المساعد الشخصي الرقمي

مشاهدة النسخة كاملة : محدش سمع عن حادث الدائري امس؟



haytham69
05-08-2010, 11:32 PM
السلام عليكم،
أنا مستغرب جدا ان مفيش و لا حس و لا خبر عن اللي حصل امس على الدائري مع أني متأكد أن الحادث كان ضخم جدا. أنا مبحبش اخرج برا اكتوبر الا بعد الساعة 1 أو 2 الصبح بيكون الامور هديت و تقريبا الزحمة قلت. طلعت على الدائري اللي بعد دريم ممشتش اكثر من كيلو و لقيت الطريق وقف. فضلنا واقفين ساعتين لغاية معرفت انزل أول فتحة يمين قابلتني و طلعتني على الرماية. و أنا نازل نزلة الرماية شفت الله يسترها عليكم و علينا..شفت ما تبقى من عربية مبعككة و كأنها أصبحت كورة وكانت واقعة من فوق الدائري على النزلة بتاعة الرماية و شفت كم رهيب من الشاحنات فوق الدائري واقفة.
طبعا الفضول ماسكني و عايز أعرف ايه اللي كان حصل و لكن مفيش و لا خبر عن الموضوع ده في اي حتة اليوم...
حد يعرف شيء؟

خلود
06-08-2010, 12:53 AM
لا حول ولا قوه الا بالله

الدائرى ده من يوم ما اتعمل وكان وراه بلاوى وحوادث وكوارث بجد

على قد فايدته من اختصار للطريق وللوقت بس مصيبه والحوادث بتاعته ربنا يحفظنا منها يارب ويسلم

لا ياهيثم انا معرفتش خالص رغم ان الدائرى قريب جدا مننا بس ربنا يستر ويسلم الناس كلها

اميرة حبى انا
06-08-2010, 12:56 AM
ولا انا سمعت حاجة عن الحادثة دى
ربنا يستر

محمود التهامي
06-08-2010, 10:06 AM
لا يا استاذ هيثم محدش مننا سمع حاجه
خصوصا انها عربية واحده زي ما حضرتك بتقول
الاخبار بتنتشر لما تكون عشرة خمستاشر عربية
لو لو كانت بسكلته حتى بس بتاعه حد مشهور
غير كدا يبقا سكتوم بكتوم

haytham69
06-08-2010, 10:35 AM
شكرا على الرد بس فعلا معتقدش انها كانت عربية واحدة لأني بقولكم الطريق كان واقف لمدة أكثر كمان من ساعتين. على العموم أنا و زوجتي قرأنا الفاتحة و دعينا للناس اللي كانوا في الحادثة. أنا توبة أستخدمه مرة ثانية.

خلود
06-08-2010, 01:07 PM
حكايه توبه تستخدمه تانى دى اظن تبقى صعب

وبعدين من غير ما تزعل منى فى ايه فى حياتنا مافيهوش خطوره ومش نخاف منه ولكن اللى مكتوب لنا هنشوفه

انا شخصيا واسرتى اتعرضنا لحادثيين على الدائرى وكانوا بشعيين جدا ورغم ذلك لغايه دلوقتى بنستخدمه ورايحين جايين عليه

اينما تكونوا يدرككم الموت ولو كنتم فى بروج مشيده

ربنا يحفظنا من كل الاخطار ويستر علينا جميعا ويسلمنا فى كل طريق

haytham69
06-08-2010, 04:06 PM
صعبة بس مش مستحيلة..بالنسبة للتوكل على الله..اشوف ان ده تواكل مش توكل عارفة ليه؟ مفيش اي وسئا امان على الدائري. فين تخطيط الحارات؟ فين رجال الشرطة و الاسعاف المتمركزين في نقط ليست متباعدة في حالة حدوث اي حادث او مشكلة في الطريق؟ هل شاهدتي الشاحنات اللي بتكون شايلة حمولة ازيد من المفروض بكثير؟ هل تعلمين ان الحمولة الزائدة تجعل من كل سيارة قنبلة موقوتة؟ الحمولة تؤثر على السيطرة على العربية. فين اللي مفروض يوقف أو يخالف هذه السيارات؟ فين اللي مفروض يمنع الشاحنات من الجري في الطريق السريع اقصى اليسار بدلا من الالتزام باليمين البطيء؟ بعد معرفنا كل السلبيات دي يبقى تواكل منا اننا نستخدمه لاننا بنطلع و عارفين ان حياتنا معرضة لخطر..ولا أيه؟