- "الحلاق والشـــــــــــــــــــــــــعر الابيـــــــــــــــــــــــض" -

[RSS]

http://picmool.nasey.com/images/463_b943e67f5b60e168e2273e.jpg



فصل بايخ حصلي الاسبوع اللي فات .. بصفتي مدرس فاضل .. وان السبت اللي فات يبقى اول يوم دراسي .. فلازم شكلي يبقى محترم .. طبعا انا محترم ودي مسأله مفروغ منها ... بس لازم يعني اعدل شكلي عشان يبدو اكثر وقارا وتؤده – يعني ايه تؤده .. حد يفتح المعجم ويقولنا – لذلك .. رحت لصالون الحلاقة ..عشان اتخلص من لوك الصايع اللي كنت عايشه في فترة الاجازة المتمثل في الشعر الكبير والدقن الغزيره اللي تفكركم بخالد الذكر ابو الليف

المهم .. اخدت الخطوة وقعدت على الكرسي قدام عمكم مرسي .. مرسي ده باحلق عندو من سبع سنين .. منحه آلهيه أن يكون عندك حلاق مخصوص بيك .. وانك لما تقول لاصحابك انا رايح احلق .. يبقى انا رايح لعم مرسي .. الراجل ده اعجب حلاق شوفتو في حياتي .. يقدس الصمت .. يبجل الهدوء .. يمقت الضوضاء ..بس اول ما يشوفني يفتكر كل امراض الدنيا .. ويفتكر انو بيكح من سنه وان الروماتيزم بينشر في عضمو والقولون العصبي معيشه في مراجيح .. اينعم هو مسلي اكتر من محمد هنيدي .. بس مش باحب تكالبه المفاجئ في الاونه الاخيرة على اخبار الحباية الزرقا ومفعولها وازاي يشتريها من غير ما الصيدلي الصعيدي يبصله باحتقار وهو بيقرأ الفاتحه على الرداله – الرجاله يعني – متعرفش ليه بقى في الشهور الاخيرة مهتم جدا باخبار الحبوب ما ازرق منها وما احمر وما اصفر .. على الرغم من انو ارمل بقالو عشر سنين ..

غير ذلك هو بيعرف يقرأ ملامحي ويعرف استعدادي للنقاش والاجابة عن أي سؤال .. بس بيعرف يستدرجني لمنطقته كويس قوي .. يعملي كوبايه شاي صعيدي وسيجارة مستورده .. وانا باخد اول نفس يناولني اول سؤال

م : اخبار الصين ايه ...؟؟؟
انا : بتسلم عليك ..!!
م : اهلا وسهلا .. مش القصد يا ريس .. عملت جديد ..؟؟
انا : طبعا .. دي الصين .. بلد المليون اختراع ..!!
م : ايوة .. خد نفس يا ريس واحكيلي .

مش عارف ليه متوقع دايما اني هلاقيلو حل لكل مشاكلو من الصين .. الراجل ده عندو عقدة صيني .. بس السؤال المخنوق جوايا هبدته في وشه ..

http://picmool.nasey.com/images/284_safsdgsdg.jpg


انا : الا مش انتا ارمل يا عم مرسي ..؟؟
م : الله يرحمها المدام .. كانت وليه مفتريه ..!!
انا : من ناحيه ايه ...؟؟
م :من كل النواحي ..!!
انا : مش فاهم ..؟؟
م :مش ضروري تفهم ..!!
انا : طب .. اخبار العرفي ايه ..؟؟
يقطب جبينه مندهشا من صيغه السؤال : ازاي يعني ..؟؟
انا : يعني .. اصلك ليك سبع شهور وانتا سيرة الحبايه الحمرا والزرقا على لسانك زي اللبانه
م : تصدق انتا فهمتني غلط يا ريس
انا : ايوة .. اعمل زيهم .. مليتو البلد
م : نعم ....!!!!!
انا : متتكسفش .. بالك اكتر حاجه باضايق منها لما حد يجي ويقولي معلش .. انا ليا واحد صاحبي عندو مشاكل .. ويوصفلك المشكله وكأن صاحبو ده بيبات في حضنو كل يوم .. ويعرف ادق مشاعرو ومشاكلو الثقافيه .
يضحك مشمرا اشداقه : انا بسأل عشان ابني
انا : ابنك ..؟؟
م :اسم الله على مقامك ... عماد ده قدك في السن .. جوزتو من سنه .. بنت بنت حلال قوي .. وزي القمر فشر عبله كامل كده – متعرفش ليه معتبرين عبله كامل رمز الانوثه الطاغيه في الصعيد مع انها عمرها ما بينت كتف ولا لبست خلخال ولا صبغت شعرها بحنه دم الغزال – والواد كان طاير بيها .. بس وعينك ما تشوف النور
انا : حصل ايه ...؟؟؟
م : الواد عطل .
انا : عطل ازاي ..؟؟
م : فصل باور ..
انا : خالص ..؟؟
م : خالص .
انا : ولا ..؟؟
م : خالص .
انا : وبعدين ..؟؟
م : احترت معاه .. جربت معاه الاحمر والازرق والاصفر والاخضر
انا : جربت كل الالوان يعني
م : مخلتش لون الا وصبغت نفسيتو بيه .. الواد حاله في النازل .. البنت اكمنها فشر عبله كامل مستحمله قدرها وبختها المايل ومش بتتكلم في الموضوع ده خالص ... لفيت بيه على الاولياء الصالحين .. سيدك المرسي ابو العباس سيدنا الحسين سيدنا احمد البدوي .. سيدنا ..
انا : لفيتو على البركه كلها يعني .. وبعدين ..؟؟
م : عرضتو على دكتور كشفو ب 300 جنيه .. الدكتور طبطب على كتفه وقالو يا ابني حالتك ميؤس منها
انا : مفيش امل يعني ...؟؟
م : خالص .
انا : خالص .. طب والوصفات الشعبيه ..؟؟
م : مخلتش .. اشي كركم واشي منقوع تمر هندي وسحلب واشي جوزه الطيب المغسوله بعسل النحل الجبلي .. وبردو مفيش فايده
انا : تكونش نفسيتو تعبانه ولا حاجه ..؟؟
م : هي من ناحيه تعبانه .. فهي تعبانه .. دانا جوزتو مخصوص عشان نفسيتو تتعدل .
انا : ليه .. عماد زملكاوي ولا ايه ...؟؟؟
م : هو من ناحيه زملكاوي فهو زملكاوي اصلي .. ده حتى الاستاذ ماتركس – فاكرينو طبعا – بيعتبرو ابن بار للزمالك .. بس هو اتعود على حال الزمالك خلاص .. ومتاكد أن حالتو ممكن تتعالج بس فرص الزمالك في العلاج زي فرصته بالظبط انو يركب مركوب الفضاء ..
انا : يكونش الشغل تاعبه ...؟؟؟
م : مش بيشتغل ..!!
انا : امال بيصرف على بيتو ازاي ...؟؟؟
م : مانا باديلو كل اول شهر 300 جنيه
انا : كام ...300 جنيه ... ومالك فرحان بشبابك وانتا بتقولها .. تكونش 300 جنيه دول هي اللي عامله العطله دي ...؟؟
م : طيب يعمل ايه .. مفيش شغل .. الواد خريج علوم ومش لاقي أي فؤصه يشبط فيها
انا : امال ايه اللي تعب نفسيتو بالظبط ...؟؟؟
م : الشّعر .
انا : الشّعر .؟؟؟
م :ايوة
انا : مالو الشّعر ...؟؟
م : صحي الصبح .. لقى حبايه شعر ابيض نابت في قلب راسه
انا : نعم ..؟؟؟!!!
م :اه والله .. فجاءة كده وبدون مقدمات يا ريس والله .
انا : وده اللي بهدله ...؟؟؟
م : هو ده اللي غير كيانو واللي خلاني اجوزو
انا : هو كل من طلعلو شعر ابيض يعطل يعني .. ايه يعني .. يصبغهم يا سيدي بدل العكننه اللي عايش فيها دي
م : صبغتهالو بس بردو طلعت تاني يوم ابيض من اللي قبلو
انا : غريبه ...!!!
م : الواد مسكني وانا راجع اخر الليل .. اترمى في حضني وهو بيبكي .. قعد يقولي .. خلاص يا ابا انا ضعت .. انا رحت
انا : رحت انتا مجوزو على طول ..
م : طب اعمل ايه .. حكمتك يا رب .. ما علينا .. دوشتك يا ريس .. اتفضل .. اتفضل
قعدت على الكرسي وانا باحلم بالدش السخن والعشا السخن واعاده الماتش السخن بتاع الزمالك والجونه .. افقت من احلامي الساخنه وعم مرسي يهتف باستغراب .: ايه ده ............!!!!!!!!!!!!؟؟؟؟؟؟؟؟؟؟
انا : فيه ايه ...؟؟؟؟؟؟؟؟!!!!!!!!!
م : ده .... شعر ابيض ......؟؟؟؟؟؟؟؟؟؟؟!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!
انا : نعم يا اخويا .. شعر ايه ...!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!
م : ابيض ..!!
انا : وده ابيض ازاي ..؟!؟!؟!؟!؟!؟!؟!
نطيت من فوق الكرسي وانا باقلب راسي بين ايديا قدام المرايا .. لغايه لما شفتوه .. كام شعرايه بيضا نابتين ولا القمح ليله عيدو ... تنحت قدام المرايا ثواني .. بس شريط حياتي عدى قدام عينيا ...26 سنه مرت قدامي كلها .. اول مرة اروح فيها المدرسه .. اول مرة العب كورة في الشارع .. اول مرة قلبي يدق بالحب .. اول مرة اتخانق في حياتي .. اول مرة اكل سوشي .. كل ده عدى عليا في لمح البصر
قاطعني من شريط الذكريات بصوته المتعاطف : هتعمل ايه يا ريس دلوقتي ....؟؟؟؟
بصتلو بصه الفرخه الدايخه : هاجري على ابويا عشان اتجوز .
م : طب بسرعه يا ريس قبل ما تعطل
انا : نعم .. اعطل ايه .. انا عندي صيدليه .. الاحمر والازرق والاصفر وعين الكتكوت
ضاحكا : كان غيرك اشطر
انا : نعم ...!!!!
م : مااحنا جربنا الحاجات دي قبلك ومفيش فايدة ...
انا : طب التمر الهندي وجوزه الطيب والكركم وسيدنا المرسي وسيدنا الحسين ....!!!!
يقاطعني : ايوة شغل الشعبي ده جربتو وبردو مفيش فايده ...!!!
اصرخ في وجهه : طب اعمل ايه ....؟؟؟؟
يجاوبني والحكمه تصبغ ملامحه : شجع الزمالك ..




منقـــول