لا للتوك توك

[kito]

يا جماعة اللي بيقول عوزين تكتوك في القطاع 6 مش حاسب الموضوع كويس
التكتكت تجربة فاشلة جدا في كل المناطق وكله سلبيات منها

- مظهرها غاية في السوء وتعطي انطباع على شعبية المكان وضعف مستواها الاجتماعي وكلنا عاوزين نعيش فمكان مستواه كويس
- سواقين التكتوك اغلبهم أطفال أو مراهقين أوعاطلين يتعاطون المخدرات والبانجو وبذلك ستزداد الجريمة خاصة مع قلة السكان وزيادة المباني المهجورة
- مع انتشار التكتوك في اي منطقة يزداد بطريقة كبيرة جدا بما يضايق حركة المارة والسيارات
- واصلا سواقين التكتوك اسلوبهم سيء جدا مع الزباين ومع المارة
- التكتك وسيلة غير امنة بالمرة لانه بيتقلب بسهولة خاصة مع تهور السائقين الطائشين

والله يا جماعة من بداية المشروع ده ونا قلقان من موضوع التكتك ده عشان كده يا جماعة يا ريت نبقا ايد وحدة ونطرد اي تكتك يهوب نحية منطقتنا

وممكن نفكر فوسيلة محترمة أكتر تحترم ادمينتنا بدل البهدلة وقلة القيمة
اخوكم سامح
قطاع ق
0124768866

[mr.db]

فعلا لازم يكون في حل للتكاتك دي :mad:

بس ايش هو الحل ؟ :confused:

[kito]

اختيار شركات النقل الجماعي بالمدن الجديدة.. الأسبوع القادم
"75" قرشاً تعريفة الركوب بالتجمع الخامس و6 أكتوبر والعبور و"50" في الشروق ودمياط و125 للسيارات المكيفة
كتب جمال العليمي:
أعلن المهندس أحمد المغربي وزير الإسكان والمرافق والتنمية العمرانية عن فتح مظاريف المزايدة العامة التي طرحتها الوزارة بين شركات النقل الجماعي الخاصة لتوفير خدمات النقل للمواطنين داخل المدن الجديدة وذلك بداية من الأسبوع القادم.
قال الوزير إنه سيتم فتح المظاريف في مدينتي 6 أكتوبر والعبور حيث تم الإعلان عن المزايدة بهما منذ فترة بينما سيتم الإعلان قريباً عن مزايدة أخري بين شركات النقل المتخصصة لتوفير النقل الداخلي بمدن القاهرة الجديدة والشروق ودمياط الجديدة.
أكد المهندس محمد دمرداش مساعد أول الوزير أن الوزارة حريصة علي توفير خدمة نقل داخلي جيدة وبأسعار مناسبة لسكان المدن الجديدة ولهذا تم تحديد مسارات الخطوط المختلفة في كراسة الشروط التي حصلت عليها الشركات المتقدمة للمزايدة بحيث تخدم جميع أحياء المدينة وتم وضع مواصفات محددة للسيارات المشتركة بالمشروع أهمها ألا تقل سنة صنع السيارة عن عام .2008
وعن التعريفة المحددة بكراسة الشروط لكل مدينة أكد المهندس محمد دمرداش أنه تم تحديد تعريفة الركوب ب75 قرشاً في كل من مدينتي 6 أكتوبر والعبور و50 قرشاً في مدينتي الشروق ودمياط الجديدة بينما تم تحديد 75 قرشاً في مدينة القاهرة الجديدة و125 قرشاً لركوب السيارات المكيفة.

[ensana]

انا معاك يا اخ سامح ان التوكتوك ظاهره سيئه جدا
وانا معاك فى كل اللى انت قولته ولاكن ...

اختلف معاك فى نقظه وحده يعنى ايه التوكتوك بيدى انطباع على شعبية المكان
وضعف مستواها الاجتماعى
على فكره انا مش عايشه فى مدينة اكتوبر والمنطقه اللى انا سكنه فيها منطقه نضيفه ومحترمه ومستوها الاجتماعي عالي
مستوى المكان بالناس اللى عايشين فيه مش بموصلته ان كانت راقيه ولا لأ
والمستوى برضو بسكان المكان مش بموصلاته ازاى ولا ايه
غير كده انا متفقه معاك فى كل حاجه بس بصراحه اول جمله معجبتنيش نهائي
واتمنى اكون قدرت اوصلك اللى عايزه اقوله
واسفه للاطاله

[kito]

اشكرك اخت انسانة على ردك
بخصوص موضوع ان التكتوك يعطي انطباع عن شعبية المكان فهمت وجهة نظرك لكن انا لم اقصد طبعا اي اساءة لسكان المنطقة باذن الله هتكون منطقة محترم بسكانها قبل اي شيء ولكن التوكتوك لانه بعيد عن اي رقابة فسائقة يسير على هواه ولا يلتزم باي قواعد للمرور او احترم للمارة او السيارات سواء باالسير عكس الاتجاه او خلافه فيعطي شكل من اشكال العشوائية في السير بالاضافة لسوء سلوك واسلوب تعامل السائقين وكذلك يقومون بتشغيل الاغاني الهابطة بصوت مرتفع وهكذا من يزور المكان بالتأكيد سيتضايق ويترك ذلك انطباع سيء عن المنطقة وبالتأكيد لا نريد ذلك لمنطقتنا
مرة اخرى اشكرك وأتأسف لكي عن سوء التفاهم

[ensana]

انا اللى بعتذر منك يمكن انا اللى فهمت غلط وانت اكيد معك حق شكرا للتوضيح واعتذر مره اخرى

[الطاوس الحزين]

مش معاكى انسانه


التوك توك مظهر غير حضارى .. ولا آمن بالمرة


وبعدين غير مسموح له بالسير فى الاماكن العامة .. ومسموح له فقط فى الاماكن الشعبية .وايضا فى اطار معين

وده مش كلامى دة القانون هو اللى محدده



بصراحة وجوده فى مصر خسارة كبيرة ..الناس بتتقدم واحنا ولله الحمد بنرجع الاف الخطوات

[M.Khalifa]

أين البديل؟

[osamamaz]

الغريب انكم سيبتم كل مشاكل المنطقة 6 و تخيلتم ان المشكلة الجوهرية هى التوكتوك
لا تنسوا انكم فى صحراء غير ممهده بطرق مسفلته و القطار يعزل المنطقة عن بعضها (القطار العازل)
لو ركبوا للتوكتوك اجنحة عشان يطير و يعبر الناحية التانية و ميمشيش ولا يغرز فى الرملة يكون افضل
ساعتها تبقى المدينة الفاضلة بالتوكتوك الطائر حتى تننقل فيه الاسمنت و الحديد و الطوب ايللى صعب وصوله خلف مطلع القطار ده و ساعتها نعمللة مطار القطاع 6 و مهبط التوكتوك

[يسرى لطفى]

اشكرا جميع المشاركين فى موضوع التوك توك وعايزا اقول لو مفيش توك توك يا جماعه يعمل ايه الغلبان اللى عايز يوصل لارضه بعد ما باع كل اللى حيلته علشان يبنى الارض ده حتى باع العجله اللى حيلته مفيش غير الجمال يا جماعه احنا لسه فى صحراء عايزين ايه اللى يمشى على الطرق ده دلوقتى ولما الدنيا تتعدل نبقى نطالب برحيل التوك توك ويمكن ربنا يسهل وتدخل مواصلات داخليه وتريحنا وده كله سابق لاوانه

[سما]

إذا كان الموضوع هزار يبقى الوسيلة هي الجمل.
ولو مش هزار يبقى الحل ليس في الوسيلة اللازمة للنقل الأن .
الواحد مننا عاوز يشوف قطعة الأرض بتاعته ويروح لها بأي وسيلة الأن ولو تاكسي.
وبعد كده ندور على شركة مقاولات أو مهندسيين محترمين ونتفق معاهم .
إحنا نعمل التراخيص وهما عليهم الباقي ونبقى نركب معاهم في عربيات الشركة لما نعوز نشوف الأرض.
وصدقوني مجتمع يضم 42000 وحدة سكنية بهذا النظام سوف يكون راقي جداً وفيه مدارس وسوبر ماركت وحدائق ودوائر حكومية وخدمات كتير قوي منها المواصلات طبعاً ودا دور الحكومة.
المهم نبني ونعمر المكان وبعدين غصب عن الحكومة توفير المرافق والخدمات.
ومحلولة إنشاء الله.
والله ولي التوفيق