مساعده عاجله

[nogafoda]

السلام عليكم ورحمه الله وبركاته
انا بصراحه عايزه اخد رايكم في موضوع شخصي
ويا ريت لو حد يقدر يفدني فيه
انا زوجي مهندس في مجموعه لبيره ومعروفه
وجايله عقد عمل في سوريا
وانا بصراحه خايفه من فكره السفر والغربه
وكمان معندناش اي معلومات عن سوريا ولا ظروف المعيشه هناك
وطبعا انا ولادي لسه صغيرين وعرفت ان التعليم هناك غالي جدا
يعني ممكن منوفرش حاجه خالص
يا ريت لو اي حد فيكم يعرف اي معلومه عن طبيعه البلد وظروف المعيشه هناك يقلي
انا اسفه طولت عليكم

[خلود]

بصى يانوجا

انا هقول لك رأيى وطبعا انتى بتتناقش يعنى مش مجبره على الاخذ بالرأى اللى ينفع لك

انتى لو سافرتى وياه التكلفه هتبقى اكتر لانه هيخد لكم مسكن لوحدكم واظن المصاريف على المغترب بتبقى اعلى شويه من اهل البلد نفسهم وزى ما قلتى التعليم كمان وكل حاجه هتبقى غاليه جدا

يعنى زى ما قلتى صعب توفرى اى حاجه

يبقى هو يسافر لوحده كده فتره وهو هيقعد فيها فى سكن مشترك مش هيكلفه كتير وانتى هتستنى هنا فى مصر تدخلى ودلاك مدارس وممكن لو تحبى تشتغلى تشوفى انتى كمان وظيفه تناسبك وفى الحاله دى تقدرى انتى من هنا وهو من هناك تعملوا اى حاجه فى الايام الصعبه دى

ويارب يوفقكم للخير
تقبلى مشاركتى وانتظرى باقى الاراء

[nogafoda]

شكرا يا خلود علي ردك
انا عايزه اقلك ان المجموعه موفره سكن عائلي في دمشق علي حسابهم
يعني تكلفه السكن مرفوعه
وكمان هو واخد قرار يا نسافر سوا يا نقعد سوا
المشكله في الفكره نفسها

[دعاء الكروان]

انا من راى انك ما تسيبيش جوزك يسافر لوحده
رجلك على رجله وزى ما بيقولو فى السفر فوائد

شوفى وجربى واهم شىء انك قبل اى حاجه صلى ركعتين استخارة
وربنا ان شاء الله ها يدلك على الصواب

وربنا يوفقكم ان شاء الله

[nogafoda]

انا متشكره يا دعاء علي نصيحتك الغاليه
وربنا ان شاء الله يهدينا الي ما فيه خير
باذن الله

[الفارس]

على فكره نوجا سوريا من البلاد الجميله وطبيعتها زى مصر

وناسها كويسين ودا اعرفه من علاقتى بيهم يعنى انشاء تتبسطو فيها

بس فى حاجه مهمه وهى الى تحدد راحتكم فيها الراتب نوجا

هل المقابل يستاهل ولا هيعادل راتب زوجك بمصر ( نقطه مهمه جدا )

هل الراتب يستاهل الغربه والبعد اننا نعمل حاجه لولادنا ولا غربه وبس

ولو الراتب كويس رأى انه يسافر الشهور الاولى فتره بسيطه يشوف الوضع

وبعد كدا تسافرو له . . وربنا يوفقكم

[nogafoda]

شكرا يا فارس علي اهتمامك
هو طبعا فرق الراتب كبير
بس الي يحكم اذا كان يستاهل ولا لا هو مستوي المعيشه هناك
يعني ببساطه ممكن الفرق يضيع في فروق الاسعار
وخصوصا المدارس لاني قريت في بعض المواقع ان التعليم هناك غالي جدا
لدرجه تخض
لكن كل ده حاجات مش ملموسه مفيش حد قالي علي شئ شافه بعينه او عاش هناك فتره وعارف الظروف بالظبط

[الفارس]

نوجا

ايه هى البنود الاساسيه الى انتى عايزه تعرفيها غير المدارس

انا ممكن اسألك على اى حاجه عايزه تعرفيها ليه اصدقاء كتير سوريين

حددى الى عايزه تعرفيه وانا اسألك عنها . . .

[nogafoda]

شكرا يا فارس علي ردك واهتمامك
بص هو الراتب2000 $
انا عايزه اعرف ده هناك يعيش في مستوي شكله ايه
هما قالو انهم هيوفرو السكن والانتقالات
وده كويس لاني عرفت ان الايجار هناك غالي جدا
لكن ده يكفي اكل وشرب ولبس ومدارس و.................
وكمان توفر علشان يبقي فيه تمن للغربه
بجد الموضوع ده عاملي ازعاج جامد جدا
وتقريبا حياتنا كلها متوقفه علي القرار ده الي اتمنا من الله انه يكون قرار سليم
وميكنش فيه ندم وده الي مخليني احاول اجمع اكبر قدر من المعلومات قبل مناخد القرار

[الفارس]

ازيك يانوجا





على فكره انا كلمت اكتر من واحد سورى وسألته على الحياه فى سوريا





بالنسبه للاسعار والحياه العاديه تعتبر ممتازه جدا والمصاريف تعتبر زى مصر واقل بكتير





وبالنسبه للمدراس المدارس الحكوميه موجوده وممكن تقدمى فيها ومستوى التعليم هناك كويس





والمدارس الخاصه الكويسه تقريبا فى حدود3500 او 4000 جنيه فى السنه والسكن كمان تقريبا





حوالى 8000 او 9000 جنيه فى السنه يعنى شهريا 700 جنيه تقريبا .





شوفى يانوجا انا شايف ان العرض كويس اتوكلو على الله وشايف كمان ان زوجك يسافر





الشهرين ثلاثه الاولى وبعد كدا تسافروا له يرتب اموره ويشوف الوضع كويس





واستخيروا وانشاء الله يكون خير ليكم . . وربنا يوفقكم . . .