مين بيعانى .. أنا واللا الجانى ؟

[fagrmasr01]

سؤال فى اليومين دول جانى

من غير شعارات ولا أغانى

مين بيعانى ؟

أنا .. واللا الجانى ؟

انا واللا اللى نهبوا حلم أوطانى

اللى قتلوا الشعر وسرقوا ألحانى

اللى بيقتلوا الفرحة وزرعوا أحزانى

اللى قلعوا الزرع وزرعوا ف قلبى سرطانى

ياترى مين فينا دلوقتى ياوطن مسجون

اللى قتل ابنى الشهيد واللى سرق أفراح الكون

واللى الدنيا شهدت له انه بيصطاد أنوار العيون

مين فينا يا شعبنا مسجون

ومين مش لاقى أنبوبة

ولا نومة ولا ركوبة

ولا اللقمة ولا الهدمة

مين فينا عيشته منكوبة

اللى سرق واللى نهب

واللى قتل واللى نصب

هو يومياً بدلته مكوية ونايم على ريش النعام

وان فتحت انا صوتى .. بيلجمونى بألف لجام

وان عملت ف يوم مظاهرة يجيبولى البلطجية قوام

وان حاولت اشترى الانبوبة لابد أعيش اسبوعين فى زحام

الغاز أصبح مفيش

ومش لاقى رغيف العيش

ومش شايف غير دبابات الجيش

وان يوم صرخت وطلبت حقى .. يقولوا الاستقرار

ياخلق هووه حياتى أصبحت أوضح معانى للدمار

والمجلس العسكرى فى الهنا نايم

هو يشبع وفى بحر الجوع انا عايم

ولابد من الالتزام بالجدول الزمنى

وانشالله اولع أنا وأسرتى وزمنى

اول معنى للاستقرار يابتوع الجيش

انى أعرف اجيب لبيتى رغيف العيش

اول معنى للاستقرار ياعظماء الجيش
انى أعرف اجيب لبيتى رغيف العيش

[fagrmasr01]

أهديها من قلب المعاناة الى من يجلسون فى مراكز القيادة وعلى عروش المناصب العليا ولا يعرفون ان ارتفاع الاسعار والتدمير اصابنا فى مقتل .. لم نعد نتحمل التسويف
فاتت سنة من الست شهور الى وعدونا بيها .. ياترى فاضل كام سنة تانى هانعانى من الجوع والغلاء والفقر والجهل والمرض .. وهم يتفاخرون بالمناصب .. والجناة فى زنازين سبعة نجوم ملابسهم مكوية وتشريفة فى الرايحة والجاية واحنا بطوننا تأكل الجوع وينهش المرض فى أجسادنا
مع تحية الى من ادى التحية للشهداء .. مع الاحترام لمن وعد بعلاج المصابين .. ونسيوهم سنة كاملة .. ونسيونا احنا كمان
والله المستعان

[خلود]

كلمات حلوه اوى ياجمال ومعبره وتصرخ بما نريد ان نقوله كلنا

وبجد بقت حاجه تزهق ولا حاجه حصلت الا الانتخابات اللى ظبطوا نفسهم خلاص وكل واحد حجز لنفسه مكان كأنه حجزه فى الجنه وبالنسبه له خلاص الدنيا اتظبطتت كده

[اميرة حبى انا]

لا حول ولا قوة الا بالله
فيها ايه لما نكون عايزين نعيش فى امان وعيشة تليق باى انسان
هو حرام
هى الناس دى قلوبها وعقولها ايه بالظبط
ربنا يصلح الحال
شكرا على الكلمات المعبرة

[فريد]

اول معنى للاستقرار ياعظماء الجيش
انى أعرف (http://www.vb.6ocity.net/showthread.php?t=118404) اجيب لبيتى رغيف العيش

شالوا حسنى حطوا حسين
ربنا ينتقم منهم الاتنين
كلمات جميلة ياعم جمال
بتعبر عن واقع مؤلم
ربنا يرحمنا
من مبارك و امثاله

[fagrmasr01]

خلود - أميرة - فريد

مروركم تكريم اشكركم عليه من قلبى .. وأتمنى ان اكون قد عبرت عما هو فعلا فى عقلى وصدرى .. كلماتى عشتها باحساسات المسيرة اللى عشتها من سنة وهم بيضربونا وقتها امام مسجد الاستقامة ومرورا بكوبرى قصر النيل حتى انسحاب الشرطة ودخولنا التحرير فى اذان المغرب يوم 28يناير2011
ووقتها اتحملنا الضرب والعنف والاصابات لان كان عندنا أمل ان يحصل التغيير
.. النهاردة احنا يناير 2012 ..
والتغيير مع الأسف لا يزال بيتم للأسوأ فى حالتنا المعيشية .. وكأن اللهو الخفى مصمم يزود معاناة شعبنا الطيب

واضح اوى انهم نسيوا ات المارد المصرى خلاص طلع من القمم ولن يعود الى القهر مرة اخرى
قبل الثورة كنا مئات او عشرات نرفض الخضوع ونعلن معارضتنا .. واليوم الملايين فى الشوارع تقول وتعلن الرفض .. والله المستعان...
لن تهدأ كلماتنا .. وستظل سلمية باذن الله .. الى ان يتحقق احد الأمرين
إما النصر .. أو الشهادة

[خلود]

يارب نصر لثورتنا وصحوتنا على طول

المشكله انهم لسه برضو مش مدركين قد ايه الناس خلاص مش هتستحمل تانى لا ذل ولا اهانه ولا استعباد ومش هتسكت على حق من حقوقها تانى ابدا

[fagrmasr01]

معاكى حق طبعاو
اللى مساعدهم على الاعتقاد ده
ان فيه ناس من اللى كانوا بيقولوا ان الثورة على الحاكم حرام وان المظاهرات كفر
هم نفسهم دلوقتى بيدافعوا عن المجلس العسكرى بحجة الاستقرار ومرة بحجة ان الثوار حرامية او مخربين او اننا جهله
زى ما كانوا بيقولوا علينا السنة اللى فاتت اننا بتوع منظرة ومظاهر
لكن .. ثورتنا باذن الله مش هاتموت .. ولن نقبل بالعودة الى القهر والاستعباد مرة تانية
ضحينا بالاف .. ولسا جاهزين من صغيرنا الى كبيرنا سوف يشرق باذن الله بايدينا .. فجر مصر .. ولو كره الحاقدون