المساعد الشخصي الرقمي

مشاهدة النسخة كاملة : - "كرمتنا .... واللقمة ....." -



RSS
07-11-2010, 04:21 PM
شــعور سخــيف



إنك تحس بإن وطـنك شئ ضعيــف
.. صوتك ضعيف .. رأيك ضعيف
إنك تبيع قلبك وجســمك



وإنك تبيع قلمك وإسمك ..



و ميجيبوش حق الرغيــف
سألو جحا عن ســر ضحكه ..



قالك أصـل اتنين وشبكوو
إالى كان من تحت ميــت والى كان من فوق كـفيف
دا شـعوووور ســخيــفْ
وشــعوور سخيف ..



إنك تكون رمز الشحـاتة .. تبنى مبنى للشحـاتة
تعمل وزارة للشحــاتة
يا سـاقية دورى عدي فوقى ودوسى ..



نصبوا عليا وشحتونى فلوسي
ربطونى بيكي حتى ما أتغميـت ..



هما الى فرحوا ووحدى انا اتغميت
وأنا الى صـَـاحب البيــت
عايش بدون لازمة ..



ولما مرة شكيت إدونى بالجزمة
مش لاقى تطفـح ي ديــك ..



هتولنا ودولنا ودونا وجيبونا هنجيب منين نديـك
طافح يا بلدى غدايا ولوعتى غدايا ..



وأدى الاحبة التقـوا عدايا
انا الى زارع الدهب بتأكليني سبــاخ ..



وان كان دا تقـل ودلع بكفـاية دلعك بـاخ
لا شوفت فيكي هنا



ولا شوفت فيكي ترف ..



كل الى فيكي قرف
كرامتنا متهــانة واللقمــة بإهَــانة ..



بتخلفيـنا ليــه لما إنتى كارهـانا؟؟
يعنى ايه تبقى انتى هبة النيل ي بوبا ..
وكل يوم المية تقطع
يعنى ايه لما أشتكى غلو الفاتورة ..

يقولو تشكى بس تدفع
لما قش الرز ثروة بتتحرق ..



وأما نفط الأمة ثروة بتتســرق
ولما جلادك ع ولادك بيبطـُـشْ



ولما علمك ميلاقيش يـاكل هيطفش
يعنى ايه نرفع ايدينا للسـلام لاجل الغزاه
ويعنى ايه لما اكون ماشى ف حالى اتشد اشتباه
يعنى ايه لما اتحبس أربع سنين حبس إحتيـاطى ..

حبس إعتبـاطى
يعنى ايه مش حاسة بالعمر وغلاوته



بتصبـي مـُر العمر ليه دا انا كنت هوهب لك حلاوته
انا عـُـمري ما أتأمرت ولا حطيت شروطى ..



ومكان ما ترسى مركبك ببنى شطوطي
دا انا كنت جيشك لما مماليكك باعوكى ..



وكنت يوسف لما عشتي سنين عجــاف
وضلوعى دى الى ف معركة قادش حَـاموووكي ..



وشفايفى دى الى مبطلتش ف يوم هتاف
انا كل شبر ف ارضك اتمرمغت فيه ..



وكل يوم عشـرين قلم عذبنى بيه
بتكلفيني عيونك السـودا وايامك الى فاتت
ما إنتيش حبيبتى من إنهارده حبيبتى مـَـاتت
مع صوت أذانك جرس ف الشدة صاحيينلك ..



من إمتى كانو الحرس هما الى باقيينلك
بعتيني عشـانهم وعنيكي معصوبة ..



ياهل ترى خاينة ولا زيي مغصوبة
كل الكلام إتقــال والشـعر بقا مـَـاسخ ...



والصبر علو جبـال والظلم بقا راسخ
وطن وغرقـان ف النطاعة ..



كل شئ ريحته نطاعة ...
علمونا بالعصـاية ..



ورضعونا الخوف رضـاعة
علمونا ف المدارس يعنى ايه كلمة قيــام ..



علمونا نخاف من الناظر فيتمنع الكلام
علمووونا إزاي نخاف وإزاي نكش ..



بس نسيو يعلمونا الاحترام
فمتزعلوش لما أبقى مش بســمع كلامكم
مســتنى أيه من طفل ربوه بالزعـاق



غير المشـاكل والخناق
كل الى قـالك بحبك دا كان نفـاق ...



وانا لما قولت لك بحبك كان نفــاق
الحـٌُـب يعنى إتنين بيدوا ..



مش أيد بتبنى وستوميت تيت تيت يهدوا
الحب حالة ..



الحب مش شعر وقوالة
الحب يعنى براح ف قلب العاشقين للمعشوقين
يعنى الغلابة ينامو ف الليل دافيانين
الحب يعنى جواب لكل المسجونين ..



هما ليه بقو مسجونين ؟؟
يعنى أعيش عشـان هدف ..



عشـان رسـالة



يعنى احس بقيمتى فيكي
عشــان مش عايش عوالة ..



يعنى لما أعرق تكافئيني بعدالة
الحب حــألة ..



الحب مش شعر وقوالة
الحب حاجة متتوجدش ف وسط ناس



بتجيب غداها من صناديق الزبـالة

شعر سمعته ولا اتذكر اسم شاعره







منقـــول