سؤال لكل شخص في المنتدى يجاوب سؤال لكل شخص في المنتدى مطلوب الايجاوب عليه

[الباشا تلميذ]

سؤال لكل شخص في المنتدى يجاوب عليه


وهو

كان فى واحد قاعد مع اصحابه وسالهم ايه هو اصعب شي بالحياة؟؟؟؟؟؟


- الاول قال الموت اصعب شيء

- الثانى قال الحب من طرف واحد

- والثالت قال انك تنجرح من حبيبك

- والرابع قال انك تعيش واحدانى

- والخامس قال ان الدنيا تبعدك عن الناس الي بتحبهم


ايه رايكم ما هو اصعب اصعب شي في الدنيا؟؟؟؟؟؟؟؟؟؟؟؟



اكتب اي شي تحس انه صعب حتى لو تجربه مريت بيها
ولكــــــم تحــــــــــــياتي ،،،،،

[خلود]

- الاول قال الموت اصعب شيء
ده اكيد الموت فراق وكاس وداير ولابد منه بس برضو صعب

- الثانى قال الحب من طرف واحد
احساس فظيع قمه العذاب فيه

- والثالت قال انك تنجرح من حبيبك
صعب لانك مش تتوقع الجرح منه هو بالذات

- والرابع قال انك تعيش واحدانى

احساس صعب جدا لان الدنيا من غير ناس ما تنداس وينفعش حد يعيش لوحده ابدا

- والخامس قال ان الدنيا تبعدك عن الناس الي بتحبهم

صعب لكن بيبقى ضرورى

معلشى بقى انا اخترتهم كلهم لانهم بالنسبه لى كلهم مهمين

انت بقى اختار


اصعب شئ فى الدنيا الاحساس بعدما الرضا لازم نرضى بالمكتوب لنا علشان نعرف نعيش

تسلم ايدك ياباشا على مواضيعك الجميله

[fagrmasr01]

رأيى ان الرابع هو أصعب شئ وهو ان تحيا وحدانى
وعلشان كده يتم الحكم بسجن المخطئين من أجل عزلهم وحيدين بعيدين عن المجتمع
ويتم تغليظ العقوبة على من هم فى السجن
بالسجن الانفرادى
الوحدة صعبة وخاصة على من لم يتعود عليها

الموضوع فعلا يستحق التقدير
الله ينور يا سعادة الباشا

[الطاوس الحزين]

كلهم اصعب من بعض

ما شاء الله مواضيعك حلوة

بارك الله فيك

[الباشا تلميذ]

اكتب اي شي تحس انه صعب حتى لو تجربه مريت بيها
ولكــــــم تحــــــــــــياتي ،،،،،




شكرا على مروركم وردودكم الجميله
بس لسه مافيش حد خد باله من أخر سطرين فى الموضوع
منتظر ردودكم مره ثانيه
وشكرا لكم ،،،

[lionking]

السلام عليكم

يا باشا الموضوع حلو اووى

بص بقى :: انا شايفة ان كلهم اصعب من بعض بس انا هتكلم عن الحاجة اللى مريت بيها وتعبتنى جدااااااااا جدااااا

الموت::
انا دايما كنت بسمع والد فلانة اتوفى \\ الله يرحمه ..

والده فلان \\\\ الله يرحمها

لكن مكنتش بحس بالوجع والالم اوى:( الا لما راحت بنت خالتى:mad::mad: واتوفت بعد صراع مع المرض الخبيث ..:(:(:(:(
ساعتها بس عرفت يعنى ايه انى افقد انسان بحبه وخصوصا انها كانت توامى ..عشنا كل مراحل حياتنا مع بعض وكبرنا ولعبنا مع بعض ..
ومن وقتها وانا بخاف جدا من اللحظة دى ومش عايزاها تتكرر تانى
مع العلم اننا كنا دايما بندعى ونقول ربنا يريحها ويرحمها من العذاب اللى هيا في. لكن كانت برده صدمة جامدة جدااا لحظة وفاتها..مش اعتراض على حكمة الموت لا سمح الله .. لكن الفراق صعب جدااااااا وعلى اد ما كنا بنتمنى الراحة ليها لكن برده احساسى انى بسمع صوتها حتى وهيا بتتالم وفجاة مش هسمع الصوت ده ..
ده تعبنى اوى وبقيت عمالة ادعى واقول ربنا يخليلى والدى ووالدتى وميحرمنيش منهم ابداااا


انا كده هنكد عليكم ............

بس اعمل ايه انت اللى طلبت معلش بقى:eek::eek::eek:

[خلود]

كماله النكد بقى ليون انا كمان هحكى تجربه مريت بيها

هى تجربه موت بجد برضو بس انا وعيلتى المكونه من زوجى واولادى وطبعا انا مرينا بيها

كنا راجعين فى شم النسيم الماضى من عند اختى كنا فى زياره لها وراكبين ميكروباص واتقلب بينا 4 مرات مره على جنبه ومره على جنبه التانى

وطلع على الرصيف وعدى الرصيف التانى وموقفش الا لما خبط فى عربيه نص نقل

وطبعا الاسعاف جه والبوليس والدنيا اتلمت علينا

الحادثه دى قالوا عليها فى اف ام الاذاعيه يومها

الحمد لله على كل شئ بس ده الموت بعينه

انا لما فوقت مكنش فى لسانى غير الحمد لله وولادى ولادى وبس

اعتقد دى ممكن تكون تجربه صعبه جداوالحمد لله على كل شئ

سامحونى نكدت عليكم انا كمان بس الباشا طلب ولازم ننفذ

[lionking]

لالالالالالالالالا ده انتى نكدك اكتر من نكدى يا قمر

المهم انك والاسرة الكريمة بخير والف حمد الله ع السلامة ويارب ما تنعاد تانى ابداااا

معلش بقى يا باشا استحمل النكد اللى هتقراه....
ولسة لما الناس تسخن وتكتب ..
ده احنا هنشوف العجب هنا...

[الامير عماد]

الحمد لله انا مجرب كل دوووووووووووووووووول بس اصعب حاجة هي الموووووووت صعبة اوووي اووووووي

[الباشا تلميذ]

فى مثل بيقول " اللى بيشوف بلوة غيره بتهون عليه بلوته "
ومثل أخر بيقول "اللى بيعيش ياما يشوف واللى يعيش أكتر بيشوف أكتر"
والدنيا ياما فيها من ابتلاء بس المهم اللى يصبر ويشكر الله عز وجل
وما أكثر هذه المواقف والابتلائات فى المستشفيات
شكرا على تفاعكم مع الموضوع

[fagrmasr01]

تجربتى الشخصية
من سبعة سنوات تألمت الم لم تسكنه المسكنات
ثم بدأت فى مرحلة النزف
كنت أنزف دماء تزيد عن نصف لتر تقريبا يوميا
وأضطررت أن افحص
وفاجئونى انه ورم يجب سرعة استئصاله
أخذتنى المفاجأة للحظات ولكن
سمعت صوتاً بداخلى يقول بصوت مسموع لى جدا

إن الله على كل شئ قدير
إن كل شئ خلقناه بقدر

أكملت الفحوص وحيداً .. حتى لا أتسبب لغيرى فى ألم انتظار النتائج
ودخلت غرفة العمليات وحيداً
بعد أن أوصيت الطبيبين والممرضة ومكتب الاستقبال
بالاتصال بأبنائى ان وصل أمر الله فى قضائى

تعمدت ألا أبلغ أحد لعلمى بخطورة الموقف
عندما أكدت التحاليل والاشعات انه ورم خبيث
عافاكم الله جميعا من كل سوء
كان اصعب ما أحسسته وقتها ..
عندما تخيلت شعور أمى العجوزة وأبنائى الصغار حين يعلمون الخبر

وعشت أعانى وحدى وحامداً لله ستة شهور كاملة

ولم يعرف أهلى وأصدقائى بحقيقة المرض
الا عندما استغاث أبنائى بأقاربى ومعارفى
فى ليلة لم أستطع فيها أن أخفى الألم

ووقتها أبلغهم الدكتور بالحقيقة وبان حالتى متأخرة

لكنى مؤمن بأن الله عز وجل هو الشافى
وعلى يقين انه فوق كل ذى علم عليم

كانت المهلة المفترضة بضعة أشهر
واليوم مرت سبعة سنوات
أحيانا تعاودنى الالام لساعات او أيام . وتختفى أسابيع
ولله الحمد من قبل ومن بعد
وأتعامل مع الموضوع انه منحة ربانية
منحة وليس محنة
ولم يزل فى العمر بقية يعلمها الله

معلش يا باشا
معلش يا احبابى
وعلى فكرة... كلام الدكاترة شئ .. وقدرة ربنا عز وجل شئ مختلف
بيده الخير وإليه المصير
إنه سبحانه وتعالى .. على كل شئ قدير

[lionking]

ربنا يديك طولة العمر يا استاذنا ويخليك لاولادك ولينا اهل المنتدى

[fagrmasr01]

ربنا يخليكى يا ست الكل ويمتعك بالصحة والسعادة ويشملك دائماً بعفوه وبرحمته

شكراً ياطيبة

[خلود]

الف سلامه عليك يااستاذ الكل والمؤمن منصاب

وبجد قدره ربنا فعلا فوق كل شئ ربنا يخليك لاولادك واسرتك يارب ولاخواتك هنا فى المنتدى

[fagrmasr01]

ربنا يخليكى ويبارك فيكى يا خلود
والله انا باعتبره منحة مش محنة ومرتاح
الف شكر على مشاعرك الطيبة
ربنا يخليكى

[الباشا تلميذ]

منحك الله الصبر وشافاك وعافاك انت وجميع المسلمين اجمعين
آميـــــن يــــــارب العالميـــــــن

[fagrmasr01]

اخى الباشا
جزاك الله خير الجزاء
وبارك الله فيك
,اكثر لنا من أمثالك

[اميرة حبى انا]

الموت ياباشا
الموت اصعب حاجة فى الدنيا
اصل الحب ممكن تحب تانى
الوحدة ممكن تلاقى حد فى يوم من الايام وكده يعنى
يبقى الموت اللى مالوش حل
ومن غير مواقف انا بزعل على اى حد بيموت حتى لو معرفوش
ربنا يحسن ختامنا جميعا

[الباشا تلميذ]

الموت ياباشا
الموت اصعب حاجة فى الدنيا
اصل الحب ممكن تحب تانى
الوحدة ممكن تلاقى حد فى يوم من الايام وكده يعنى
يبقى الموت اللى مالوش حل
ومن غير مواقف انا بزعل على اى حد بيموت حتى لو معرفوش
ربنا يحسن ختامنا جميعا




اللهـــــــــــــــــــم أميـــــــــــــــــــــــــــن

[الرومنسى]

أولا
مجهود رائع منك يا باشا
وفكرة جميلة جدا
لكن
أنا اصعب شئ عندى لما أحس أن فيه مجموعة بتجهل الشعب وان الناس ساكتة وخايفة من الواقع ليحصل صدام ودى مشكلة أكبر
عيشين فى بلد بتحكمها الغوغاء دلوقتى
ودا أصعب شئ يمر على الجميع
تحياتى مرة أخرى