يوم الغضب..............

[lionking]

حد يعرف او سمع عن موضوع 6 ابريل القادم


هحكيلكوا الحكاية باختصار




http://up111.arabsh.com/s/be6i1tbieq.jpg (http://up111.arabsh.com/)





من حق جيلنا أن يجرب .. فإما أن ينجح .. أو يقدم تجربه تستفيد بها الاجيال الاخرى


ليس على الشعوب ان تخاف من الحكومات .. بل على الحكومات ان تخاف من الشعوب


يوم الغضب ... 6 ابريل 2009


اكيد بتمشى فى الشارع و مخنوق من البلد
نفسك تسافر فى اول طياره .. أو أول مركبه حتى لو تغرق على حدود ايطاليا
ونفسك تتشعبط فى عجلة طيارة وتموت متجدم مش كده :confused:
اكيد مخنوق من الفساد و الرشاوى و عدم الرقابه على الموظفين و اكيد عارف ان الفساد بييجى من فوق و انهم قاصدين ان الفساد ينتشر :(


اكيد مخنوق من التعليم الفاشل اللى مالوش اى علاقه بالواقع


اكيد مخنوق من المواصلات الزحمه و الطرق المكسره و اللى بدون تخطيط ويقولولك انت السبب فى ارتفاع نسبة الحوادث


اكيد مخنوق من العشوائيه فى اتخاذ القرار


اكيد مخنوق من الاسعار اللى بتزيد كل يوم بسبب رجال الاعمال المحتكرين لجميع السلع و بيرفعوا اسعارها بدون رقيب او حسيب


مش عارف تتكلم
مش لاقى اللى تتكلم معاه


يبقى ايه العمل
هنهرب ؟؟ ونموت؟؟ ولا نحاول على اد ما نقدر يمكن نعرف نصلح المايلة ..


لكن ليه نخاف
و ليه نسافر و نسيب ليهم البلد
البلد دى بلدنا
و إحنا إللى هانغيرها


فى شعوب كتير قدروا يغيروا بلدهم للاحسن رغم كل الفساد و الاستبداد
إحنا مش اقل منهم


احنا لو سكتنا على الوضع ده هنموت كلنا
مش بعمل دعوة لاضراب ولا حاجة
انا بفكر الناس باللى بيحصل فى البلد
واكيد كلنا شفنا ان الاضرابات بتجيب نتيجة
الصيادلة...الاطباء
المحامين ... المعلمين..
اساتذة الجامعة
كل الناس دى عملة اضراب وطالبت بحقوقهم
منغير تكسير وبهدلة للبلد
لان البلد دى لينا وملكنا احنا


كلنا مع بعض نحاول نعمل حاجة

وربنا يستر

اعدوا بالعافية

[fagrmasr01]

المشكلة الحقيقية ان شعبنا اصابته اللا مبالاة فى مقتل
لا مبالاة فى المشاركة السياسية منذ عشرات السنين
وأصبحنا نحب ان نعيش فى ظل العقد .. عقدة الاضطهاد .. عقدة الخواجة .. نظرية المؤامرة وعقدة ان الغرب والشرق بيخططوا للقضاء علينا وعاوزين يخربوا بيوتنا
وأصبحنا ندمن الخضوع لكل ذو قوة او كل ذو سلطان
يضطهدك الموظف الصغير فى شباك التذاكر فتسرع الى استرضاؤه وليس الى طلب حقك
يضطهدك سواق الميكروباص .. تقوم بسرعة راجع للخشوع والخضوع .. وتقول له .. صباح الفل يا اسطى باشا
يضطهدك المدرس والفراش والخباز فى الفرن وأمين الشرطة .. فتسارع الى الاسترضاء
ولم يفكر شعبنا الطيب فى ان يغير او ان يتغير

والكارثة انه عند التحول الى الموقف العكسى.. نجد الفعل العكسى

شعب اصبح يستسلم الى انه اما ان يكون الفرعون .. او يكون من يترك بيته وعمله لكى يبنى للفرعون قصراً وقبراً

والخوف هنا ان دعوة الاضراب تتحول الى دعوة للخراب ، فمن الواجب اولا ان يتم زيادة وعى الشعب
زى ما حضرتك قلتى انها ممتلكاتنا الى بنكسرها او نحرقها

رأيى ان الشعب يحتاج الى زيادة الوعى قبل دعوة التحريك حتى يتحرك فى اتجاه صحيح يصب فى مصلحة الشعب .. مصلحة مصر المحروسة

[lionking]

الله ينور عليك يا استاذنا

اللامبالاة

صفة هتودينا فى داهية

فعلا بقينا شعب مليان عقد وكلاكيع

الاستسلام

دى كمان صفة موجوده بغزارة
تلاقى الواحد سايب الدنيا تشيل وتهبد فيه ولما تساله يقولك مفرقيتش كتير اركب الميكروباص دلوقتى ولا كمان ساعة ,, عدم احساس بالوقت وبلادة المشاعر

وطبعا كله محسوووووووووووووب

ما علينا
نرجع للشعب الطيب والشباب الضايع اللى مش لاقى حتى هدف يفكر فيه

هيفكر ليه اذا كان شايف الحال كده ومن سىء لاسوا

المهم احنا دلوقتى عايزين نوعى الشعب وخلينا نبدا بشعب المنتدى

عايزين يكون فى ثقافة الحوار

ناخد وندى فى الكلام منغير ما واحد يزعل ويخاصم التانى

على راى الليمبى(نبقى زى السكينة فى الحلاوة)

عايزين نتعلم نسمع عشان نتسمع كويس

عايزين يكون فى عندنا روح المشاركة فى كل حاجة ( يعنى نشارك ونرد فى كل المواضيع مش بس مواضيعنا __ وكمان نرد باستفاضة ,, مش كلمتين واقلب)

مش معنى الكلام ده ان الناس مش عاجبنى لا سمح الله
انا بس بفكر اننا نبدا بنفسنا لانى لاحظت ان معانا شباب صغير والناس دول هما اللى لازم نعلمهم الحاجات دى ونبدا بيهم

عشان كده اللى عنده اقتراحات لتغير وتعديل سلوك وآآآآآآآآآفات الشعب ياريت يحطها هنا ونبدا نناقشها واللى تعجبه حاجة يبقى يعملها
هو هيستفيد واحنا كمان اكيد هنستفيد


والله المستعان

[اسامة22]

موضوع غاية في الروعة ياليون
بس هنقعد بالعافية لو ابنك مريض ولابنتك مريضة ومش لاقية حق الدوا
هتعملي اية الفساد منتشر بطريقة فظيعة
والي حاكمين البلد شوية حرامية مدمرين البلد والناس
هل جربتي او عشتي انك تتاخدي في نص الليل
وتترمي في سجن متعرفيش انتي فين ولا حد يعرف عنك حاجة
ارجوكي متقلبيش المواجع
لنا الله ياليون
كل صوت حر بيطالب باحترام آدميتة مرمي في السجن بالسنيين
تارك اولادة لمصير مجهول حتي الجار مش بيسأل علي اولادة وهو مرمي
داخل معتقل
اسكتي ياليون السجنون مرمي فيها وتعذيب ناس شرفا اصحاب راي
رحم الله عمر ابن الخطاب
لو عطرت ناقة في الشام لا سأل عنها عمر يوم القبامة
رحم الله عمر بن الخطاب
وربنا يجعلة عامر

[fagrmasr01]

أعتقد انه يصدق علينا .. من اعمالكم .. سُلِطَ عليكم
لقد نسينا الله فأنسانا أنفسنا وسلط علينا بذنوبنا الخوف والجوع والقهر والمرض
فهل لنا أن نفكر فى العودة الى الله
هل لنا ان نعيد بناء بيوتنا على تقوى الله ومخافته
هل لنا ان يعود كل أب وأم الى ان نحاسب أنفسنا وان ننصح ونرعى أولادنا وأن نربيهم على الحب والتراحم وعلى ان الله عز وجل أولى بالخوف منه والخشوع له وأنه عز وجل القوى العزيز

أعتقد اننا فقدنا صلتنا بدين الله ففقدنا عزتنا وكرامتنا وسلط الله علينا الدنيا
الحل فى رأيى العودة بأنفسنا وبيوتنا الى الله عز وجل بغير تشدد ..
والله المستعان

[lionking]

عشرات المعلمين يتظاهرون أمام «التعليم» ضد «اختبارات الكادر».. ومفاوضات بين الوزارة والمتظاهرين «فى الشارع»

كتب هشام شوقى ٢٥/ ٣/ ٢٠٠٩http://media.almasry-alyoum.com/photo.aspx?ID=96271&ImageWidth=240 (http://www.almasry-alyoum.com/popimage.aspx?ImageID=96271)


تظاهر العشرات من المعلمين أمام مقر ديوان عام وزارة التربية والتعليم أمس، احتجاجاً على ربط بدل المرحلة الثانية من الكادر بالاختبارات، فيما شهد الشارع المواجه للوزارة «أول تفاوض» بين الوزارة والمعلمين على قارعة الطريق، تم خلاله الاتفاق على مناقشة أزمة الاختبارات مع المعلمين غداً.
وقال بعض المتظاهرين لـ«المصرى اليوم» احتجاجنا يأتى على خلفية ما حدث فيما سبق من غش داخل لجان اختبارات الكادر، وكذلك لعدم تدريب المعلمين قبل دخول الاختبار.
وحمل المتظاهرون صور الرئيس مبارك إلى جوار لافتاتهم، التى تضمنت تساؤلات وشعارات احتجاجية، منها «هل المعلم الراسب يخرج من التدريس؟» و«عدم دستورية اختبارات المعلمين»، و«نطالب بحقنا فى الكادر دون اختبار أو إجابة»، و«لا لمهانة المعلم». كما ردد المتظاهرون هتافات «يسرى بيه يسرى بيه حوافزك إيه وبقت إيه»، مهددين بالمشاركة فى إضراب ٦ أبريل المقبل، إذا لم يحصلوا على الكادر.
من جانبه، أرسل الدكتور يسرى الجمل، وزير التربية والتعليم، زغلول عبدالمقصود، وكيل الوزارة لشؤون الأمانة العامة، للمتظاهرين فى الشارع للتفاوض معهم وعرض دخولهم اختبارات شهر أبريل، فيما علق المعلمون موافقتهم بصرف الكادر بأثر رجعى، بينما أكد عبدالمقصود أن ذلك يعد «مخالفاً للقانون»، مما أدى لتأزم الموقف.
وانتقلت المفاوضات بين الوزارة والمعلمين إلى داخل ديوان عام الوزارة، وتم الاتفاق على عقد لقاء غداً يضم ممثلين عن كل محافظة للاستماع لوجهات نظرهم بشأن اختبارات الكادر، ومناقشة مدى قانونية اختبار جميع المعلمين فى اختبار واحد.



والله حاجة تلغبط وتجنن

ربنا معنا وعلى رايك يا اسامة

ربنا يجعله عامر

[الباشا تلميذ]

قال تعالى : " إن الله لايغير ما بقوم حتى يغيروا ما بأنفسهم "

صدق الله العظيم

اللامبالاه
مرض العصر
كل شخص يرى الخطأ فى كل وقت وفى أى مكان ولايحرك ذلك ساكنا
لابد من نهضه انتفاضه من داخلنا أولا حتى نستطيع أن نغير ماحولنا
لابد من أن نقوم بتغير كل مانراه خطأ
فى حياتنا اليوميه وكم من المواقف التى يصادفها الانسان فى حياته اليوميه من غش واستغلال ونصب
أصبحنا وكأننا فى غابه القوى يأكل الضعيف
علينا أن نصحى ضمائرنا ونقوى إيماننا بالله ونوجد الرحمه فى ما بيننا
وعلى رأى الاستاذ جمال



أعتقد انه يصدق علينا .. من اعمالكم .. سُلِطَ عليكم
لقد نسينا الله فأنسانا أنفسنا وسلط علينا بذنوبنا الخوف والجوع والقهر والمرض
فهل لنا أن نفكر فى العودة الى الله
هل لنا ان نعيد بناء بيوتنا على تقوى الله ومخافته
هل لنا ان يعود كل أب وأم الى ان نحاسب أنفسنا وان ننصح ونرعى أولادنا وأن نربيهم على الحب والتراحم وعلى ان الله عز وجل أولى بالخوف منه والخشوع له وأنه عز وجل القوى العزيز

أعتقد اننا فقدنا صلتنا بدين الله ففقدنا عزتنا وكرامتنا وسلط الله علينا الدنيا
الحل فى رأيى العودة بأنفسنا وبيوتنا الى الله عز وجل بغير تشدد ..
والله المستعان

[fagrmasr01]

بسم الله الرحمن الرحيم
ان الله لا يغير ما بقومٍ حتى يغيروا ما بأنفسهم
صدق الله العظيم

[ام الاء]

يا جماعة ابعدوا عن يوم 6 ابريل وخلينا فى حالنا مش عايزين مشاكل

[fagrmasr01]

مين منكم قرأ الشعر الى اوله
ياشعبى وحبيبى يا شاطر يا بيبى يا حاطك فى جيبى يا ابن الحلال؟
واخر كلمة فى اخر بيت اسمى انا .. جمال

[lionking]

هههههههههههههههههههههههههههههه


حلوة منك يا استاذ جمال


على فكرة انا قرات الشعر ده بتاع يا شعبى يا بيبى


بس والله حلو بجد ومعبر بصحيح


على راى ام الاء ابعد عن الشر وغنيله



وعلى راى سيد ابو حفيظة


اعدوا بالعافية