"""تحت بيتنا بياع حشيش,,,اقوله بانجو يقولى مفيش"""

[خلود]

::::::: تحت بيتنا (http://www.tarae3o.com/vb/showthread.php?t=59601)بياع (http://www.tarae3o.com/vb/showthread.php?t=59601)حشيش (http://www.tarae3o.com/vb/showthread.php?t=59601)........
أقوله بانجو (http://www.tarae3o.com/vb/showthread.php?t=59601)يقولى (http://www.tarae3o.com/vb/showthread.php?t=59601)مافيش :::::::






جملة سمعتها بالصدفة
فى أغنية من الأغانى الشعبية الهابطة






اللى بقت منتشرة بشكل
مش طبيعى وكل شغلها
تتكلم عن المخدرات






شوية يطلعولنا فى الفاكهة
وشوية يقلبوا على المخدرات







لما نشوف هينقبلوا على ايه تانى






عنوان الموضوع وان كان
هزلى أو كوميدى شوية
ولكن الموضوع المرة دى
مش هيكون كده
المرة دى هناخد
الموضوع جد شوية
لأنه بجد موضوع خطير






وأصبح بيمثل ظاهرة
غريبة على شبابنا ومجتمعنا
وهى انتشار المخدرات بشكل غير عادى
وخصوصا الحشيش والبانجو
لرخص اسعارهم وسهولة تعاطيهم






لدرجة انهم بقوا أكتر وأسهل فى الشراء
من سلع التموين اللى بتدعمها الدولة
مافيش ناصية شارع فى مصر
الا وتلاقى حد واقف بيبيع الهاش او الوجيج او
الملوخيه دى اسامهم المنتشرة






لدرجة انها بقت مرخصة من الحكومة
ولا حول ولا قوة الا بالله
تلاقى واحد فتح كشك سجاير
أو محل بقالة أو أى نشاط تجارى
وتلاقيه واخد من نشاطه قناع
بيغطى بيه على تجارته فى المخدرات







تلاقى الشاب من دول مقابل صاحبه
يقوله رايح فين يا مان
يرد عليه ويقوله رايح الدولاب
صاحبه يقوله طيب خد
هاتلى معاك قرش حشيش
بكل بساطة وكأنه بيقوله
هاتلى معاك ترمس






ولو سألت الشاب من دول
انت بتعمل كده ليه
تلاقى ردود غريبة وعجيبة
يقولك انا لما بعمل دماغ
بنسى الدنيا اللى حواليا
وادخل فى المود كده
وابقى شاب جرئ وكول
واللى يقولك عايز انسى
ولو سالته تنسى ايه
هيقولك مش عارف
وخد عندك كتير من ده






لدرجة ان حتى البنات دلوقتى
بيتعاطوا البلاوى دى
ربنا يسترها علينا يارب







نداء لكل شاب وكل فتاة
بيتعاطى المخدرات دى
علشان انا بحبكم وخايفه
عليكم بقولكم الكلام ده
قولى ايه اللى بتستفيده
لما تشرب الحاجة دى






بتعمل دماغ هههههههههههههه
على أساس يعنى ان ربنا والعياذ بالله
خلقك من غير دماغ وانت
بشربك للحاجات دى هتعمل الدماغ






يا راجل اتقى الله فى نفسك وأهلك
بتخسر فلوسك وبتخسر صحتك
وقبل كل ده بتخسر احترامك لنفسك






بالله عليك اقف مع نفسك وقفة
شوف نفسك قبل الادمان كنت ازاى
وبعد الادمان بقيت ازاى






وما تقوليش الحشيش مافيهوش ادمان
لا فيه ادمان يعنى انت مدمن
أه انت مدمن ماتستغربش
بس مش معنى كده انه مستحيل تبطله
لحسن الحظ ان الحشيش والبانجو
ادمانهم مش ادمان كيميائى
زى الهيروين والكوكايين مثلا
يعنى بشوية صبر مع شوية عزيمة
تقدر تبطل وترجع زى الأول وأحسن






يا أخى بص لشكلك فى المراية
بص لعنيك وهى كل يوم بتضيق
وكل يوم نظرك بيضعف
حس بصدررك اللى
مليان سواد من جواه
فكر فى مشاكل ضيق
التنفس والجيوب الأنفية






فكر فى الحبوب والبرشام
اللى بيضيفوه للمخدرات دى
علشان تحققلهم مكسب أكتر
ومش مهم اللى هيشرب
الحاجات دى هيحصله ايه






فكر كام صلاة فاتتك بسبب الهباب ده
هات ورقة وقلم واحسبها وشوف
انت صرفت كام علشان
تجيب الحاجة دى
هتلاقى انك ضيعت فلوس كتير
لو حافظت عليها كان ممكن
تساعدك فى حاجة تانية تفيدك






فكر ان كل ده على والدك
الغلبان المطحون
اللى بيطفح الكوتة
علشان انت تاكل كويس
وتعيش كويس وتتعلم احسن تعليم
وانت تيجى على الجاهز
وتضيع تعبه فى كلام فاضى






فكر فى الوقت اللى بتضيعه
فى الحاجات دى
لو استغليته فى قراءة القرآن
أو عمل حاجة مفيدة






فكر لو لسه مخك عايش وبيفكر
خد عهد على نفسك انك
مش هترجع للحاجة دى تانى
المهم يكون عندك الإرادة والعزيمة
انك بجد مش هترجع للحاجات دى تانى






جرب تصلى أو تقرا قرآن
وحاول تقارن بين الراحة النفسية
اللى بتحس بيها لما تصلى أو تقرا قرآن
وبين الدماغ اللى بتعملها
وانت شارب حشيش (http://www.tarae3o.com/vb/showthread.php?t=59601)أو بانجو!!!!!!!!






قارن وانت تحس الفرق بنفسك
ولو ان المقارنة هتكون
ظالمة وغير متكافئة






ابدأ من دلوقتى وخد العهد
وبارادتك وعزيمتك واصرارك
هتبعد عن الحاجة دى
ومش هترجعلها تانى
وصدقنى حياتك هتتغير
تغيير كبير للأحسن

[اميرة حبى انا]

ياريت اللى بيعملوا كده يعرفوا ويفهموا خطورة اللى هما فيه
وفعلا فى اغانى مش هابطة بس
يعنى مش لاقية ليها كلمة توصفها الصراحة

[اسامة22]

شوفي ياحاجة انتي وهي
اولا اسعد الله اوقاتكم بكل خير
وكل عام وانتم بخير
شوفي انتي وهي
البلد دي من قديم الازل وهي عايشة في حروب
وحرب المخدرات هي اشد قسوة لانها بتدمر العقول
واما ادراكي انتي وهي عقول المصريين
بس اول حاجة مهمة ندور علي البيت اي الاسرة
التربية ثم التربية
من تربي علي العفة والطهارة والحلال والحرام مش ممكن اي قوة في العالم تهزمة
وكفاية كدا
وربنا يحرص شباب مصر امل الامة

[محمد المصري]

بصراحة معاكى حق

الحجات دى من الحجات اللى بتفسد الشباب بسماعها

وطالع فيها سواقين التوكتوك بطريقة فظيعة

ربنا يرحمنا يارب

[خلود]

اشكركم على الردود والمناقشات الجميله وياريت كلنا نحارب الظواهر دى وبياعين التوك توك اكبر فئه ظهرت وسطها الحاجات دى

ربنا يستر علينا يارب

[اسامة22]

لاشكر ياخلود
موضوعك ذو قيمة كبيرة
وبيناقش مستقبل امة باكملها

[محمود عبد الله]

على فكره هوا كان عندو بانجو بس مش بيحب الواد ده ف مش عايز يبيعلو
ههههههههههههههههههههههههههههههههههههههههههه

[خلود]

ماشى يامحمود

يارب اقول عليك ايه بس

برضو هقولك ميرى ياحودااااااااا

[abo trieka elking]

الاغانى دلوقتى بقت تحت الهابطة
آخر تهييييييييييييييس

[خلود]

ابو تريكه

نورت الموضوع وربنا يحرسك ويحميك من التهييس وقرفه

[الرومنسى]

أولا موضوع جميل وخطير يا خلود
ويمكن هبفقى رخم شوية
بس المشكلة بدأت من زمان
لما دخلنا اربع حروب وربنا نصرنا
لما البلد فضلت محتلة وربنا خرجنا منها على خير
فيه خطر قاعد ديما متربص لنا من كل حد وصوب
كل هدفه الوحيد تدمير شباب مصر وترابها
بمعنى فشل فى الحروب العسكرية
تشن علينا حرب فكرية وثقافية وسلوكية تأثيرها علينا أشد بكثير من الحرب المباشرة
الدليل
المخدرات الاغانى الهابطة الموضات البرامج الخليعة الافكار الهدامة قتل العزيمة تجهيل العقول بأفكار مغايرة للعادات والتقاليد اللهو عن الدين إنتشار البطاله تنمية فكر معادى تنشيط الفتنة الفرقة بين أبناء الشعب الواحد
وغير ذلك بكثير فما مدى تاثير تلك الحرب
اسف على رخامتى

[خلود]

مش رخامه ولا حاجه يامحمد

انت بتتناقش باسلوب جميل اهو قدامى

بس برضو ربنا هيحمى مصر وولادها بفضل اسمها الى اتذكر فى القراءن

اشكرك على مداخلتك ونقاشك الجميل

[فريد]

انا شايف انكم تحاملتم كتير على التوتوك
كتير قوى و ده برضه ركبه ناس كتير محترمة
زى حبيبنا الاخ المحترم مصطفى
و حبيب قلبى الغالى اسامة سمسم
وزى ملوك ملوك افريقيا و العالم العربى القرادتى
لكن اصل الموضوع بقى هو البعد عن الدين
وخلاص مفيش كلام تانى