مناقشاتنا واحنا مختلفين

[fagrmasr01]

أحبابى الطيبين

كل عام وانتم بخير ويارب مصر كلها بخير باذن الله رب العالمين

عايز اناقش معاكم موضوع شاغل بالى من فترة

وأتمنى منكم جميعا المشاركة والنصيحة والرأى

مقدمة لابد منها
1- مصر بتحبنا وكلنا بنحبها .. لكن شكل الحب بيختلف من شخص لشخص
2 - المناخ السياسى فى مصر بيتغير من نفاق للحزب الوطنى او معارضة كرتونية .. وأصبحت الان الاحزاب الوطنية والائتلافات والتحالفات تدور فى فلك مختلف تماما .. أغلبها حرة الرأى ... سواءً اتفقنا معها او اختلفنا

الموضوع
اتمنى اننا كلنا نفتح نقاشاتنا واحنا على ثقة بان لو شاء ربك لجعل الناس أمة واحدة
واننا نبنى حواراتنا وخلافاتنا على المبادئ وعلى اساس ان كلنا نفترض حسن النية فى بعضنا .. من غير تخوين ومن غير إقصاء
ونقبل ونتقبل الخلاف فى الرأى .. اللى بكل صدق ان أتقناه سوف يثرى نقاشاتنا ويزيد من ثقافاتنا ويوسع من مداركنا

انا عن نفسى أقولها بكل أريحية
أحبكم فى الله .. حتى وان اختلفت معكم
تعالوا نتحاور ونتفق ونختلف واحنا حبايب

[خلود]

والله ما عارفه اقولك ايه ياجمال

كلنا بنحبها وكلنا مستعدين نفديها بارواحنا لكن للاسف ساعات مش بنرضى باراء بعض ومهما قلنا اننا كل واحد له طريقته فى حبها والتعبير عن حبه للبلد بس برضو بلاقى ناس مصممه على رايها معاى فى الشغل مثلا فى تصميم غريب على ان كلامهم هما الصح وبس وانت لازم تقول ايوه مظبوط

يلا ربنا يوفق للخير ونخلص من الصراعات اللى احنا فيها دى

[ahmedabdelziem]

انا هبدء المناقشه وعايز حد يفسرلى
سبب الهجوم الدائم على الرموز الوطنيه
ومنهم طبعا حمدين صباحى ودكتور محمد البرادعى
ومن اى منطق يتم تخوين اشخاص اقل مايقال عنهم
انهم لم ينحنوا لظالم ولم يقبلوا يد الملك من اجل شئ
عايز اعرف من حضراتكم رائيكم

[فريد]

الموضوع جميل طبعا
واحنا لازم نختلف العلماء نفسهم اختلفوا
لكن المشكلة بجد من وجهة نظرى المتواضعة
انه هناك اناس لا ترى الحقائق بعينها ولكن ترى مايعجبها
واخرى ترى الحقائق اكاذيب
موضوع حمدين يالذات انا مش عارف اتكلم فيه ازاى
لكن للنظرين على الامور يعملون
هروبه من الميدان و تعلقه بامل شخصى
ثم انضامه لشخص يعلمه الجميع و هو ساويرس و ابو حامد
الكلام كتير لكن زى ماقلت وجهات نظر
الاخوان و من يرهم دائما خائنون بتوع صفقات مع انه لم يثبت عليهم شيء
و اقسم بالله انى لست من الاخوان
ولكن دفاعا عن اناس اتعامل معهم
منذ سنين و كنت اخاف منهم مثل كل الناس و اردد مايقولوه الاعلام المباركى عنهم
حتى دخلت بينهم و رايت بعينى
ولكن لا اقول انهم ملائكة لهم اخطاء طبعا
من لا يخطىء مثلهم مثل كل الاحزاب
والموضوع كبير

[ahmedabdelziem]

حمدين مهربش من الميدان
ده لو عايزين نحكم بحياديه
لانه لما نزل بعد حكم على مبارك
حولها اللى يهمهم تشويها الى انه نازل عشان منصب
ولما سافر كلنا بنبقا عارفين ان مواعيد العمره بتكون متحدده من فتره
ومع ذلك اهو ريح الناس من نزوله عشان المنصب
اما بالنسبه للاجتماع السرى مع ساويرس وابو حامد
احب اقول ابو حامد اصلا مكنش موجود
وساويرس كان حاضر الاجتماع السرى بصفته ممثل عن الحزب اللى بينتمى ليه
وبالنسبه للاجتماع السرى انا نفسى حضرته بصفتى احد اعضاء حمله حمدين
وبالنسبه برضو لموضوع المجلس الرئاسى المدنى واللى طرحه حمدين وقال انه
مش هيكون عضو فيه هو طرحه من يوم 11 فبراير من يوم التنحى يعنى
وطالب بيه بعد كده بدل المره عشره
اللى فات كان للتوضيح

اما الاخوان فانا مش هنسى لما كنا بنموت فى محمد محمود وكان معايا الحاج جمال (فجر مصر)
وساعتها مجلس شعبنا الموقر قال انه الشرعيه بقت للمجلس مش للثوار
وانه مضربش علينا خرطوش
الحاج جمال بقا يقدر يقولنا هنا اللى شوفانه هناك كان خرطوش
ولا بومب من بتاع فيلم (تك تك بوم )

اسف جدا للاطاله

[خلود]

انت فين ياجمال

فتحت موضوع تقصد بيه حاجه ولكنه دخل فى سكه تانيه

بس كويس برضو كله نقاش

واتمنى يكون نقاش بين اخوه متحابين فى الله

كل منهم يحمل فكر وراى ولكن يتفقوا فى النهايه على حبهم وانتمائهم لمصرنا الغاليه الذى لا يستطيع احد ان يشكك فيه

تحياتى لكم ولنقاشكم الجميل

[M.Khalifa]

ليه كل واحد فاكر إن الرموز الوطنيين دول هم من يتفقون معه فقط في الرأي ؟
================================================== =========
يعني مثلا لو واحد كاره التيار الاسلامي تلاقيه شايف الاخوان يتمولوا من قطر وإيران والسلفيين بيتمولوا من السعودية
وعلى النقيض بعض محبي التيار الاسلامي شايفين ان كل من يرفض التيار الاسلامي يتمولوا من المنظمات الأمريكية واليهودية
على فكرة أنا لا أغضب من النقد ومش زعلان ان الناس تنتقد حمدين أو البرادعي لكن المشكلة فعلا ان احنا بنجرم بعض
معقول واحد يوصف التاني انه مجرم ولص كده والبعض يصف الاخوان والسلفيين انهم قتلة والبعض يصف الثوار انهم مخربين ايه ده ده مش اسمه اختلاف خاااااااااالص
انا عن نفسي بن الحركة الاسلامية واختلف مع قادات الحركة الاسلامية كثيرا سواء الاخوان او السلفيين وأختلف مع البرادعي أحيانا ومع حمدين أحيانا ومش زعلان ان الناس تختلف بس أهم حاجة مش عايز حد يقول على حد انه قاتل أو مجرم الا بدليل
بس فيه حاجات مش ينفع فيها اختلاف خاالص الحاجات دي بتكون متعلقة بمباديء ولا يعذر صاحبها الا بجهله ويجب أن يقف ضده فيها محبيه قبل خصومه لأن النبي صلى الله عليه وسلم قال (( انصر أخاك ظالما أو مظلوما ))

[ahmedabdelziem]

هو ده بقا اللى نفسى يكون الناس كلها تدركه
مش كل حاجه لازم تتصدق ومش كل حاجه لازم نمشى وراها
اكيد كله عنده اخطاء لان ديه طبيعه البشر
الله ينور ياستاذناا

[fagrmasr01]

أحبابى الطيبين

كل عام وانتم بخير ويارب مصر كلها بخير
باذن الله رب العالمين

ألف شكر على استجابتكم الجميلة للموضوع

وبرغم وجود بعض الاختلافات التى يمكننا ان نفتح فيها نقاشات مطولة تفيدنا جميعا

انا عن نفسى والله استفدت كتير من كل وجهات النظر الطيبة التى تم طرحها هنا

وأشكركم من قلبى وباذن الله الكريم نفتح صفحة خاصة نناقش فيها الأفكار التى وردت هنا .. ونفيد بعض وونستفيد باذن الله

وأليكم أرسل كل اشارت المودة مع كل الحب والتقدير لقلوبكم الطيبة

[فريد]

كل واحد بياخد الكلام على مزاجه و على مايوافق هواه الشخصى
انا لما انتقدت حمدين انتقده على علم و عارف كويس هو عمل ايه
ومقلتش انه مجرم ولا حرامى
ولما قلت الاخوان قلت ليهم اخطاء و انا مش اخوان

وموضوع محمد محمود مش محتاج اسال حد انا كنت هناك و شفت
اشياء لو قلتها سيخرج علينا الخوارج و يقولولون ده حصل و محصلش
رغم انى شفته بعينى و مش انا و بس
الكلام كتير
لكن الا بياهجم التيار الاسلامى مش عارف بيهاجمه ليه
بياهجم و خلاص اهو زى الناس مابتعمل
لكن احنا بناهجم الاحزاب بننتقد افعال و تصرفات مش يقلك المتاسلمين
لا حول ولا قوة الا بالله

[ahmedabdelziem]

اه طيب يبقا مدام النقاش ممكن يكون ان طرف عارف والتانى مش عارف
مش هيوصل لنتيجه
فانا هفضل على قناعتى وحضرتك خليك على قناعتك
ده افضل كتير من اننا نقعد كتير نتكلم فى حلقه واحده
وكل شويه نرجع لنقطه الصفر

وطبعا ده رأى الشخصى ومش بفرضه على حضرتك

[خلود]

صح كده

تمام

كل واحد له قناعته وتفكيره اللى صعب التانى يغيره له

علشان كده اتمنى منوصلش فى النقاش بينا لطريق مسدود ونخلى بينا مساحه للنقاش والتفاهم بكل حب وود

شكرا لكم ولصاحب الموضوع لفتحه موضوع نقاشى

[DMR]

لو عايزين ديمقراطية بجد .. يبقى مضطرين نسمع رأي الاحمق و السفيه
و لازم نتحمله لحد ما نقنعه او على الاقل نبعد أذاه عنّا
هناك أناس اعرفهم معرفة شخصية يدعون للديمقراطية و غير مؤيدين لمرسي .. و عندما فاز و رأو مؤيديه و مشجعيه و داعميه في الميدان حوله .. قالو عنهم غنم و عبيد و يخلقون ديكتاتور جديد !!!
هل لمجرد دعمهم و تأييدهم لمرشح فائز يكونو من العبيد و الغنم
لا أحب الاخوان و لن أحبهم في يوم من الأيام و لكن .. " لنكن منصفين "
و لا يجب ان نكون متحاملين على جماعة او حزب و شخص لمجرد كرهنا له ... كل ما نريده أفعال لا أقوال و كلام معسول ...
و اقول لمؤيدي حمدين .. لا يعميكم حبكم له و تأييدكم له عن رؤية الحقيقة و البحث في ماضيه ايام صدام و الحرب في العراق
الاستاذ حمدين قال في لقائه مع منى الشاذلي انه لن و لم يكن في يوم من الايام داعما لصدام و لا لأفاعيله في بلاده و يتحدى من يجد دليل يثبت عكس ذلك ... في حين انه في البحث عن ماضيه يوجد له فيديو و هو يمدح في صدام و نظامه ... لذلك اهتزت صورته امامي .. فإنه اما ان يكون منافق او كذاب .. لذا لا ارى أحد حتى الان من المطروحين على الساحة السياسية يمكن نقدره أو نثق فيه !!!!

لم يظهر بعد منقظنا !!! .... لك الله يا بلاد المسلمين
و أرجو تقبل الرأي الآخر و كفانا عصبية و تعصب فإن مثل تلك الاشياء تعمينا عن رؤية الحقيقة

[ahmedabdelziem]

الفيديو اللى حضرتك بتقولك عليه كان اثناء زياره حمدين للعراق
بخصوص المصريين المعتلقين فى السجون العراقيه
واللى ربنا جعله سبب فى انهم يرجعوا
وكنت اتمنا انك تراجع ماضيه برضو مع ياسر عرفات
وتراجع لما كان هو والاستاذ كمال ابو عيطه وسيد الطوخى ومجموعه
من الشخصيات الوطنيه بيحاولوا كسر الحصار عن غزه
انا فعلا مؤيد لحمدين وبحبه كشخص كمان
لكن فعلا لو عرفت عنه شئ يثير الجدل هكون اول فاضح له
واول من ينقده او يهاجمه ان اضطرنى الامر
ومع ذلك انا برضو مش ضد الدكتور مرسى رئيس جمهوريه مصر العربيه
لانه الان يمثلنى ويمثل كل مصرى وبان ذلك فى انفعالاتنا وردودنا اثناء
هجوم مايدعى ضاحى خرفان بالقول على الدكتور مرسى
فى النهايه واتكلم عن شخصى اتمنا ان اكون صحيح وان لا اكون اؤيد شخص
بشكل اعمى يمنعنى عن رؤيه اخطائه

[DMR]

( الفيديو اللى حضرتك بتقولك عليه كان اثناء زياره حمدين للعراق
بخصوص المصريين المعتلقين فى السجون العراقيه
واللى ربنا جعله سبب فى انهم يرجعوا )

هل ده سبب يجعله يمدح في نظام صدام ؟؟!!! لو ده صحيح زي ما حضرتك بتقول ... اعتقد ده يبقى اسمه تذلل علشان يجيب حق معتقلين ... يبقى راحت فين الكرامة ؟؟

[lionking]

بسم الله ما شاء الله

ربنا يزيد ويبارك

مجمعين عند النبى ان شاء الله

اولا تحيه اعزاز وتقدير واجبه للحاج جمال
الكبير اوى ( كبير المقام ) طبعا
موضوعك روووعة وده امر لابد منه

تحيه جامده وسلام حاير وطاير لكل الناس اللى شاركت برايها فى الموضوع واللى لسه هتشارك

انا بقالى اسبوع مش متابعة الاخبار ولا بشوف حاجة ومريحه دماغى

انا عندى كلمتين هقولهم واتكل على الله
لان واضح جداا ان كل واحد متمسك برايه وقافش على موقفه

بصوا يا جدعان بأه
بالنسبه لاهانة الرموز الوطنية ده امر مرفوض وخاصة اذا كانت واضحه من اول يوم ومن قبل الثورة كمان ومنهم
البوب

بالنسبة لمهاجمة التيارات الاسلامية
اذا انا شخصيا بهاجم تيار معين بيكون نتيجة لاداؤه وتصرفاته المشينة والتى تسيىء للدين الاسلامى قبل الاشخاص
رايى ان الاسلاميين مكانهم فى الدعوة وليس السياسة لان السياسة محتاج للكذب والتلون وده رايي

بالنسبة بأه للاهم

وتوهم البعض ان الشخصيات العامة لا يمكن انتقادها
فده غلط
كل الناس يمكن توجيه النقد لهم ولكن المشكلة ان المشايخ اللى دخلت السياسة واللى كانت مستخبية ايام زمان للاسف الناس بتصدق كلامهم كانهم انبياء


سؤالى للاخوة السلفيين

اين الاعتصاااااااااااااااااااااااااااام

[DMR]

انا ليا تعليق على نقطتين بس



بصوا يا جدعان بأه
بالنسبه لاهانة الرموز الوطنية ده امر مرفوض وخاصة اذا كانت واضحه من اول يوم ومن قبل الثورة كمان ومنهم
البوب

بالنسبة للنقطة دي فأنا متفقة معاكي تماما

بالنسبة لمهاجمة التيارات الاسلامية
اذا انا شخصيا بهاجم تيار معين بيكون نتيجة لاداؤه وتصرفاته المشينة والتى تسيىء للدين الاسلامى قبل الاشخاص

و النقطة دي بردو متفقة معاكي فيها

رايى ان الاسلاميين مكانهم فى الدعوة وليس السياسة لان السياسة محتاج للكذب والتلون وده رايي

انا من وجهة نظري ان دي فكرة النظام السابق كان بيحاول يقنعنا بيها للتخويف من الاسلاميين و النظام الاسلامي .... و لكن انا من وجهة نظري لو واحد هيتبع الدين بجد مش زي اليومين دول أقسم بالله العظيم حال البلد هيتصلح و الكل هيبقى كسبان ... و بالنسبة للنقطة بتاعت ان السياسة محتاجة كذب و تلون ... لو السياسي الاسلامي ( كما تسمونه ) اتبع هدي الرسول صلى الله عليه و سلم و نهج منهجة في سياسة البلاد فلا أظن انه سيُضطر للكذب و التلون .. الرسول صلى الله عليه و سلم كان سياسي ناجح و لا أعتقد انه كَذِبَ و تَلَوَّنَ !!

لماذا نعترض على سياسة لم نجربها و لم نعلم عنها شئ ؟؟؟ ... من قرأ سياسة الرسول في إدارة البلاد حتى يحكم عليها ؟؟؟




أنا عارفة ان ممكن حد يقول عليا ساذجة و طيبة و مين هيسمع للكلام الحلو ده و يتبع السنة بجد !!!
فالننتظر ... ربما يظهر المسلم الحق و ليس المتأسلم

[fagrmasr01]

طبعا منورين ومفرحين قلبى

أولا ايجابيات
اللمة حلوة اوى
حتى لو مختلفين
لأن الاختلاف شئ طبيعى وهو جزء من تكوين عقول البشر


أما نقاط التحسن فى الموضوع فهى
مينفعش نهين الرموز مهما كان خصوصا ان الرموز بيضحوا فى سبيل مبادئ وقيم لابد نحييهم على شجاعتهم فى الدفاع عنها

وكمان مينفعش نربط أداء شخص .. ولو كان داعية .. بالدين الحنيف
لأن كل منا يؤخذ من كلامه ويرد عليه
الا صاحب المقام عليه افضل الصلاة وأتم السلام
إنما هى اجتهادات تصيب وتخئ فلا يجوز ان نرهن نجاح الاجتهاد او فشله بنجاح النظرية او لا سمح الله فشلها

أما الربح الجميل فهو ما أتمناه منكم .. ألا وهو .. استمرار النقاش

حياكم الله وأحياكم بخير كل عام
كل عام وانتوا طيبين .. ياطيبين

[DMR]

الحقيقة موضوع حضرتك يا استاذ جمال رائع جدا ... فتح مجالات كتير للنقاش
و مهما كان الاختلاف .. فلن يفسد للود قضية

[lionking]

ازيك يا دى دى

منوره والله يا قمر

انا زعلت من ردك فى حاجة واحدة

انك قلتى عليا انى بسمع كلام النظام السابق
او
انى مقتنعه بكلامه واكاذيبه

وده غلط لان معروف جدا عنى انى من المعارضين من زماااااااااان اوى وكانوا هنا دايما بيخافوا عليا من كلامى ونقدى ومواضيعي

بس هعديها عشسان انا طيوبة

ههههههههههههههههه

بالنسبة للاسلاميين اللى دخلوا فى السياسة

عدى معايا كام مره كذبوا وتلونوا ورجعوا فى كلامهم كده

اقعدى افتكرى من اول الثورة لما خافوا وقالوا الخروج على الحاكم حرام شرعا وبعد ما الحاكم مشي خرجوا وبدأوا يلموا الغنائم

والامثلة كتير اوى

بالنسبة للاخوان والسلفيين

ياريت يتبعوا هدى الرسول عليه افضل الصلاة والسلام مكانش حد هيزعل لكن للاسف هما مش عارفين ومش هيعرفوا

احنا مش عايشين فى قارة لوحدنا

وهما عندهم قناعات مش هتتغير وبانت فى تصرفاتهم فى المجلس المنحل

وبعدين يا حبيبتى ما احنا دلوقتى بيحكمنا الاخوان اهو

محدش قال حاجة خالص

بالعكس

انا من المعارضين للاخوان ولم انتخب مرسي

ولكن له منى كل الاحترام والتقدير ومستنيه اشوف اى انجازات

الدين الاسلامى مش غلط لكن
من يقوموا بتفسيره من المتشددين هما اللى غلط

[DMR]

ازيك يا دى دى

منوره والله يا قمر
ربنا يخليكي ده نورك و نور المنتدى
انا زعلت من ردك فى حاجة واحدة

انك قلتى عليا انى بسمع كلام النظام السابق
او
انى مقتنعه بكلامه واكاذيبه

وده غلط لان معروف جدا عنى انى من المعارضين من زماااااااااان اوى وكانوا هنا دايما بيخافوا عليا من كلامى ونقدى ومواضيعي
و الله مش قصدي .. انتي فهمتيني غلط او انا عبرت عن الكلام بطريقة غلط .. أسفة على سوء التفاهم
بس هعديها عشسان انا طيوبة

ههههههههههههههههه
هههههههههههههههههه طول عمرك طيوبة
بالنسبة للاسلاميين اللى دخلوا فى السياسة

عدى معايا كام مره كذبوا وتلونوا ورجعوا فى كلامهم كده
انا معاكي انهم كذابين .. و لكن مش المفروض اننا نلصق كذبهم بإسلامهم .. لأن احنا كده غصب عننا من غير ما ناخد بالنا بنشوه صورة الاسلام ... يعني لما حد يكذب نقوله انت كذبت منقوليش اهو اتفرجو على الاسلاميين الكذابين
اقعدى افتكرى من اول الثورة لما خافوا وقالوا الخروج على الحاكم حرام شرعا وبعد ما الحاكم مشي خرجوا وبدأوا يلموا الغنائم

والامثلة كتير اوى

بالنسبة للاخوان والسلفيين

ياريت يتبعوا هدى الرسول عليه افضل الصلاة والسلام مكانش حد هيزعل لكن للاسف هما مش عارفين ومش هيعرفوا
بالظبط و هو ده اللي انا اقصد عليه .. مفيش حد بيتبع سياسة الرسول صلى الله عليه و سلم في ادارة البلاد و كل واحد فاكر نفسه صح و مفيش حد زيه و هو الخبرة و الكل في الكل
احنا مش عايشين فى قارة لوحدنا

وهما عندهم قناعات مش هتتغير وبانت فى تصرفاتهم فى المجلس المنحل

وبعدين يا حبيبتى ما احنا دلوقتى بيحكمنا الاخوان اهو

محدش قال حاجة خالص

بالعكس

انا من المعارضين للاخوان ولم انتخب مرسي

ولكن له منى كل الاحترام والتقدير ومستنيه اشوف اى انجازات
بالظبط و انا زي ما قولت انا لم و لن اكن من مؤيدي الاخوان و لكن فالنأمل خير ... و منتظرين منهم الانجازات
الدين الاسلامى مش غلط لكن
من يقوموا بتفسيره من المتشددين هما اللى غلط
فيه ناس كمان بيفسروه على مزاجهم علشان يحللو الحرام لنفسهم ... و الشعب المصري ما شاء الله عليه بيحب يفتي في اي حاجة .. فاهم او مش فاهم :50 (3):


و الحمد لله ان خلافتنا الخلافات الطبيعية ... و الحمد لله ان الخلاف بين ثوريين و ليس من مؤيدي النظام
أحبكم في الله

[lionking]

حبيبتى يا دى دى

والله بحبك جداا

وعلى فكرة الخلاف ده حاجة صحية جداا

ولو كان ربنا عايزنا كلنا حاجة واحده كان خلقنا حاجة واحدة

تسلميلي يا قمر المنتدى انتى

[stylooo]

السلام على من اتبع الهدى

أحيي الجميع المشاركين فى نقاش أستاذنا الجليل / فجر مصر
و كذلك تحية عطرة للجميع خوفا من الغلط و النسيان
أما بعد
فموضوع النقاش جميل و الآراء ع الرغم من اختلافها و لكنها تثرى الموضوع و الآن حان دورى لعرض رأى الخاص بى
اعتبر نفسى محظوظة لانى شاركت بثورة لو كانت تحققت كل أهدافها لصرنا الآن من الدول التى أشادت بما تم من شباب الثورة
و لا ننسى نخبة العالم من الساسة و أحاديثهم عنها ... المهم و اختطفت الثورة بفعل فاعل ...و تم تحيد الشعب ....و تدمير الرموز القوية التى نادت بفكرة و اشتعلت ..
و جاء حزب الحرية و العدالة ليجنى الثمار و كلنا يعلم ذلك و أهين من أهين.. و ارتفع من ارتفع... و رغم إنى من المبطلين لصوتى لانى رأيت أن الشعب موضوع بين فكى رحى...
و ليس أمامنا غير انتخاب أخف الضررين ... علمت وقتها أنه لا مبرر لما يحدث الآن .. لقد تحملنا أكثر سنوات مصر العجاف
و الآن حان الدور أيضا علينا أن نتحمل فقط 2 سنة لنرى و تتضح معالم الحمل رغم تخبط سياسية إدارة الأمور فى مصر
و كان أولها حملة النظافة و نحن دافعى الضرائب و كذلك قيمتها على فاتورة الكهرباء ..
هذا قليل من كثير و كذلك حبى للبرادعى و حمدين.... و ارجو ان تقوى المعارضة لاننا بصراحة انتهينا من حزب وطنى إلى حرية و عدالة
و لا أجد غير تغيير المسمى فقط فقد وضع إسلامين فى مكان مطبيلين الوطنى .. و أصبحت المؤسسات تطبل بحمد الحزب
و لكن نكن موضوعيين و أن اختلفت الروءى و المسميات و نعطيهم فرصة و لنجرب أولى ديمقراطية
بشرط أن تبتعد الاعضا ء المنتمين للجماعة و الحزب عن التدخل بالقول و الفعل... ليس لشئ سوى الظهور الإعلامى فقط
أن كان الشعب يعلم ... فقط لى عجة أسئلة و أرجة الإجابة عليها دو تعصب أو غضب
1 - أين وعد الريس مرس بالافراج عن المعتقلين سياسياً 14 ألف معتقل خلف الاسوار منذ 28 يناير 2011 حتى الان لا حس و لا خبر ؟؟؟؟؟؟
2 - الخروج الآمن لكل من قيادات المجلس العسكرى و عدم محاكمتهم على الجرائم التى فعلوها بحق الشعب و الثوار ؟؟ظ
3 - أين محاكمة قتلة الثوار ..و إعادة محاكمة مبارك و عصابته على سوء إدارة البلاد مدة 30 عام من الفساد و الظلم ؟؟؟
4 - أين و أين ....؟
5 - أين مشروع النهضة التى قالوا عنها و اتضح إنها كلام فقط و شعار انتخابى ؟؟
6 - أين الحد الآدنى و الاقص للاجور ؟؟
7 - أين الرعاية الطبية و الصحية ؟؟؟
8 - حرموا سابقا القروض و العمل الحكومى .... لماذا الآن نمد أيدينا للقروض ؟؟؟
9 - أين استرداد الأموال المهربة و الدول سمحت بالرد بعد حكم القضاء ؟؟؟؟
يا ربى إنى مغلوبة على امرى.............................. و منتظرة الاجابة
و هنا انتهى حديثى و سأرد على المنتقد لى شكرا له قرأت كلامى و فهمت ما بين السطور
و أخر ما قاله وزير العدل /.... مكى .............من تجهيز قانون طوارءى جديد لهو بعينه بداية للرجوع للخلف من تكميم الافواه و حرية الرأى...
و عودة الشعب لحظيرة امش جنب الحيط و أن لم ينفع ادخل الحيط ......

[ahmedabdelziem]

رد على الاستاذه ستايلو

مشروع النهضه قائم والدليل ازمه الغاز
مشروع النهضه قائم والدليل ازمه السولار
مشروع النهضه قائم والدليل ازمه البنزين
مشروع النهضه قائم والدليل سعر المانجا (بالمناسبه محصول المانجا ده محصول السنه اللى فاتت )
مشروع النهضه قائم والدليل ان البلطجيه (الثوار ) لسه فى السجون
مشروع النهضه قائم والدليل عدم تنفيذ قانون الاجور
مشروع النهضه قائم والدليل ان اشرف ضباط (ضباط 8 ابريل ) مازلوا محاكمين عسكريا
مشروع النهضه قائم والدليل ان الضابط محمد وديع تم تحويله لمستشفى امراض عقليه للاطاحه بمستقبله
مشروع النهضه قائم والدليل ان الشرطه لم تتغير
مشروع النهضه قائم والدليل رفض تامين مؤتمر يمثل احد اطراف المعارضه
مشروع النهضه قائم والدليل ان القرض بقا حلال
مشروع النهضه قائم والدليل ان الزباله رجعت تانى فى كل مكان
مشروع النهضه قائم والدليل فض الاعتصامات بالقوه
مشروع النهضه قائم والدليل ان حمدين خمهم والبرادعى عميل
مشروع النهضه قائم والدليل ان شعارهم نحمل الخير لمصر (من اجل مستقبل افضل سابقا )

اكتفى بهذا القدر حتى لا انكر مجهودهم فى اقامه دوله نهضويه قويه
اسف لكل شهيد مات عشانى مش لاقى رئيس يجيب حقكم بما لا يخالف شرع الله
فرئيسى يبيح المحظوره من اجل الضروره
ويبدو ان الضروره تبيح السكوت منه عن القصاص لكم

[حاتم جلال]

لافوض فاهك يااخ احمد

انت تستحق اجمد سقفه وتحيه واخلع لك القبعه احتراما على كل اللى قلته

احنا لبسنا الخاذوق خلاص يامعلم

حسبنا الله ونعم الوكيل فيهم

[fagrmasr01]

الى ابنتى دي دى والمتألقة ليون كنج
الاخت الرائعة ستايلو والاخ احمد عبد العظيم

بالفعل تثبت الايام ان مشروع النهضة هو أكبر خدعة

ارجو ان ينتبه الشعب الى المؤامرات التى تتم

[اسامة22]

اسعدنى الحوار من بدايته الحاج الكبير جمال وفى البدايه الف حمدالله على سلامتك ويارب يشفى عنك ياراجل ياطيب

بس انا حابب ندى فرصه لمرسى ونشوف هيعمل ايه

بلاش نستعجل احنا صبرنا 30 سنه على فساد وخراب ذمم وقتل وسحل

ميجراش حاجه ندى للراجل الطيب ده فرصه الفتره دى بس ونساعده

مش كده ولا ايه

[fagrmasr01]

ربنا يبارك لك يا أسامة ويوفقك

مشكلتنا مع الأخوان المستديمة انهم بيعاهوا ويحلفوا .. وفى اول مناسبة بيلحسوا كل العهود ..

فينا محاسبة من قنلوا الثوار علنا فى محمد محمود ومجلس الوزراء وماسبيرو

فين محاسبة اللى رموا الشهيد فى صندوق الزبالة

فين محاسبة اللى قتلوا ولادى وعروا بناتى ومنحهم مرسى أنواط ونياشين وحصانة وبراءات بالجملة

دم ولادنا لا يجوز ان ننساه .. مهما كانت اغراءات الصفقة بين الاخوان والعسكر وغيرهم

ومهما كانت المناصب والمكاسب