمير أغلب منشآتها وتم فيها احتلال كامل اليابان
بعد الحرب أعلنت اليابان عن .. المكاشفة .. المصارحة.. انتقاد الذات بالعقل والمنطق
ووضعوا لأنفسهم تفصيلات كاملة لعيوبهم ومشاكلهم بكل الصدق ..
لم يجاملوا أنفسهم
ولم يدخلوا الى جلد الذات
بل تصارحوا وتكاشفوا
وكانت النتائج التى نعرفها جميعاً ..
اقتصاد ورفاهية وانتماء غير مسبوق
فى كل أوطان العالم

انتظر مشاركة جميع الأعضاء..
كلنا لها محبون .. فلنعبر عن حبنا ..
بتعريف صريح .. لمعنى كلمة وطن

ليون.. شكراً لكى أيتها المتألقة
وأحييكى على طريقتك فى إدارة الحوار

انا مصرى مولود هنا وباعشقها من كل قلبى وروحى ..
وأعلنها ان ان عارف قد ايه حبك لمصر ومتأكد من ده بكل ثقة
وبيقين الواثق أحييكى على وطنيتك التى فتحتى بها لنا هذا الباب الحوارى الرائع
ولا انكر عليكى السؤال
بل .. فلنتعاون معاً على الرأى وبكل مصارحة
وارجو استمرار هذا الباب الحوارى الراقى فى مضمونه
واتمنى الا يتعصب أحد منا لرأيه
و ليدلو كل منا بدلوه
فكلنا هنا . . لها عاشقون

lionking

27-05-2009, 04:56 PM

مش معنى كلامنا هنا اننا بنعمل انقلاب او بنعمل تجمع للى مش بيحب مصر

اقرى كلامى تانى حضرتك
مش هتلاقى ولا حرف يحمل معنى الجملة دى

اميرة

انا قريت كلامك كويس جداا

والجملة المكتوبة دى مش موجهة ليكى دى جملة اعتراضية او توضيحية وسط الكلام ومش ليكى تحديدا

دى للجميع عشان الموضوع يفضل واخد مجراه الطبيعى ( النقاش من اجل تعميق حبنا لبلدنا )
ايا كانت
مصر ولا الهند ولا السودان

اسامة22

27-05-2009, 05:01 PM

http://cdn.content.sweetim.com/sim/cpie/emoticons/000203C1.gif (http://www.sweetim.com/s.asp?im=gen&lpver=3&ref=10)
يابلادي ياأحلى البلاد يابلادي
فداكي أنا والولاد يابلادي
ياحبيبتي يامصر...يامصر

ماشافش الأمل في عيون الولاد
وصبايا البلد
ولا شاف العمل سهران في البلاد
والعزم إتولد
ولاشاف النيل فأحضان الشجر
ولاسمع مواويل فليالي القمر
أصله ماعداش على مصر
ياحبيبتي يامصر

ماشافش الرجال...السمر الشداد
فوق كل المحن
ولاشاف العناد في عيون الولاد
وتحدي الزمن
ولاشاف إصرار في عيون البشر
بيقول أحرار ولازم ننتصر
أصله ماعداش على مصر
ياحبيبتي يامصر

lionking

27-05-2009, 05:06 PM

استاذ جمال حضرتك ضربت مثل جميل جدااا وواضح للكل

وخد عندك كمان المانيا كانت ايه والناس والستات عملوا ايه للنهوض ببلدهم

اهم حاجة فى حل اى مشكلة

مواجهتها بمنتهى الصراحة

فى الوقت ده بس هنقدر نشوف السلبيات والايجابيات

ومن هنا نقدر نحل المشكلة

وبعدين احنا مش بنتكلم عن مصر تحديدا
احنا بنتكلم عن كلمة وطن

نتكلم بصراحة اكتر

هل فى مشكلة فى حب الوطن ؟؟؟

الاجابة

اه فى مشكلة فى حبه وفى الانتماء كمان

ليه؟؟؟

هو ده بئه السؤال اللى لازم نحاول نجاوب عليه
منغير ما نقول كلام شعارات ( احنا مش نازلين انتخابات ) وزى ما قال فريد كلنا بنحب مصر ومحدش ممكن يزايد على حد فى حب بلده ايا كانت وكيفما كانت

بس هو السؤال

ليه زمان ايام الاحتلال والحروب كانت الناس بتحب مصر والشباب كان بيضحى بكل حاجة عشان بلده؟؟

دلوقتى الشاب من دول لما بيجيله استدعاء للجيش

بيتجنن وبيعمل كل اللى يقدر عليه عشان يسقط فى الكشف وكلنا عارفين الحيل دى

انا لو بحب بلدى مش هتاخر عليها

وناس تانية كتير من اللى اتولدوا ونشأوا وترعرعوا فيها بيهربوا للخارج قبل التجنيد ومش بيرجع الا لما يتاكد انه خلاص مش هيتم استدعاؤه

صح ولا غلط

عايزة تفسير للنقطة دى من اى شخص

انا اعتقد ان ده دليل واضح وبين لحب الوطـــــن :1 (20):

fagrmasr01

27-05-2009, 05:06 PM

فعلا ... اصله معداش على مصر .. أغنية جميلة

اسامة22

27-05-2009, 05:35 PM

فعلا ... اصله معداش على مصر .. أغنية جميلة

دور جواك تلاقاها هي الصحبه وهي الأهلhttp://69.59.144.138/icon.aspx?m=blank
عشرة بلدي بتبقى نسيانها ع البال مش سهلhttp://69.59.144.138/icon.aspx?i=icon_smile_wailing
يمكن ناسي لأنك فيها http://69.59.144.138/icon.aspx?i=icon_smile
مش واحشاك ولا غيبت عليهاhttp://69.59.144.138/icon.aspx?i=icon_smile
بس اللي مجرب وفارقها قال في الدنيا مفيش بعديها
وهو دا الي مصبر الناس علي الي فيها

lionking

27-05-2009, 05:46 PM

دور جواك تلاقاها هي الصحبه وهي الأهلhttp://69.59.144.138/icon.aspx?m=blank
عشرة بلدي بتبقى نسيانها ع البال مش سهلhttp://69.59.144.138/icon.aspx?i=icon_smile_wailing
يمكن ناسي لأنك فيها http://69.59.144.138/icon.aspx?i=icon_smile
مش واحشاك ولا غيبت عليهاhttp://69.59.144.138/icon.aspx?i=icon_smile
بس اللي مجرب وفارقها قال في الدنيا مفيش بعديها
وهو دا الي مصبر الناس علي الي فيها

مهو ده اللى انا بقوله

انت بتتكلم من منطق انك بعيد عنها انت برة الصورة وكل اللى برة بيكون ده احساسه وبتكون عنده رغبة شديدة انه يرجع ويترمى فى حضن بلده
:36_3_2[1]: :36_3_2[1]:
بس بالامانة لما اى مغترب بينزل اجازة بيحس بايه

اقولك انا

اول اسبوع :: بلده وحشاه جداا ونفسه يبوس ترابها

تانى اسبوع:: يبدأ يتخنق من الزحمة والعطلة اللى بيتعطلها لما يروح الجوازات عشان يقيد تاريخ وصوله للبلد

تالت اسبوع:: الدنيا غالية اوى ده احنا عندنا ( فى المهجر ) فاتورة الكهربة عمرها ما وصلت للرقم ده مع ان التكييفات شغالة ليل ونهار مش بتبطل

رابع اسبوع:: اففففففففففف امتى الاجازة تخلص وارجع لشغلى بئه

ههههههههههههههههههههههههههه :36_3_2[1]:

اميرة حبى انا

27-05-2009, 05:53 PM

لا لا لا
اكيد احنا فاهمينها غلط:50 (2):
ده مافيش فيها ولا حاجة:1 (18): واحدة حلوة
خلاص
هى وحشة:36_5_11[1]:
وانا
مش
بحبهااااااااااااااااااااا
:50 (8)::50 (8)::50 (8)::50 (8)::50 (8):

خلود

27-05-2009, 05:58 PM

يعنى ايه كلمة وطن
؟؟؟؟؟؟؟؟؟؟؟؟؟؟؟؟

بجد يعنى ايه مصر !!!!!!!
ويعنى ايه لما الواحد يقوللى تعالى نحب مصر
انا من الناس اللى نشأوا وترعرعوا خارج مصر

وأدينى هنا بقالى سنين

http://www.6ocity.net/vb/images/smilies/1%20(5).gif http://www.6ocity.net/vb/images/smilies/1%20(5).gif

هتضحك لما تعرف انى ولائى وانتمائى لمكان ميلادى
بس مش قادرة انسى مكان ميلادى
حياتى كلها وذكرياتى هناك
http://www.6ocity.net/vb/images/smilies/50%20(2).gif http://www.6ocity.net/vb/images/smilies/50%20(2).gif

مش عارفة ده بئه اسمه ايه

تناقض واضح جدا

دلوقتى الشاب من دول لما بيجيله استدعاء للجيش

بيتجنن وبيعمل كل اللى يقدر عليه عشان يسقط فى الكشف وكلنا عارفين الحيل دى

انا لو بحب بلدى مش هتاخر عليها

دى حالات فرديه
مسمعتيش عن الظباط اللى بيرفضوا الرشوه والقضاه اللى بيحكموا احكام شديده من غير خوف من ى حد
مسمعتيش عن الظابط اللى ضحى بنفسه علشان بنت كانت مخطوفه على الكوبرى الدائرى واستشهد وكان خلص ورديته ومروح

اكيد ده كان بيحب بلده ومات وهو بيحبها وفيه نماذج اكتر بكتير موجوده

ليه دايما نظره التشاؤم هى السائده بيننا ودايما شايفين بلدنا وحشه

كفايه انك فى مصر محدش يطردك ومثال بسيط سمعته من زميلتى فى بلد زى الكويت والسعوديه اللى عايشين فى الملكيه فيه حاجه اسمها بطاقه احوال ( تابعيه اى تابع ) عندنا هنا فى مصر اسمها بطاقه الشخصيه او العائليه

نرجع يااختى ليون لموضوعنا اذا اتكلم او انتقد او عمل مظاهره فى بلد من دول تسحب منه هذه البطاقه ويطرد خارج البلد ولا يجرؤ اصلا انه يعمل مظاهره

شوفتى بقى ياليون كام مظاهره فى بلدنا وكام صوت حر اتكلم وانتقد وكام قناه فضائيه بتظهر سلبيات البلد قبل ايجابياتها قولى لى اى بلد عربيه فيها اللى عندنا ده

انا معاكى فيه ناس كتير فى السجون والمعتقلات لكن ده نظام بلد
اه فيه سلبيات ولكن فيه ايجابيات برضو
الحمد لله على اننا كده بعد كل الحروب اللى خضناها وكل الازمات اللى اتعرضنا لها
قدرنا نقف عل رجلينا تانى مش منبقاش امثال الصومال والسودان
ارجو التنبيه ياليون اننا شعب مستهدف وكفايه علينا امريكا واسرائيل بتحاربنا ولسه برضو عايشين ولله الحمد

وشكرا

اميرة حبى انا

27-05-2009, 06:02 PM

خلود
ياواد ياجامد انت
ايه الكلام الكبير ده
يااخواتى
سعد زغلول بيتكلم

fagrmasr01

27-05-2009, 06:03 PM

ههههههههههههههههههههههه
اخويا الغالى أسامة أفندى
الأخوة والأخوات الاعزاء
فعلا مصر حلوة
ومحدش قال ان مصر مش حلوة
مصر حبيبتى وانا جربت الغربة عشرين سنة وعارف معنى الغربة وأظننى اعشق مصر عشق بلا حدود ..
ولكن حبى لها .. أحاول ان اجعله مفيداً لها ولأهلها

لكن يبقى السؤال .. يعنى ايه كلمة وطن
مش علشان نقول مصر حلوة واللا مش حلوة ... لالالالا
ولا علشان نقول ونكرر اغانيها وشعارات حبها .. لالالالالا
كلنا بنقول انها حبيبتنا ..
ولا اظن ان هناك من يزايد على حبى لها

لكن اكرر.. السؤال هو .. يعنى ايه كلمة وطن

والموضوع انا شايف انه لازم يكون حوار مفتوح بقلب وعقل مفتوح
لأنه موضوع مهم اوى والله العظيم مش مجرد مزايدة ولا شعارات ولا توزيع اتهامات ولا نفى انتماء ولا الكلمات الصعبة دى اللى راح خلاص زمنها

كنا بنرقص فى الشوارع ونقول اطلب تلاقى تلاتين مليون فدائى فى جميع الميادين
وناصر يا حرية ياوطنية ياروح المة العربية يا نااااصر
وياجمال ياحبيب الملاييين
ومع كل شعاراتنا واغانينا .. جت لنا اكبر نكسة ف عمرنا 1967

ووقتها سجد سيدنا الشيخ الشعراوى سجدة الشكر فى الكعبة
وهذا مذكور فى كتب كثيرررة على لسان شيخنا رحمة الله عليه
ومسجل فى تسجيلاته بصوته وصورته
هل سوف نزايد أيضاً على وطنية شيخنا الشعراوى

ارجوكم يا اخوانى .. الموضوع ليس للمزايدة .. انا فهمت الموضوع انه حوار بالعقل حتى نزيد الانتماء فى قلوب الشباب الذين لم يعرفوا من مصر غير بعض مشاكلها
واكرر .. حتى لا يضيع الموضوع فى أغانى .. بنحبها كلنا .. لكنها لن تعطينا رد السؤال
يعنى ايه كلمة وطن

اميرة حبى انا

27-05-2009, 06:05 PM

اتفضل حضرتك
قول يعنى ايه وطن
عشان الخناقة تخلص والموضوع يخلص
اتفضل حضرتك

اسامة22

27-05-2009, 06:06 PM

الله ينور عليكي ياخلود
لقد اوجزتي وانجزتي
وعلي فكرة ياليون انا لاخر ساعة وانا راجع
من الاجازة ومسافر من مصر بتمني ان الطيارة يحصل اي حاجة وارجع تاني
ودايما اسافر علي اخر لحظة
وعايش المعاناة الي عايشها الناس في مصر
وعايشها في الغربة
في غلاء وفي قهر وظلم
وكل الي يخطر علي بالك واكتر
ومش بحس بالامان الا في حضن تراب بلدي
مهما كانت
لان الحلو موجود اكتر من السئ
وشكرا

fagrmasr01

27-05-2009, 06:21 PM

خناقة ايه بس يا أميرتنا الغالية
مفيس اى خناقة بيننا كلنا باذن الله الكريم
كلنا مصريين وبنعشق مصر ولا مزايدة فى هذا

وانا ضربت مثال واضح جدا بشيخنا الشعراوى رحمة الله عليه .. وبعد موقفه ده .. وافق ان يكون وزير الأوقاف فى مصر
ومعروف ان الوزير منصب سياسى .. لا يمكن ان يتسلمه شخص مشكوك فى وطنيته ولا انتماؤه
غير ان فضيلة الإمام رحمة الله عليه ..
بعيد عن اى شكوك من اصله

كل اللى طلبته من حضراتكم هو عدم التعصب
لان لما واحد فينا يقول ان فيها مشكلة .. مش معناه انه فاقد للإنتماء

انا انتقدت كثيرا تزوير الانتخابات وانتقدت تصرفات كثير غلط .. وشكرنى أعضاء كثيرين ..
ولا اسمح بان يزايد أحد على حبى لمصر

الانتقاد لعيب او مشكلة لا يعنى فقد الانتماء

ارجوكم ان تعودوا معى بهدوء الى ما فعلته اليابان بعد القنبلة الذرية من مراجعة شاملة للنفس
ومن بعدها انطلقوا الى أكبر الدول الصناعية ومن أغنى الدول .. بعد المراجعة التى تمت بلا شعارات وبلا تعصب

يعنى ايه وطن ؟

لخصها الباحثين فى كلمات قليلة وأفردوا لها مجلدات كبيرة
الإحساس بالإنتماء الى بقعة من الأرض ..
فيها مجموعة من البشر والحجر
مع احساس بالأمان الذى تحن اليه النفس فى كل وقت
فى الشدة وفى الرخاء .. فى الفرح وفى وقت الاحزان

مع الاحساس بالأمن والأمان يبدأ الإنتماء لهذه البقعة من الأرض
ولهذه المجموعة من الناس
ويتكون منهم جميعاً ..
الناس والأرض والإحساس ..
بهم معاً .. يكتمل معنى الوطن

وللحديث بقية ان كان لى فى العمر بقية

اميرة حبى انا

27-05-2009, 06:24 PM

يعنى ايه وطن ؟

لخصها الباحثين فى كلمات قليلة وأفردوا لها مجلدات كبيرة
الإحساس بالإنتماء الى بقعة من الأرض ..
فيها مجموعة من البشر والحجر
مع احساس بالأمان الذى تحن اليه النفس فى كل وقت
فى الشدة وفى الرخاء .. فى الفرح وفى وقت الاحزان

مع الاحساس بالأمن والأمان يبدأ الإنتماء لهذه البقعة من الأرض
ولهذه المجموعة من الناس
ويتكون منهم جميعاً ..
الناس والأرض والإحساس ..
بهم معاً .. يكتمل معنى الوطن

وللحديث بقية ان كان لى فى العمر بقية

شكرا على توضيح المعنى
ارجو ان يكون هو ده اجابة السؤال اللى دار حوله الموضوع
لينتهى النقاش
شكرا جميعا

lionking

27-05-2009, 10:18 PM

خلود

اولا انا لا اسمح لاى شخص انه يقول عليا انى عندى تناقض

ودى جملتك

تناقض واضح جدا

حبيت بس اسجل اعتراضى

انتى مثلا اكيد من مواليد اى بلد غير القاهرة
اكيد بتحبى المكان ده وبتحنيله جداا

احنا بس مش بنعرف نتناقش
والعواطف بتغلب علينا مش العقل

وتانى وللمرة الاخيرة ليس معنى الحوار ده ان فى واحد مش بيحب بلده
لكن فيه واحد بيحبها اكتر من التانى

نيجى بئه لموضوع المظاهرات والكلام الرائع اللى الكل سقفلك عليه

فى اى مكان فى العالم المتظاهرين بيحترموا لكن عندنا وفى اى دولة عربية زى ما بتقارنى لا يحترم المتظاهر

حد فكر ليه

طبعا لأ
لان اصلا احنا شعوب مش بتعرف تفصل بين العاطفة والعقل
ووقت المظاهرة تاخده الجلالة ويبهدل الدنيا

طبعا يتمسك وياخد جزاؤه

نيجى بئه للظباط اللى استشهدوا
على عينا وراسنا وده واجبهم
وكمان فى الظباط المرتشين والمستغلين للمهنة وكل حاجة

وكمان بالنسبة للتجنيد
ارجوكى متقوليش ان دى حالات فردية

كل اللى فى التجنيد كارهين التجنيد
والا لو انتى تعرفى حد كده
ده يبقى ملاك
مش شاب عربى

lionking

27-05-2009, 10:22 PM

المغترب افندى

وعلي فكرة ياليون انا لاخر ساعة وانا راجع
من الاجازة ومسافر من مصر بتمني ان الطيارة يحصل اي حاجة وارجع تاني

خلاص يا سيدى قدم استقالتك من هناك وارجع اقعد فى البلد وابقى احكيلنا ايه رايك
فى كل حاجة

من اول النظافة والشحاتة والناس الحاقدة على بعض

ومفيش داعى ان الطيارة يحصلها حاجة
:36_3_12[1]: :36_3_12[1]:
يعنى هو احنا عندنا كام اسامة

انا معاك ان الدول العربية كل اصحاب الاعمال نفسياتهم وحشة جدا وبيستغلوا الكفالة اللى فى ايدهم
بس برده المغتربين هما اللى خلوهم كده
وطبعا انت فاهم الكلام ده كويس

lionking

27-05-2009, 10:24 PM

شكرا على توضيح المعنى
ارجو ان يكون هو ده اجابة السؤال اللى دار حوله الموضوع
لينتهى النقاش
شكرا جميعا

يعنى هل الناس دلوقتى فهمت ازاى تحب بلدها مهما كانت وايا كانت

حضرتك اصدرت الحكم بانهاء المناقشة على اساس ايه

طلب توضيح بس

fagrmasr01

27-05-2009, 11:54 PM

يعنى هل الناس دلوقتى فهمت ازاى تحب بلدها مهما كانت وايا كانت

ليون .. الذى انتهى النقاش حوله هو معنى كلمة وطن
أما كيف نحبه فهذا حوار لا يزال مفتوحاً

وأرجو ان تقبلى مداخلاتى فيه ان كان فى العمر متسع بعد ان أعود باذن الله من التحليل غداً.
وانتى عارفة ان ذهابى الى المستشفى غداً باذن الله رب العالمين لاستئصال جزء من الورم لعمل التحليلات عليه.
فان قدر الله عز وجل لى العودة فسيكون من دواعى سرورى أن أستمر فى الحوار مع حضرتك ..
أحترم كل كلمة قلتيها هنا ..
وأحترم كل رأى وان خالف هذا الرأى جميع آرائى

وقديماً قالوا ..
قد لا اتفق مع رأيك ولا أسانده
ولكننى احترم انك صاحب رأى معلن

الأخوة الأحباب أعضائنا ومشرفينا
لا تدعوا الخلاف فى الرأى يفسد للود قضية

باذن الله يكون لنا لقاء
أستودعكم الله الذى لا تضيع ودائعه

اميرة حبى انا

28-05-2009, 09:40 AM

يعنى ايه كلمة وطن
؟؟؟؟؟؟؟؟؟؟؟؟؟؟؟؟

بجد يعنى ايه مصر !!!!!!!
ويعنى ايه لما الواحد يقوللى تعالى نحب مصر
ما أنا بحبها يا ناسhttp://www.6ocity.net/vb/images/smilies/36_3_5%5B1%5D.gif
طب نفكر مع بعض
يعنى ايه أنا بحب مصر
وهى مين مصر دى اللى أنا بحبها
(الكلام ده كلام ليون يا مستر جمال يعنى مش سؤال عن الوطن بس لا مصر كمان
ومافيش مشكلة)
لكن يبقى السؤال .. يعنى ايه كلمة وطن
(لان ده كلام حضرتك قلت ان الموضوع اصلا بيدور عن السؤال ده وبس)
ــــــــــــــــــــــــــــــــــ
لما حد ييجى يقوللى مصر هى ايه
أقوله ايه؟؟

وعلى فكرة انا بحب مصر بس مش عارفة هيا ايه
ــــــــــــــــــــــــــــــــــــــــــــــــــ ـــ
انا من الناس اللى نشأوا وترعرعوا خارج مصر

وأدينى هنا بقالى سنين

http://www.6ocity.net/vb/images/smilies/1%20%285%29.gif http://www.6ocity.net/vb/images/smilies/1%20%285%29.gif

هتضحك لما تعرف انى ولائى وانتمائى لمكان ميلادى

مع العلم انى بحب بلدى مصر جداا

بس مش قادرة انسى مكان ميلادى
حياتى كلها وذكرياتى هناك
ــــــــــــــــــــــــــــــــ
ده كلام حضرتك يااستاذة ليون وده اللى قصدت بيه خلود انه تناقض
وكلمة تناقض وارد انها تتقال فى اى نقاش يعنى مش شتيمة
ــــــــــــــــــــــــــــــــــــــــ
وأنا أرى أن هم المشاكل والعيوب
.. هى عيوب نفسى انا كمواطن

انا من وجهة نظرى ان الوطن هو المواطن
احنا اللى بندى سمات وصفات وطباع للوطن
لاننا بشر اما الوطن فهو جماد ارض جبال ماء ......الخ

اذا المشكلة الحقيقية تكمن فينا كبشر
ــــــــــــــــــــ
انت عايز تقنعنى ان الناس اللى مش قادرة تجيب عيش حاف عشان تاكله
مبسوطين

ولا الناس اللى بيضربوا نفسهم بالــــــــ
وقت دفع مصاريف المدارس
ــــــــــــــــــــــ
شاورلى على واحد فيكى يا مصر

مش بيتمنى يطلع منها

حتى لو هيروح فى داهية

والادلة ع الكلام ده كتير وكتير اوى

لا اعتقد ان الشباب اللى بيموت فى البحر ده مبسوط وبيضحك ومتهنى
ـــــــــــــــــــــــــــــــ
الناس اللى بتهرب من الارياف والصعيد وبيهربوا فى المراكب اهم دول اتولدوا هنا واتربوا فى خيرها وحضنها وكل الكلام الجميل ده

لكن مصر دلوقتى قاسية على ولادها جداااا

ردى حضرتك على سؤالى وشوفى الاحصائيات وانتى تعرفى اد ايه هجرة شرعية وغييييييييير شرعية
ـــــــــــــــــــــــــ
هل لو قدر لك وركبتى اتوبيس هتلاقى الاحترام زى زمان كونك امراة
ـــــــــــــــ
(ده برضو كلام حضرتك يااستاذة ليون وكان فى بدايته قلتى عايزين نعرف نحب الوطن ازاى
اسمحيلى هتحبيه ازاى وانتى اللى قلتى ولائك وانتمائك لمكان تانى
انا بقولك كده على اساس انك ذكرتى فى بداية الموضوع مصر وقصدتى مصر بالتحديد
وهتحبيه ازاى وهتخلينا نحبها ازاى واى شاب او بنت دخل الموضوع ده هيحبوها ازاى وانتى مقلتيش كلمة واحدة حلوة
غير انا بحبها والله
ولم تذكرى الا سلبيات فقط)
ـــــــــــــــــــــــ
وتانى وللمرة الاخيرة ليس معنى الحوار ده ان فى واحد مش بيحب بلده
لكن فيه واحد بيحبها اكتر من التانى
(ده كلامك برضو وان كنا من شكل الحوار بنحبها اكتر من حد تانى فمش عيب)
ـــــــــــــــــــــــــــ
نيجى بئه لموضوع المظاهرات والكلام الرائع اللى الكل سقفلك عليه
(من حقى اعترض على الاسلوب ده حتى لو حد شايفه عادى وده برضو كلامك يااستاذة ليون)
ـــــــــــــــــــــــــ
نيجى بئه للظباط اللى استشهدوا
على عينا وراسنا وده واجبهم
وكمان فى الظباط المرتشين والمستغلين للمهنة وكل حاجة
(وده برضو كلامك مع انى فى ردى على الموضوع قلت ان كل بلد وكل شبر فى الكون كله فى حلو وفى وحش
مافيش بلد مليان ملايكة)
ـــــــــــــــــــــــــ
حضرتك اصدرت الحكم بانهاء المناقشة على اساس ايه
(طلبت انهى المناقشة على اساس ان استاذ جمال قال ان الموضوع كله يعنى وطن
وهو قال يعنى ايه وطن)
ــــــــــــــــــــــــــ
ليون .. الذى انتهى النقاش حوله هو معنى كلمة وطن
(ده كلام استاذ جمال)
ـــــــــــــــــــــــــــــ
أما كيف نحبه فهذا حوار لا يزال مفتوحاً
(معتقدش فى حد هيقرا اللى انتو بتكتبوه ده ويحبه ابدا)
ـــــــــــــــــــــــــــ
مع كل احترامى لكل اللى اتقال
ده رأيئ وانا حرة فيه
دى بلدى وفيها سلبيات كتير
واقسم بالله العلى العظيم
مش شعارات زى مابتقولوا
انى بحبها ومبحبش غيرى ومش عايزة غيرها
ولما حد يحب حاجة ولو بنسبة بسيطة يقول حاجة واحدة
واحدة بس
حلوة فى حقها
ارجو من الجميع ان النقاش لا يأخذ صورة اخرى او خناقة بالبلدى يعنى
والا هضطر لغلق الموضوع
اصلا انا مش شايفة حاجة تانى تتقال

lionking

28-05-2009, 10:53 AM

السلام عليكم

اميرة
انا كنت بسال استلة كتير اوى

هل الوطن هو حيث نولد؟؟!
هل الوطن هو من حيث نبتت جذورنا؟؟!
هل الوطن هو حيث يوجد أصدقاؤنا وأحباؤنا؟؟!
هل الوطن هو حيث نجحنا وتفوقنا؟؟!
هل الوطن هو حيث وجدنا راحتنا؟؟!
هل الوطن هو حيث شعرنا بالأمان؟؟!

وكلها اتنست ومسكنا فى السؤال الاخير

كنت بتكلم عن الوطن بصفة عامة

والحمد لله اتحول للكلام عن مصر

وبرده مش مشكلة لانه كنا هنوصل للنقطة دى آجلا او عاجلا

لكن يبقى السؤال .. يعنى ايه كلمة وطن
(لان ده كلام حضرتك قلت ان الموضوع اصلا بيدور عن السؤال ده وبس)

ده كلام حضرتك يااستاذة ليون وده اللى قصدت بيه خلود انه تناقض
وكلمة تناقض وارد انها تتقال فى اى نقاش يعنى مش شتيمة

اولا انا لم اذكر كلمة شتيمة فى حوارى كل اللى حصل انى سجلت اعتراضى
لانك لو انتى قاعدة فى البلكونة بتتكلمى مع واحدة صاحبتك وقالتلك انتى عندك تناقض فى شخصيتك اكيد مؤكد هتضايقى منها

ولم تذكرى الا سلبيات فقط)

يا اميرة كل اللى اتقال فى الحوار من اوله لاخره عن البشر اللى هما اساس اى وطن

وزى ما انا قلت احنا البشر اللى بنشكل بلدنا ونديها انطباعات وعادات يعنى يا سيدتى
المشكلة فى الناس والكلام ده انا قلته قبل كده

نيجى بئه للظباط اللى استشهدوا
على عينا وراسنا وده واجبهم
وكمان فى الظباط المرتشين والمستغلين للمهنة وكل حاجة
(وده برضو كلامك مع انى فى ردى على الموضوع قلت ان كل بلد وكل شبر فى الكون كله فى حلو وفى وحش
مافيش بلد مليان ملايكة)

انا مقلتش خالص ان فى مكان فى الكون كله ملايكة
لكن فى ناس بتسعى للتغيير للاحسن وفى ناس لأ
والفساد فى كل دول العالم حتى اعظم الدول فيها فساد
بس البشر اللى هناك بتقاوم الفساد وبتسعى للتغير
وهو ده المطلوب
اننا يكون من جوانا فى دافع للتغيير

معتقدش فى حد هيقرا اللى انتو بتكتبوه ده ويحبه ابدا

تانى هسالك
لما تنتقدى صديقة ليكى او ابنك هل ده معناه انى مش بفكر فى مصلحته او مصلحتها

النقد اول خطوة فى مواجهة المشكلة والمحاولة للوصول لحل

وليس من الطبيعى اننا نكون بنتفرج على برنامج العاشرة مساءا
و90 دقيقة
وبلدنا
والحقيقة

...... الخ
ونغمض برده ونقول لالالالا كله تمام
امال البرامج دى بتعمل ايه

واعتقد الناس دى وطنية جدا وبتحب بلدها جداا

المطلوب ان الناس تعرف مشكلتها فين وتحلها

احنا فى الوقت الحالى محتاجين حل للمشاكل مش المفروض اننا نغمض او ندفن راسنا فى الرمل زى النعام

فى مرة فى العاشرة مساءا
استضافت منى وزيرة اقتصاد يابانية
وسالتها ازاى اليابان وصلت للوضع الحالى

ردت عليها وقالتلها ايه

عندنا حكمة بتقول

المشكلة يعنى فرصة للتفكير

وهو ده المطلوب

ندى نفسنا فرصة نفكر فى المشكلة وحلها ونحطلها مليون حل ونحاول

وبعدين اللى بقوله عن الناس اللى بتهرب من البلد اعتقد ان الناس كلها عارفاه مش مستنين ليون تقوله

وبرده عن المرتشين والخونة مش ليون هيا اللى اضافت من عندها

كل حاجة واضحة وباينة للناس

ومفيش دولة او وطن عربى معندوش المشاكل دى بل عندهم اكتر واكتر كمان

وكلنا عارفين دى برده

احنا نخلينا فى نفسنا ونفكر نحل الوضع ده ازاى

ازاى لما بنتى واحنا معديين من ترعة المريوطية وتشوف حصان نافق فى الترعة

سالتنى يا مامى ليه محدش شاله ؟؟
طبعا معرفتش ارد وكدبت عليها وقلتها هيجوا يشيلوه

لما تعدى فى نفس الشارع والمفترض انه شارع سياحى وباصات السياح مالية المكان

وتسالنى ليه الناس مش بترمى القمامة جوه الصندوق؟؟
.......

بصى يا اميرة

انا كل اللى عايزاه ان احنا نواجه اخطاءنا وبعزيمة نحلها ونقضى عليها

تحياتى للجميع

سما

28-05-2009, 11:17 AM

بعيد عن الأغاني وعن الشعارات
مصر دي أحسن بلد في الدنيا
ولو زهقت شويه جرب تبعد عنها شويه
هتلاقي مصر وحشتك جداً
كل مكان فيه صعوبات في العيش والحياة
ولكن والله لو كل مصري عايش في رفاهية أكيد حياته سوف تكون فاضية جداً
ولكن الحياة بدون مشاكل وحلها ومشاكل تاني وحلها ملهاش لازمة
والإنسان دائما في كبد يا جماعة
بس ده ما يخليناش نزعل من مصر
والله مصر دي أم الدنيا فعلاً
عمار يا مصر
ووحشتيني يا مصر بكل ما فيكي
وتحيا مصر
وتحيا تحيا بس سبوها تحيا من أي ناحية

fagrmasr01

29-05-2009, 07:29 AM

يؤسفنى ان يصل النقاش الى هذه الحالة من الحساسية

واسمحوا لى ان اقتبس بضع سطور من موضوع متميز واعجبنى جدا كتبه أخونا الفارس

*********
إذا شعرت برغبة من يحاورك في
إستفزازك .. والعبث بأعصابك ... لا تناقش

إذا عقدت العزم على أن ترضى بتغيير مالم يكن صحيحاً ..
و أن لا تخجل بالإعتراف .. بخبرة محدثك .. أو بقلة علمك ..
و إن أعجبك اسلوب من تحاور ..
حينئذٍ ... لا تتردد .. وناقش
*********
انتهى الاقتباس
*********

مناقشة عيوبى انا مع نفسى انا
ليس معناه اننى أكره نفسى

رجاء الا يتعصب احدنا لرأيه
فهو موضوع حوارى يفتح باب مناقشات
تحتاجها مصر ..
ان كنا فعلا عاوزين نثبت اننا بجد بنحب مصر

لا أنكر على أحد انه يحبها .. كلنا مصريين ونحبها
ولكن
ليست بالأغانى وحدها .. تنصلح الاحوال
ولا بالهتافات والشعارات الرنانة تتقدم البلاد

برامج كثيرة فى تلفزيون مصر الرسمى ناقشت وتناقش
وهذه فى حد ذاتها نقلة نوعية

أتمنى أتمنى أتمنى
الا تصل مناقشاتنا هنا الى انه غير مسموح
الا بكلمات المجاملة فقط فى الردود ..
مثل رووووعة ورررررااااائع ومشكووور اخى
وان من يكتب غيرها يتعرض للهجوم

أستأذنكم ان أكرر .. فبعض التكرار تأكيد
عندما سجد الإمام الشعرواى شكر لله على هزيمة 67 لم يكن يكره مصر .. ولم تكرهه مصر

بدليل انه بعد سنوات قليلة كلفته مصر بأن يكون وزيراً
ووافق هو على التكليف

وعندما اعترض عرابى على اسلوب الحاكم وقتها .. لم يكن خائن لمصر
ومن بعده ,, مصطفى كامل ومحمد فريد وسعد زغلول .. لم يكونوا خونة لمصر
واعتراض جمال عبد الناصر .. لم يكن خيانة لمصر

مناقشة عيوب بلدى بصراحة معناه
انى
بحبها

lionking

29-05-2009, 03:46 PM

أتمنى أتمنى أتمنى
الا تصل مناقشاتنا هنا الى انه غير مسموح
الا بكلمات المجاملة فقط فى الردود ..
مثل رووووعة ورررررااااائع ومشكووور اخى
وان من يكتب غيرها يتعرض للهجوم

أستأذنكم ان أكرر .. فبعض التكرار تأكيد
عندما سجد الإمام الشعرواى شكر لله على هزيمة 67 لم يكن يكره مصر .. ولم تكرهه مصر

بدليل انه بعد سنوات قليلة كلفته مصر بأن يكون وزيراً
ووافق هو على التكليف

وعندما اعترض عرابى على اسلوب الحاكم وقتها .. لم يكن خائن لمصر
ومن بعده ,, مصطفى كامل ومحمد فريد وسعد زغلول .. لم يكونوا خونة لمصر
واعتراض جمال عبد الناصر .. لم يكن خيانة لمصر

مناقشة عيوب بلدى بصراحة معناه
انى
بحبها

احييك على الكلام ده وعلى المثل الرائع كمان

fagrmasr01

04-06-2009, 09:13 PM

لكى لا ننسى .... أتمنى وسأظل أتمنى ان تكون لدينا شجاعة حب الحوار
الحوار بلا تعصب
ولا يعنى توزيع اتهامات

انتهت هذه الحقبة الزمنية التى كان فيها الجميع يجبرون على الركوع كرمز لحب الحاكم
انتهت فترة ارتباط حبى البلد بحبى لمن يملك فيها السلطة

مصر اكبر من الأغانى ومن الشعارات
مصر قامت وستظل قائمة باذن الله الى يوم الدين
وسيحمل لواء حريتها ابناؤها وبناتها المحبون لها على اختلاف مشاربهم

بصراحة .. اعود فاكرر النقاش .. الحوار .. وليس توزيع الاتهامات والتعصب

ولا مانع طبعن من التعليقات ... مثل .... رائع .. مشكور ... تسلم ايدك.. الله ينور ... مبدع طبعن

محمود التهامي

12-06-2009, 10:31 PM

عارفين انتو كدا عاملين زي ايه

زي اغنية اشرف عبد الباقي وياسمين عبد العزيز في فيلم مش فاكر اسمه
كانو بيقولو
عيل صغير عمل صوابعه كدا هو مسدس وفال لصاحبه طريخ طراخ
فام صاحبه طاوعه وساقله فيها وعمل له ميت وأهله قالو دا طخه طخ

وكمان زي الناس اللي طول النهار تقول هو دا عيب الشعب المصري
على اساس انهم من اصول سويسريه يعني

لو فيه عيب في الوطن يبقا فينا احنا لاننا احنا اللي بنعمل الوطن واللي على راسه بطحه .... !! مش كدا برضه

M.Khalifa

13-06-2009, 11:36 AM

نعيب مصرنا والعيب فينا ×××××××××× وما لمصرنا عيب سوانا
أنا مش عارف أقول ايه
المشكلة فعلا فينا احنا ولوا كل واحد نظر لهذا الموضوع من أوله لآخره هيعرف ان المشكلة فينا
أهذا أسلوب للنقاش
يا جماعة فيه تجاوزات كتيرة في أسلوبكم
أنا واثق ان احنا كلنا بنتنافس على حب البلد دي
بس احنا أكثر ما بنتنافس على حبها بنعيب على بعضنا ونفحم بعضنا البعض
وبصراحة أنا شفت مبالغات ومغالطات من البعض في الوصف أو في التعبير ربما يصفه البعض بعدم الوطنية
ولكني أرى أن كل من كتب هنا يحب مصر
أنا عن نفسي باقول رغم الشحاتة رغم الزحمة رغم الغلاء رغم البلاء رغم انفلونزا الطيور رغم انفلونزا الخنازير رغم .............. كل شيء
باحب مصر بعبلها
وخير دليل على حبها انتم أنفسكم
وما فعلتموه الآن
اللي ذكر السلبيات بيحبها والدليل انه زعل لما حد رد عليه وقاله انت غلط وشكك في وطنيته وبسرعة رد متعصبا أنا باحب مصر
واللي ذكر الايجابيات برضه بيحب مصر وبيدافع عنها
ولكن لا يصح أن يصل بنا الحوار لهذا المستوى من العصبية الزائدةوبالمناسبة
أعضاؤنا المشتركين في هذا الموضوع مشرفين كانو أم متميزين أم أعضاء جدد
يجب أن يحترم كل رأي