موضوع للنقاش

[خلود]

السلام عليكم ورحمة الله وبركاته
امامنا سؤال يطرح نفسه كثير هو :
ماهو اهم شئ (حاجه)في الكون بالنسبه للانسان؟؟؟؟
الكثير منا يعتبره المال والبعض يعتبره الاولاد والبعض يعتبره الجاه والسلطان والمناصب وغيرها كتييييييييييييييييييييييييييييرجدا ولكل انسان وتفكيره
انتظر رد اخواني واخواتي في منتدي 6 اكتوبر الموقر علي هذا السؤال وباب النقاش مفتوح
في انتظار ردودكم واجاباتكم واتمني ان ينال هذا الموضوع الاعجاب

[haytham69]

أشكرك على الموضوع و سأعتبر ردي فيه علاج نفساني لأني نفسي فعلا حد يسألني السؤال ده من زمان.

مش الفلوس و لا الجاه و لا الأولاد..أهم شيء في نظري ومن واقع تجربتي في الحياة و الغربة..هي ان الأنسان يعيش زي مهو " كان " عايز يعيش. لسؤ الحظ (وبالنسبة للكثيرين هو مش سؤ حظ أبدا بس لأني جربت و عرفت بقول كدة) كان نفسي اعيش في بلدي زي مكل أصحابي و اقاربي عايشين.... كان نفسي يبقى عندي جيران و كان نفسي ابقى قريب من قرايبي هنا في مصر..انا بتلخبط في أسماء بنات و اولاد عمي و معرفش عيالهم أصلا. ضحيت بدفىء الجيرة و الحبايب عشان الغربة و ندمان اشد الندم لاني معشتش الحياة اللي كنت عايزها..عشت الحياة اللي اجبرت ان اعيشها.
بنزل مصر شهر كل سنة. ماليش غير صاحب واحد في مصر كلها. قرايبي لو شفتهم مرة يكون رائع و يمكن مبشوفهمش لأني بكره أسوق برا اكتوبر.
أعتقد لو الواحد قدر يعيش الدنيا دي براسه و مزاجه من غير ميكون مجبر يبقى هي دي قمة السعادة.

وتاني أشكرك على الموضوع الجميل و ابعتيلي فاتورة الاستشارة. :)

[خلود]

هههههههههههه

انا اللى هبعت فاتوره الاستشاره

شكرا هيثم على مشاركتك الجميله اللى قربتنى شويه من صديقى هيثم وعرفتنى انه مغترب عن بلده وناسه واهله وانه بيعانى من الغربه والامها

والله عندك حق الصحاب والدفا واللمه وسط العيله بكنوز الدنيا كلها

بس اعتقد هنا قرار السفر والغربه بيكون قرار اضطرارى فى بعض الاحيان وده للظروف الصعبه اللى بتمر بيها بلدنا

تعرف ياهيثم احنا مسيريين فى اغلب شئون حياتنا

اتمنى لك حياه سعيده ياهيثم ورجوع دائم لبلدك واقامه جميله وحياه سعيده تعيشها وسط اهلك وناسك

نورت الموضوع ياهيثم واتمنى تواجدك الجميل دائما فى كل مواضيعى

[اميرة حبى انا]

ياريت كان كل واحد يعيش وخلاص
بس احنا فعلا فى حاجات كتير مجبرين عليها
عشان هى الظروف والحياة كده
ربنا يهون عليه غربتك يا هيثم
وشكرا ع الموضوع يا خلود
اللى واضح انه هيفتح مجال للناس تفضفض باللى جواها

[lionking]

والله يا خلود موضوع جميل جدا

وكل واحد ليه اولوياته طبعا من واقع حياته وتجربته سواءا تجربة ناجحة او ..........

بالنسبة ليا

اهم شىء فى الكون بالنسبة ليا هو

بيتى واسرتى الصغيرة وبعد كده العائلة ويتخلل كل الحاجات دى المال( الفلوس الفلوس كل شىء ييجى بالفلوس ) لان بالمال هنقدر نحقق ربع طموحاتنا واخدة بالك انتى ربعها ...........

[خلود]

شكرا يااميره على تواجدك بس تفتكرى لو كل واحد عاش زى ماهو عايز كان هيبقى فيه ثواب وعقاب وجنه ونار

علشان كده صعب نعمل اللى عايزينه ولكن نحاول على قدر المستطاع نحقق رغباتنا من غير ما نخسر ديننا وقيمنا

ليون

اسعدنى تواجدك الجميل بعد غياب وبالنسبه لموضوع الفلوس للاسف هى فعلا اللى بقت بتخلص كل حاجه وهى السلاح الذى لا يقهر

لذلك كله بيتكالب عليها لجمع اكبر كميه منها

ليون كفايه الا الكلام كتيييييييييير اوى

والواحد نفسه يبعبع

ههههههههه

[fagrmasr01]

اهم حاجة فى رأيى هى راحة البال
اللى هى مينفعش الواحد يوصل لها الا مع راحة الضمير .. لما يكون الضمير الداخلى للانسان صادق .. جوا زى برا .. وفى طاعة ربنا بعيد عن المعاصى
وقتها مش حايهم المال ولا الصحة ولا اى شئ تانى
وعاجبانى اوى فى القناعة دى مقولة سيدنا على بن ابى طالب كرم الله وجه
علمت ان رزقى لن يأخذه غيرى .. فاطمأن قلبى

الله ينور عليكى يا خلود

[محمود عبد الله]

راحة البال هيا اهم حاجة

الفلوس تقدر تشترى الاكل
لاكن متشتريش النفس اللى تاكل

الفلوس تقدر تشترى السرير
لاكن متشتريش النوم

الفلوس تقدر تشترى الادوية
لاكن متشتريش الشفاء

من اقوال امينة رزق

[خلود]

انت ياعم يابتاع اميه رزق

انت من زمان اوى كده ليه

ههههههههههه

يلا اجرى على دار المسنين اللى انت خارج منها

بس تصدق كلامك معقول فعلا وعندك حق فيه الفلوس

مش هتشترى راحه البال ولا راحه الضمير ولا الصحه

شكرا ياحودا ونورت بالرد الجميل

[gmal0123]

الصحة هي أهم شيئ في الدنيا ..
ربنا يديمها علينا وعليكي ..
مشكورة

[خلود]

اشكركم على النقاش الجميل اللى بتمنى انه ميكونش انتهى لحد كده وبالنسبه للفلوس احنا نقدر نعتبرها وسيله لتحقيق غايتنا فى الحياه وليست هى الغايه التى نسعى اليها لانه فى حقيقه الامر لا نستطيع ان لها اهميه خطيره جدا والدليل على صحه كلامى ما سمعناه عن اكثر من حادثه تخلص فيها الاب من اسرته بسبب عدم مقدرته على تلبيه احتياجاتهم والام التى قتلت ابنها وحاولت قتل نفسها لعدم قدرتها على الصرف عليه

فى انتظار باقى اراء ونقاشات اعضاءنا الافاضل واشكر متابعتكم الجيده للموضوع

[haytham69]

ردك الان اعطاني فكرة. ليه منعملش قسم في المنتدى و ممكن نسميه "ليلة القدر" او زي متحبوا و كون هدفه مساعدة المحتاج؟ طبعا احنا كلنا بنحب نعمل الخير و لكن لا نعرف كل اللي محتاجين. اللي يعرف حد محتاج يحط ظروفه و ايه اللي محتاجه و اللي يقدر من الأعضاء يساعد فليساعد و يكسب الثواب. هذه مجرد رؤوس اقلام كما يقال. تنفيذ الفكرة راجع للإدارة.

[خلود]

شكرا هيثم على اقتراحك الجميل وربنا يجازيك خير ويجعله فى ميزان حسناتك

والاداره ويانا وشايفه ولو تقدر تنفذ مش هيتأخروا ابدا عن فعل الخير

شكرا هيثم

[haytham69]

اللي فيه الخير يقدمه ربنا.