مش ( علشان ) ! ...

[RSS]

السلام عليكم ورحمة الله وبركاته



دايماً في حياتنا متعودين لما حد يقول لنا اعمل كذا نقول له السؤال التقليدي اللي اتعودنا عليه من صغرنا : ليه ؟!!



فيبادر ويقول : علشان كذا وكذا



أو يقول لنا : متعملش كذا ..



فنرد : ليه ؟!!



يقول لنا : علشان كذا وكذا !



تعالوا نشوف المشاهد دي ..



الأم لابنها : لازم يا حبيبي تشرب اللبن ..



الابن : لازم ليه يا ماما ؟!!



الأم :علشان تكبر !!



( الابن يتمتم بينه وبين نفسه غير مقتنعاً بكلام الأم ) : يعني لو مشربتش اللبن مش هكبر ؟!!



والحقيقة : أنه طبعاً هيكبر حتى لو مشربش اللبن ..!!



بس ربما ينمو عظمه ضعيف شوية لأنه ناقص كالسيوم ، وممكن بسهولة يحصل له التواء أو كسر لما يكبر ..



ممكن تكون الأم نفسها متعرفش ليه الولد لازم يشرب اللبن ( لو كانت غير متعلمة مثلاً ) !!



لكنها عارفة ان شرب اللبن مفيد للأطفال وخلاص ، ازاي وليه ؟



متعرفش ..!!



لكنها لازم تبرر لابنها علشان يقتنع ويشرب اللبن لأنها عارفة أن ده أكيد هو الخير له ..



حتى لو كان المبرر غير صحيح وغير مُقنع ، لكنها مقتنعة بالهدف نفسه وشايفة ان هو ده الصح !!



.............................



الأم لابنها : ذاكر يا حبيبي ..



الابن : ليه ؟!!



الأم مبررة :علشان تنجح ..



( الابن في نفسه مقتنعاً بالسبب وتبدو عليه علامات الرضا ) : حاضر يا ماما..



...................................



أحياناً كلمة ( علشان ) بتريحنا ، لأننا بنلاقي فيها مبرر لحاجات كثير بنعملها أو المفروض اننا نعملها ..



و بنحاول دايماً نقولها للناس علشان نبرر لهم سر أي طلب مطلوب منهم ، علشان نقدر نقنعهم إنهم يعملوه أو أن هو ده الصح والخير ..



ممكن تكون مبرراتنا دي صحيحة ومنطقية ، وممكن تكون مش صحيحة ومش واقعية ، لكنها مجرد محاولات للإقناع ..



كل ده جميل .. وطبيعي .. في علاقاتنا سوياً وعندما تكون تلك الطلبات ( أو الأوامر من أنفسنا لأنفسنا ) ..



لكن العجيب بقى اننا بنستخدم نفس الكلمة في التعامل مع أوامر ربنا سبحانه وتعالى ..



وبنحاول دايماً نبرر للناس أوامر الله ، ونجيب لهم أسباب مقنعة تفسر لهم سر الأوامر دي أو الحكمة منها ..



رغم أن الأسباب دي ممكن تكون في حد ذاتها مش أسباب مقنعة ، أو بمعنى أصح منقدرش نقول أن حكمة ربنا تتمثل فقط في تلك الأسباب ..!!






منقول