المساعد الشخصي الرقمي

مشاهدة النسخة كاملة : "" المواطن المصرى "" يجيب على ......



lionking
29-04-2009, 10:54 AM
هناك من شكك فى ذكاء الإنسان المصرى وبناء عليه قرر عمدة القرية الذكية اجراء اختبار لقياس مستوى ذكاء المواطن المصرى ، استلمت الأسئلة وقمت بالاجابة عنها ملتزما بالشروط التى ذكرت فى رأس ورقة الأسئلة التى تنص على أن زمن الاجابة فترة واحدة تجدد بموافقة مجلس الشعب ، وان الاجابات يشترط اجابتها بقلم حبر فوسفورى وأنه لن يلتفت الى أوراق الاجابة غير المرفق بها طابع شرطة وان الامتحان سيكون تحت اشراف القضاء .

يا مسهل بدأ يفتح ورقة الأسئلة ويجاوب :

# هل صحيح ان كتر السلام يقل المعرفة ؟
ــ صحيح فيما عدا السلام مع اسرائيل ، كتر السلام معاها يعمق المعرفة والبيزنس .

# القيادة السياسية تدرس مع القادة العرب فرص احياء عملية السلام ؟
ــ أهى دى بالذات حاجة محدش يقدر يحييها غير اللى خلقها .

# يقال إن87%من الشعب المصرى ساخطون على الحكومة المصرية ... ما تعليقك ؟
ــ ال 13% الباقيين فى بورتومارينا .

# تقرير :45% من الشعب المصرى مصابون بمرض السكر ما تعليقك ؟
ــ آدى اللى خدناه من" الحلوانى " اللى بنى مصر .

# ما أهم مظاهر الفهلوة عند المصريين ؟
ــ انهم يشكون فى الشحات ولا يشكون فى النصاب .





# بعد اضطهاد النادى الأهلى الواضح لنادى الزمالك والمتمثل فى التنكيل به ذهابا وايابا .... ماذا تتوقع لجماهير الأخير ؟
ــ أتوقع أن نقرأ قريبا أخبارا عن زملكاوية المهجر .


# ليه الحزب الوطنى بيعمل اعلانات لنفسه مع ان البلد كلها بتاعته ؟
ــ زى ما شبكة الأوربت بتعمل اعلانات لنفسها على شاشة الأوربت .

# ما الفرق الأهم بين مصر وأمريكا ؟
ــ الفرق الأهم ان عائد السياحة من الهرم المزيف الموجود فى لاس فيجاس مئة ضعف عائد السياحة من الهرم الحقيقى .


# ما أهم قاعدة موجودة فى مصر ؟
ــ ان مفيش قاعدة لأى حاجة

# ما وجه الشبه بين السد العالى وقانون الطوارىء ؟
ــ الأثنان مصدر " للكهرباء!!!" .

# لماذا يطلق المصريون على زوجاتهم لقب " الحكومة "؟
ــ لصعوبة تغييرها مهما تسببت فى كوارث .


# أين يمكنك أن تلاحظ سوء نية المصريين ؟
ــ عندما يغنون للطفل البرىءبمنتهى الخبث قائلين .... يارب يا ربنا " تكبر وتبقى زينا .


# ليه أكتر ناس بياخدوا مواقف معارضة جريئة هم الناس بتوع الغزل والنسيج ؟
ــ علشان بيشتغلوا فى القطن , و " القطنة ما بتكدبش " زى ماقلت مدام نظيفة.


# امتى بتحس ان البلد حلوة ؟
ــ ما باحسش ان بلدنا حلوة غير لما داليدا تقول : " حلوة يا بلدى "( .... بغض النظر انها قالتها وانتحرت …)


# امتى هناكل جوافة من انتاج مزارع توشكى ؟
ــ لما نلاقى المشمش!!!!!


# ما العلاقة بين عصام الحضرى وسمن روابى ؟
ــ الطعم فلاحى وتحدى .


# هل لك أقارب استشهدوا فى الحرب ؟
ــ لأ عندى أقارب استشهدوا فى السلام ..... " السلام 98" .






# ما تعليقك على أن المصريين لا يتحدون الا لما يكون المنتخب بيلعب ؟
ــ الاستاد هو الحل !


# ما الدليل على أن مصر بلد الامان ؟
ــ الدليل ان الواحد بيتردد كتير قبل ما يدخل أى قسم شرطة .


# ايه الكلمة اللى ما بتحبش تسمعها وانت فى أوضة العمليات ؟
ــ يا خسارة .


# ما الفرق بين الزوجة المصرية والزوجة اللبنانية ؟
ــ 0 4 كيلو جرام على الأقل .


# بماذا ستجيب كمصرى عند سؤالك عن عمرك فيما أفنيته بعد عمر طويل ؟
ــ أفنيته فى اشارة قصر النيل مستنيها تفتح ، وفى صلاح سالم مستنيه يتحرك ، وعلى كوبرى أكتوبر مستنى لما رئيس الوزراء يروح .


# من المستفيد من الزحام الذى يسيطر على شوارع القاهرة ؟
ــ شركات المحمول ، كله واقف فى الاشارة ماسك الموبايل ، بيخلص شغل أو بيعتذر عن التأخير أو بيسلى نفسه على الأقل ، وبالتالى تعتبر الادارة العامة للمرور هى المستفيد الثانى " مخالفات استخدام المحمول أثناء القيادة ".
المستفيد الثالث هى الشركة الشرقية للدخان حيث يتزايد معدل الحرق على سبيل " التنفيث " .

المستفيد الرابع هو الهيئة العامة للبترول حيث يتزايد حرق البنزين على الفاضى اثناء الوقوف وهو الأمر الذى يبرر اختفاء البنزين من المحطات وبالتالى يصبح المستفيد الخامس هم أطباء الأمراض الصدرية .

المستفيد السادس المعلنون على اذاعة نجوم fm وبالتالى يصبح المستفيد السابع الشركة المصنعة للأدوية المهدئة بالتساوى مع صيدليات على على .

## ليه بيقدموا الساعة ساعة عندنا فى الصيف ؟
ــ علشان البلد تتقدم بينا .


## ايه اكتر حاجة بتجمعنا كمصريين ؟
ــ حبنا للكابتن ابوتريكة .
ــ حبنا لأبو تريكة بيخلينا ندعى له من قلوبنا يارب يخف يارب يلحق ماتش المنتخب يارب أبوتريكة ينزل دلوقتى ، ما أظنش ان فيه حد فينا دعى لمصر بأى حاجة من زمان .
ــ حبنا لأبو تريكة خلانا نصفق له ونقف وراه لما رفع فانلة عليها " تعاطفا مع غزة " ، لكن لما الغزاوية دخلوا عندنا شوف بأه .
ــ حبنا لأبو تريكة خلا معظمنا يمشى فى الشارع لابس تى شيرتات عليها رقم 22 ، حد فيكم فكر يعلق علم مصر فى البلكونة عنده ؟ .

### لماذا يقال عن الشعب المصرى انه شعب فوضوى ؟
ــ علشان بيكره " النظام . "
# اذكر اسم شخصية عامة معروفة ما بتكبرش أبدا ؟
ــ بــــــــــــــــــكـــــــــــــــا ر

fagrmasr01
29-04-2009, 11:17 AM
هههههههههههه
فعلا اجابات مصرية صميمة

فيه سؤال اتنسى

س - ما هى رموز الخير والفرحة فى مصر
ج - ان رئيس وزرائها رمز النظافة ( نظيف )
ورئيس مجلس الشعب رمز للفرحة ( سرور )
ورئيس الشورى عندها رمز الشرف ( الشريف )
ورئيس لجنة السياسات رمز للجمال ( جمال )
ووزير داخليتها رمز للحب والعدل ( الحبييب العادلى )
وفيها من رموز العز ما يكفى لأن تعيش فى عز
وفيها وزارة مخصوص للتضامن الاجتماعى ( تتضامن مع تجار الدقيق ) ومع أصحاب الافران الافرنجى
وفيها أغانى خيال علمى ( مشربتش من نيلها )
وبتتحقق فيها الأفلام .. اقصد الأحلام ..( عاوز حقى )
وفيها أحزاب كتييييير معارضة ( كتير لدرجة منعرفش ولا اسم فيهم ) ولا حتى اى نشاط ليهم
وفيها وفيها وفيها .. والى فيها .. بيكفيها

lionking
03-05-2009, 10:46 PM
هههههههههههههههههههههههههههه

حلوة جدا يا جمال بجد

والاغانى الخيالية دى تحفة
والافلام

تسلم ايديك

fagrmasr01
04-05-2009, 12:10 AM
انتى اللى ابتديتى يا ليون وسخنتى الكلام ..
ولما ليون تقول .. لازم الرد يكون على حجم وقيمة كلام ليون
تسلمى لنا يا ليون
و
و
و ربنا يستر

ensana
05-05-2009, 12:44 AM
مش عارفه اضحك ولا احزن
شكرا يا ليون وشكرا يا استاذ جمال