ضيف الكرسى جمال بيه

[خلود]

http://up111.arabsh.com/s/jffsjnwa9k.gif


http://up111.arabsh.com/s/eyiusbx69v.jpg





اتفضل جمال بيه استريح هنا يلا وعايزين نشوف الابداع والاسئله

ياجماعه مش عايزين رحمه على راى الاخت عبله كامل العبوا بغباء

عايزين اسئله مافيهاش مجامله خالص

وزى ما قلت قبل كده ده مش اى عضو ده رئيس البرلمان

[fagrmasr01]

بجد بجد..ربنا يخليكى
لكن
فين المشرفين دلوقتى
ينقلوا لنا المواضيع
الله يمسيكى بالخير ياأميرة

[lionking]

وبعدين فى الحيرة دى بقى

هيا المحاكمة فيييييين بالظبط

انا حصلى تشتت يا خلود


طب لو المحاكمة هنا ابقى هاتى الاستجواب بتاعى عشان انا طبعا مش هعرف اجيبه هنا ولا فيا صحة اكتبه تانى


وبعدين انت شاطرة ولهلوبة وهتعرفى تتصرفى

[خلود]

[

وبعدين انت شاطرة ولهلوبة وهتعرفى تتصرفى


ههههههههههههههههههه

ده شغل مشرفين ياجميل مش شغلتى انا

اهو جمال قالك انتى فينك يااميره

عموما معلشى اتعبى شويه علشان الموضوع يكتمل

يلا بقى متبقيش كسلانه كده

[lionking]

السلام عليك جمال باشا

معلش بقى مضطرين نعيد استجوابك

اسمحلى ابدا

1) لو قلنا ان مصر شافت ايام حلوة تفتكر كانت امتى ( السادات ... مبارك.... عبد الناصر) وطبعا هتقولنا ليه؟

2) انت بتنتمى لحزب ايه؟؟ ممكن توضيح السبب

3) حضرتك موافق على ان ( ننوس عين مامته يبقى رئيس جمهورية؟؟

4) طب انت مع ( حماس... فتح .... ولا حد منهم ) وياريت نعرف ليه؟

5) طب لو الاخوان وصلوا الحكم هيبقى ايه موقفك؟؟


شوف السؤال ده بقى وادعيلى

عايزاك تعبر بـ3 كلمات عن الشخصيات دى

#شيمون بيريز

# السادات

#احمدى نجاد

# بشار الاسد

#مبارك

# اردوغان

# بوش


وشكرا جزيلا على سعة صدرك

[fagrmasr01]

أستفتح بسم الله الرحمن الرحيم

لكن معلش سؤال بيلح اوووووى على عقلى

هو المرة دى كرسى اعتراف

واللا تحقيق من اياهم


لكن على كل حال

أتشرف ان ارد على اسئلة حضرتك وبكل صراحة
ولو انى ماليش ف السياسة والله يا بيه
لكن هارد وامرى الى الله

هارد طبعا
اصل هو يعنى ف الحقيقة
لازم ارد

شوفى يا ست الكل
هاستعير بعض ابيات
من كلماتى ولله الحمد

أولاً تقديم لشخصى الفقير الى الله
كرئيس لبرلمان شعب هذا المنتدى الرائع

انا شهادة ميلادى ماضيها مينا
وحنة راسى جزء من تراب سينا
سينا الى مهما اعيش بعيد عنها
هيفضل ترابها هو الكحل لعينينا

وفى وصف تانى لشخصى المستجير الى الله أقول

ولو حاولوا ينسونى انى
ان انا منك .. وانك منى
هعيش احبك .. سنك سنى
فرحك فرحى .. حزنك حزنى

انا أصلاً .. إبن لحتشبسوت
جوايا ضمير عمره ما هيموت
وضميرى مابيقبلش سكوت
حتى ولو مسجون ف تابوت


أعتقد كان تعريف ضرورى
لراجل عجوز عمرى
خمسة وخمسين سنة

لكن عمرى الحقيقى فى وقت الاحزان
يمتد عبر الاف السنين .. زى مصر فى وقت حزنها

ولكن .. وأقولها صادقاً .. عندما أكون سعيد
أشعر بأننى لا أزيد عن الثلاثين بأى حال من الحوال

غير منتمى الى اى حزب ف العالم
مع انى لفيت كتير من دول العالم

أطلت المقدمة ولكنها اعتقد ضرورية كتقديم لشخصى
على كرسى الاعتراف
وأتشرف بانه جلس عليه قبلى
أروع اشخاص فى شعب هذا المنتدى الرائع



1) لو قلنا ان مصر شافت ايام حلوة تفتكر كانت امتى
( السادات ... مبارك... عبد الناصر) وطبعا هتقول ليه
أولاً كل منهم له ما له وعليه مآخذ ككل قيادة تحكم شعب عظيم كشعب مصر يصيب ويخطئ
لكن كإجابة مباشرة .. عبد الناصر طبعا .. جعل لإسم مصر قيمة ولو انه كان على حساب حاجات تانية ضاعت منه تحت شعار.. لا صوت يعلو فوق صوت المعركة

2) انت بتنتمى لحزب ايه؟ممكن توضيح السبب
لا انتمى الى اى حزب - لأنه لا توجد احزاب حقيقية فى مصر





3) حضرتك موافق على ان ( ننوس عين مامته ) يبقى رئيس جمهورية؟
أرفض وبكل اقتناع .. لأن مصر ولادة .. لم ولن تعقم .. ولن نتحول الى ملكية وراثية

4) طب انت مع ( حماس... فتح..... ولا حد فيهم) وبرده عايزة اعرف ليه؟
ولا حد فيهم .. الاثنين يتنازعون على السلطة وعلى ايديهم تضيع فلسطين وتموت قضيتها وتتفرع الى ضفة وقطاع . الله يهديهم



5) طب لو الاخوان وصلوا الحكم هيكون ايه موقفك؟؟

الاخوان لا يصلحون - من وجهة نظرى للسلطة وابسط دليل انهم برغم مرور سنوات طويلة على نشأتهم لم يكونوا برنامج يصلح للحكم يتماشى مع تطورات العصر ويطرحون شعار الاسلام هو الحل بدون برنامج حقيقى مقنع
الاسلام دين الحق وهو دين عظيم يخاطب العقول والألباب . لكن الدين ليس بالمظهر فقط

عايزاك تعبر بــــ 3 كلمات عن كل شخصية من دول
# شيمون بيريز ثعلب ماكر حويط
#السادات زعيم رحل مبكراً
#احمدى نجاد شخصية بتحب بلدها
#بشار الاسد واجهة لنظام محتكر
#مبارك بقاله كتيرررر معانا
#اردوغان قائد تركى متمررررس
#بوش الحذاء والأزمات العالمية

الكلمات الحمراء هامة لتوضيح رأيى المتواضع


هسيب الناس تكمل بقى بس اكيد هرجع واسال تانى

أتشرف طبعاً ، وليست كلمة مجاملة ، كلنا نعرف مقدار حضرتك وقيمتك وشرف لى ان احاول الرد

والف أهلاً بكل من يحاول معنا أن يحيى موضوع كرسى الاعتراف

:d :d :d :d

[fagrmasr01]

( باقى أسئلة ليون كينج )
ليون كنج الطييييبة

يانهار ابيض يا استاذنا
مش تحقيق والله ولا حاجة انا بس قلت ارخم عليك بالاسئلة البايخة دى
وبعدين برده لازم تحس برهبة الكرسى اللى حضرتك عليه
بس بجد ردودك مقنعة ومهمة جداااا
السؤال بقى

1) ياترى حضرتك اتجوزت عن حب ؟؟؟
بصراحة .. جواز تقليدى اوى ..
اهلى اختاروا اخت صاحبى ووافقت
يوم قراءة الفاتحة .. شفتها
وعرفت ان هى دى الى عليها الدور
وعندى دلوقتى بنتين وثلاثة أولاد

2) ايه رايك فى حب اليومين دول ؟؟
الحب هو الحب فى كل عصر وأوان .. سلطان متوج
.. إن كان حب صادق .. وليس مجرد تسلية
3) ايه رايك فى الصداقة بين الازواج هل هى ضرورية ؟؟
الزواج ثلاثة مراحل :
لتسكنوا اليها .. مرحلة الشباب
وجعل بينكم مودة ورحمة .. المودة يجب ان تستمر منذ البداية وحتى الكبر
والرحمة عند الكبر وعند المرض وفى الازمات
هذا تفصيل رب العالمين للحياة الزوجية
4) هل انت متابع للاذاعة؟؟ ولا التلفزيون؟؟
اتابع بعض الاحيان التلفزيون المصرى .. فقط لمعرفة الاخبار المحلية التى لا نراها فى القنوات الخارجية
واتابع بعض الوقت قناة الجزيرة .. لمعرفة الرأى الآخر من أبناء عروبتنا المتطلعين الى تحقيق اكبر مكاسب ممكنة مما يحدث من تهميش حالياً فى دور مصر
واتابع البى بى سى ( العربية ) فى النت وكذلك السى ان ان لمعرفة النشرات والتحليلات
انا مدمن نشرة أخبار وقراءة جرائد وتحليلات
اما الاهرام .. فلقراءة حالات الوفاة لتقديم واجب العزاء

5) عايزة اعرف رايك فى التعليم فى بلدنا المنحوسة؟؟ ممكن يوصلنا لفين؟؟
مع الأسف هناك أيادى تبذل كل جهدها لتدمير العملية التعليمية
واصبح التعليم المجانى نكتة سخيفة جدا..
سواء الجامعى او ما قبل الجامعى
ويحاول بعض المخلصين القليلين الوقوف فى وجه هذا التيار التدميرى
ولكن
يبدو أنه قدر محتوم .. أقصى ما نطمح فى ان نفعله هو التأجيل لفترات بسيطة لعل الله عز وجل يأتى بالفرج
ولن يأتى الفرج الا ان تغيرت المنظومة كلها
ليس التعليم فقط
أغلب مسارات النجاح تقريباً فى كل المجالات
يسدها الفساد فى كل الطرقات
الصحة .. الزراعة .. الصناعة .. التجارة .. الإقتصاد

الله يعين شعبك يا مصر
ويهدى لك سكان القصر
6) ادينا وصفة حلوة عشان نخلى الولاد يلتزموا بالصلاة وميحسوش انها تقيلة على قلبهم ... احسن انا بعانى مع ابنى فى الموضوع ده؟؟
افضل طرق القيادة .. فى الادارة بالشركات الهيئات وحتى فى البيوت
هى القيادة بالقدوة .. ان يكون الابوان ملتزمين بلا تشدد .. بهدوء
مع التحفيز البسيط .. غير المبالغ فيه
عند حضور الجماعات.. عندما يقوم للفجر .. عندما يلتزم بصلاة العشاء
اعملى لهم مسابقة.. مين يحفظ أسماء الله الحسنى .. مين يحفظ جزء عم.. سورة يس.. الرحمن
اشغلوهم عن المعاصى بطاعات محببة .. صوم تطوع ونفطر كلنا ونتسحر ونصلى مع بعض ونحكى لهم حكايات خفيفة خفيفة عن الجنة والثواب الطيب الحلو الجميل فيها
والله تعالى اعلى وأعلم
7) كيف نعبر ازمة منتصف العمر ؟؟
مع الله وفى طريقه بهدوء .. مع الزوج/الزوجة والابناء ... مع الثقة بالنفس وبالشريك

اظن كده اسئلة تمام
أكثر من تمام ، أشكرك عليها جدا ليون كنج الطيييييبة
كما اشكر لك نشاطك وعزيمتك فى احياء هذا الكرسى
حضرتك وخلود طبعا ربنا يجازيكم الف خير آمين
ويارب يارب نرجع تانى كلنا ايدينا ف ايدين بعض نعيد لهذا المنتدى بهاؤه وجماله وجوه الأسرى

انا عايزة اعرف فين باقى المحققين :eek::eek:

بصرررراحة.. ايوة فين ؟؟

هل من مبارز؟؟

اين فرسان هذا المنتدى ورواده

الأعضاء بيحبوا المنتدى..

فهل تسمعنا الادارة ويسمعنا المشرفين

أتمنى

[lionking]

جزاك الله خيرا استاذ جمال

مش عارفة اشكرك ازاى على نقل الموضوع ومعلش اذا كانت اسئلتى تعبتك ولا خنقتك

******
*******
********
*********
**********
***********
************
*************
**************
***************
**************** وعشان الخدمة الرائعة فى نقل مداخلتى

اطالب انا من موقعى هذا

جمييييييييييييع اعضاء المنتدى ان يبداوا المحاكمة وبشكل عاااااااااااااجل

[fagrmasr01]

مش انا قلت لحضرتك
انى كنت فاكرك طيبة


طلعتى
طييييييييييييييييبة اوى اوى جدا خالص

[lionking]

والله انا مش قلقانة غير من كلمة طيبة دى

لأ وكل يوم بتتمد شوية ..

يالا معلش .. بس والله والله والله طيبة طيبة

[خلود]

بسم الله الرحمن الرحيم

والله المستعان
اول سؤال اكتر حاجه بتخاف منها؟

ثانى سؤال اكتر حاجه ندمان انك عملتها؟

ثالث سؤال اكتر حد حبيته مين؟
رابع سؤال اكتر حاجه زعلت عليها؟


5-ما هي احسن صفاتك وماهي اسوا صفاتك؟

6-ما القسم الذي تفضله في المنتدي؟

7-من اكتر عضو بتحب مواضيعوا في المنتدي؟

8-ماذا تعني لك الغدر والفراق؟

9-ما هي هوايتك المفضله؟ وما احب اللوان اليك؟

10-ايه اكتر موقف محرج حصلك؟

هذه مجموعه من الشخصيات ضع من يقابلها من اعضاء المنتدى بوجهه نظرك :-

الشخصيه المثقفه

الشخصيه الفوضويه

الشخصيه المبدعه

الشخصيه الاجتماعيه

الشخصيه المشاغبه

الشخصيه الهادئه

الشخصيه العبقريه

الشخصيه الدبلوماسيه

الشخصيه المرحه

الشخصيه الساخره

الشخصيه البريئه

الشخصيه الحاده

من العضو الذى يسعدك وجوده بالمنتدى؟؟؟

اشياء لا تحب ان تتكلم عنها مع اى شخص ؟؟؟
. حلم مقدرتش تنفذة

. حب قديم واية سبب الانفصال

. المطرب المفضل؟؟؟

الكاتب المفضل ؟؟

. احسن عضو ( عضوة )


. هوايتك اية

كلمة حلوة لمن تهديها

.13. موقف محرج جدا

14. موقف تتمنى يتكرر

15 . شخص نفسك تكون مكانة

كلمه حلوه لمن تهديها

يارب مكونش تقلت عليك بأسئلتى

[fagrmasr01]

خلود

بصراحة سعدت جدا

بمشاركة حضرتك بأسئلتك القوية اوى دى

وباذن الله ارد عليها مساء اليوم

لانها أسئلة دسمة اوى

وتحتاج بجد لتركيز اوى اوى اوى

اكرر شكرى لمشاركتك

ربنا يبارك فيكى ويخليكى
آمين

[خلود]

انا مستنيه اهو يلا بقى

وباقى الاعضاء فين اسئلتكم ومشاركاتكم فى الموضوع

[fagrmasr01]

أستأذن حضرتك فى تأجيل الرد الى بكرة ..
بصراحة أسئلتك محتاجة تركيز عميق
.. معلش .. أكيد الكرسى دوار ..
ومسيرى أجهز لحضرة جناب سيادة سعادتك أسئلة كده زيها
و ...

و ...

وربنا يقدرنا على رد الجمايل

[خلود]

لا خلاص كده انت متعرفش مش انا قعدت خلاص

ومش هقعد تانى

نحن السابقون وانتم ان شاء الله لاحقون

يلا رد ومش عايزين كسل لسه فيه اسئله تانيه فى انتظارك

ومش عايزين هروب

[fagrmasr01]

اول سؤال اكتر حاجه بتخاف منها؟
الفشل .. ولهذا احاول ان أرجع جميع خطط العمل واجتهد قدر إمكانى ان اجهز لكل عنصر من عناصر الخطط كل الأسباب المطلوبة للنجاح .. وقبل وبعد كل شئ الإعتماد على الله عزو جل بيقين ثابت.
ثانى سؤال اكتر حاجه ندمان انك عملتها؟
انى تركت العمل بالسعودية فى جدة بالقرب من الكعبة الشريفة لأن وقتها كان توقيت العمرة أسبوعياً بسهولة وزيارة المسجد النبوى الشريف كل شهر والحج كل عام. كان صديقى يقول اننا فى أوكازيون ربانى لن نعرف قيمته الا لما نرجع مصر. وقد عرفنا فندمنا.
ثالث سؤال اكتر حد حبيته مين؟
الحب الاولانى.. والآخرانى
رابع سؤال اكتر حاجه زعلت عليها؟
بزعل اوى لما اخسر شخصية بحبها .. وخصوصا لو كان الخطأ منى انا
5-ما هي احسن صفاتك وماهي اسوا صفاتك؟
أحب خدمة المجتمع فى قريتى .. حساس زيادة عن اللزوم .. سريع الإحساس بالحزن الداخلى وأتأثر جدا بأحزانى اعيشها عدة مرات . عندما تحدث وعندما اجترها وعندما اكتب عنها الخواطر
6-ما القسم الذي تفضله في المنتدي؟
الشعر
7-من اكتر عضو بتحب مواضيعوا في المنتدي؟
بصراحة .. الباشا وام الاء وحضرتك وليون .. واميرة
8-ماذا تعني لك الغدر والفراق؟
الغدر جرح عميق .. الفراق قتل يتم بسكين بارد
9-ما هي هوايتك المفضله؟ وما احب اللوان اليك؟
القراءة والتحليلات المتعمقة الموثقة بأدلة ووثائق أو براهين
وخصوصا فى مجال الروح القيادية وتنمية قدرات ومهارات الموارد البشرية
10-ايه اكتر موقف محرج حصلك؟
عاكست بنت كانت ضابط بوليس فى مطار روما .. خرجت من الطابور ورحت قلت لها انها حلوة اوى .. مش معاكسة يعنى معاكسة.. لكن هى كانت كده فعلا .. وطلعت من المطار تحت الحراسة بعد ساعة ونصف.

هذه مجموعه من الشخصيات ضع من يقابلها من اعضاء المنتدى بوجهه نظرك :-

الشخصيه المثقفه الأحباب

الشخصيه الفوضويه شخص دخل علق تعليق سخيف وهرب بلا رجوع ..

الشخصيه المبدعه ابراهيم البشبيشى

الشخصيه الاجتماعيه خلود

الشخصيه المشاغبه قمر . صورها كلها مشاغبات .. لكن مشاغبات زى العسل

الشخصيه الهادئه أم الاء

الشخصيه العبقريه المدير

الشخصيه الدبلوماسيه الباشا

الشخصيه المرحه خلود

الشخصيه الساخره نصل الهوى

الشخصيه البريئه الطاووس

الشخصيه الحاده ليون

من العضو الذى يسعدك وجوده بالمنتدى؟؟؟
برتاح جدا الى الثلاثى المرح طبعا لانكم عناصر الكفاح الجاد لإعادة روح البيت وجو الأسرة للمنتدى
اشياء لا تحب ان تتكلم عنها مع اى شخص ؟؟؟
مشاعرى الداخلية واحساساتى
خصوصا عندما اكتب خاطرة حب او حزن
. حلم مقدرتش تنفذة
تصليح حال التعليم والمستشفى فى قريتنا برغم المجهود الضخم والمستمر
. حب قديم واية سبب الانفصال
أول حب.. بنت الجيران ... وعلشان كانوا اغنياء جدا جدا
. المطرب المفضل؟؟؟
أم كلثوم .. وخصوصا أغانى الهجر ..
الأطلال .. جددت حبك .. فات الميعاد .. هجرتك
الكاتب المفضل ؟؟
فى القصص نجيب محفوظ فى السياسة هيكل فى الشعر فاروق جويدة
. احسن عضو ( عضوة )
ليون / خلود ( نظراً لسمو الهدف الحالى الذى تسعيان اليه بصبر جميل )
. هوايتك اية
قراءة وكتابة الشعر / الشطرنج مع انى ضعيف فيه
كلمة حلوة لمن تهديها
بحبك يا أمى ( عمرها 90 ) اعشق الجلوس بالفاكهة تحدت قدميها
.13. موقف محرج جدا
بنت فى لندن كانت بتسالنى عن الهايد بارك وربع ساعة اشرح لها وتشرح لى انجليزى الى ان سالتها منين .. وردت .. من المغرب .. واكملنا الاحراج نضحك على أنفسنا.
14. موقف تتمنى يتكرر
الحج
15 . شخص نفسك تكون مكانة
أتمنى ان أكون فقط فى مكان جمال.. لانى والحمد لله راض جدا عما أنا فيه بفضل من الله
كلمه حلوه لمن تهديها
ولو انه مكرر .. لكن اهديها
اليكى انتى وليون .. ربنا يبارك فى مجهودكم
الاحباب ونصل الهوى .. جزاكم الله خير عنا .. ومحتاجين وجودكم
الباشا وام ألاء : يعجبنى وقار موضوعاتكم وردودكم وهدوء عقلكم
الطاوس: وحشتينا .. ربنا يشفى لنا والد حضرتك ويطمنكم عليه
الفارس : نحترمك ونقدر مشاركاتك وان اختلفنا احيانا لكن نحترم طريقتك فى الاختلاف
قمر : صورك روعك وكلها زى العسل
ابراهيم البشبيشى : أخ أحبه جدا واعتز به جدا وواحشنى جدا

تعمدت الا أذكر أميرة حبى انا لحساسية الموقف الحالى فعذرا
هى تعلم قيمتها عندى وعندنا كلنا طبعا
وأتمنى كل الى يعرفها يبلغها شكرى وتقديرى وشوق وحب وشكر وتقدير كل أعضاء المنتدى




ياااااااااااااااااااااااااااااه
مش مصدق انهم خلصوا

اللهم لك الحمد

ويارب تعجبكم
ومن غير حساسية

[lionking]

انا حادة انا

:eek::confused::(:mad::mad:

مـــــــــــاشى مفيش مانع

:(:(

حادة حادة ... المهم محدش يتعور

[fagrmasr01]

ياسعادة ليون الطيبة بجد
اعتبرى انى كنت شايفها جادة بالجيم مش بالحاء
يعنى برضه عديها لأخوكى.. العجوز
وينفع نقول .. نقول .. العتب ع النظر يا سعادة البيه
وأهى كمان تمشى مع موضوع الافيهات ( فؤاد المهندس )

انما يعنى حضرتك لقطتى دى وخلاص

طل ما انا قايل الحقيقة برضه فى حاجات تانية
الثلاثى المرح
ونشاط حضرتك ونشاط خلود
وترشيحى لكما كاحسن عضو

واللا بس حضرتك شفتى بس جادة دى.. وكمان لقطتى انها حادة مش جادة
العفو والسماح .. لكن
كل يوم تزداد قناعتى ان حضرتك
طييييييييييييييييييبة اوى اوى اوووووووى

[خلود]

ماشى ماشى انا طنشت كتير وعديت اسئله كان لى رد عليك فيها زى مثلا

اكتر عضو بتحب مواضيعو فى المنتدى مقلتش 10

هنعديها المره دى علشان خاطرك

احسن عضو وعضوه حضرتك مختار اتنين وسيدات

ماشى

ممكن كام سؤال كده لى الماشى

اصعب مافي الحياه.......
أحلى مافي الحياه........
الذ مافي الحياه.........
أسوء مافي الحياة........
قلبك ام عقلك ............
متى تقول لا وبدون تفكير ,, ومتى تقول نعم وبدون تفكير ,,
منصب تتمنى أن تصل إليه وماهو ؟
آيه قرآنية تجعلها دائماً نصب عينيك ؟
ما هو لقبك المتداول بين معارفك ؟؟
إيه الحاجة اللى لازم تكون متوفرة فى شريك حياتك .. ومش ممكن تتنازل عنها أبداً أبداً .. ؟
ما رأيك بهذه الكلمات ..
الخيانة ..
المرأه..
الصداقة ..
النميمة ..
النفاق ..

بالنسبه لى انا كفايه كده علشان لو حد عايز يسال قبل المده ما تنتهى

وشكرا جمال على تعانك معنا

[fagrmasr01]

ماشى ماشى انا طنشت كتير وعديت اسئله كان لى رد عليك فيها
متشكرين يا سعادة البيه .. وهو دا العشم برضه

ممكن كام سؤال كده لى الماشى
حضرتك تأمرى
اصعب مافي الحياه.......
عدم وجود أهداف للإنسان
أحلى مافي الحياه........
الكفاح من اجل تحقيق الأهداف والإحتفال بتحقيقها
الذ مافي الحياه......... الحب الحقيقى الصادق
أسوء مافي الحياة........ ضياع الحب الحقيقى الصادق
قلبك ام عقلك ............ قلبى لأنه مصدر إلهام عقلى
متى تقول لا وبدون تفكير ,, ومتى تقول نعم وبدون تفكير ,,
أقول لا بدون تفكير .. لكل الكبائر
أقول نعم بدون تفكير .. للحب والحنان
منصب تتمنى أن تصل إليه وماهو ؟
أن أكون صاحب قرار حقيى تنفيذى فى إصلاح حال التعليم لأن التعليم هو باب الأمل ان اصلحناه ينصلح حال الأمة
آيه قرآنية تجعلها دائماً نصب عينيك ؟
بسم الله الرحمن الرحيم
(( الذين قال لهم الناس إن الناس قد جمعوا لكم فاخشوهم فزادهم إيماناً وقالوا حسبنا الله ونعم الوكيل * فانقلبوا بنعمة من الله وفضل لم يمسسهم سوء واتبعوا رضوان الله والله ذو فضل عظيم )) صدق الله العظيم " ال عمران "
هذه الآية تعطينى قوة فى أصعب المواقف التى تواجهنى مهما كان الموقف حاد او جاد او صعب .. وأمام كل من يمكن ان يكون لهم قوة او سلطان فلا أخاف من المواجهة بفضل إيمانى بقوة وعظمة وقدرة الله عز وجل.
ما هو لقبك المتداول بين معارفك ؟؟
فى العمل .. الاستاذ جمال
وفى الخارج بالحروف الاولى ggk
إيه الحاجة اللى لازم تكون متوفرة فى شريك حياتك .. ومش ممكن تتنازل عنها أبداً أبداً .. ؟
الوفاء
ما رأيك بهذه الكلمات ..
الخيانة .. قتل بسكين بارد جدا
المرأه.. فرحة
الصداقة .. هى الأمان
النميمة .. مرض خبيث قاتل
النفاق .. شخص ضعيف معدوم الإيمان ..
لذا فإن المنافقين فى الدرك الأسفل من النار والعياذ بالله

بالنسبه لى انا كفايه كده علشان لو حد عايز يسال قبل المده ما تنتهى
وشكرا جمال على تعانك معنا
انا الى اتشرفت بتواجد حضرتك وتواصلك
والشكر لله عز وجل اولاً ثم لحضرتك وللأخت ليون
واتمنى الباقى يشاركنا
والله المستعان وبالله التوفيق

[lionking]

انا جيت تانى ههههههههههه

قولى بقى

)) ايه الفرق بين الحب والتعود؟

)) تتغاضى عن ايه فى من تحب؟

)) ادامك واحد مدمن ومطلوب منك مساعدة فى علاجه مع العلم انه مش قابل يسمع قرآن والكلام ده .. هتعمل ايه؟؟

)) لو تقدم لابنتك المصون شاب غلبان لا يملك الا وظيفته ولا شقة ولا غيره ( بس هيعيش هنا فى مصر ) وفى نفس الوقت تقدم لها الشاب الذى لا يملك الا وظيفته بس هيعيشها برة ( اى بلد اوروبى ) توافق على مين ؟؟
مع مراعاة انها لا تميل لاى منهم

)) لو صديق لك اهانك بتصرف وانقطعت العلاقة لفترة طويلة ورجع وحاول يكلمك ,,,, هتعمل ايه ؟؟؟

)) لو انت ماشى فى الشارع وفجاة واحد ادامك خبطته عربية وجريت هتعمل ايه؟؟
(هتوديه المستشفى على مسئوليتك,, ولا هتبلغ الاسعاف والاسم فاعل خير,,, ولا هتمشى وليه رب كريم)

************
**********
********
******
***
*
**
***
****
******
********

كفاية كده خلى غيرى يسأل

[fagrmasr01]

أولا ..
رجوعك بينور صفحتى
و بينور المنتدى كله
مش عارف اشكرك ازاى انتى وخلود
على الى بتعملوه عشان المنتدى يعيش

أما أسئلة حضرتك.. فهى تزيدنى

)) ايه الفرق بين الحب والتعود؟
الحب قيمة حلوة .. صفاء للنفس والروح .. والتعود إدمان

)) تتغاضى عن ايه فى من تحب؟
عندما أحب.. فان حبيبتى فى عينى وعقلى مالهاش اى عيوب

)) ادامك واحد مدمن ومطلوب منك مساعدة فى علاجه مع العلم انه مش قابل يسمع قرآن والكلام ده .. هتعمل ايه؟؟
العلاج النفسى لا يشترط أن يكون بالقرآن الكريم ..
من الممكن ان أذهب معه الى ( أو أحضر له ) طبيب نفسى ..
لكن بشرط أن أكون أنا من داخلى مقتنع انى بساعده لانى بحب اعمل كده مش عشان اقول انتصرت
وهذه القناعة هنا شرط مهم لانى سأواجه معه ومنه مشكلات كثيرة أثناء رحلة العلاج فيجب ان اكون من داخلى اشعر بحلاوة وجمال ما أفعله وما أقوم به معه
)) لو تقدم لابنتك المصون شاب غلبان لا يملك الا وظيفته ولا شقة ولا غيره ( بس هيعيش هنا فى مصر ) وفى نفس الوقت تقدم لها الشاب الذى لا يملك الا وظيفته بس هيعيشها برة ( اى بلد اوروبى ) توافق على مين ؟؟
مع مراعاة انها لا تميل لاى منهم
لن ازوجها طبعا طالما لا تميل لأى منهم .. سأزوجها لمن تميل له حتى لو هتعيش معاه فى بلاد الواق واق
)) لو صديق لك اهانك بتصرف وانقطعت العلاقة لفترة طويلة ورجع وحاول يكلمك ,,,, هتعمل ايه ؟؟؟
هاقوم واخده فى حضنى وابوسه
)) لو انت ماشى فى الشارع وفجاة واحد ادامك خبطته عربية وجريت هتعمل ايه؟؟
(هتوديه المستشفى على مسئوليتك,, ولا هتبلغ الاسعاف والاسم فاعل خير,,, ولا هتمشى وليه رب كريم)
اول شئ هتصل بالبوليس بالموبيل ثوانى لإثبات الحالة
ومهما كانت مشاغلى سوف اذهب به فوراً لأقرب مستشفى لإنقاذه

وعلى فكرة حصلت معايا مرتين ولم أواجه مشاكل حقيقية بل وجدت الشكر من المصاب وأهله

[lionking]

)) لو انت ماشى فى الشارع وفجاة واحد ادامك خبطته عربية وجريت هتعمل ايه؟؟
(هتوديه المستشفى على مسئوليتك,, ولا هتبلغ الاسعاف والاسم فاعل خير,,, ولا هتمشى وليه رب كريم)
اول شئ هتصل بالبوليس بالموبيل ثوانى لإثبات الحالة
ومهما كانت مشاغلى سوف اذهب به فوراً لأقرب مستشفى لإنقاذه

وعلى فكرة حصلت معايا مرتين ولم أواجه مشاكل حقيقية بل وجدت الشكر من المصاب وأهله

ده حضرتك حظك حلو والله محصلش مشكلة خالص

:eek::p:p:p:p

[fagrmasr01]

مع اثبات الحالة بالموبيل ومع طريقة تبليغ الحادث بيكون واضح انى بحاول اعمل خير
وعلى كل الأحوال
صدقينى حضرتك ان ربنا بيساعد الشخص الى هو فعلا بيساعد خلق الله

ومنتهى انهيار القيم ان أرى شخص يمكننى انقاذه ولا أفعل

انا عارف ان ممكن تحصل لى كارثة
ولكن بمقياس العقل .. قل لن يصيبنا الا ما كتب الله لنا

وأتمنى ان كل الى يقدر ينقذ مصاب ميخافش لان النصيب لازم يصيب
وعلى الأقل تنال أجر المحاولة
وتكسب احترامك لنفسك كإنسان
وتكسب رضا ربنا

وعلى فكرة مكسب رضا ربنا مش شئ سهل

ولو عملت كده عن قناعة هايرضى ربنا عنك
اولا : حاولت تنقذ مخلوق .. له اسرة وأحباب يتمنوا انه يعيش
ثانيا : متوكل فعلا على الله ومش خايف من المجهول

[DMR]

اهلا بك يا استاذ فجرمصر على كرسي الاعتراف
عندي اسئلة بسيطة جدااا
1 ـ ماذا تفعل اذا اكتشفت ان احد من اعز اصدقائك كذب عليك في كل كلمة؟
2 ـ اجمل مرحلة في حياتك؟
3 ـ اكتر شئ بتكره في انه يكون موجود في الناس ....... و ايه اكتر شئ بتحبه ؟
4 ـ ليه اخترت منتدى مدينة 6 اكتوبر لتشترك به ؟
5 ـ ايه اكتر لون بتحبه ؟
6 ـ ايه اكتر موقف وحش متقدرش تنساه و اكتر موقف حلو ؟
ارجو ان الاسئلة متكنش رخمة شويه
و شكرا

[fagrmasr01]

دى دى
شكرا جزيلاً على مساهمتك
وكانت واحشانا اوى مشاركاتك الحلوة
بصراحة .. سعدت على تشريفك لموضوعنا ده
بارك الله فيكى


1 ـ ماذا تفعل اذا اكتشفت ان احد من اعز اصدقائك كذب عليك في كل كلمة؟
صعب ان أختار صديق يحب الكذب.. فأنا أكره الكذب
ولكن ان حدث.. وفى كل كلمة .. فلن أغفر له ..
الا ان طلب السماح وتعهد بعدم الكذب.. أسامحه وأبدأ معه صفحة بيضاء
2 ـ اجمل مرحلة في حياتك؟
كل مراحل حياتى أحبها ..
* طفولة فى الكشافة ونادى الصحافة بالمدرسة والنشرة اقولها فى النادى الانجليزى فى طابور الصباح
* وفى مطلع شبابى فى عمر العشرين شاركت فى حرب أكتوبر
* ومن الثلاثين أحج وأعتمر من فضل الله وأجوب بلاد بها تقدم وحضارة فى أوربا
* ومن الاربعين أتخصص فى تنمية وإدارة الموارد البشرية كتخصص جديد بالعالم
وفى نفس الوقت أتطوع لخدمة المدارس فى قريتى الصغيرة وأعيش الجمال الرائع فى التعاون المجتمعى
* ومن الثامنة والأربعين أتعامل مع هدية فى جسدى منحها لى ربى .. جعلتنى أفهم معنى الحياة .. مرض السرطان الذى جعلنى أكثر نضجاً وتحملاً للألم
3 ـ اكتر شئ بتكره في انه يكون موجود في الناس ....... و ايه اكتر شئ بتحبه ؟
* أكثر شئ أكرهه هو الكذب
* أكثر شئ أحبه هو الحب نفسه ولكن الحب الصادق الوفى
4 ـ ليه اخترت منتدى مدينة 6 اكتوبر لتشترك به ؟
* كنت أبحث عن نتائج نصف العام ، وفوجئت بالمستوى الأخلاقى الرائع للأعضاء والمشرفين .. والاستجابة السريعة بحب واخلاص من الادارة
والجميع على أخلاق عالية .. فوجدت انه مكان شعرت فيه اننى فى بيت نظيف طيب الخلق .. فأحببته لدرجة العشق
5 ـ ايه اكتر لون بتحبه ؟
الأزرق السماوى
6 ـ ايه اكتر موقف وحش متقدرش تنساه و اكتر موقف حلو ؟
* شخص قررت فصله من العمل لسوء أخلاقه
ثم قابلنى ومعه كتيبة من الشباب فى الصحراء ( مشهورة جدا نزهة الصحراء فى دول الخليج ) .. وأضطررت لإستخدام جميع مهارات التفاوض حوالى ساعتين حتى رجعنا بالسلامة (( بدون ضرب ))
خصوصا ان كان معايا زوجتى وثلاثة أبناء.. وفى الصحراء
* أكثر موقف حلو : أول مرة أحضر إجتماع مجلس آباء مدرسة ، اخترت ان اكون ممثل الأيتام فطلبوا منى ترشيح نفسى لرئاسة مجلس الأباء ، فاشترطت على أن من يعطينى صوته يتبرع لطفل يتيم بطقم ملابس.. وجمعت 150 طقم ملابس .. وكان انتخابى للمرة الأولى بالإجماع


ارجو ان الاسئلة متكنش رخمة شويه
أنا اللى اشكرك لمساهمتك الجميلة
وربنا يجازيكى خير الجزاء

[fagrmasr01]

النهاردة الجمعة
آخر يوم
حد عاوز يسأل وناسى

؟

[DMR]

شكرا على اجاباتك الرائعة دي
و فعلا اجابات مميزة و مقنعة جداااااا
شكرا لك

[fagrmasr01]

انا اللى لازم اشكر حضرتك يا دى دى
على مشاركتك الجميلة
وأسئلتك الحلوة

ربنا يبارك لنا فيكى

[fagrmasr01]

فى ختام الخمسة أيام أشكركم جميعا على مشاركاتكم الحلوة فعلا
وبصراحة .. كنت سعيد جدا بتواصلكم معى وأسئلتكم وردودكم القيمة

كنت اتمنى طبعا مشاركة باقى الادارة والمشرفين وكل الاخوة والأخوات أعضاء هذا المنتدى الجميل بحق
ولكن
انتم فعلا فيكم البركة
وأبتهل الى المولى العزيز القدير ان يثيبكم خير الثواب وأن يجازيكم خير الجزاء
ويسعدنى ان ارشح للكرسى


*

*

*

*

*

*

*

*

*

*

*

*

الأخت دى دى dmr

وأطلب من اختنا خلود تجهيز الكرسى الجميل اللائق بأختنا دى دى لنسعد بصحبتها باذن الله خلال الخمسة أيام القادمة

تحياتى اليكم جميعا من كل قلبى الذى يحبكم ويتشرف بالتواصل معكم
جمال ( فجر مصر)